लूका 13

मिया पापताल पस्तेमाम्ट

1गलील देशतोर लोकुरक येरुसलेमता मन्दिरतिगा परमेस्वर साटि बलि हियाला आस मन्दुरक, असके रोम देशतोर अदिकारि पिलातुस आपुनोरक सेय्निक लोकुरा कयदे ओरक सबोय लोकुरकुन हव्कतुर। 2अनि इव पोल्लोनुंग केन्जुन येसु लोकुरकुन इतुर, “ओरक गलील देशतोरक सबोय लोकुरकुन इदाम तकलिप आतु इन्तोर ओर बाकि सबोय गलील देशतोरक लोकुराताल पकाय पापकिस मन्दुरक बहे#१३:२ गलील देशतोरक सबोय लोकुरक पकाय पापकिस मन्तोरक। ?” 3अनि येसु इतुर, “आयो! आयो! निमाट आपुना पापताल पस्तेमायवेक गलील लोकुरकुन नाश कितुर अदामे निमाट वने नाश आयकिट इन्जोर नना मिकुन चेतेकिन्तोना। 4अनि येरुसलेम प्रदेशता बाहरो सिलोह पोरोयदा जागातिगा, उन्दि महाल लेहका मता गुम्मट लोकुरा पोरो अरस अटरा लोकुरक हातुरक, येरक येरुसलेम सहेरता दुसरो सबोय लोकुरकताल पकाय पापि लोकुरक मन्दुरक बहे? 5आयो! आयो! ओरक अद प्रदेशतोर दुसरो लोकुरकताल पकाय पापि हिलेर आसि। मति निमाट आपुना पापताल पस्तेमायवेक ओरक लोकुरा लेहका मिक सबोयलोरक वने इदामे नाश आयार इन्जोर नना मिकुन वेहान्तोना।”

काया हादवाल मराता पिटो

6अनि येसु ओरकुन उन्दि पिटो वेहतुर: “वरोर मानेयना अंगुरता बगिचातिगा अगा उन्दि अन्जीर पोरोयदा मरा मन्दु। अनि बगिचातोर मालकाल अद अन्जीरता मरातिगा कायांग पळकान साटि वातुर, मति अद मरातिगा कायांग कल्योर आतुर। 7असके मालकाल बगिचातुन केपवाल नोवकोरिन इतुर, ‘केन्जा निमा, नना मून्ड वरसाताल इद मरातिगा कायांग हुळान साटि वान्तोना, मति नना इद अन्जीरता मरातिगा कायांग कल्योन इन्जोर इदेक इद मरातुन कदिया! बाक्याकि इद मरा दरतितुन रोकेकिस इरस मनमाकि।’ 8अनि बगिचातुन केपवाल नोवकोर आपुना मालकान इतुर, ‘हे मालिक, अद मरातुन इयेन्ड असा मन्दिला हिम, नना अद मराता हिरमुटा काचुन कातु अनि एर दोस्का। 9अनि उन्दि वर्षा पजा कायांग हादानुंग ते बेस, आयो ते इद मरातुन कदिस वाटका।’ ”

पवित्र दिया मुरगाल आळदुन येसु सुदरे किन्तोर

10अनि यहुदि लोकुरा पवित्र दिया येसु ओरा उन्दि समाज मन्डलितिगा परमेस्वरना राज्यता पोल्लोतुन वेहिला आस मन्दुर, 11अगा अटरा वरसाताल उन्दि दुष्टात्मा पयसमन्द इन्जोर मुरगाल आस मन्दु, मति हुचुन वने सरको आय परो आत उन्दि आळ मता। 12अनि येसु मुरगाल आळदुन आपुना हेरे केयसुन, “हे बायि निमा आपुना बिमारिताल सुदरेमातोन” इदाम इन्जुन येसु अद आळदा पोरो कय इरतुर। 13असके अद आळ सान्डे सरको आतु, अनि परमेस्वरना महिमा किया लाकतु।

14अनि येसु पवित्र दिया मुरगाल आळदुन सुदरे कितुर इन्जोर यहुदि समाज मन्डलितोरक मुक्या मानेय होंगदे आसुन लोकुरकुन इन्दा लाकतुर, “सारुंग दियांग मन्तांग, अव दियाने बुतोकियाना अनि अवे दियाने वासुन सुदरे केविर, मति पवित्र दिया सुदरेमायान साटि वायमाट” इन्जोर इतुर#निर २०:९,१०; व्यव ५:१३,१४।

15अनि अद पोल्लो केन्जुन प्रबु इतुर, “हे कपटि लोकुरक! बांग निमाट पवित्र दिया आपुनांग कोन्दानुंग-बुळगाकुन गुटातिगाडाल लेहचुन एर उहान साटि ओयविट बहे? 16मति सयतान अटरा वरसाताल दोहचुन इरस मन्दु अब्रहामना वंशता इद पेडिन पवित्र दिया सयताना इद दोहतालतिगाडाल सुदरे कियाना बेस हिले आसि बहे?” इन्जोर उत्तर हितुर। 17येसु इदाम इतोर बरोबर ओनोर सबोय विरोदि लोकुरक लज्जा आतुरक, असके भीळतोरक सबोय लोकुर येसुना महिमाता चमत्कारतुन हुळसुन पकाय गिरदा आतुरक।

रायि पळेदा पिटो

(मत्ति १३:३१-३२; मर ४:३०-३२)

18असके येसु असा वने इतुर, “परमेस्वरना राज्य, बोना लेहका मन्ता? अनि नना परमेस्वरना राज्यतुन बोद पोल्लोतासंग उपमा कियाका? 19अद बोरे मानेय ओसुन आपुना बगिचातिगा वीचितुर उन्दि रायिता पळे लेहका मन्ता। अनि अद पळे होळियसुन उन्दि हजोर मरा आतु, असके आबारतांग पिटेंग अद मरातांग कान्दानिगा वासुन मन्दिला लाकतुंग।”

होविता पिन्डिता पिटो

(मत्ति १३:३३)

20अनि असा वने येसु लोकुरकुन इतुर, “नना परमेस्वरना राज्यतुन बोद पोल्लोतासंग उपमा किसुन वेहका? 21अनि अद होविता पिन्डि लेहका मन्ता, अद चिजतुन उन्दि आळ ओसुन मून्ड सेर पिन्डीतिगा मिलेकिसीतु, अद सबोय पिन्डि वले आसोरिंग पकाय बोगिलत। स्वरग राज्य वने इदामे मन्ता।”

हुडला हरि

(मत्ति ७:१३-१४; २१—२३)

22अनि येसु सबोय सहेरतिगाडाल अनि नाटनाटेनिगडाल हन्जुन, परमेस्वरना पोल्लोतुन करियसोरिंग येरुसलेम सहेरतिके हन्दिला आस मन्दुर। 23असके वरोर मानेय येसुन पुच्चेमातुर, “हे प्रबु, पिसाना कलियवालोरक कमि लोकुरक मन्तोरक बहे?” 24अनि येसु ओन इतुर, “हुडला कवाळतिगाडाल हन्दाना पकाय मेहनत किम्ट, पकाय लोकुरक अद हरितिगाडाल हन्दाना कोसिस कियानुरक, मति हन्दा परोरक आयनुरक। 25अनि लोतोर मालकाल तेचुन मारि केहच मन्दानुर, अनि निमाट बाहरो निचुन, ‘हे प्रबु, मावा साटि मारितुन तरया’ इदाम इन्जुन मारितुन टकटक कोहकसोरिंग मनकिट ते ‘निमाट बगाडोर आन्दिट इन्जोर नना निकुन पुनोन’ इदाम ओर लोपाडाल उत्तर हियानुर। 26असके निमाट ‘हे प्रबु, माक निया मुने तिन्दाना उन्डाना कितोम। अनि निमा मावांग हाटुमतिगा परमेस्वरना पोल्लोतुन वेहति’ इदाम इन्किट। 27मति मालकाल इन्दानुर, ‘निमाट बगाडोरक आन्दिट इदाम नना मिकुन पुनोन। हे खराब बुतोंग केवालोरक निमाट सबोय लोकुरक नावा हेरेटाल लक हन्ट!’ इदाम ओर मिकुन इन्दानुर#भज ६:८। 28अनि अगा अब्रहाम, इसहाक#१३:२८ इसहाक अब्रहामना पेकाल मतोर।, याकुब#१३:२८ याकुब इसहाकना पेकाल मतोर। अनि परमेस्वरना पोल्लो वेहवाल सबोय लोकुरक परमेस्वरना राज्यतिगा उदितोरक मति मिकुन बाहरो टन्डिहतोर इदाम हुळकिट ते निमाट अगा किलाना अनि पल्क कडरेकियाना किसोरिंग मनकिट#मत्ति २२:१३; २५:३० । 29अनि पूरवतिकेडाल, पश्चिमतिकेडाल, उत्तरतिकेडाल अनि दकसिनतिकेडाल नालुंगास बासाताल पकाय लोकुरक वासुन परमेस्वरना राज्यतिगा जेवेकियान साटि मिले मायनुरक। 30अनि केन्जाट, परके मन्तोरक ओरक मुने आयनुरक, अनि मुने मन्तोरक ओर परके आयनुरक#१३:३० अनि केन्जाट, मुक्याल मन्तोर इदाम विचार किन्तोर पकाय लोकुरक परके आयनुरक अनि मुक्याल आयोर इदाम विचार किन्तोर पकाय लोकुरक मुने आयनुरक।#मत्ति १९:३०; २०:१६; मर १०:३१ ।”

हेरोदेस राजाल येसुन दुश्मन किन्तोर

31अनि येसु लोकुरकुन वेहिला आस मन्दुर अचोन बेरा हुचुलोर परीसि लोकुरक येसुना हेरे वासुन, “हे येसु निमा इगाडाल पसियसुन हन, बाक्याकि हेरोदेस राजाल#१३:३१ हेरोदेस राजाल रोमि देशता वरोर हजोर राजाल मतोर। निकुन हव्काना साटि हुळान्तोर” इन्जोर इतुरक। 32अनि येसु परीसि लोकुरकुन इतुर, “निमाट हन्जुन ओर कोलियाल लेहका पकाय चलाकि मानेयतुन इदाम इन्ट, ‘हुळा नना नेन्ड अनि नाळि दुष्टात्मातुन पूळान्तोना अनि बिमार लोकुरकुन सुदरे किन्तोना, अनि मून्ड दियाने नावा बुतोतुन पुरा कियाकान।’ 33मति नाकुन नेन्ड अनि नाळि अनि मनेदियाताल ताकाना जरुरि मन्ता, बाक्याकि परमेस्वरना पोल्लो वेहवाल बोरे मानेयतुन केवल येरुसलेम सहेरतिगा हव्कपरान्तोरक।”

येरुसलेमता बारेता दुःख

(मत्ति २३:३७-३९)

34येसु असा इतुर, “हे येरुसलेमतोरक लोकुरक, हे येरुसलेमतोरक लोकुरक, निमाट परमेस्वरना पोल्लो वेहवालोरकुन हव्कान्तोरिट अनि मिया हेरे परमेस्वर लोहतोर मानेयकुन कल्कने पिटिहच हव्कान्तोरिट। बदाम तलुळ आपुनांग पिलानुंग आपुना मारेक अडिय ओलहिन्ता, अदामे नना वने मिकुन डगि कियाना बोचोक बेरांग नना इच्चा कितान, मति मिया इदाम इच्चा हिले आस मतोरिट! 35हुळाट, इदेक मिया लोन सबोय हरचुन दाकिट। अनि ‘प्रबुना पोरोयदे वान्तोर ओर मानेय धन्य मन्तोर’, इदाम निमाट इन्दानावनाह निमाट नाकुन असा हुळविट आयकिट इन्जोर नना मिकुन इन्तोना#भज ११८:२६।”

Currently Selected:

लूका 13: fmu

Highlight

Copy