Lukas 12

Sinu Tua Tam Fakalimuun

Mt 10:26-31

1Kadugenya ngayuk libuk taw andasug sas Isus, ay kanya fagayu gsidsikfitan. Ay Isus nalong taguna sat ngay tagadal te, “Lag gfaning taw Fariseu at fakamaninganun, aroro at fakamaninganun kata way sik famabia tinapay. 2Aroro fagayu at yud kalag umsure ban, ay fagayu at masuksukan umsaful ban. 3Fagayu ay nalong sisad dulum umdungug ban sasad mayamag, ay fagayu ban taw dumungug ay naibugan sisad suluk.

4“Ku ngay fagadgalangan, gfoyung au sa ayu te, lag kalimu tagfabul ay bilug, aroro at fagmakatuun tagfabul way lang ay bilug. 5Gfoyung au ayu ay fakalimuun: ay fakalimuun Dius tua, aroro nu nafabul ay bilug kanya e fagmabalyananun yay gukas ay falad sas afuy daul. Anud, alimui fia anya.

6“O nunda limak maya nu kabayad bunwa dua wayk salapi? Ay Dius wa nalyam nusdi sadik maya. 7Ay anggan ay buk Dius natap wan. Lag am kalimu, aroro ay kamafanudan gtungud tuam ngay maya.

Nu Gfoyung tam Isus sa sangay Taw

Mt 10:19,20,32,33, 12:32

8“Ay glong au ayu te, nusnga sinu tagfoyung sa tiba te, ‘Gafanud au sas Isus,’ anggan au, Taw at Baguama, gfoyung kyangay ban sas Dius at ngay tagbarita te, ‘Kanya ku taw.’ 9Ay nusnga sinu yud gfoyung sa tiba te, ‘Gafanud au sas Isus,’ kwa yangay ban gfoyung sas Dius at ngay tagbarita te, ‘Kanya ku taw.’ 10Ay nusnga sinu at nalong at mauri sabaliwa angku, Taw at Baguama, Dius gfalyam yay. Ay dewa katanya, nusnga sinu at nalong at mauri sabaliwa at Masine fag Falad, Dius wa gfalyam ya.

11“Ay nu e nataban ayu sa sangay taw Udyu at bale fakafulan ay sa sangay tagfangguna ay sa sangay ke fagmabalyananun at daga salubangan, lag gafanawa te, ‘Tain ro siring em famalus, ay tain ro em longan?’ 12Aroro ginanya ban at Masine fag Falad gfoyung sa ayu ay ngay longan ban at masine.”

Sik Maramraman fag Taw at Yud Amatanganan

13Ay sanya fag ngay taw at sadi nalong sas Isus te, “Takamoyung, longi sa ku faduksay te, afudi wan em mama at ramraman ay foni angku ku ekwan.”

14Ay Isus nalong anya te, “Duan sama! We taw nafili angku laman nanginsaful au at masine ay laman nangafud au ay ramraman.”

15Ay Isus nalong sanya fag ngay taw at maful te, “Amatangani, lag am gfanganuran nusnge wain, aroro sik taw at leleg amafanud yap tua at ramraman.”

16Isus nafoyung sik faydayuanan te, “Ebi, e sik taw maramraman. Ay siginan at gamasun ngayu at gutluan. 17Ay kanya gamatangan te, ‘Tain ban ku fakamulun? Aroro kwe fagfasakboan ya tiba ku gutluan.’

18“Ay kanya nalong te, ‘Nasaful kwan ku fakamulun. Nangiklas kban ku bale famoy ay gdog kyay nangawat labi yap tua aro taw. Ay sanya ban nu gfasakbo au ku gutluan ay ku ramraman. 19Ay glong kban sa ku sadili te, Katsi ku ramraman ngayu tua, kasakan wa ban dewa ngayuk banwa. Kamato kway ban lang ay gfangon ay ginum ay anggan guseganan.’

20“Ay Dius nalong anya te, ‘Ida, o nunda wo e amatanganan ya! Katsi ro sad yabi namul kwan am falad. Nu katanya, sinu ban at nangagbilug am nafungsu fag ngay ramraman?’

21“Katanya ban sik taw at nafungsu at ngay ramraman ste swa daga, ay wa ngap maramraman sas Dius.”

Isus at Foyungan sabaliwas Fagafanawaun

Mt 6:25-33

22Sanya ginan, Isus nalong sat ngay tagadal te, “Lag am gafanawa te, daginan ban ay fakonun, ay ay lanbung. 23Aroro ay leleg at kamafanudan gtungud tua sik fakonun, ay ay bilug at kamafanudan gtungud tua sik lanbung. 24Amatangani te, sik ugak we tanum ay we gutluan ay we fungsuan. Dewa katanya Dius gfon tua gugat at fakonun. Ay ay kamafanudan gtungud tuam ngay manuk tungud.

25“Sinu am at mafafaaba ay leleg sik kadugayan sirut siginan ay fagafanawaun? 26Ay nu dway am mafafakamulun kadaul oma kanya fag fakamulun sirut, wain ya ro ay fagfamutun ay fagafanawaun sa tiba ay fakaylatun?

27“Amatangani ngay barugwak. Kanya wa gfakamulun ay wa kawat at lanbung. Ay glong au ayu te, nusnga fun Sulumun nasulun at tiba tungud at lanbung at masine nu kalag, kanya ya kamasine sik barugwak. 28Ay Dius nu gfae lanbung tua makmak katanya sa sangaba talun, dewa melo katsi, ay balabag ban e gukas wan sasad afuy, kaugat waro Dius nu gfon ayu ay lanbung. Ya maksvn nu gafanud am.

29“Lag gafanawa sabaliwa ay fakonun ay ay fanginum. 30Aroro fagayu taw at yud gtoglag Dius, kabavn grvbvy takatanya, ay ay Mama nasaful wan nusnge wain ay fagayudanun. 31Abat ngate am gafanawa, ugatani yakman te, setain Dius nu gfagtainan fia ayu, ay Dius gfon ban sa ayu fagayu ay fagayudanun.

Tagsis Banwa fag Ramraman

Mt 6:19-21

32“Lag am gafanawa, deyud am ngayu, aroro ay Mama naylat gfagtainan ayu. 33Falaoi ay ramraman ay foni at nagbulan sa sangay taw at yud e kwa. Katanya nu gbul am sik fagsuadan ramraman at yud karasras, ay anggan at yud e fakatabuan fag ramraman sas banwa. Aroro we madasug sanya ngay tagfangkamul, ay we fatung at manamin ay ramraman. 34Aroro nu inda ay ramraman, sanya yangay anggan ay amatanganan.

At Mafalganan fag ngay Fagsuguan

Mt 24:43,44, 25:1-13; Mk 13:33-37

35“Mafalganani tua gugat ay lag gfarabung ay salung. 36Faningi sik ngay taw tagfanya tua at tagfayafun nu kafoli siginan sik fakadadwaan, ay kanya nu ndasug ay natuk sakbawan, at ngay tagfanya gluang tua vtv. 37Mauseganan ngay fagsuguan at mafuloan tua gugat gfanya at tagfayafun nu kadasug. Matuyan nu glong au ayu te, at tagfayafun namalganan at sadili ay namalunggung at ngay fagsuguan ay namon anya at yafun. 38Ay dewa at tagfayafun andasug sis wabilug yabi, ay dewa bagu kadulum, nu glag nu mafuloan tua, kanya fag ngay fagsuguan guseganan tua ban.

39“Amatangani te, sik taw nu nasaful di te, ginanya ro tagfangkamul nu kadasug sat bale, wa ro gfabayan nu gsakbo. 40Nu katanya, anggan am, mafalganani tua. Aroro nu kadasug au, Taw at Baguama, gina way ban am yud gamatangan te, kadasug kwan.”

At Matuyan ay at Mauri fag Fagsuguan

Mt 24:45-51

41Pedru nainto te, “Em Fun, o sa way lang emi am fagyafadungugun am nafoyung fag faydayuanan, ay o mannga sa tuas fagayu taw?”

42Ay tam Fun nabalus te, “Katatuy at matuyan ay at mamatanganan fag tagalaga. At tagfayafun nasugu anya te, ‘Alagai ku ngay fagsuguan ay fafangoni tua anya fagayu galay fanfangonan.’ 43Mauseganan kafag fagsuguan, gina at tagfayafun kadasug, nu gfakamulun tua fia at fakamulun. 44Matuyan nu glong au ayu te, at tagfayafun namatigwanan sanya fag fagsuguan fagayu at fagagbilugun.

45“Ay sik fagsuguan nu mauri way, kanya gamatangan way te, ‘Glugo yay ban ku tagfayafun nu guli,’ ay gfasigad gfalang at iba fag ngay fagsuguan mangama ay mangena, ay kon ay ginum ay glanguan. 46At tagfayafun umdasug gina kanya fag fagsuguan yud mafalganan fag menit ay fag buknga, ay namaurianan anya maksvn, ay namalo sat yud gafanud fag ngay taw.

47“Sik fagsuguan, dewa nasaful at tagfayafun at fakaylatun, nu dway gfaning ay nu dway gfakamulun at fanambagun, kanya ban gafaurianan maksvn. 48Ay sik fagsuguan nu dway nasaful at tagfayafun at fakaylatun, at fakamulun dewa sak gafaurianan, di maksvn nu gafaurianan. Nu ngayu way at nafon sa sik taw, ngayu yangay ban at fagnamulun siginan anya. Ay nu ngayuk fanambagun at nafatigwanan sa sik taw, ngayu tua ban nangus at nafakamulun.”

Ngay Taw Ginkafudan Aroro sas Isus

Mt 10:34-36

49Isus nalong te, “Andasug au, laman namuba sik afuy sas fagdaul daga, ay ku fakaylatun nangus ku ba afuy gigang wan. 50Ay gina ban nangafasludan takatanya, nandalan kyay ngayuk fagidapun. 51O gamatangan am te, ku fagindasugun namae fagmanabayanun au ngay taw ste swa daga? Duan. Gfoyung au ayu te, ku fagnastaeun, namainkafudan kway ngay taw. 52Siginan katsi si sik bale at taw nu lima, at tulu namawayan at dua. Ay at dua namawayan sat tulu. 53Ay sik mama gfawayan at baguama, ay sik baguama namawayan at mama. Ay sik mina namawayan at baguina, ay sik baguina namawayan at mina. Ay sik nugangina namawayan at nugang, ay sik nugang namawayan at nugangina.”

Masine nu Saful tuam Takafasludan Katsi fag ngay Menit

Mt 16:2,3

54Isus glong sa sangay taw te, “Nu nalag am sik linyabu nu kasure siginans fakayabian, glong am te, ‘Karak ro.’ Ay katanya ro at kumdasug. 55Ay nu namatang am tagsiginans alvngvdan fag tagmara nu gtayuk ayu, glong am te, ‘Masugba ro,’ ay katanya wa fia. 56Sik ngay takamaningan am! Nasaful oma am at fakasafulan sa tam daga ay tam kiwang, ay wain ay fagyudun saful katsi fag ngay menit at masuad?

Rvbvyi at Matuyan fag Fakamulun

Mt 5:25,26

57“At masine nu gfili tuam at matuyan fag fakamulun. 58Kaduge tagfantabugan gtaban emu sas funan, at masine ugatani wa fasinei sa anya gina yayam glao, laman wo sak gatabanan sas tagwabilug, ay tagwabilug wa sak gfadasug emu sas tagulit laman ro wa gubung emu. 59Glong au emu te, wa ban o umkalfas, yakmay ban o nabayad fagayu am bedan.”

Currently Selected:

Lukas 12: OCCT

Highlight

Copy