Fakasigadan 34
34
Nafakamulun sas Dina at Mauri
1Sik menit, Dina, Akub ay Lia at baguina, nanansibo at ngay fagadgalangan fag ngay baguina sas talun Kanaan. 2Ay sanya fag talun at fun, Kamur fag taw Kib. Ay kanya e baguama at ngayan Sekem. Ay Sekem nu nalag Dina, nafabulun nataban anya ay nafataladan. 3Kanya maksvn nu galabian ay gfababaun sa anya. 4Ay Sekem nalong sat mama te, “Mama, awati sik balyawvtan laman mabul au Dina ku bubay ban.”
5Ay Akub nu nasaful te, Sekem nafakamulun at mauri sas Dina, kanya naragangan way lang, aroro ginanya at ngay baguama galaga way at ngay baka sit fagfafangonan. 6Ay Kamur, Sekem at mama, nalao sas Akub laman namakamatoan.
7Ay Akub at ngay baguama nu nasaful at kinfakamulun at mauri sas Dina, noli wa vtv siginan at fagfafangonan, ay ankuri sat ngay amatanganan ay maksvn nu kadotama Sekem, aroro nafakamulun at yud masine fag fakamulun tagfapla Akub at talananan.
8Ay Kamur nalong anya te, “Dakngani Sekem kaylat wan Dina, wain tam fagyudun gfadadwa wan anya fagdua? 9Masadi watam, aylati wan ay ngay baguina nu kadadwa sa em ngay baguama, ay em ngay baguina nu kadadwa yangay sa ay ngay baguama. 10Masine wayam gbanwan iste si em daga nusnga nday ay fakaylatun. Ay nusnga nday masine yangay am gfalao nusnga setaw ay fagagbilugun, ay magbilug am nusnga nday ste fag daga.”
11Ay Sekem kaksvn way nya nu gfalukmeanan sas Dina at mama ay anggan sat ngay faduksay. Ay kanya nalong sa anya fagayu te, “Nu masine sa ayu, nanfamubay au ay faduksay Dina. Ay anggan am, eti yangay ay fakaylatun nusnge wain si emi. 12Longi, seyu ro ku fon ayu laman umdadwa ami. Gfon kro sa ayu nusnga seyu ay fagetun nung tua ro mi andadwa.”
13Ay aroro Sekem nafakamulun at mauri sas Dina, Akub at ngay baguama namanaw Sekem fag talame. 14Akub at ngay baguama nalong sas Kamur te, “Maksvn fag fakaplaun nu nafafangindugan way romi em faduksay sat yud e fakatoglagan.”
15Ay kanya glong yangay te, “Kaylat wa romi, fagayu mangama tagste nung tua ro gfae fakatoglagan kata emi. 16Ay nu katanya tua ban, masine wam dayvm kamubay em ngay baguina, ay anggan ban ami kamubay wami sa ay ngay baguina. Ay namanwan wami magamut ayu laman sik furuan way tam. 17Ay wayam kaylat takatanya, glo wami, gtaban wami Dina.”
18Ay Kamur talame namatangan te, Akub at ngay baguama at longan masine. 19Ay aroro Sekem maksvn nu kesug Dina, wa nfangulan ya at buknga laman namaning Akub at ngay baguama at fakaylatun. Ay Sekem wan at fagfaningun fia fag taw sit mama at talananan. 20Nu katanya, talame nafaful fagayu mangama sis sakbawan furuan ay nalong te, “At kasine gfadgaloan kafag ngay betaw at kindasug sa antam. 21Gbia tua tam talun. Ay gfabanwan waban tam ste. Masine waban tam mesa gfafanmangena ay gfafanmangama tam ngay sisian.”
22Ay talame glong sat ngay ibama te, “Umfasludan ban takatanya nu nafae fakatoglagan tua ban tam kata Akub fag talanan. 23Nu katanya, at ngay ramraman ay at ngay baka ay nusnge wain antam wan. Aylati wan kanya fagayu nu gfadgaloan antam gbanwan.” 24Ay fagayu mangama naylat takatanya fag balyawvtan, ay kanya fagayu nafae fakatoglagan wan.
25Ay sis fatuluk menit, gina maksvn yay fia nu ganini at nafae fakatoglagan, Simyun ay Lebi, Dina at ngay kaka, nabul at mesa fiso ay nafabul sanya fag ngay mangama gina ganinian. 26Ay duksay nafabul wan fagayu anggan talame Kamur ay Sekem, ay nataban Dina siginan Sekem at bale, ay nalao wan. 27Ay nu ntabu wan fagayu, Akub at ngay baguama tiba nabul kanya fagayu at ramraman. Duksayan nafakamulun takatanya aroro Sekem nafakamulun mauri sas Dina. 28Kanya fagayu nabul wan anggan at ngay fagbaugun tupa, baka ay ngay asnu, ay nabuba yangay fagayu tagsis furuan ay tagsis tanuman at masine at ke fanambagun. 29Ay nabuba yangay fagayu at ramraman, ay nataban wan at ngay mangena ay at ngay sisian, ay we nafasawad ya nusnge wain.
30Akub nalong sas duksay Simyun ay Lebi te, “Nafon am angku sik maksvn fag fagidapun. Katsi ngayu takauri angku, taw Kanaan ay taw Peres. Kanya ro fagayu nu nsadi way ay nu nanamawayan way ro antam, wa tam e kasakan taw laman tagbalabag antam. Kanya ro fagayu makatu way gfaurianan fagdaul ku talananan.” 31Dewa katanya, duksay nalong te, “Wami kaylat em faduksay nu kafoyung te, sik mauri fag baguina.”
Currently Selected:
Fakasigadan 34: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
