Matiyu 26

Kúnndii ólu fɛ́ kɛ Ɛnza nváa

Maki 14.1-2; Luka 22.1-2; Yaya 11.53-54

1 Ɛnza ŋé wɛɛ o kóman ó bɛ́ fɔ́la mínngɛ, aa fɔ a yɛ kaamɔɔndhye ŋolu yɛ kó: 2«Mɔɔn mín ŋé mɔɔn Dhyénjɛ óle, o yáa ló a yúu olu bhóo tó olu a gbáan yíi o mán. Tee fyáa lé wɛ́ɛ tó o kó ó ɲánman, a ló ŋan lɔ ŋóo a káa kɛ́ Hɔ́lɔɲanli o ɲánlagbɛ ló ŋo lé la.»

3O fɔ́nin ŋó kwɔ, faanlɛɛɲansebhaa olu kúnndii ólu ní Yawudhyaa cɛba ólu ɲɔ́ɔnɲe faanlɛɛɲansebhaa olu kúnndiiba Kayife yɛ́ lúkɔɔn ó mán. 4Ii bhyɛ kée mán kó kɛ Ɛnza myáan loo nɔn kɛ a fáa. 5I tɛ́ɛ fɔ́la o bhóo ó mán kó: «Án ndɛ́ sé a myáanla ɲánlagbɛ lo míin mán ní o tɛ, yaman ó yáa ɲáanmin.»

Muso lɔ́ é latikɔlɔ kɛ́la Ɛnza ngúnnɔn

Maki 14.3-9; Yaya 12.1-8

6Só mín ndɔ́ɔ kó Betani, Ɛnza ndɛ́ɛ yénɔn, Simɔn kwáantɔ yɛ́ bhó ŋó la. 7Muso lɔ́ é í mángbaa a lá ni bháanin ngúugbɛɛ nɔ le mín nálaanin ndɛ́ɛ káwa kúugbɛɛ nan, mín ŋe kíila ko Alibatili. Tó a fanin ndɛ́ɛ latikɔlɔ sɔɔn gbɛ́ɛ nan. Aa o latikɔlɔ ŋo kɛ́ Ɛnza ngúnnɔn ké oo lɔ́min kɛ́. 8Ɛnza ɲɛn kaamɔɔndhye ŋolu o kókɛse ŋó yé mínngɛ, oo i lamwɛnnɛn, tó ii fɔ kó: «Aa latikɔlɔ ngúugbɛɛ nzúu míin nɔ́nɔɔnla mínnɛɛn lé gbú lá nín? 9Mɔɔn tɛ́ɛ sé ale latikɔlɔ ó felela wɛ́ɛ lágbɛɛn nan kɛ o wɛ́ɛ o dí bhóokoo ŋólu mán!»

10O kóman ólu bhyáa Ɛnza ndóo lɔ́ mínngɛ, aa fɔ a yɛ kaamɔɔndhye ŋolu yɛ kó: «Mínnɛɛn le kósɔn áa muso míin ngannankwaanyala? A wɛɛ kóbhɛɛ lé kɛ́ ɲɛ́n nín! 11Kɛ mansɔɔ ále ní bhóokoo ŋólu yáa kɛ́ kéene yánun wáati bɛ́ lɔ, wáa né ní ále táa kɛ́ kéene yánun wáati bɛ́ lɔ. 12Muso míin ŋé latikɔlɔ ó kɛ́ nga nzúlongo o lé kósɔn. 13Tó ní fɔ a yɛ́ tínɲan in ne ngó, sanmankanmɛɛ míin ngáa í láse dínɲan ywáa óo ywáa lɔ, muso ó kɛ́ko míin ɲáan fɔ́ o ywáa ó bɛ́ lɔ tó a ko é bhyáa mɔɔn olu hákiila.»

Ɛnza ɲanvalɔɔ é Zudasi la

Maki 14.10-11; Luka 22.3-6

14Kaamɔɔndhye ndá ni fyáa ó mín ngée ndɔ́ɔ tɛɛ kó Zudasi Sikaliyɔti, oo táa faanlɛɛɲansebhaa olu kúnndii ólu fɛ́ yé 15Tó aa fɔ i yɛ kó ni ngɛ́ Ɛnza lo á bhóo, á káa mínnɛɛn lé dí mán. Olu wɛ́ɛgbannan bísawa dí a man. 16Kɛ ta o wáati o mán, Zudasi tɛɛ ɲánɲiinnan kɛ Ɛnza no í móo.

Hɔ́lɔɲanli sunman ngo o

Maki 14.12-21; Luka 22.7-14,21-23; Yaya 13.21-30

17 Búlufuunmɛɛ ó ɲánlagbɛ # 26.17 Búlufuunmɛɛ ó ɲánlagbɛ: O ɲánlagbɛ o lée Izalayɛlika olu bhɔ ó yɔɲan ó lɔ o ko bhyaa lá i kɔɔnnɔn. Í ɲángban kóyoo ŋó man íi búlufuunmɛɛ ó lɔɔ ŋó lé lɔ. Íi ó ɲanlagbɛ o kíila i kwɔ́ ko Hɔ́lɔɲanli ó ɲánlagbɛ ó. o tée jónan ó mán, kaamɔɔndhye ŋolu Ɛnza manɲaankɛ kó: «Íi fɛ́ ké án ni í yɛ́ Hɔ́lɔɲanli o ɲánlagbɛ ó gbá ó kɛ́ ywáa mínnɛɛn lé lɔ?» 18Ɛnza ngó i yɛ kó: «Áa táa lɔ fɛ́ yénɔn lúukɔɔnnɔn kɛ fɔ a yɛ kó: ‹Án ngáamɔɔn kó kɛ́nan fɔ kó tɔ bhɛ́ɛ tɛ́ a ta wáati o sé o lá bhée, oo lɔ mínngɛ, ale ní a yɛ kaamɔɔndhye ŋolu káa nan Hɔ́lɔɲanli o ɲánlagbɛ ó kɛ́ í fɛ́yanun.› » 19Ɛnza ŋé kó mín nvɔ kaamɔɔndhye ŋolu yɛ, ii o kɛ tó kɛ Hɔ́lɔɲanli o ɲánlagbɛ ó gbá ó kɛ.

20Ywáa óo sé mínngɛ, Ɛnza ni a yɛ kaamɔɔndhye ndá ni fyáa ólu dhyɛ kɛ. 21Í tɛ́ɛ lɔ́min kɛ́ ó lá wáati mínnɔn Ɛnza ŋé fɔ kó: «Tó ní fɔ a yɛ́ tínɲan in ne ngó, a kée ngéenan yáa ne yánva.» 22O kóman óo kaamɔɔndhye ŋolu ɲánlasii tó ii Ɛnza manɲaankɛ kée ngée ndá kó: «Né kó tɛ lɛ, bháa díi Mantii o?» 23Ɛnza ŋé i yawi kó: «Né ní mɔɔn mín ngáa í bhóo ló sunmannve ŋó lɔ́ kéene, o tíi ó lé káa ɲánva. 24Mɔɔn Dhyénjɛ ó yáa sayakɛ óyoo a sɛwɛnin ɲé a ta fa nvɛ́ tɛ́nmɛn né. Wáa mɔɔn mín ngwɛnnin ngáa mɔɔn Dhyénjɛ ó yánva, kunnangboya é o tíi ó yɛ! Yáanin o tíi ó wóobhaa yɛ́ɛ tɛ́ mán a bhyáa fwɛ́ɛn ka, o tɛ́ɛnan físaya!» 25Zudasi, o mín ndɛ́ɛ Ɛnza ɲanvasii lɔ, oo ale Ɛnza manɲaankɛ kó: «Né kó tɛ lɛ, bháa díi kaamɔɔn ó?» Ɛnza ŋé a yawi kó: «Íle lé kó cé ŋwaa.»

Ɛnza ŋé lɔ́min lábha mín ngɛ ni a yɛ kaamɔɔndhye ŋolu le

Maki 14.22-26; Luka 22.14-20

26I tɛɛ lɔ́min o kɛ́la mínngɛ, Ɛnza ŋé búlu ó tá, kɛ Ala bálika bhɔ́, kɛ a lɔ́tɛɛtɛɛ kɛ́ a di a yɛ kaamɔɔndhye ŋolu mán, tó kɛ fɔ i yɛ kó: «Nvásisoo ó lée wé, áa a tá kɛ a lɔɔ.» 27Aa wɛɛ kɛ lɛ́zɛnnjifyɛ lɔ tá tó kɛ Ala bálika bhɔ́ kɛ o lɛ́zɛnnji o ló i bhóo kɛ fɔ kó: «A bɛ́ a a lɔ mín, 28ɲee ó lée wé, yée mín ŋé bwɔ́ yúumu yafa o bhóoman mɔɔn shɛ́ɛman ngósɔn. Yée mín ŋé wé, o lé káa kɛ́ Ala yɛ dhyáaɲɔɔnya ó láheli o tɔ́ɔmanse ne. 29Tó ní fɔ a yɛ́ tínɲan in ne ngó, ndáa lɛ́zɛnnji mín bhée fɔ́ ngɛ́ kɛ́ lɛ́zɛnnji kwáa mínnan ní ále Nvá yɛ́ Mansaya ó lɔ.» 30Ii wɛɛ Ala tándo lɔ́ ŋolu lá lá mínngɛ, ii bhɔ́ kɛ táa Olivyetii ó mánshaa fɛ́.

Ɛnza ngó Piyɛli yáa fɔ kó a man ale lɔ

Maki 14.27-31; Luka 22.31-34; Yaya 13.36-38

31 Ɛnza ŋé fɔ a yɛ kaamɔɔndhye ŋolu yɛ kó: «Bí sú míin nɔ́n, a bɛ́ yáa í kwɔ́kɛ nán, kɛ mansɔɔ a sɛwɛnin ɲé kitabu o lɔ́ kó: Ɲáan saamangbɛngbɛmaa o fáa tó saa sɛ́ɛ ólu ɲɛ́nɲɛn. 32Wáa ngɛ́ kúun kɛ bhɔ́ su ólu cɛ́man, ɲáan bhyáa a ɲɛ́n nzɔ́ kɛ táa Galile lánga ŋo lɔ.» 33Piyɛli é fɔ a yɛ́ kó: «Yáanin mɔɔn tɔ́ ólu kɛ́ í kwɔ́kɛ í la, né táa ngwɔ́kɛ í lá tún.» 34Ɛnza ŋé a yawi kó: «Tó ní fɔ í yɛ́ tínɲan in ne ngó, bí sú míin ɲɛ́ɛ lɔ, sánnin lónan ŋo a kóman, í yáa fɔ síɲan sawa kɛ kó í mán né lɔ.» 35Piyɛli kó a yɛ kó: «Dínɲan lɔ, ndáa fɔ ngó mán í lɔ́, yáanin ngɛ́ saya kɛ́ í fɛ́.» Kaamɔɔndhye ŋo tɔ́ ólu bɛ́ɛ o fɔ o ɲán kée ŋó mán.

Ɛnza ŋé í sɛ́ɛla Zesemane

Maki 14.32-42; Luka 22.39-46

36Fɔ́ é kɛ́la ywáa mín man kó Zesemane, Ɛnza ni a yɛ kaamɔɔndhye ŋolu sé ó ywáa ó lɔ mínngɛ aa fɔ i yɛ ko: «Áa í síi ya ké ndáa nzɛ́ɛ yéenɔn.» 37Aa Piyɛli ní Zebede dhyénjɛ fyáa ó bhyáa í fonga kɛ táa. Ɛnza ndɛ́wɛɛ bhyáa í ɲánlasii le, óni kɛ a ní ó tɔ́lɔ. 38Tó aa fɔ i yɛ kó: «Né ní o wɛ́ɛ tɔ́lɔ koyoongɛ fɔ́ kɛ kɛ́ óo ngáa sayakɛ a bhóo. Áa tó yánun, áa tó í ɲánla ní ne.» 39Ɛnza ŋé í cɛ́bhɔ i la dɔ́ɔnin tó kɛ í cé ngbáan lúu lɔ kɛ Ala dɛ́li ni fɔ le kó: «Nvá Ala, tɔ́lɔyaba míin nín, ni íi sé kɛ ó cɛ́bhɔ ne lá. Waa ó bɛ́ kwɔ, í kɛ́nan a kɛ ne sao óle, fɔ́ í légbu sao ó!» 40Aa í kwɔ́sɛɛ a yɛ kaamɔɔndhye nzawa ólu saala. Aa táa ké olu sunnɔɔn lɔ. Aa i lakuun kɛ fɔ Piyɛli yɛ kó: «Ɲɔ́ɔn ngó ále mán sé lɛ́ɛlɛ kéembe kɛla a ɲán lá ni né le kɛ́ɛ! 41Áa tó í ɲánla, kɛ Ala dɛ́li ké á kɛ́nan lo lɔ́swaannin ó lɔ. Kóbhɛɛ kɛ́ yóso é Adamandhye ŋó kɔ́ɔnnɔn, wáa a sé tɛ́ a yɛ.» 42Aa í cɛ́bhɔ i la ko síɲan fyáaɲɔn o kɛ kɛ́ táa Ala dɛ́li íkwɔ kó: «Nvá Ala, tɔ́lɔya mín ŋé nánla nín, ni ngákan kɛ ngúnnzii o kɔ́ɔ lé, ni a táa sé í cɛ́bhɔla nan, í sáo ó a kɛ́!» 43Aa í kwɔ́sɛɛ kaamɔɔndhye ŋolu mán íkwɔ, kɛ́nan i sɔɔ sunnɔɔn lɔ ikwɔ, kɛ mansɔɔ i bɛ́ ɲánfaa tɛ́wɛɛ gbíiya i la. 44Aa i tó yénɔn kɛ í lɔ́nin manbhɔ íkwɔ tó kɛ í sɛ́ɛ síɲan sawaɲɔn kɛ óyoo aa í sɛ́ɛ dɔ́ olu lɔ tɛnmɛn. 45Aa wɛɛ kɛ í kwɔ́sɛɛ a yɛ kaamɔɔndhye ŋolu saala. Aa fɔ i yɛ kó: «Áa sunnɔɔn le lɔ́ bhée kɛ a lɔ́nwɛɛn a? Mɔɔn Dhyénjɛ ó, o káa ló yúumukɛbhaa olu bhóo wáati mínnɔn, o wɛ́ɛ bhyáa sé lé. 46Áa í wíi ké án ndáa! Ɲanvabhaa o lée nánla nín!»

Ɛnza myaanko o

Maki 14.43-50; Luka 22.47-53; Yaya 18.3-12

47Kɛ́ Ɛnza ndó kóman o la, a yɛ kaamɔɔndhye ndá ni fyáa ó kée ŋó mín ndɔ́ɔ kó Zudasi, oo í kunnanbhɔ ni yamandhye ngbɔ́gbɔ lé a kwɔ́ka. Fá ŋóni gbéle lú tɛ́ɛ yaman o bhóo. Faanlɛɛɲansebhaa olu kúnndii ólu ní Yawudhyaa cɛba ó léelu tɛ́wɛɛ o mɔɔn ólu bhyáashaa. 48Ɛnza ɲanvabhaa o tɛ́ káa a tɔɔmansii ɲán o mín man, a tɛ wɛɛ o ɲányaa yamandhye ŋó lá tá kó: «Ngáa nvínin cɛ mín man wé, ale lée wé. Áa ale lé myáan!» 49Aa í mánlo Ɛnza nán íkɔlɔ téeman kɛ fɔ a yɛ kó: «Ní í fola, kaamɔɔn ó!» Aa o fɔ tó kɛ́ í fínin a man. 50Ɛnza ŋé a yawi kó: «Ndwáanva, í nánnin ŋé kó mín ngɛ tɔ́ɔ lɔ, o kɛ.» Mɔɔn ólu í mánlo Ɛnza nan kɛ a myaan. 51Ɛnza nvongamaa o kée ŋé a ta fá ŋó bhɔ́ a foo ŋo lɔ kɛ a láyii faanlɛɛɲansebhaa olu kúnndiiba ó yɛ́ bháalakɛdhye ŋo ka kɛ a tóofaa ó tɛɛ man téeman. 52Oo kɛ́ mínngɛ, Ɛnza ŋé fɔ a yɛ kó: «Í yɛ́ fa ŋo ló a foo ŋo lɔ, kɛ mansɔɔ mɔɔn óo mɔɔn é fa ndála mɔɔn lu fɛ́, fa ne káa o tíi ó fáa. 53Í mán lɔ ŋóo né tɛ́ɛ sé kɛ Nvá dɛ́li ngó aa malɛɛka wáa gbɔ́gbɔ lánan ɲɛ́n nín íkɔlɔ a? 54Wáa ni o ló ngɛ́ kɛ́, Kitabu o lɔ́kan ŋó káa í lafa o lɔ́ díi bhée? Kó mín núu nzɔ́ɔla nín, a fɔnin ngɔɔ lée Kitabu o lɔ kó olu tɛ́ káa nzɔ́ɔ le kɔ́ɔ!»

55Ɛnza ŋé wɛɛ kɛ fɔ yaman o yɛ kó: «Áa nánla ni fá nu ní gbéle lú lé né lé myáan tɔ́ɔ lɔ óyoo kóyoongɛbhaa lɔ a? Ló ŋóo ló, ndɛ́ɛ nzíila Ala bhatobhomba ó kɔ́ɔnnɔn kɛ mɔɔn olu kála, a mán myáan. 56Kó míin ngwɛ́ɛn mbɛ́ é nzɔ́ɔ ke céla ólu saaninkan mín núu Kitabu o lɔ, olu a í lafa.» Oo kɛ́ mínngɛ, a yɛ kaamɔɔndhye ŋolu bɛ́ é bwée kɛ í kwɔ́kɛ a lá.

I wɛɛ táa ni Ɛnza né kítitɛɛlaa o lɔ

Maki 14.53-65; Luka 22.54-55,63-71; Yaya 18.13-14,19-24

57 Ɛnza myaanbhaa olu táa ni ale faanlɛɛɲansebhaa olu kúnndiiba Kayife lé fɛ́ yénɔn, ké sɛliya kaamɔɔn ólu ní cɛba ólu ɲɔ́ɔn nadhyɛ yénɔn. 58Piyɛli é Ɛnza nzúukutaaman kɛ, kɛ táa lo fɔ́ faanlɛɛɲansebhaa olu kúnndiiba ó fɛ́ yé. Aa lo lú o kɔ́ɔnnɔn tó kɛ í síi kunndiiba ó yɛ́ bháalakɛdhye ŋolu tɔ́ɔfɛ. Ɛnza myaanko o tɛ́ káa í lábha ndɛ́nmɛn, a tɛɛ fɛ́ ké o a kɛ́ a ɲanla.

59 Faanlɛɛɲansebhaa olu kúnndii ólu ní Yawudhyaa olu yɛ́ kítitɛɛmɔɔnba ó bɛ́ tɛ́ɛ fwɔnɲankan nɔ ɲíinnan sɛ́ɛya bhóoman ké i tɛɛ o bɛ́ɛ Ɛnza nan, kó óo kó é kɛ ke o tɛ́ɛ kɛ́ a faakun né i bhóo. 60Wáa i man kan nzɔ́ɔ, mín ndɛ́ɛ sé kɛ́la Ɛnza nvaakun ne, kɛ́ɛke sɛ́ɛya fwɔ́ɲanfɔ gbɔ́gbɔ tɛ́ɛ i bhóoka. Kwɔ́ o lá ósɔ, cɛ fyáa é táa i saala 61kɛ fɔ kó Ɛnza ndɔ́ɔ míin ŋé fɔ kó álee sé Ala bhatobhomba ó céla kɛ́wɛɛ kɛ a lɔ́ ko kwáa kɛ́ tee sáwa kɔ́ɔnnɔn. 62O sɛ́ɛya ó ládinin ŋó kwɔ, faanlɛɛɲansebhaa olu kúnndiiba óo í wíi kɛ fɔ Ɛnza ɲɛn kó: «Kóman súu súu tɛ́ í fɛ́ kɛ mɔɔn míin nú yawi a?» 63Ɛnza ŋé lumandhye myáan a yɛ́ɛ ka. Oo kɛ́ mínngɛ, faanlɛɛɲansebhaa olu kúnndiiba óo fɔ a yɛ kó: «Í shɛ́n Ala ɲáanman ŋó la kɛ fɔ án ɲɛn ni íle lée Kílisi o le, Ala Dhyénjɛ ó.» 64Ɛnza ngó a yɛ kó: «Í légbu lé wɛ́ɛ o fɔ́ wé. Waa, tó ní fɔ a yɛ́ ngó a yáa mɔɔn Dhyénjɛ ó, síinin ɲé Sétii ó bhóobhɛɛkɔɔ, a ló yáa a yé nánla sángawa ólu ka.» 65Ɛnza ŋé o kóman ólu fɔ́ mínngɛ, faanlɛɛɲansebhaa olu kúnndiiba óo a yɛ́ɛla kannanfaani o fála mwɛ́nnɛn o mán tó kɛ fɔ kó: «A wɛɛ Ala lɔ́ɔya! Án manko tɛ́ sɛ́ɛya gbɛ́ɛ ɲiin nán bhée! A bɛ́ wɛ́ɛ a kómankan ŋo myɛ́n ké aa Ala lɔɔyala lɛ? 66Álee kó án ni mínnɛɛn lé kɛ́ a lá o lɔ?» Mɔɔn ólu fɔ kó: «Áa á fáa lé!» 67Oo kɛ́ mínngɛ, íi i láji bwɔ́ a ɲán lɔ óni kɛ a gbú gbú, lɔ́luu a tóo cé 68tó kɛ táa fɔ lé a yɛ kó: «Célayakɛ Kílisi! Yɛ́ɛtii i gbasi ó fɔ́ án ɲɛn?»

Piyɛli é í lámangbɛyala kó ale mán Ɛnza nɔn

Maki 14.66-72; Luka 22.56-62; Yaya 18.15-18,25-27

69Oo í lɔ́ ké Piyɛli síinin ɲé kɛ́ɛnman lú o kɔ́ɔnnɔn. Bháalakɛdhye musoman nɔ́ é í mángbaa a lá kɛ fɔ kó: «Íle ní Ɛnza Galileka cɛ o tɛ́ɛ kéene.» 70Wáa Piyɛli é í lámangbɛya ni a fɔ lé bɛ́ ɲánla kó: «Í yɛ́ɛ é dhyaa mínnan wé, né tɛ́ bhɔ́la o ɲánle.» 71Aa o fɔ tó kɛ táa lú o lákɔɔlaa ó lɔ. Bháalakɛdhye musoman ngbɛ́ɛ é a yé yénɔn, oo fɔ yé ŋó mɔɔn ólu yɛ kó: «Cɛ míin ní Ɛnza Nazalɛtika cɛ o tɛ́ɛ kéene.» 72Piyɛli é í lámangbɛya ko kwáa kɛ́ ni í shɛ́n ne kó: «Mán ale cɛ ó lɔ.»

73Wáati dɔ́ɔnin ŋé tínmin mínngɛ, mɔɔn mínnu tɛ́ɛ yénɔn, olu í mángbaa Piyɛli la kɛ fɔ a yɛ kó: «Síka tɛ́ lɔ, íi Ɛnza nvongamaa o lé lɔ́ le, í kómankan ŋo bɛ́ é yáala mɔɔn la kó íi bhɔ́la Galile le.» 74Piyɛli é í shɛ́n kɛ fɔ kó: «Ala a ndáan, ni ngɛ́ kɛ́ fwɔnɲan la! Ngó mán ale cɛ ó lɔ!» O wáati kée ŋó lɔ, lónan ŋóo kóman téeman. 75Oo kɛ́ mínngɛ, Ɛnza ŋé kóman mín nvɔ Piyɛli yɛ oo bhyáa a kɔɔnnɔn téeman kó: Sánnin lónan ŋo á kóman, íle yáa fɔ né mán síɲan sawa kó í mán né lɔ́. Aa bhɔ́ kɛ́ɛnman kɛ kasi kɛ́ bhɛ́ɛbhɛɛ le.

Currently Selected:

Matiyu 26: MXX

Highlight

Copy