Matiyu 4

Sɔtaannan é Ɛnza nɔswaannan

Maki 1.12-13; Luka 4.1-13

1Kwɔ́ o la, Ní Sɛnnɛnyanin ŋóo kɛ tó Ɛnza ŋé táa dhyɛ́ o lɔ, kó óo kó é kɛ ke Sɔtaannan o tɛ́ɛ táa a lɔ́swaan. 2Ɛnza ŋé tee bínaannin ni sú bínaannin kɛ́ sún nɔn mínngɛ, kɔ́ɔn é a myaan. 3Sɔtaannan mín ŋé lɔ́swaannikɛbhaa o le, oo í mángbaa Ɛnza nan kɛ fɔ a yɛ kó: «Ní íi Ala Dhyénjɛ le, a fɔ káwaguun míin nú yɛ kó ii i yɛ́ɛman kɛ kɛ́ búlu lé í yɛ́.» 4Ɛnza ŋé a yawi kó: «A sɛwɛnin ɲé Ala yɛ kitabu o lɔ kó: Mɔɔn tɛ́ bhálola lɔ́minfe ngbɛ́ɛgbɛɛ la; wáa saanin súusuu é bhɔ́la Ala káa lɔ, oo mɔɔndhye ŋó bhálola.»

5Oo kɛ́ mínngɛ sɔtaannan é táa nín Ɛnza né fɔ Yeluzalɛmu, só sɛ́nnɛnyanin ŋó la, kɛ alalɔ Ala bhatobhomba ó kúnnɔn 6tó kɛ fɔ a yɛ kó: «Ni íi Ala Dhyénjɛ le, í gbán kɛ i yíi lúuman, kɛ mansɔɔ a sɛwɛnin ɲé Ala yɛ́ Kitabu o lɔ kó:

Ala yáa cé dí a yɛ malɛɛka ólu mán i kósɔn,

tó íi í tá í bhóo ó lɔ́,

ké i se ŋó kɛ́nan gbasi káwaguun nɔ la.

Kɛ́nan gbasi káwa lɔ́la.»

7Ɛnza ŋé a yawi kó: «A sɛwɛnin ɲé íkwɔ kó: Í kɛ́nan Mantii o, í yɛ́ Ala o lɔ́swaan.»

8Sɔtaannan é táa ni ale tii yámba lɔ́ ka íkwɔ, tó kɛ dínɲan mansaya o ywáa olu ní olu cɛ́ɲanlaa ólu bɛ́ yáa a lá, 9tó kɛ fɔ a yɛ kó: «Ɲáan míin bɛ́ di í mán ní ile kwɛ́nnin ngɛ i kúnmɛɛn nɔ́kɛɛ né kɔ́ɔ kɛ́ né bháto.» 10Ɛnza ŋé fɔ a yɛ kó: Í mánbhɔ nán, Sɔtaannan! Kɛ mansɔɔ a sɛwɛnin ɲé Ala yɛ́ Kitabu o lɔ kó i manyii i yɛ́ Mantii o i yɛ́ Ala ó le yɛ́, kɛ́ ale kéengboto lé bháto. 11O fɔ́nin ngwɔ, Sɔtaannan oo a mankɛnin ndo. Malɛɛka ólu o lé kɛ́ nán lé Ɛnza nzaala kɛ lɔ́min dí a man.

Ɛnza ŋé í kwɔ́sɛɛla Galile

Maki 1.14-15; Luka 4.14-15

12Ɛnza ŋé myɛ́n mínngɛ kó i wɛɛ Yaya bhyáa kasola, aa táa Galile lánga ŋo lɔ. 13A man í lá ngɛ́ Nazalɛti, aa táa í síi Galile bhá ó tɔ́ɔfɛ Kapɛnamu só ó la, o só óo mala mínnɔn, fɔ́ é kála o mala ó mán kó Zabulɔn ní Nɛfutali. 14Oo kɛ́ lé, ke kó óo kó é kɛ ke céla Ezayi é kóman mín nvɔ, o a í lafa. A fɔnin ndɛ́ɛ a kwɔ tá ne kó:

15 Álee Zabulɔn ní Nɛfutali mála mɔɔn olu,

óni álee mɔɔn mínnuu kɔɔji o tɔ́ɔfɛ,

óni mínnuu Zuludɛn bhá ó kwɔ́man;

álee síya mínnu Galile mala ó lɔ áa í tóo mánlɔ!

16 Mɔɔn mínnu tɛ́ɛ dínɲanlɔtɛɛla diwi lɔ,

olu wɛ́ɛ kɛ́ɛnɲanba o yé.

Diwi lɔdiwiyaninmba ó tɛ́ɛ yamaan mín mɔɔn lú ka,

kɛ́ɛnɲan o wɛ́ɛ bhɔ́ olu yɛ.

17Kɛ ta o wáati o mán, Ɛnza ndɛ́ɛ lakawanin kɛ́la kó: «Áa a yóo ólu yɛ́ɛman, kɛ mansɔɔ Ala yɛ́ Mansaya ó lángɛɛnman wáati o wɛ́ɛ bhyáa sé le!»

Ɛnza ŋé a yɛ kaamɔɔndhye njónan ólu kíila

Maki 1.16-20; Luka 5.1-11

18Ɛnza ŋé tó táamanla Galile bhála o la kɛ bhádhyenjɛman nvyáa yé: Simɔn mín ndɔ́ɔ íkwɔ kó Piyɛli, óni a lɔɔcɛ Andele. I tɛɛ yɔ fíi bhá ó lɔ kɛ yɔ́ɔ myáan. 19Ɛnza ŋe fɔ i yɛ kó: «Áa nan í bhyáa né kwɔ́, ɲáan a kɛ́ mɔɔn ɲíinmaa le ké áa i lanan ne mán.» 20O ywáaninngee ŋo lɔ ii í kwɔ́ kɛ́ i yɛ yɔ ólu lá téeman kɛ i bhyáa a kwɔ.

21Aa táa ɲɛ́nnzhaafɛ, aa bhádhyemannjɛ fyáa gbɛ́ɛ yé yénɔn: Zebede dhyénjɛ Zaki ní o lɔ́ɔcɛ Yaya. I tɛɛ i yɛ yɔ ólu lɔ́bhyɛnan Kúun ŋó kɔ́ɔnnɔn ni i facɛ Zebede le. Ɛnza ŋé i kíi; 22Ii í kwɔ́ kɛ́ i facɛ lá téeman, óni Kúun ŋó la, tó kɛ bhyáa Ɛnza ngwɔ.

Ɛnza ŋé lakawanin kɛla óni kɛ lákɛɛnyalikɛ

23Ɛnza ndɛ́ɛ Galile mála ó ywáa ó bɛ́ lɔyaalala kɛ táa mɔɔn olu kála né í yɛ́ sɛ́ɛbho ŋólu la, óni kɛ táa Ala yɛ sanmankanmɛɛ ó láse lé Ala yɛ́ Mansaya ó tá fa nvɛ́, o kwɔ, a tɛɛ yangalo bɛ́suu lákɛɛnyala. 24A tɔ́ɔ é lá Sili yamaan o ywáa bɛ́ ka. Yangalo bɛ́suu tɛ́ɛ mɔɔn mínnu la, ii táa o mɔɔn ó bɛ́ lé a saala: Lámansayoo ndɛ́ɛ mɔɔn mínnu fɛ́ óni benzhaayatɔ ólu ní mɔɔn mínnu sé ndɛ́wɛɛ fáa i man, Ɛnza ŋé i lákɛɛnya. 25Yaman gbɔ́gbɔ é bhyáa a fonan, kɛ ta Galile mán kɛ sii Dekapɔli la, óni Yeluzalɛmu ní Zude ní Zuludɛn bhá ó kwɔ́man.

Currently Selected:

Matiyu 4: MXX

Highlight

Copy