Makaabon 2
2
YALLIH MALAYKATTI ISRAAYIL UMMATTA LUK YAABE
1YALLIH malaykatti Gilgal akak iyyan aracaak, Bokim deqsita arac yemeeteeh, tokkel Israayil marak annah iyye. «Masrik sin eyyeqqa heeh sin kaxxa abbobtik, ‹Siinih aceeyyo› exceh xagana akah cule baaxo fan sin baahe. ‹Anu sin lih haysite bical sin mamaka'mmay, 2isin kaadu a baaxol yan mara lih hebeltô-bica mahaysitina. Oson sadgat elle aban mansafitte bututtukka haa› 'yaanam siinik exceh en. Takkay immay anu siinik excem maabinnitoonuuy; maabina siinik excem abten. Hay, ceele-waytam abten! 3Taway siinik axcemii, Anu ahaysa isin ken gutuqak bahtaanamah, a mara baaxok siinih mayyaaqa. Oson naqboytit siinik akkelon. Oson yaqbuden duyyeeya ofloy edde radaanahiyya siinil akkelon» iyye. 4YALLIH malaykatti ah iyye waqdi, inkih tan Israayil ummatta weqteh. 5Too aracak Bokim#2:5 Bokim: Qibraan afat Bokim iyyaanam weeqa mara iyyaanama akah iyyaanam tohih sabbata. Tokkel sadgat YALLAH aben.
YOOSUWA-RABA
(Yoosuwa 24:28-33)
6Yoosuwa Israayil marak iyyeemih, «Ahaysa gexxaasita» iyyeeh; too waqdi kulli num keenik kaah yeceen baaxol gace. 7Yoosuwa suggu 'yem fanah Israayil mari YALLA aqbuduk suge. Usuk rabek sarra kinni way, YALLI Israayil ummatah abe kaxxa abina isih yuble mari addunyal suggu 'yem fanah, YALLA aqbuduk sugen. 8Núun-Yoosuway YALLIH naqasuh yene qumrik bool kee tabna liggidat yan saaku rabe. 9Baaxok kaa elle yoogoqeenim, qaleela le Efrayim rasul sugta Timnat-Ceeres deqsita magaalay kaah yeceenihiyya. Too arac Gaqas-qalek kilbat le kabut raaqa. 10Woo saaku sugga 'te kay ado inkih rabteeh; sarra temeete ado YALLA kee YALLI Israayilih abba heem inkih hawwenteh.
ISRAAYIL-MARI YALLIH AMRI CINE
11Tohuk lakal Israayil mari YALLIH garil dambi lem abak maacisen. Yalla cabba heenih Baqal deqsittaamay Yallih innah yaqbudeenihiyyah qibaadat gacen. 12YALLAY ken kaxxa abbobti dooreh Masrik ken eyyeqqa heehiyya yaqbudeenim cabeenih, ken dariifal yan mari Yalla akak iyyaamay yaqbudehiyyah qibaadat ken lih gacen. Too duyyeh qibaadah gommoh radaanam baaheeniih, YALLIH naqabu isinnil oobisen. 13Too mari YALLA cinna heeh, Baqal kee Qastarot akak iyyan duyyeh qibaadat gacen. 14Toh keenik yuble waqdi, YALLI bagcarriteeh; umeynit buxaaxi keenik akah bubta'nnah abe. Dariifal keenik sugga 'te naqboytit caylah keenik yiysiiseh. Naqboytiitit koysitoonu yeffereenih. 15Carbih gexinnaan waqdi, YALLI akah inxicca 'ye innah, abinnaan carbil ken gacsiisak yen. Tonna-leemiik kaxxa gibdaabinat yenen.
16Tohuk lakal YALLI a marih gabak ken yayyaaqu waa makaabon keenih yecee. 17Takkay immay too makaabonuy Yalli keenih heehiyyah yab cinak sugen. Ken kaxxa abbobti YALLAL luk ten imaan cabeeniih; Yallih aftok duyyeeyâ-qibaada faxeeniih, too duyyeeyah qibaadah gommoh raden. Ken kaxxa abbobti YALLI iyyem abak yeneeni'mmay, ta ado Yallih yab cinteh. 18Sinam keenit xukkuttaah ken biyaakan waqdi, YALLAL weeqah hayya haak yenen. Too waqdi YALLI keenih xuwaawak yeneeh; makaabantu doorru haak yeneeh, too makaabanti addunyal yanim fanah kaa catakaay, woo makaabantih gabat Israayil mari qaduwwik akah yayse'nnah abak suge. 19Woo makaabonuy Yalli keenih heehiyya rabtek wadir, duma ken kaxxa abbobti abak sugte uma-taamak lafitta 'ta uma-taama abak yenen. Yalla cabba heenih duyyeeya yaqbudeenim dumak laffa haak abak yenen. «Ninnih fanxem abenno» axcuk, uma-gita cabaanam cineenih. 20YALLI toh yable waqdi, kulli way bagcarritak yeneeh, «A mari yi yab cineeh, anu ken kaxxa abbobti lih hee Yalla-kee-xaganal digga iyyoonu cineenih. 21Tahaysa, Yoosuwak wadir baaxol raaqe mara, Israayil mari ken gutuqak baahaanamah baaxok keenih mayyaaqa. 22Immay uxih ahak-sarra, a mara baaxoh addal elle raaqisam faxaah; too waqdi Israayil mari, duma ken kaxxa abbobti akah abak tene'nnah, yoo katayaanam kee, wonna hinna'mmay, yoo cinaanam keenik ableyyo» iyye. 23Tonna-leemiik YALLI elle iyye'nnal, too mara xayi baaxok maxiiriyinnaay baaxol ken raaqiseeh; Yoosuwa addunyal yen saaku, a marak inkih, Israayil mara qeebil maysiisinna.
Currently Selected:
Makaabon 2: NKM
Highlight
Share
Copy
Want to have your highlights saved across all your devices? Sign up or sign in