Lukas 6

Isus Famiangalay fag Menit at Fun

Mt 12:1-14; Mk 2:23–3:6

1Gina sis Famiangalay fag Menit, kaduge Isus gdalan si sik gamasun, at ngay tagadal nabul ngay raug trigu ay nabintuy ay naon. 2Ay tibak taw Fariseu nalong te, “Wain ay fagyudun gfaning tam faugali sabaliwas Famiangalay fag Menit?”

3Ay Isus nabalus te, “O nunda yam natap sabaliwa fun Dabid at nafakamulun ebi gina kanya ay at ngay ufud kalunus? 4Kanya nasakbo sas Dius at bale ay naon fanggalangun fag ngay tinapay, ay nafon yangay sat ngay ufud, Dius at Longan dewa gsalag takatanya. Aroro at masine kon, kayu way ngay tagfon fanggalangun.” 5Ay Isus nalong te, “Au, Taw at Baguama, au wan Famiangalay fag Menit at Fun.”

6Sa tibak Famiangalay fag Menit, Isus nasakbo sas bale fakafulan ay nafoyung. Sik mangama sanya wa mafalelegan at siun fag daluap. 7Ay sanya fag ngay tagfoyung Muisis at Faugali ay taw Fariseu gulit, laman sumaful te, o Isus ro gfafia gina Famiangalay fag Menit, aroro kaylat namoyung sa tibak taw te, Isus e asalanan. 8Ay Isus nasaful kafag ngay taw Fariseu at amatanganan, ay nalong sat yud mafalelegan at daluap te, “Gewan, stei sfagunan.” Ay kafag mangama nanangakbang ay namalindug sanya.

9Ay Isus nalong sas fagayu taw te, “Ginto au ayu te, inday tagfaning tam faugali sabaliwas Famiangalay fag Menit: o nu gfakamulun at masine, ay mannga nu gfakamulun at mauri; o nu gfalangfe sik taw ay mannga nu gfabul sik taw?” 10Ay Isus nadama sa kafag ngay taw, ay nalong sat yud mafalelegan at daluap te, “Falugdei am daluap.” Ay kafag taw nafalugde, ay at daluap anfia wan. 11Ay ngay tagfoyung Muisis at Faugali ay ngay taw Fariseu maksvn nu kadotama, ay gkamatoan te, “Tain ban tam fakamulun sas Isus?”

Isus Nafili at Labi Duak Nasugu

Mt 10:1-4; Mk 3:13-19

12Ginanya fag menit, Isus nalo sas tagbudbuksulanun fag talun laman nandarangin. Fagngabak yabi Isus gdarangin sas Dius. 13Ay nu nmenit wan, Isus nafaful at ngay tagadal, ay nafili labi dua. Ay Isus nafangayan anya fagayu te, at ngay nasugu. 14At ngay ngayan: Simun, (Isus at nafangayan te, Pedru), Andres, Simun at arian, ay Santiagu, ay Uan, ay Felipe, ay Bartulume, 15ay Mateu, ay Tumas, ay Santiagu, Alfeu at baguama, ay Simun, tiba nafangayan anya te, Maseganama, 16ay Udas, Santiagu at baguama, ay Udas Iskariute, at namoyung ban Isus sa sangay tagfangguna.

Isus Nafoyung ay Nafafia

Mt 4:23-25

17Isus nu natagbung gadgaloan at ngay nasugu, anragang si sik datag. Maful sanya ngayu at tagadal ay ngayuk taw tagsiginans fagdaul talun Udea, ay tagsiginans Erusalem, ay anggan tagsiginans tigyangan dagat fag talun sis ligung furuan Tiru ay Sidun. 18Ay kanya fagayu andasug laman nandungugan Isus, ay get sas Isus te, fafiai at ngay fakasaitun. Ay Isus nafafia yangay at ke mauri fag ngay falad. 19Ay kanya fagayu kaylat nanlangbud sumyu Isus, aroro fagmabalyananun kalfas siginans Isus laman gfafia fagayu at ke fakasaitun.

At Mauseganan ay at Mauri fag ngay Taw

Mt 5:1-12

20Isus nadama at ngay tagadal ay nalong te,

“Mauseganan tuam, am fag ngay taw at yud e kwa, aroro Dius gfagtainan ayu.

21“Mauseganan tuam, am fag ngay taw takalunus, aroro e gfapsug ban ayu.

“Mauseganan tuam, am fag ngay taw tagwayway, aroro kase tua ban am.

22“Mauseganan tuam gina e kadotama ayu, ay gaiyan ayu, ay gfalingun ayu ay glong at mauri sabaliwa ayu, siginan nu gafanud am sa angku, Taw at Baguama.

23“Katanya yangay tagfauri ayu at ngay mangaguyang at nafakamulun ebi sas Dius at ngay taglong. Useganani ginanya fag menit, ay fanulbuani useganani, aroro masine mandi ban Dius at fon ayu sas banwa.

24“Ida am, fag ngay taw at maramraman, aroro nabul wam ay fakasunan.

25“Ida am, fag ngay taw at mapsug gugat, aroro kalunus way ban am.

“Ida am, fag ngay taw tagfanagsag gugat, aroro kabalu ban am ay gwayway.

26“Ida am, fagayu taw nu gseg way ayu, aroro katanya yangay kafag ngay taw at ngay mangaguyang at nafakamulun sat yud matuyan fag ngay taglong.

Esugi Tua ay ngay Fawayan

Mt 5:38-48, 7:12

27“Ay glong au sa ayu tagdungugan te, esugi tagfawayan ayu, ay e fakamuluni at masine sa takadotama ayu. 28Eti sas Dius laman ggubuk tua taglong sa ayu te, ‘Dius gfauri ayu,’ ay darangini tagfaidapan ayu. 29Ay sik taw nu nafalang am fingi at sadi, falagi yangay am fingi sit sadi fag tigyangan. Ay nu e gago emu am fangumutan, foni wan, ay nu nabul am lanbung, foni yangay. 30Foni sas fagayu taget sa emu, ay nu e naago emu am ramraman, lag o namul ya. 31Ay nusnge wain ay fakaylatun ay iba at fakamulun sa ayu, katanyai yangay ay fakamulun say iba.

32“Ay fakesugun nu takesug way lang ayu, wa ban am e fagfanyaun at masine. Aroro anggan tagasalanan kesug yangay takesug anya.

33“Ay ay faggubukun nu taggubuk way lang ayu, wa ban am e fagfanyaun at masine. Aroro anggan tagasalanan, katanya yangay at fakamulun.

34“Ay fagfaulbusan nu sa way lang ay fagsegun te, mafafabangsi, wa ban e gfauseganan ayu. Aroro anggan tagasalanan gfaulbus way sa tibak tagasalanan, aroro gafanud te, gfafoli yay ban sa anya.

35“Esugi tagfawayan ayu, ay fakamuluni sa anya at masine, ay faulbusi tua sa anya ay lag gfanya ya at fantubus. Nu katanya tua ban ay fakamulun gbia tua ban ay fagnamulun sas banwa, ay kangayan ban am te, Tiba Tungud fag Dius at ngay sisian. Aroro Dius kafanyu yangay dewa sa sangay taw mauri ay at yud ggubuk at iba. 36Afanyui, kata ay Mama nu mafangafanyu.

Lag Ginsaful Ay Iba at Asalanan

Mt 7:1-5

37“Lag gamatangan sabaliwa ay iba te, mauri at fakamulun, laman ban Dius di gfoyung te, mauri yangay ay fakamulun. Ay lag am glong te, ‘Dius nangus gfaurianan wan kafag ngay taw tagfakamulun at mauri,’ laman ban Dius wa gfaurianan ayu. Falyami tua ay iba at asalanan sa ayu, laman ban Dius gfalyam yangay ay asalanan. 38Famoni tua ay e gfon yangay ban ayu, aroro at famafoli ban sa ayu matignan tua ay matarangas. Aroro nu seyuk tasan ay nafon sa ay iba, kayu yangay ban nya at fon ayu.”

39Isus nafoyung sik faydayuanan te, “O sik taw yud glag masine gtabanan sik yud glag? Duan. Aroro fagdua ro kabulsu way sasad lusung.

40“We tagadal tagtungud at takamoyung, ay fagayu tagadal nu nasaful fagayu, kanya kata yangay at takamoyung nu saful.

41“Wain am faglongun sam faduksay te, ‘Gamata o,’ ay emu ngap am namata sik balse tua daul? 42Ay wain ro am fagnalongun sam faduksay te, ‘Faduksay, au wan tagbul am namata,’ ay wo glag kafag balse sim mata. Takamaningan wayo fag taw. Buli yap taguna kafag balse sim mata, ay nu nabul tuo, malyo tua ro nu gdama o, ay mabul wo am faduksay at namata.

Isus at Faydayuanan sabaliwa sik Kayu ay at Rawvg

Mt 7:16-20, 12:34,35

43“We kayu masine, mauri at rawvg. Ay we kayu mauri, masine at rawvg. 44Aroro saful tam fagayu kayu siginan at rawvg. Wa batang e grabas rawvg bayabas siginan sik dugi dauy, ay wa batang e grabas rawvg sarisa siginan sik sabinit. 45Sik masine fag taw at longan masine tua aroro at amatanganan masine. Ay sik mauri fag taw mauri way at longan, aroro at amatanganan mauri way. Aroro sik taw glong nusnga setaw tagsit amatanganan.

Duak Takawat Bale

Mt 7:24-27

46“Wain ro ay fagngayanun angku te, ‘Ku Fun, ku Fun,’ nu dway ngap am gfaning ku longan? 47Fagayu taw at kindasug sa angku, ay at nadungug ku longan, ay at nafaning, gfasaful au ayu at fagfafaskudanan. 48Kanya kata sik taw takawat at bale ay naali ngabasad, ay at turuk antungkud sas gang. Lugwak nu ndasug sat bale, di guigan at bale, aroro mogat tua. 49Dewa katanya sik taw at nadungug ku longan ay at yud gfaning, kanya kata way sik taw at nawat at bale ay yud naali ya at fagturukan. Nu nalugwak, at bale ansuak wan.”

Currently Selected:

Lukas 6: OCCT

Highlight

Copy