लूका 12

कपटि लोकुराताल चोवकोस मन्ट

(मत्ति १०:२६-२७)

1अनि अचोन बेरा येसुन हुळान साटि हजार हजार लोकुरा पकाय भीळ दुरस-दुरसुन एकमेका पोरोडाल वायिला लाकतुरक असके येसु सबोयताल मुने आपुनोरक चेलालोरकुन इन्दा लाकतुर: “परीसिलोकुरा कपटि पोल्लोंगताल चोवकोस मन्ट, बाक्याकि ओरांग पोल्लोंग होवियता पिन्डि लेहका मन्ता#मत्ति १६:६; मर ८:१५ । 2अनि मकिहचुन इन्तोरक बोदे पोल्लोंग दिसानुंग, अनि गुपित इरतोक अव सबोय पोल्लोनुंग वने पुन्दानुरक#मर ४:२२; लूका ८:१७। 3इन्जोर निमाट बोव पोल्लोनुंग आन्दारतिगा वेहानुरक, अनि लोन लोपा पुसकिने वेहान्तोरिट अव पोल्लोनुंग सबोय लोकुरा मुने वेहानुर।”

माक बोन वरियला पहाजे

(मत्ति १०:२८-३१)

4अनि येसु असा इन्तोर: “मति नावोर गोतियाह नना मिकुन इन्तोना, मेन्दुलतुन हव्कान्तोरक मति इदेना तासि असा दुसरो बाताले किया परोरक बोरे लोकुरकुन वरियमाट। 5मति निमाट बोने वरयाट इन्जोर नना मिकुन चेतेकिसुन वेहका, हव्कसुन नरकतिगा वाटसियाना अदिकार मन्ता परमेस्वरिन वरियमाट, इंगो, नना निमाट परमेस्वरदुन वरयाट असा मिकुन वेहान्तोना। 6अनि रन्ड पयसाने सेयुंग कोळका पिटेंग लोकुरक मोमान्तोरक बहे? मति परमेस्वर अदेना पयकि उन्दि वने मरंगोर। 7अनि मिया तलातांग कल्क वने लकतांग मन्तांग। इन्जोर निमाट वरियमाट, पकाय कोळका पिटेनताल वने मिया हजोर किमत मन्ता।”

येसुना गवाहि वेहानाता जरुरि

(मत्ति १०:३२-३३; १२:३२; १०:१९-२०)

8अनि येसु लोकुरकुन इन्तोर, “नाकुन मानेयकना मुने बोर आयि मानेमायनुर ते ओन नना मानेयतोर मरि वने स्वरगदूतकना मुने मानेमायका। 9मति नाकुन मानेयकना मुने बोर मानेमायोर आयनुर ते ओन परमेस्वरना स्वरगदूतकना मुने मानेमायो आयका। 10अनि नना मानेयतोर मरिन बोर आयि होंगते बोदे पोल्लो इन्दानुर ते ओना गुना मापि कियानुर, मति पवित्र आत्माता निन्दा बोर आयि कियानुर ते ओना गुनातुन मापि पुटपरो#मत्ति १२:३२; मर ३:२९।”

11अनि येसु इन्तोर, “मिकुन नावा कारणते मिया समाज मन्डलितिगा अनि मिया मुक्या मानेयकना मुने अनि मिया अदिकारक लोकुरा मुने ओयनुरक, नना बदाम वळकिका अनि बदाम जवाब हियाका इन्जोर अद बेरा निमाट बोदे पोल्लोता चिन्ता केमाट#मत्ति १०:१९,२०; मर १३:११; लूका २१:१४,१५ । 12बाक्याकि परमेस्वरना पवित्र आत्मा अदेबेराते बाताल वळकाना मन्ता अद पोल्लोतुन मिकुन करहानुर।”

वरोर धनि मानेयना पिटो

13अनि लोकुरा भीळतिगाडाल वरोर मानेय येसुन इतुर, “हे गुरु, बाबोना संपतितुन नावासंग तुसीर इन्जोर नावोर हजोर दादान वेहा।” 14अनि येसु ओर मानेयतुन इतुर, “हे मानेय, नना मिया न्याय केवाल अनि तुसवाल आन्दान इन्जोर निकुन बोर वेहतुर?” 15अनि येसु लोकुरकुन इतुर, “निमाट चोवकोस मन्ट! सबोय प्रकारतांग लालच कियानाताल आपुनतुन पिसहाट; बाक्याकि बोनाय जिवनता आदार संपति कमेहकियाना हिले।”

16अनि येसु लोकुरकुन उन्दि पिटो वेहतुर: “बोरे धनि मानेयता डन्डतिगा पकाय वन्जिंग पन्डतुंग। 17असके ओर ‘इदेक नना बदाम कियाका? बाक्याकि इदेक नावांग वन्जिनुंग इरान साटि जागा हिले’ इन्जोर धनि मानेय आपुना मन्दे आल्हिला लाकतुर। 18असके ओर इतुर, ‘नना इदाम कियाका, नावांग वन्जिंग इराना लोहकुन अरिचुन अदेन हजोर बनेकियाकान अनि अगा नना सबोय पन्डतांग वन्जिनुंग अनि बाकि चिजकुन इरका। 19अनि नना आपुनतुन इदाम इन्का, “नियागा पकाय वरसांग साटि पकाय धनसंपति इरतोना; मजा किम तिन-उन अनि सोबाय मन।” ’ 20मति परमेस्वर धनिमानेयतुन इतु, ‘हे मूरखाल मानेय! इदे नरका निया जिवातुन नना ओयका; असके इद निमा धनसंपतितुन डगि कितोन अद बोना आयार?’ 21परमेस्वरना मुने धन बनेकेवोर आस आपुना साटि धनसंपति डगि किन्तोर ओर मानेय इदाम आन्दुर।”

परमेस्वरनिगा भरोसा इराट

(मत्ति ६:२५-३४)

22अनि येसु आपुनोर चेलालोरकुन इतुर, “निमाट आपुना जिवाता बारेते माक बातांग तिनकोम; अनि आपुना मेन्दुल साटि माक बातांग करकोम इदाम आल्हिमाट इन्जोर मिकुन नना वेहान्तोना। 23बाक्याकि तिन्दानाताल वने जिवा हजोर मन्ता, अनि कपळांगताल वने हजोर मेन्दुल मन्ता। 24अनि कवरानिके हुळाट: अव बसकेन वीतोंग अनि बसकेय कोयोंग, अनि अवेकुन वन्जिंग इरान साटि टोलिवने हिले, मति परमेस्वर कावराकुन पालेकिन्तोर, अनि कावरांगताल निमाट हजोर मन्तोरिट। 25आलहिचुन आपुना वरसानुंग हुडुक गेला बरसिला परान्तोर मिया पयकि बोर मानेय किया परान्तोर? 26अनि निमाट सबोयताल हुडला बुतोतुन वने कियापरविट ते असा दुसरो पोल्लोंग साटि बाक्या आल्हान्तोरिट?”

27अनि येसु ओरकुन असा इतुर, “अनि केळातांग पुंगाह बदाम बरसतांग इन्जोर हुळाट; अव बाताले बुतो केवोंग अनि आपुन साटि सन्दरांग वने बनेहकेवोंग; मति सुलेयमान राजानिगा सबोय प्रकारता पकाय धनसंपति मता, मति ओर वने बसकेय केळातांग पुंगाह लेहका सिंगार केवोर आस मन्दुर इन्जोर नना मिकुन वेहान्तोना#१ राजा १०:४-७; २ इति ९:३-६। 28अनि नेन्ड मन्ता मति नाळि किस्तिगा अचियानुर दिपा पल्लातिगा रोन्डातुन परमेस्वर इदाम लेहका मोळिहतुर ते हे अरदो विस्वास केवालोरक लोकुरक मिकुन परमेस्वर अदेनताल वने बचोन सोबातांग कपळांग करहोर आयनुर? 29अनि माक बातांग तिनकोम अनि बातांग उन्कोम इन्जोर मिया मन्दे इदाम चिन्ता केमाट। 30बाक्याकि दुनियातोरक सबोय लोकुरक इव पोल्लोनांग चिजकुन पळकसोरिंग मन्तोर, मति इव सबोय चिजक मिकुन जरुरत मन्ता इन्जोर मिवोर स्वरगतोर बाबाल पुन्तोर। 31इन्जोर पहले निमाट परमेस्वरना राज्यतुन पळकाट अनि अदेनासंग इव सबोय चिजक वने मिकुन पुटानुंग।”

स्वरगता धनसंपति

(मत्ति ६:१९-२१)

32येसु असा इतुर, “हे परमेस्वर साटि अलगो कितोरक विस्वासि लोकुरक, निमाट हुचुलोरे मन्तोरिट मति वरियमाट, बाक्याकि मिवोर स्वरगतोर बाबाल स्वरग राज्य मिकुन हियान साटि मिया पोरो गिरदा मन्तोर। 33अनि निमाट आपुना धनसंपतितुन मोमसुन दान हिसिम्ट। बोरे कलेरक ओयोर या पुळियक वने तिन्ज नाश केवोंग ओद स्वरगतिगा, बसकेन जुनाल आयो आयार पिसविंग अनि बसकेय मारो आयार धनसंपतिहकुन स्वरगतिगा डगि किम्ट। 34बाक्याकि बगा मिया धनसंपति मन्ता अगा मिया मन वने लागस मन्दार।”

चेता मन्ट

35येसु ओरकुन असा इतुर, “परमेस्वरना सेवाकियान साटि तयार आस दिवा पयटे किस केपसोरिन मन्ट#मत्ति २५:१-१३, 36ओनोर मालकाल मरमिंग साटि हन्जुन मलस वासुन मारितुन कोहकानुर ते सान्डे हन्जुन आपुना मालकान साटि मारितुन तरया साटि ओर बसकेय मरमिंगताल मलस वायनुर इदाम आपुना मालकान साटि हरहुळस मन्तोर ओर मानेयता लेहका बनेमाम्ट#मर १३:३४-३६। 37अनि मालकाल वायनुर असके सबोय तयारि किस मालकाल साटि हर हुळसोर मन्तोरक ओरक दास धन्य मन्तोरक। मालकाल आपुना तयारि किसुन ओरकुन तिन्दान साटि उपहानुर अनि ओरा सेवा कियानुर इन्जोर नना मिकुन चेतेकिसुन वेहान्तोना। 38अनि मालकाल अरदो नरका या कोरक कुसाना पहाराते वायानपा, आपुनोर दासतुन चेता कल्यान्तोर ओर दास धन्य मन्तोर। 39नेन्ड बचोन बेरा कलेर वायनुर इन्जोर लोतोर मालकाल पुन्ज मनेर ते ओर चेता मन्जुन केपेर अनि आपुना लोतिगा कलिला हेवोर आयेर। 40अनि निमाट आल्हिविट आयकिट ओद बेरा नना मानेयतोर मरि वायका इन्जोर निमाट वने चोवकोस मन्ट#१२:३९,४०; मत्ति २४:३,४४ ।”

विस्वासि अनि अविस्वासि दासक

(मत्ति २४:४५-५१)

41असके पतरास, “हे प्रबु, इव पिटेंग माकुन वेहान्तोन या सबोय लोकुरकुन वेहान्तोन?” इन्जोर येसुन पुच्चेमातुर। 42अनि प्रबु पतरासिन इतुर, “बरोबर बेराते तिन्दा-उन्दा हेविर इन्जोर मालकाल सबोय नोवकरकनिगा मुक्याल बनेकितोर विस्वासयोग्य अनि बुद्धिमान भणडारि, बोर मन्तोर? 43अनि ओरा मालकाल वायानपा आपुना बुतोतिगा पकाय सोबाय काम किसोरिंग कलियतोर ओर दास धन्य मन्तोर। 44अनि ओर मालकाल ओना सबोय धनसंपतितिगा आपुना विस्वासयोग्य दासतुन अदिकारि बनेहकियानुर इन्जोर नना मिकुन खरोय वेहान्तोना। 45मति निमाट असा दुसरो उन्दि पोल्लोता बारेते विचार किम्ट: ‘नावोर मालकान वायान साटि बेरा आयार’ इदाम विचार किस ओर दास आपुनोर मालकाना नोवकोरकुन अनि दासक दासिकुन हहाना-पिटहाना कितुर, अनि ओर दास तिन्वाल-उन्वाल अनि वाहचवाल वने आतुर। 46अनि ओर दास आपुनोर मालकान साटि केपोर आसोरिंग मन्दानुर अद दिया अनि बेराते ओनोर मालकाल वासुन ओर दासतुन पकाय दन्ड हिसुन ओन विस्वासघाति लोकुरासंग किसियानुर। 47अनि आपुनोर मालकाना इच्चातुन पुन्जुन ओना इच्चाता अनुसार तयारि आस ताकोर ओर दास पकाय मार तिन्दानुर। 48मति मालकाना इच्चा पुनोर आस दन्डता योग्य गलति किन्तोर ओर कमि मारतिन्दानुर। बोन पकाय हितोर ओनाताल पकाय तलकानुर, अनि बोन पकाय सोपेकिसितोर ओनाताल पकाय तलकानुर।”

येसुनिगा विस्वास कियानाता मारे होंग

(मत्ति १०:३४-३६)

49अनि येसु इतुर, “नना दरतितिगा किस लावेकियाला वातोन, ओद इदेक पोतिसोर मनवार इदाम नावा इच्चा मन्ता। 50नाकुन ते उन्दि बपतिस्मा येताना मन्ता अनि अद बपतिस्मा पुरा आयानावनाह नना पकाय तकलिपते मन्तोना#मर १०:३८! 51अनि नना दरतितिगा मिले कियान साटि वातोना इदाम निमाट बाताल समजेमायिला आतोरिट बहे? आयो, मति अलगो कियान साटि वातोना इन्जोर नना मिकुन वेहान्तोना। 52बाक्याकि इदेकवनाह उन्दि लोतिगा सेयुंग लोकुरक मन्तोरक, मति इदेक वरोन दुसरोनसंग होंगते मन्दानुरक, मुवुरक इवुर लोकुरासंग अनि इवुर मुवुर लोकुरासंग होंग मन्दानुरक। 53अनि बाबो मरिनासंग होंग मन्दानुर, अनि मरि बाबोनसंग होंग मन्दानुरक; अवहारि मियहारिसंग होंग मन्दार, अनि मियहारि अवहारिनसंग होंग मन्दार, अनि कोळयाहारि पोयहारिनसंग होंग मन्दार, अनि पोयहारि कोळयाहारिनसंग होंग मन्दार#मीखा ७:६ ।”

इद पिळिता रुप-रंगता भेदतुन बराबर पुन्दाना

(मत्ति १६:२-३)

54अनि येसु लोकुरा भीळतुन इतुर: “निमाट आबारतुन पश्चिम दिशातिकेडाल तेदान्ता तान हुळसुन, ‘इदेक पिर वायार’ इन्जोर सान्डे इन्तोरीट। अदामे आन्ता। 55अनि दक्षिण दिशातिकेडाल वाळिय वायानातुन हुळसुन ‘इदेक पकाय गरमि आयार’ इन्जोर निमाट इन्तोरीट। अनि अदामे आन्ता। 56हे कपटि लोकुरक! निमाट ते दरति अनि आबारतांग रुप-रंगता भेदतुन पुन्दा परान्तोरिट। मति इद पिळिता रुप-रंगता भेदतुन बाक्या पुन्दा परविट?”

मिया विरोद केवालनासंग सान्डे मेलमिलाप किम्ट

(मत्ति ५:२५-२६)

57अनि येसु असा इतुर, “बोद पोल्लो बरोबर आन्द इन्जोर निमाट आपुहे बाक्या निर्णय केविट? 58अनि निमा आपुना विरोदिनासंग खरोय पोल्लोता निर्णय कियान साटि मुक्याह मानेयना हेरे हन्दिला आतोरिट ते निमाट हरतिगाय अद पोल्लोतुन अगाय मिटे कियाना किम्ट। अनि इदाम केवोर ते ओर निकुन न्याय केवाल मुक्याह मानेयना हेरे पिळिंगसोरिंग ओयिर अनि मुक्याह न्यायि निकुन पुलिसकना कयदे सोपे केविर अनि पुलिस लोकुरक निकुन जेहलतिगा केहचिविर। 59अनि बचोन-वनाह ओना सबोय गुनातुन निहचिवि आयकि अचोनवनाह निमा जेहलताल चुटेमायवि आयकि इन्जोर नना मिकुन चेतेकिसुन इन्तोना।”

Currently Selected:

लूका 12: fmu

Highlight

Copy