Fakasigadan 24
24
Bubay laman sas Isak
1Abrayam mafufuama wan, ay Yawi nafon tua sa anya nusnge wain. 2Sik menit, Abrayam nalong sat fagsuguan tagalaga at ngay ramraman te, “Fasai ku buknga balangbang am daluap.#24:2 Fasai… am daluap: at masuad, Fafasludani am fatuyanan. 3Ay fatuyanani sas Yawi, banwa ay daga at Dius te, wa ban o gfanrvbvy ku baguama Isak at bubay ste ginans Kanaan fag ngay taw tagbanwan si tam ligung. 4Loi sa ku fakasalugan fag talun ay nanrvbvy o sanya ku baguama Isak at bubay ban, tagsiginan ku ngay kalongan.”
5Ay at fagsuguan nainto yay te, “Ay tain ro kanya fag baguina nu dway kaylat galo angku stae? O nantaban kro Isak sam fagbanwanan ebi?”
6Ay Abrayam nabalus te, “Lag o gtaban sanya Isak! 7Yawi, Dius tagsis banwa, nafadasug angku stae siginan ku mama at kalongan, siginan ku fakasalugan fag talun, ay nafatuyanan te, ‘Gfon kban talun Kanaan sa am ngay kasugfunanan.’ Nu katanya, loi wan aroro Yawi sumugu at tagbarita at namangguna emu laman lumag o ku baguama at bubay ban. 8Kanya ban fag baguina deyud kaylat nangalo emu, wa ban e kadasug sa emu at mauri dewa o nafatuyanan sa angku. Dewa katanya, lag o gtaban sanya ku baguama.” 9Nu katanya, at fagsuguan nafasas Abrayam at buknga balangbang at daluap ay nafatuyanan te, namaning ban at suguan sa anya. 10Sanya ginan, at fagsuguan nabul safuluk kamelyu, ay at mafanud fag ngay famonun siginan at tagfayafun Abrayam. Ay nalo wa vtv sas Aram-Naaraim, Nakur at fagbanwanan fag furuan.
11Kafag fagsuguan nu ndasug wan, nafafiangalay at ngay kamelyu munakbang si sik bubun sis day furuan daul. Ginanya, gakayabiun wan ay buknga wan ngay mangena nu nanagub. 12Kafag fagsuguan gdarangin te, “Yawi, ku tagfayafun Abrayam at Dius, umfasludan nangus manabayan ku algan stae, ay falagi am fagmasineun laman sa ku tagfayafun. 13Katsi malindug au munakbang ste sday bubun gfanya au ngay mangena nu e nanagub. 14Ay nu naet kro sik mamam sa sik mangena at ke ba baringan, ay kanya ro nu gbalus tua te, ‘Kin, inumi wan, ay gfainum kyangay ro anggan am ngay kamelyu,’ kanya wa ro nangus fag mangena am nafili am fagsuguan Isak at bubay ban. Katanya ro ku fagtoglagan nu gfalag o am kamatuyanan sa ku tagfayafun Abrayam.”
15Ay gina kafag fagsuguan yud antabu gdarangin, Rebeka andasug gfasanan sik baringan. Rebeka, Betuel at baguina. Ay Betuel, Nakur ay Milka at sisian. Nakur, Abrayam at faduksay. 16Rebeka sik masine fag mangena ay ye indugan. Ay kanya natagbung sas bubun ay nafapnu mamam sat ba baringan ay glao gundaud sa sangaba tubi. 17Kafag fagsuguan gabanganan namablang Rebeka ay nalong te, “O wo gayvd masine gfainum angku tagsi am ba baringan fag mamam dewa ro alay?”
18Rebeka nabalus te, “Kin, masine way fagtainan.” Ay Rebeka nafatungkud wa vtv sas daga at ba baringan siginan at lafi ay gted way kaduge kafag fagsuguan ginum. 19Nu ntabu nu gfainum, Rebeka nalong te, “Nanagub kyangay ro, laman ro fagayu am ngay kamelyu nainum yangay.” 20Ay kanya nafabusbus wa vtv at ba mamam sas fagfainuman ngay fagbaugun, ay gtarung kafoli sas bubun laman nandog nanagub. Ay gfataglayun yay gugat nu gfanagub yakmay kafag fagsuguan at kamelyu fagayu nainum. 21Kaduge kafag fagsuguan gdama Rebeka, kanya gamatangan te, o kanya wa ro Yawi at famalus at darangin at nasanyan fag talun.
22Ay at ngay kamelyu nu nainum wan, kafag fagsuguan nafaduksun at buba fag fanumyu at mawatan siginans gintu, at kabyatan sadik sandan duak safuluk tagis fabudbungguan, ay nafaduksun yangay duak bauyung at kabyatan sadik sandan labi limak fabudbungguan. 23Ay kanya fag fagsuguan, nainto sas Rebeka te, “Sinu am mama? O e fakasakan yay ro si ayu, at masine em fagtiugan ro katsi fag yabi?”
24Ay Rebeka nabalus te, “Betuel au at baguina, Nakur ay Milka at baguama. 25Sabv, e fagtiugan mandi ro am sa em bale, ay ngayu yangay at nagbiluganan, laman ay ngay kamelyu at fakonun.”
26Ay kafag fagsuguan narungan ay naseg Yawi. 27Ay kanya nalong te, “Segi Yawi, ku tagfayafun Abrayam at Dius. Kanya nafalag at kamatuyanan sa ku tagfayafun. Ay nataban angku sa ku tagfayafun at ngay kalongan.”
28Rebeka gabanganan guli sat mina at bale ay nafansulit fagayu at kinfasludan sas fagayu tagbanwan sanya. 29-30Ay at faduksay Laban sanya yangay gdungugan at nalong sabaliwa kafag taw. Laban nalag sis Rebeka at dungus fag fanumyu ay sit famauyungan fag ngay bauyung. Ay kanya natarung sas bubun sas Rebeka at nalong fag taw. Ay kanya fag mangama malindug sis day bubun si sangay kamelyu at day tigyangan. 31Ay Laban glong sa anya te, “O wan mangaro Yawi at faggubukun. Wain am fagmalindugun yay gugat sanya? Gewan wan sa em bale, aroro nafalganan kwan am fagtiugan ay anggan sik buknga laman sa am ngay kamelyu.”
32Ay kafag fagsuguan nanangalo Laban. Ay nu ndasug wan sat day bale, Laban nafasa was daga ngay kamelyu at ngay famubaun, ay nabaug wa vtv sa sangay kamelyu ngay nagbiluganan. Ay nabuba yangay mamam sa kafag fagsuguan ay anggan sat ngay ufud, laman famegus at ngay darafa. 33Ay nu nafon wan sa anya fagayu fakonun, kafag fagsuguan glong te, “Kya ro gfangon yakmay kro nalong ku fagnasteun.”
Ay Laban nabalus te, “Agvd, longi emi.”
34Ay kafag fagsuguan nalong te, “Ku tagfayafun Abrayam. 35Yawi nafon nusnge wain sa ku tagfayafun, ay katsi maramraman wan. Yawi nafon anya ngayuk tupa ay kambing ay baka ay kamelyu ay asnu ay sanbung salapi ay gintu, ay anggan ngay fagsuguan mangena ay mangama. 36Ay at mangena Sara dewa mafufuina wan, kanya nasisian yay, ay at sisian ban nangagbilug fagayu at ramraman. 37Ku tagfayafun nalong sa angku te, ‘Fatuyanani sa angku laman gfaning ban o ku suguan.’ Ay kanya nalong te, ‘Lag o gfanrvbvy ku baguama Isak at bubay ste ginans Kanaan fag ngay taw tagbanwan si tam ligung. 38Sa way o ku mama at fagbanwanan, ay nanrvbvy o sanya ku baguama at bubay ban siginan ku ngay kalongan.’
39“Ay nainto au te, ‘Tain ro kafag mangena nu dway kaylat galo angku?’
40“Ay kanya nabalus te, ‘Yawi ku fagaloan gugat gsugu at tagbarita sa emu laman ban am loun umfasludan. Lumag o ku baguama at bubay ban siginan ku ngay kaiban, sa ku mama at kalongan. 41Nu glao ban o nu sa tua ku ngay kalongan, di ban e kadasug sa emu at mauri kata ku nalong sa emu, kanya ban fagayu deyud gfaalo emu kafag baguina.’
42“Nu katanya, aro andasug au sas bubun, ay nadarangin au te, ‘Yawi, ku tagfayafun Abrayam at Dius, umfasludan nangus ku loun stae. 43Katsi malindug au ste sis day bubun. Ay sik baguina ro nu ndasug laman nanagub, get kro tiba at ba mamam sit ba baringan. 44Ay nu gfainum tua ro angku anggan ku ngay kamelyu, nangus kanya wa ro am nafili ku tagfayafun at baguama at bubay ban.’
45“Ay kya ntabu gdarangin, Rebeka andasug gfasanan sik baringan, ay natagbung sas bubun laman nanagub. Ay nalong au sa anya te, ‘O masine o gfainum angku?’
46“Ay kanya nafatungkud wa vtv at ba baringan, ay nalong te, ‘Kin, inumi wan, ay gfainum kyangay ro anggan am ngay kamelyu.’ Nu katanya, nainum au, ay kanya nafainum yangay anggan ku ngay kamelyu.
47“Ay nainto au te, ‘Sinu am mama?’
“Ay nabalus te, ‘Ku mama Betuel, Nakur ay Milka at baguama.’
“Ay arodi nafasa au at dungus fanumyu, ay nafasulun kyangay sat famauyungan sik ngay bauyung. 48Ay narungan kwa vtv ay naseg Yawi. Nafauseganan au Yawi, ku tagfayafun Abrayam at Dius. Kanya at naguna angku sat matuyan fag dalan nu inda nu glag au ku tagfayafun Abrayam at arian Nakur at fufu, laman at baguama at bubay ban. 49Katsi gyasafulun au te, o gfon am sas Isak, Rebeka laman at bubay ban, laman gfalag am ay kamasinean sa ku tagfayafun? Longi wa vtv laman ro saful au nusnga setaw ku fakamulun.”
50Laban ay Betuel nabalus te, “Aroro tuy Yawi at fakaylatun, wami e fagmalongun ya. 51Iste wan Rebeka, tabani ban anya gina o guli laman am tagfayafun at baguama at bubay ban, kata Yawi at longan.”
52Ay kafag fagsuguan nu nadungug katanya, narungan ay naseg Yawi. 53Ay nafaduksun wa vtv at famubaun fag ngay famasine bilug, mawatan siginans gintu ay sanbung salapi, ay ngay lanbung, ay kanya nafon sas Rebeka. 54Sanya ginan, kafag fagsuguan gfangon wan gasfuan at ngay ufud. Ay sanya wan nu gtiug ginanya fag yabi.
Ay balabag di, kafag fagsuguan nalong te, “Guli wami sa ku tagfayafun.”
55Ay Rebeka at faduksay ay at mina nabalus te, “Ste yap am kaduge safuluk menit, sanya ginan long ban, loi wan.” 56Ay kafag fagsuguan nalong te, “Lag am gfaduge angku ste. Yawi nafafasludan ku loun stae, nu katanya, guli kway vtv sa ku tagfayafun.”
57Ay kanya fagayu nabalus te, “Nanguro yap tam Rebeka ay nanginto tam te, setain at namatangan.”
58Ay kanya fagayu nanantaban Rebeka ay nainto anya te, “O kaylat wo nangalo anya katsi?”
Ay Rebeka nabalus te, “Sabv.” 59Ay kanya fagayu nafaalo Rebeka gadgaloan at fangkamato. Ay kanya nanangalo wan Abrayam at fagsuguan ay at ngay ufud. 60Laban ay Betuel nadarangin Rebeka gina galoun. Kanya fagayu nalong te,
“Faduksay, ngayu tua ban nangus am kasugfunanan.
Ay am ngay kasugfunanan ban nangus namabo at ngay fawayan.”
61Rebeka ay at ngay fagsuguan nu nafalganan wan fagayu, kanya nasakay sa sangay kamelyu, ay nanangalo wan Abrayam at fagsuguan.
62Ginanya, Isak gbanwan sis Negeb aroro bagu yay kadasug siginans Beer-Lakay-Ruy. 63Sik menit gina gakadulumun, Isak naduksun ay gfanloan sit wa tanuman, ay nalag sik ngay kamelyu kakbang anya. 64Ay Rebeka nu nalag Isak, kanya natustus siginan at kamelyu at tungud guyuy, 65ay nainto sas Abrayam at fagsuguan te, “Sinu atsi fag taw taglao sis tanuman takakbang sa antam?”
Ay kafag fagsuguan nabalus te, “Kanya ku tagfayafun at baguama.” Ay Rebeka natabun at mata sik ramit.
66Ay kafag fagsuguan nafoyung sas Isak fagayu at nafakamulun. 67Ay Isak nataban Rebeka sat bale ramit ebi sit mina Sara at fagtiugan, ay nabubay anya ay maksvn nu kesug. Siginan takatanya, nalyam wan Isak nu kabalu at mina at nabulanan.
Currently Selected:
Fakasigadan 24: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
