ማ̈ቶ̈ሳ 27

ዬሱ̈ሳ ኣ̈ ኢሚ̇ኖ ዪሁዶ ፌ̈ና ሶ̈ቲ̇ ዎዴ

1ጌ̈ሽ ጌላፋ ቄ̈ሳ ኣላቃንኬ ጋዳ ጪ̈ጛሻን ዎይ ዬሱ̈ሳ ጋልዳ ዓይቃ ፊርዳ ፊርዲሳንዳ̇ብ ዎል ዎልኣ ዞሪንቲ̇ዴ። 2ዪኒ̇ፖ ዎሃ ኢያ ቃቻ̇ሪ ኤ̈ጚ ጋዲን ኣቂሲዛ ጲላ̈ጦ̈ሳብ ኣ̈ ኢሚ̇ዴ።

3ዬሱ̈ሳ ጋልዳ ፊርዲኖን ቤቃ̇ሪ ኢያ ኣ̈ር ኢሚ̇ኖ ዪሁዶ ፌ ኦ̈ኖ ኢ̈ት ኦ̈ሲምባር ዎይሊን ኣዛ̇ናሪ ዓይዚ̇ ታ̈ጳ ቢሪን ቄ̈ሳ ኣላቃንብኬ ጋድ ጪጛሻንቦ ማሂ ኢሚ̇ዴ። 4ኢናፖ̇ ኢንታ̇ኮ “ና̈ሳ ጺላ̇ዳ ቴ ኢያ ዓይቃብ ኣ̈ር ኢሚ̇ኖ̈ዲ ታ̈ኒ ባላ” ጌይን ኢንታ̇ሬ ኢ̈ኮ “ዓት ኑ̈ና ኣ ሜቴ! ኑ̈ና ኢና ጌልሲዝ ባዚ ባዬ̇” ጌይዴ። 5ኢያሬ ዓይዚ̇ ታ̈ጳ ቢሪን ጾ̈ሳ̇̇ ኬ̈ ጋርታ̇ ላ̈ላ̇ሪ ኢናፖ̇ ኬስኪ̇ዴ፤ ሉካ̇ር ፌ̈ና ሶታ̇ር ዎዴ።

6ቄ̈ሳ ኣላቃን ዓይዚ̇ ታጳ̇ ቢሪን ዲንሪ “ዓና ሚ̈ሺ̇ንዳ ሱ̈ ሚ̈ሽ ማ̈ቂ̇ኖኮታ̇ቦ ዪኒ̇ፌ̈ኖ ሚ̈ሺ̇ንዶ ጾ̈ሳ̇̇ ኬ̈ ጋርቶ̇ ሚ̈ሻ̇ባር ቡሻዚንዳ̇ብ ኮሽ ጊዳካ̇ዬ” ጌይዴ። 7ዪ̈ኮታ̇ቦ ኢንቲ̇ ዎል ዎልኣ ዞሪንቲ̇ኖፖ̇ ዓኒ ኣሳ ጋዳፖ̇ ዬ̈ይኖ ዛቃ̇ንቦ ዱ̈ፊ ቤስ̇ ማ̈ቃ̇ምፔ̇̈ን ና̈ሳ ኦት ኮቺ̇ዛ ሳ̈ዚን ዎጚዴ። 8ዪኒ̇ ጊሻ̇ቦ ዪና̇ ሳ̈ዚንዳ ዓታ̇̈ብ ዬሊ̇ዝ ዲራ̈ስ ሱ̈ ሳ̈ዜ ጌያ ጼይጊንታ̇ሬ።

9ዪኒ̇ባራ ና̈ባ ኤርማ̈ሲ “ኢስሬ̈ላ ናኣን ኢ ዋ̈ጊን ዓና̇ ማ̈ቆ̇ ጋ̈ር ሶ̈ሊኖን ዓይዚ̇ ታ̈ጳ ቢሪን ኤኪ̇ዴ። 10ጎዳ ታ̈ና ኪ̈ቲ̇ኖንዲፌ̈ን ሚ̈ሺ̇ንዶ ኦት ኮቺ̇ዝ ና̈ሳ ሳ̈ዚምቦ ጪጊ̇ዴ” ጌዪ ካ̈ዪኖ ካ̈ዪን ፎቲንታ̇ዴ።

ዬሱ̈ሳ ጲላ̈ጦ̈ሳ ቲ̈ን ፊርዳብ ሺ̈ሺ̇ዴ

ማ̈ርቆ̈ሳ 15፡2-5፤ ሉቃ̈ሳ 23፡3-5፤ ዋ̈ኒ̇ሳ 18፡33-38

11ዪኒ̇ባራ ዬሱ̈ሲ ጋዲን ኣቂሲዛ ጲላ̈ጦ̈ሳ ቲ̈ን ሺ̈ቂዴ ጲላ̈ጦ̈ሳር ኢ̈ኮ “ኣን ኔ ኣይሁድ ካ̈ታ?” ጋ̈ር ኦይጪ̇ን ዬሱ̈ሳር ኢ̈ኮ “ኣ ኔ ጌይኖንዲፌ̈ኔ” ጋ̈ር ማሂዴ። 12ቄ̈ሳ ኣላቃንኬ ጋድ ጪጛሻን ኢያ ሞ̈ቲን፥ ኢ ኣባካር ሶ̈ሊ ማሃካ̇ይ ኣቲ̇ዴ። 13ኢናፖ̇ ጲላ̈ጦ̈ሲ ኢ̈ኮ “ዓን ኔ ጋልዳ ኣ̈ፊን ባዝባር ኔ̈ና ሞ̈ታምባ̇ራ ኔ ሲስካ̇ባሳ?” ጋ̈ር ኦይጪ̇ን፥ 14ኢያር ኣሳን ኢ ጋልዳ ሺ̈ሺ̇ኖ ሞ̈ታን ጋርታ̇ፖ̇ ሜላ ኣቲ̇ን ፔታ̇ኒምባር ሶ̈ሊ ማሃካ̇ይ ኣቲ̇ን ጋዲን ኣቂሲዛ̈ዲ ዎይሊን ጋራ̇ሚንቲ̇ዴ።

15ጋዲን ኣቂሲዛ̈ዲ ላይ ላይ ፋሲጋ ባ̈ልባራ ዎርዣ ፌ̈ብ ቢሊንቶ̇ ጌዪ ኦይጪ̇ዝ ቃሺንቲ̇ኖ ኣሳን ጋርታ̇ፖ̇ ቢሊ̇ ሚሺዝ ዎጋ ኢ̈ብ ዎ 16ዪኒ̇ባራ ዉጫ ኦ̈ሳባር ኤሪንቲ̇ኖ ባርባ̈ና ጌይዛ ቃቺ̇ንቲ̇ኖ ኣሲ ፔታ̇ን ዎ። 17ዎይሊን ኣሲ ሺ̈ቂኖ ጋርታ̇ ጲላ̈ጦ̈ሲ ኢንታ̇ኮ “ቴ ዪንታ̇ብ ኦ̈ና̇ ቢላ̇ምፔ̇̈ን ኮዪ̈ራ? ባርባ̈ናቤ ዎይ ክርስቶ̈ሳ ጌይንቲ̇ኖ ዬሱ̈ሳ ቢላ̇ኖ?” ጋ̈ር ኦይጪ̇ዴ። 18ኢ ዪኖ̇ ጌይኖንዳ ኣሳን ዬሱ̈ሳ ቂና̈ታባር ኢ ኩሽታ̇ ኣ̈ ኢሚ̇ኖን ኤራዚንኮታ̇ቦ። 19ጲላ̈ጦ̈ሲ ፊርዳንዳብ ፊርዳ ቤስ̇ ጋልዳ̇ ዶኢንዶ̈ን ኢ ማጪ̇ን ኢ̈ብ ኪ̈ታ ሚሻራ “ዓ ና̈ሳ ጺላ̇ ኣሴ፤ ኔ ኢ ጋልዳ ኣባክ ኢ̈ታ̇ ባዝ ኦ̈ፔ̇፥ ዓታ̇ብ ቃም ኢ ጊሻቦ ኣይቦ ታ̈ና ዎይሊን ዋዪሙታ̇ ኣቂኔ” ጋ̈ዴ። 20ዪና ኢዝባራ ቄ̈ሳ ኣላቃንኬ ጋድ ጪጛሻን “ባርባ̈ኒ ኑ̈ብ ቢሊንቶ̇! ዬሱ̈ሲ ሶቲንቶ̇” ጋ̈ሪ ኦይጫ̇ምፔ̈ን ዎርዣ ዞሪዴ። 21ጋድ ኣቂሲዛ̈ዲ “ዓን ና̈ምኣን ጋርታ̇ፖ̇ ቴ ዪንታ̇ብ ኦ̈ና̇ ቢላ̇ምፔ̈ን ኮዪ̈ራ?” ጋ̈ር ማ̈ቃ̇ር ዎርዣ ኦይጪ̇ን ኢንታ̇ሬ “ባርባ̈ኒ ኑ̈ብ ቢሊንታ̇ምፔ̈ን ኮዪ̈ሬ” ጋ̈ር ማሂዴ። 22ጲላ̈ጦ̈ሲ “ዓት ዪ̈ዶኮ ክርስቶ̈ሳ ጌይዛ ዬሱ̈ሳ ቴ ዎዛ̈ርታ̇ኖ?” ጌይን ዎይን “ኢ ሶቲንቶ̇” ጋ̈ር ማሂዴ። 23ጋዲን ኣቂሲዛ̈ዲ “ኣባቦ? ኢ ኦ̈ኖ ኢ̈ታ ባዚን ኣብዛ?” ጋ̈ር ኦይጪ̇ን ኢንታ̇ሬ “ኢ ሶቲንቶ̇” ጌዪሙታ ጉጃር ዉይሲዴ። 24ጲላ̈ጦ̈ሲ ባዝ ዓና̇ ዋች ዲንርዶኬ ሜላ ኣባካር ማ̈ዲ̇ዝ ባዚ ባዮ̇ን ቤቃ̇ሪ “ና̈ሳ ዓ ዓይቂምቦ̇ ቴ ኦይጪንታ̇ባሴ ኦይጪንቲዛን ዪንታ̇” ጋ̈ር ዎርዣ ቲ̈ን ዋ̈ባር ፌ ኩሺን ሜ̈ጪ̇ዴ። 25ዎርዣ ዎይ “ኢ ዓይቂን ኮታ̇ብ ዬ̈ዝ ጎይሊንዳ̇ ኑ̈ባኬ ኑ ናኣንቦ ማ̈ቆ̇” ጌይዴ።

26ኢናፖ̇ ጲላ̈ጦ̈ስ ባርባ̈ና ኢንታ̇ብ ቢሊ̇ ሚሻሪ ዬሱ̈ሳ ጋራ̇ፊሳሪ ሶታ̇ምፔ̈ን ኢንታ̇ብ ኣ̈ ኢሚ̇ዴ።

ዎታ̇ዳራን ዬሱ̈ሳ ጋልዳ ቃልዲዴ

ማ̈ርቆ̈ሳ 15፡16-20፤ ዋ̈ኒ̇ሳ 19፡2-3

27ኢናፖ̇ ጲላ̈ጦ̈ሳ ዎታ̇ዳራን ዬሱ̈ሳ ኤ̈̇̈ሪ ጲላ̈ጦ̈ሳ ጊቢ̇ን ጋርታ̇ ኤ̈ጚዴ። ኢንታ̇ሬ ሜላን ዎታ̇ዳራን ዎይ ኢ ቡጊዲምባ̇ር ሺ̈ሺ̇̈ዴ። 28ኢ ኣፊሊን ኢ ጋልዳፖ̇ ቃ̈ሪ ፋይሪ ዞቃ ኣፊላ ኢያ ማኢሲዴ። 29ኣጚባር ዳዲ̇ኖ ዛውዳ ኢ ቆም ጋልዳ ጋዲ̇ዴ፤ ኢ̈ብ ኡሻቻ̇ ኩሺን ጋርታ̇ ማ̈ቃ ኤይሪ ኢ ቲ̈ን ቡቂ̇ንታ̇ር ኢ̈ኮ “ኣይሁዳ ካ̈ታ̇ዶ ሳሮ!” ጌዪሙታ̇ ኢ ጋልዳ ቃልዲ̇ዴ። 30ኢ ጋልዳ ጩቲ̇ ኢ ኩሽቶ ማ̈ቂን ኤካ̇ር ኢ ቆሚ̇ን ቆሚ̇ን ቡኪ ኤ̈̇ዴ። 31ኢ ጋልዳ ቃልዲኖፖ̇ ዓኒ ኢ ጋልዶ ዞቃ ኣፊሊን ኬሳ̇ሪ ኢ ኣፊሊን ቲ̈ኖን ማኢሳር ኢያ ሶታ̇ንዳብ ኤኪ̇ ሉኪ̇ዴ።

ዬሱ̈ሳ ሶቲ̇ዴ

ማ̈ርቆ̈ሳ 15፡21-32፤ ሉቃ̈ሳ 23፡26-43፤ ዋ̈ኒ̇ሳ 19፡17-27

32ጲላ̈ጦ̈ሳ ጊቢ̇ን ጋርታ̇ፖ̇ ኬስካ̇ምባራ ሲሞ̈ና ጌይዛ ቄሬ̈ና ጋዶ̇ ና̈ሳ ዲጛሪ ዬሱ̈ሳ ማስቃ̇ሊን ዎልቃ̇ባር ኢያ ቶ̈ሲ̇ዴ። 33ዪኒ̇ፖ ዓኒ ጎልጎታ ጌይዝ ቤስ̇ ዬሊ̇ዴ። ኢዝ ቢርሺቺ̇ንዳ “ኣሳ ቆም ጎይስ” ጌንቴ̇። 34ኢናፖ̇ ጪሽ̇ባር ቡሺኖ ዎይና ጃ̇ ኡሽካ̇ምፔ̈ን ኢ̈ብ ኤኪ̇ ዬይዴ፤ ኢያር ቁ̈ቂ̇ ቤቃ̇ሪ ኡሽካ̇ብዳ ጌዪ ኢጺ̇ዴ። 35ኢያ ሶቲ̇ኖፖ̇ ዓኒ ኢ ኣፊሊን ማላሪ ኢጻ ቶጛር ኤኪ̇ዴ። 36ኢናፖ ኢና ዶኣር ኢያ ና̈ጊ ኤ̈̇ዴ። 37ኢንቲ̇ ኢያ ሶቲ̇ኖን ኣባብኮ ኣሲ ኤራምፔ̈ኒ “ዓ̈ዲ ኣይሁዳን ካ̈ታ ዬሱ̈ሳ” ዪዝ ጋ̈ሪ ጻ̈ፋር ኢ ቆማቻ̇ ማስቃ̇ሊን ጋልዳ ካጲዴ። 38ዪና̇ ኢዝባራ ናምኢ ፋ̈ና̇ን ዬሱ̈ሳባራ ፔታ̇ና ኡሻች ጎይ ፔታ̇ና ዓዲርስ ጎይ ሶቲ̇ዴ።

39ጎይምባር ኣ̈ዝ ኣሳን ኢያ ቆ̈ሙታ̇ኬ ፌ ቆም ዚጊ̇ሙታ̇፥ 40“ኣን ኔ ጾ̈ሳ̇̇ ኬ̈ ዪርዲ̇ሳራ ዓይዚ̇ ቃምባር ማሃ ኬ̈ጻ̇̈ሬ ጌያ ኬርፊዝ ና̈ሳዲ! ዓት ዪዚ ኔ ኔ̈ና ፋኔ! ኔ ጾ̈ሳ̇̇ ናእኮ ማስቃ̇ሊን ጋልዳ̇ፖ̇ ሶ̈ባቤ!” ጌይዴ።

41ቄ̈ሳ ኣላቃን፣ ሙ̈ሳ ሂጋ̇ ታማ̈ርሲዛንኬ ጋድ ጪጛሻንባር ዎልኣ ዪና̇ ኢዝፌ̈ን ጌዪሙታ̇ ኢ ጋልዳ ቃልዲ̇ዴ። 42“ኢ ሜላን ፋዴ፥ ፌ̈ና ፋንዳብ ዳንዳኣካ̇ዬ! ኢ ኢስሬ̈ላንቦ ካ̈ትኮ ዓት ኢ ማስቃ̇ሊን ጋልዳ̇ፖ̇ ሶ̈ቦጋ̈ቤ ኑ̈ናር ኢያ ኣማ̇ናንዳ! 43ኢ ጾ̈ሳ̇̇̈ባር ኣማ̇ኒንቲ̇ኔ ‘ታ̈ኒ ጾ̈ሳ̇̇ ናኤ’ ጌይኔ። ዪ̈ኮታ̇ቦ ጾ̈ሳ̇̇ ኢያ ካ̈̈ርኮ ዓት ኢያ ፋ ጋ̈ቤ!” ጌይዴ። 44ኢባር ዎልኣ ሶቲ̇ንቲኖ ፋ̈ና̇ንር ዪና̇ ኢዝፌ̈ን ኢያ ቆ̈ዴ።

ዬሱ̈ሲ ዓይቂ̇ዴ

ማ̈ርቆ̈ሳ 15፡33-41፤ ሉቃ̈ሳ 23፡44-49፤ ዋ̈ኒ̇ሳ 19፡28-30

45ሌሂ ሳኣ̈ታፖ̇ ኤ̈̇ር ሳ̈ካሊ ሳኣ̈ታ ዬሊ̇ዝ ዲራ̈ስ ሳ̈ዚን ማ̇ዴ። 46ሳ̈ካሊ ሳኣ̈ታ ጋልዳ ዬሱ̈ሲ “ኤሎ̈ሄ! ኤሎ̈ሄ! ላ̈ማ ሳባቅታ̈ኒ?” ጋ̈ሪ ፌ ቆ̈ን ሾክ ዎታ̇ሪ ዉይሲዴ። ኢዝ ቢርሺቺ̇ንዳሬ “ቴ ጾ̈ሳ̇̈ዶ! ቴ ጾ̈ሳ̇̈ዶ! ኔ ታ̈ና ኣባብ ኣሺ̇ዬ?” ጌንቴ̇። 47ኢና ኤቃ̇ር ዎ ኣሳን ጋርታ̇ፖ̇ ፔታ̇ን ፔታ̇ናን ዪኖ̇ ሲስካ̇ሪ “ዪ ኢ ኤ̈ላ̈ሳ ጼይጊ̈ሬ!” ጌይዴ። 48ዪና̇ ኢዝባራ ኢንታ̇ ጋርታ̇ፖ̇ ፔታ̇ናዲ ፉ̈ታ̇ ፌ̈ኖ ባዝ ኤካ̇ሪ ሶ̈ሪኖ ዎይና ጃ ጋርታ̇ ዱ̈ኪ̇ ኬ̈ሳር ማ̈ቃ ሲን ጋልዳ ቃጲሳሪ ዬሱ̈ሲ ኡሽካምፔን ኢ̈ብ ኤኪ̇ ዬይዴ። 49ሜላን “ኔ ዋይሲ̇ኔ! ኤ̈ላ̈ሲ ዬ̈ሪ ኢያ ፋምፔ̈ንኮ ኑ ቤ̈ቆ̇!” ጌይዴ። 50ዬሱ̈ሲ ናምኢ ፌ ቆ̈ ሾክ ዎቲ ዉይሲዴ፥ ኢናፖ̇ ኢ ካ̈ሲን ኬ̈ስካ̇ዴ። 51ዪና̇ ኢዝባራ ጾ̈ሳ̇̇ ኬ̈ ጋርቶ̇ ማጋራ̈ዣ̈ዲ ኖ̈ናፖ̇ ጻና ዬላ̇ር ዳርኣር ና̈ምኢ ፋጊንቲ̇ዴ። ሳ̈ዛር ኤንኢ̇ዴ ዛ̈ላ̇ዳር ቆ̈ቂንቲ̇ዴ። 52ዱ̈ፋንር ፊርቂ̇ንቲ̇ዴ ቲ̈ን ዓይቂ̇ኖ ዎይሊን ጌ̈ሻ ኣሳንሬ ዓይቃ ጋርታ̇ፖ̇ ዲንዲ̇ዴ። 53ኢንታ̇ር ዱ̈ፊ ጋርታ̇ፖ̇ ኬስካ̇ሪ፥ ዬሱ̈ሲ ዓይቃ ጋርታ̇ፖ̇ ዲንዲ̇ኖፖ̇ ዎሃ ጌ̈ሻ ካታሚን ዬሩሳ̈ላም ጋርታ̇ ጌሊዴ፥ ኢናር ዎይሊን ኣሲ ኢንታ̇ ቤ̈ቂዴ። 54ማታላቃ̈ዳኬ ኢባር ዎልኣ ዬሱ̈ሳ ና̈ጊዛን ሳ̈ዚ ኤንኢኖምቢ̇ኬ ማ̈ቂ̇ኖ ባዛን ቤቃ̇ሪ ዎይሊን ኢ̈ጫ̇ሪ “ኪን ዓ ጾ̈ሳ̇̇ ናኤ” ጌይዴ። 55ጎት ኤቃ̇ር ኢያ ቤቂ̇ዝ ዎይሊን ማጫ̇ን ኢና ዎ። ዪን ጋሊላፖ̇ ኤ̈̇ሪ ዬሱ̈ሳ ማ̈ዲ̇ሙታ̇ ኢ ዎሂን ዬ̇ ዎ ኣሳን። 56ኢንታ̇ ጋርታ̇ፓ̇ሬ ማ̈ራማ ማግዳሎንዶ̇፣ ዓይቆ̈ባኬ ዮ̈ሴ̈ፋ ኢንዲ̇ን ማ̈ራሞ፣ ማ ዛብዶ̈ሳ ናኣን ኢንዲ̇ንዳ̇ር ኢንታ̇ባር ዎ። 57ሳ̈ዚን ቃ̈ሚን ዮ̈ሴ̈ፋ ጌይዛ ኣርማታ̈ሳ ካታሚን ጋርታ̇ ዶኢዝ ፔቲ̇ ዱር ኣስዶ̈ሪ ኢና ዬይዴ። ኢያሬ ዬሱ̈ሳ ታማ̈ሪዬ። 58ኢ ጲላ̈ጦ̈ሳክ ሉካ̇ሪ ዬሱ̈ሳ ኣሂን ፌ̈ብ ኢማ̇ምፔ̈ን ጌሺዴ። ጲላ̈ጦ̈ሳሬ ኣሂን ኢ̈ብ ኢማ̇ምፔን ኪ̈ቲ̇ዴ። 59ዮ̈ሴ̈ፊ ኣሂን ኤካ̇ሪ ኦራ ኣፊላባር ጻቂዴ። 60ሹች ማሳ̇ር ፌ ቆማ̇ብ ጌ̈ዚንኖ ኦራ ጎሪ ዎዶን ኢዝ ጋርታ̇ ኢያ ዱ̈ኪ̇ዴ። ኢናፖ̇ ዓኒ ጴች ሹች ፊርሳሪ ዱ̈ፊን ካሪን ዪብጻር ሉኪ̇ዴ። 61ማ̈ራማ ማግዳሎ̈ንዲኬ ሜላር ማ̈ራሚ ጋ̈ዚንዲክ ኢና ዱ̈ፊን ቲ̈ን ዶኢኔ። 62ኢዝ ዎንን ቄ̈ሪ ጋላሲ̇ ቄ̈ሳ ኣላቃንኬ ፋራሳ̈ዋን ዎልኣ ጲላ̈ጦ̈ሳኮ ሉካ̇ሪ፥ 63“ላ̈! ዓ̈ ና̈ሳ ኣስ ባሊዛ ዚቃንታ̇ ዓይቃ̇ናፖ̇ ቲ̈ኒ ‘ታ̈ኒ ዓይዚ̇ ቃማ̇ፖ̇ ዎሃ ዓይቃ ጋርታ̇ፖ̇ ዲንዳ̈ሬ’ ጌዪ ሶ̈ሊኖን ኑ̈ክ ኤልቅ ጋ̈ዴ። 64ዪዚ ኢ ታማ̈ራን ሉካ̇ሪ ኢ ኣሂን ዉ̈ቂ̇ ኤካ̇ሪ ዎርዣኮ ‘ዓዲሼ ዓይቃ ጋርታ̇ፖ̇ ኢ ዲንዲ̇ኔ’ ጋ̈ካ̇ይፌ̈ኒ ዱ̈ፊን ዓይዚ̇ ቃም ዬሊ̇ዝ ዲራ̈ስ ና̈ጊንታ̇ምፔ̈ኒ ኪ̈ታ̇ቤ። ዪ ባዪ ኣቴ̇ጌይን ዎሃ ባሊዚንዳ ቲ̈ን ኑ̈ና ባሊኖምፖ̇ ሺ̈ሬ” ጌይዴ። 65ጲላ̈ጦ̈ሳሬ “ና̈ጊዝ ዎታ̇ዳራን ዎ፥ ሉካ̇ሪ ዪንቲ̇ ኤራዚንዲፌ̈ኒ ና̈ጊሲብቴ” ጌይዴ። 66ዪ̈ኮታ̇ቦ ኢንቲ̇ ሉካ̇ሪ ሹቺ̇ን ጋልዳ ማይታማ ቡካ̇ሪ ዱ̈ፊን ዛባባር ና̈ጊሲዴ።

Currently Selected:

ማ̈ቶ̈ሳ 27: ኦጫ̈ቃማ

Highlight

Copy