मत्ति 8

येसु कोळि बिमार मानेयतुन सुदरे किन्तोर

(मर १:४०-४५; लूका ५:१२-१६)

1येसु आपुना वळकाना मारिहच ओद मटाताल रयतुर असके लोकुरा उन्दि पकाय भीळ ओना परके वातुरक। 2असके वरोर कोळि बिमारितोर मानेय येसुना हेरे वास ओन नमस्कार किस “हे प्रबु, निया इच्चा मन्दार ते नाकुन शुद्ध किया परान्तोन” इन्जोर इतुर। 3येसु कय मुनेकिस ओन इटतुर, “नावा इच्चा मन्ता, निमा शुद्ध आम” इन्जोर इतुर। अनि सान्डेय ओर कोळि बिमारिताल बेस आतुर। 4येसु ओन, “हुळा, बोने वेहमा, निमा हन्जुन आपुनतुन याजकतुन तोहा अनि मूसाना आग्याता अनुसार बलि हिम असके निमा कोळि बिमारिताल बेस आतोन इदाम लोकुरकुन समजेमायार#लेव्य १४:१-३२” इन्जोर इतुर।

रोमि सयनिक अदिकारिना विस्वासतुन येसु प्रशंसा किन्तोर

(लूका ७:१-१०)

5येसु कफरनहुम नाटेनिगा वातुर असके रोमि सयनिक लोकुरा वरोर अदिकारि येसुना हेरे वास ओन, 6“हे प्रबु, नावोर नोवकर लोतिगा लकवा बिमारिते पकाय तकलिपते मन्तोर” इन्जोर ओन विनन्ति कितुर। 7असके येसु ओर अदिकारिन, “नना वास ओन सुदरे कियाका” इन्जोर इतुर। 8मति अदिकारि ओन, “हे प्रबु, निमा नावा लोन वायिलाय नना लायकि हिले। मति निमा केवल उन्दि पोल्लो इन्जिम ते नावोर नोवकर बेस आयनुर इन्जोर उत्तर हितुर। 9बाक्याकि नना वने दुसरो मानेयना अदिकारते मन्तोना, अनि नावा अदिकारते सयनिक लोकुरक मन्तोरक। नना वरोन हन इन्तोना ते ओर दान्तोर, अनि दुसरोन वाय इन्तोना ते ओर वान्तोर, अनि आपुनोर नोवकरतुन ‘इद किम’ इन्तोना ते ओर किन्तोर।” 10इद केन्जुन येसुन आश्चरय आतु, अनि ओना परके वान्दुर ओरकुन, “नना इस्रायेलतिगा वने इचोन हजोर विस्वास बोनागाय कलियोन इन्जोर नना मिकुन खरोय इन्तोना इन्जोर इतुर। 11अनि पूरव अनि पश्चिमतिकेडाल पकाय लोकुरक वास अब्रहाम, इसहाक अनि याकुबनासंग स्वरग राज्यतिगा जेवन साटि उदानुर इन्जोर नना मिकुन इन्तोना#लूका १३:२९। 12मति परमेस्वर मुनेय आचतोर विस्वास केवोर आस मतोर पकाय यहुदिलोकुरकुन#८:१२ यहुदिलोकुरकुन परमेस्वर आपुना राजतिगा हन्दान साटि मुनेटाले आचतुर मति ओरक मसिनिगा विस्वास केवोर इन्जोर स्वरग राजतिगा हन्दिला परोर आतुरक। बाहरो आन्दारते वाटसियानुर, अगा किलाना अनि पल्क कडरे कियाना आयार#मत्ति २२:१३; २५:३०; लूका १३:२८।” 13असके येसु ओर रोमि अदिकारिन, “हन निया विस्वास कितोन लेहका निया साटि आयि” इन्जोर इतुर अनि ओनोर नोवकर ओदे बेरा बेस आतुर।

येसु अलग-अलग बिमार मतोर लोकुरकुन सुदरे किन्तोर

(मर १:२९-३४; लूका ४:३८-४१)

14येसु पतरसना लोन वातुर असके पतरसना पोयाळ पिनिते हुन्जता हुळतुर। 15येसु अदेना कयदुन इटतुर अनि अदेना पिनि रयतु, अनि अदु तेदचुन ओरा सेवा कियाला लागतु। 16ओद दिया पोळद मुलत असके लोकुरक दुष्टात्मा मता पकाय लोकुरकुन ओना हेरे ततुरक अनि येसु अव दुष्टात्मातुन आपुना केवल उन्दिय पोल्लोते पसिहतुर अनि सबोय बिमार लोकुरकुन सुदरे कितुर।

17“ओर आपुनास मावा कमजोरितुन आपुनिगा येतितुर

अनि मावा बिमारितुन ताहतुर#यश ५३:४”

इदाम परमेस्वरना पोल्लो वेहवाल यशायाहना द्वारा इन्ज मतोर ओद पोल्लो इदाम पुरा आयि इन्जोर।

येसुना चेलाल बनेमायानाता किमत

(लूका ९:५७-६२)

18येसु आपुना नालुंगास बासा लोकुरा उन्दि पकाय भीळ हुळतुर असके आपुना चेलालोरकुन नहारता होदपाकाळ हन्दाना आग्या हितुर। 19असके वरोर मूसान नियमतुन करिहवाल मानेय येसुना हेरे वास, “हे गुरु, निमा बगाय दाकि ते वने नना निया परके वायका” इन्जोर इतुर। 20असके येसु ओन, “लाळग्याहकुन मन्दान साटि पान्जांग मन्तांग अनि आबारता पिटेनुंग मन्दान साटि गुडांग मन्तांग, मति नना मानेयतोर मरिन तला इरान साटि बगाय जागा हिले” इन्जोर इतुर, 21असके चेला लोकुरकनिकेडाल दुसरो वरोर येसुन, “हे प्रबु, नाकुन मुने हन्जुन नावोर बाबोना मुरदातुन मिसिहिला हिम असके पजा निया परके वायका” इन्जोर इतुर। 22मति येसु ओन, “निमा नावा परके वाय, अनि हातोरक आपुना हातोर लोकुरा मुरदा मिसिला हिम#८:२२ आत्मिक रुपते हातोर ओर आपुना हातोरकुन मिसिला हिम” इन्जोर इतुर।

येसु हूरेमाटियाल वळियतुन कमेक किन्तोर

(मर ४:३५-४१; लूका ८:२२-२५)

23येसु डोंगातिगा अन्जतुर असके ओनोर चेलालोर वने ओना परके हतुर। 24अनि नहारतिगा उन्दि पकाय हजोर हूरेमाटियाल वळिय वातु अनि डोंगा एेता पळवाते निन्दिला आस मन्दु, अनि येसु हुन्जसोर मतोर। 25असके चेला लोकुरक हेरे वास, “हे प्रबु, माकुन पिसहा, माक हायिला आतोरोम” इन्जोर वेहचुन ओन तेहतुर। 26येसु ओरकुन इतुर, “हे अल्पविस्वासि लोकुरक, बाक्या वरयान्तोरिट?” ओर तेदचुन वळिय अनि समुद्रतुन रांगतुर, अनि सबोय कमेक आतु। 27अनि ओरक आश्चरय किस, “येर बदाम मानेय मन्तोर, वळिय अनि समुद्र वने ओना आग्या मानेमान्तांग” इन्जोर इन्दा लागतुरक।

दुष्टात्मा पयतोर मानेयतुन येसु सुदरे किन्तोर

(मर ५:१-२०; लूका ८:२६-३९)

28येसु नहारता होदपाकाळ गदरेनिया लोकुरा देशतिगा अवतुर ते दुष्टात्मांग मतोर इवुर मानेय बिजगुडिताल पसियस ओन हापळेमातुरक। ओरक पकाय वरेवसना मतोरक इन्जोर बोरे ओद हरिते हन्दिला परोर आतुरक। 29ओरक जोरदे इतुरक, “हे परमेस्वरनोर मरि, निमा मावा नडुम पिसकाट कियाला बाक्या वाति? बाताल निमा बेराता मुने माकुन पकाय तकलिप हियाला इगा वातोन बहे?” 30ओरा हुडुक लक पकाय पदिंगना गोहडि मेयिला आस मन्दुंग। 31दुष्टात्मांग ओन, “निमा माकुन पसियाहन्तोन ते पदिना गोहडितिगा लोहचिम” इन्जोर विनन्ति कितुंग। 32येसु अवेहकुन, “हन्ट” इन्जोर इतुर; अनि अव पसियसुन पदिना लोपा होळियतुंग अनि सान्डे पदिना सबोय गोहडि घाटाडताल विचोरिन समुद्रतिगा हन्ज अरतुंग अनि मुळियस हातुंग। 33पदिनुंग मेहवालोर वितितुरक अनि नाटेनिगा हन्जुन इव सबोय पोल्लोंग अनि दुष्टात्मांग पयतोरक मानेयकना बारेते वेहतुरक। 34असके नाटेनोर सबोय लोकुरक पसियसुन येसुन मिलेमायिला वातुरक, अनि मावा सिवाताल बाहरो हन इन्जोर ओन हुळसुन विनन्ति कितुरक।

Currently Selected:

मत्ति 8: fmu

Highlight

Copy