ማ̈ርቆ̈ሳ 12
12
ዎይና ታ̈ኪልቲ̇ን ቤሳ̇ ጋርታ̇ ኦ̈ዝ ኣስ ሚሳ̈̇ሊ
ማ̈ቶ̈ሳ 21፡33-46፤ ሉቃ̈ሳ 20፡9-19
1ኢናፖ̇ ዬሱ̈ሲ ኢንታ̇ብ ሚሳ̇̈ሊባር ሶ̈ሊ̈ርዶ̈ሪ “ፔቲ̇ ኣስዶ̈ሪ ዎይና ታ̈ኪልቲ̇ን ቶካ̇ር ኢዝ ቡጊዲንባራ ጋሲ ጋሲሳሪ፣ ዎይና ኣ̈ፊን ጪ̈ጪዝ ዶ̈ቺ̇ ቦ̈ኪ̇፣ ኢዝ ጋልዳ ዶኣር ና̈ጋንዳብ ሻካ̇ ሻኪ̇ሺ፥ ዪን ዎይ ዎታሪ ኣሳብ ኪራያ ኢማ̇ር ሜላ ጋዳ̇ ሉኪ̇ዴ። 2ዎይኒን ካጻ̇ር ሺ̈ሺዝ ኬሊ̇ ዬሊ̇ን ካጺ̇ኖ ኣ̈ፊምፖ ፌ̈ብ ኤሄ̈ምፔ̇̈ኒ ፌ ኣይላን ጋርታፖ̇ ፔታ̇ና ኪራያ ኤኪ̇ኖ ኣሳንኮ ኪ̈ቲ̇ ሚሺዴ። 3ኢንታ̇ር ና̈ሳ ኤ̈̇ ቡኪ̇ ቡካ̇ር ሜላ̇ ማሂ ሚሺዴ። 4ጋዲን ባ̈ባ ዓታ̇ር ኢንታ̇ኮ ሜላ ኣይላ ሚሺን ኢንታ̇ር ና̈ሳ ቡኪ̇ ቆ̈ቃ̇ር ዬ̈ሊ̇ር ሚሺዴ። 5ና̈ሳ ዓታ̇ር ሜላ̇ ኣይላ ሚሺን ኢያ ኤ̈̇ ዎዴ። ዓታ̇ር ዎይሊን ኣስ ሚሺን ኢንታ ጋርታፖ ፔታ̇ን ፔታ̇ናን ቡኪ̇ ዶካ̇ን ዎዴ።
6ዓት ኢ̈ብ ኣቲ̇ኖንዳ ፌ ካዝ ናኣ ሚሻዚን ሙታ̇። “ዪዚ ታ ናኣ ሚሺኖኮ ኢ̈ብ ኢ̈ጪ̇ዝዳ” ጋ̈ር ቆፓ̇ሪ ዉርሲ ጋልዳ ፌ ናኣ ፔታ̇ና ሚሺዴ። 7ኣሳንር “ዪ ዋ̈ና̇ ኢ ቤሲ̇ን ኤኪ̇ዛ̈ዳ ባያ? ዓይ ዬብቴ ኑ ኢያ ዎስቶ፤ ኑ ኢያ ዎ̈ጌይን ቤሲ̇ን ኑ̈ብ ኣታ̇ሬ” ጌዪ ዎልዎልኣ ዞሪንቲ̇ዴ። 8ኢናፖ̇ ና̈ራ ኤ̈̇ ዎር ዎይና ታ̈ኪልቲን ጋርታ̇ፖ̇ ቡጊድ ኬሳ̇ር ቶጚዴ።
9ዪዚ ዪንቲ ቆፓ̇ምባራ ዎይና ታ̈ኪልቲን ላ̈ ዎዛርቲዛ ማይጺ̈ራ? ዬ̈ሪ ኦ̈ዝ ኣሳን ዎይ ዎሪ ታ̈ኪልቲን ቤሲ̇ን ሜላ ኣሳብ ኢሚ̇̈ሬ። 10ዪንቲ̇ ጾ̈ሳ̇̇ ቃ̈ላ ጋልዳ̇፥
“ ‘ሹች ኬ̈ ኬ̈ጺዝ ኣሳን ሌቂ̇ ቶጚኖ ሹቺ̇ንዳ፤
ኢዛ ኬ̈ንቦ ኮዪንታ̇ዝ ዋ̈ና ̇ሹች ማ̈ቃ̇ዴ፤ 11ዪ ዎቲኖ ጾ̈ሳ̇̇̈ዳ። ኣ̈ፍባር ቤቃ̇ምባራ ኑ̈ብ ዎይሊን ጋራ̇ሚሲዝ ባዜ’ ጌዪ ጻ̈ፊኖን ናባ̇ቢ ቤቃካ̇ያ?” ጌይዴ።
12ዬሱ̈ሲ ዪኖ̇ ሚሳ̇ሊን ሶ̈ሊኖን ኢንታ̇ብ ማ̈ቂኖን ኤሪኖኮታ̇ቦ ኢያ ኤ̈̇ንዳብ ኮዪንዶ̈ን ዎርዣ̈ብ ኢ̈ጫ̇ሪ ኢያ ኣሻ̇ር ሉኪ̇ዴ።
ሮ̈ማ ካ̈ታ̈ቦ ጊ̈ራ ጊ̈ራንዳ̇ብ ኮሺ̇̈ርቤ ኮሺ̇ባ̈ሳ?
ማ̈ቶ̈ሳ 22፡15-22፤ ሉቃ̈ሳ 20፡20-26
13ዬሱ̈ሲ ሶ̈ላዝ ሶ̈ሊንባር ኢያ ኮራምፔ̇̈ኒ፥ ፋራሳ̈ዋንፕኬ ሄሮዶ̈ስ ኣሳን ጋርታ̇ፖ̇ ፔቲ̇ ፔቲ̇ ኣሳን ኪ̈ቲንታ̇ር ኢ̈ክ ሉኪ̇ዴ። 14ዪን ኣሳን ዬሱ̈ሳክ ዬ̈ሪ “ኣስታማ̈ራ̈ዶ! ኔ̈ኒ ኪን ሶ̈ላዚን ኣሳብ ኢ̈ጫ̇፥ ኣሳ ኣ̈ፋብ ዬ̈ልቃር ፔቲ̇ ባዝ ዎታባሶን፥ ጾ̈ሳ̇̇ ጎይንዶ ኪንባር ታማ̈ርሳዚን ኑ ኤሪ̈ሬ። ዓት ኑ̈ኒ ሮ̈ማ ጋዲን ካ̈ታ ቄ̈ሳ̈ራቦ ጊ̈ራ ጊ̈ራንዳ̇ብ ኮሺ̇ርቤ ኮሺባ̈ሳ? ኑ ጊ̈ራኔቤ ኣታ̇ኔ?” ጌዪ ኦይጪ̇ዴ።
15ኢያር ኢንታ ቆፊን ኢ̈ቲን ኤራሪ “ኣባብ ዪንቲ ታ̈ና ሶ̈ላባር ኮራንዳብ ኮዪ̈ራ? ዎይዲቴ ፔቲ̇ ሳንቲ̇ ዪንቲ ኤሄይን ቴ ቤቃ̇ስቶ” ጌይዴ። 16ኢንቲ̇ ኢ̈ብ ሳንቲ̇ን ኤሄይን “ዓ ሳንታ̇ ጋልዳ ዎ ሚሲላ̈ዲኬ ሱ̈ምዲክ ኦያ̇?” ጋ̈ር ኢንታ ኦይጪ̇ን ኢንታር “ሮ̈ማ ጋዲን ካ̈ታ ቄ̈ሳ̈ራዬ” ጌዪ ማሂዴ።
17ኢያር ጋ̈ሪ “ዓት ዪ̈ዶኮ ቄ̈ሳ̈ራኮን ቄ̈ሳ̈ራቦ፥ ጾ̈ሳ̇̇̈ኮን ጾ̈ሳ̇̇̈ብ ኢሚ̇ብቴ” ዪዝ ጋ̈ር ማሂን፥ ኢንታ̇ር ኢ ሶ̈ሊ ማሂኖ ሶ̈ሊንባራ ጋራ̇ሚንቲዴ።
ዓይቃ ጋርታ̇ፖ̇ ዲንዲዝ ጎይ ኦይጪ̇ኖ ኦይች
ማ̈ቶ̈ሳ 22፡23-33፤ ሉቃ̈ሳ 20፡27-38
18ኣሲ ዓይቂ̇ኖፖ̇ ዓኒ ዲንዲባ̈ሴ ጌይዝ ሳዱቃን#12፡18 ሳዱቃን ኣይሁድ ዜርዶ̈ሪ ኢንታ̇ ጋርታ̇ፖ ዎይሊንን ቄ̈ሳ። ቄ̈ሳ ኣላቃር ማ̈ቂ̇ን ኢንታ̇ ጋርታ̇ፖ̇ ሹሚንቲ̈ሬ። ዪን ኣሳን ኣሲ ዓይቂ̇ኖፖ̇ ዓኒ ማ̈ቂ̇ ዲንዳዚንዲኬ ኣፎ ኪ̈ታንቻ̇ን ዎን ኣማ̇ኒባ̈ሴ። ዬሱ̈ሳክ ዬ̈ሪ፥ 19“ኣስታማ̈ራ̈ዶ! ሙ̈ሶ ፔቲ̇ ሂጋ̇ ጻ̈ፊ ኑ̈ብ ኢሚ̇ርዶሪ ‘ፔቲ̇ ኣሲ ማጫ̇ ኤካ̇ሪ ናኢ ዬላካ̇ይዶ̈ር ዓይቄጌ̈ንዶ፥ ጌ̈ዳዲ ኢ ማጪ̇ን ማሃሪ ኢ̈ብ ናኢ ዬሊሶ ጋ̈ቤ’ ጋ̈ር ጻ̈ፊኔ። 20ሌሂ ኢና̇ኢ ኢ̈ብ ዎ ፔቲ̇ ኣስ ዎዶ̈ሪ ማጫ̇ ኤካ̇ሪ ናኢ ዬላካ̇ይዶ̈ር ዓይቂዴ። 21ኢ ኡንኪን ጋልዶ̈ዲ ኢ ማጪ̇ን ማሂ ኤካ̇ሪ ኢያሬ ናኢ ዬላካ̇ይዶ̈ር ዓይቂ̇ዴ። ዓይዚ̇̈ዳሬ ዪና̇ ኢዝፌ̈ኒ ኣሲን ኢዞ ማሂ ኤካ̇ሪ ናኢ ዬላካ̇ይዶ̈ር ዓይቂ̇ዴ። 22ዪንዲስቲ̇ ሙታ̇ ታብዛን ዎይ ናኢ ዬላካ̇ይዶ̈ር ዓይቂ̇ን ዉርሲ ጋልዳ ኣሲንዳ̇ሬ ዓይቃ̇ዴ። 23ዪዚ ታብዛን ዎይ ኣሲን ኢዞ ኤኪ̇ኖኮታ̇ቦ ዓይቃ ጋርታ̇ፖ̇ ዲንዲ̇ዝ ቃምባራ ታብዛን ጋርታፖ ኢዛ ኦ̈ብ ማጫ̇ ማ̈ቃ̈ራ?” ጌይዴ።
24ዬሱ̈ሲ ኢንታኮ “ዪንቲ̇ ጾ̈ሳ̇̇ ቃ̈ላዲኬ ጾ̈ሳ̇̇̈ ዎልቃ ኤሪባ̈ሶኮታ̇ቦ ባሊቲ̇̈ሬ” ጌዪ ማሂዴ። 25“ዓይቂኖ̈ን ዲንዳ̇ሪ ኣፋ ዎ ኪ̈ታንቻ̇ንፌ̈ን ዶኢ̈ርዶኬ ኣቲናር ማጫ̇ ኤኪ̇ባ̈ሴ ማጫ̇ር ኢስቲ̇ባ̈ሴ። 26ዓይቃ̇ ጋርታፖ ዲንዲዛ ጎይ ማ̈ቄ̇ጌይን፥ ቆ ጋርታ̇ ታማ ኤይቲ̇ርዶ̈ን ጾ̈ሲ̇ ታሚን ጋርታፖ̇ ሙ̈ሳቦ ሶ̈ሊ̈ርዶ̈ሪ ‘ታ̈ኒ ኣብራሃ̈ማ፣ ዪሳ̈ቃ፣ ዓይቆ̈ባ ጾ̈ሳ̇̇̈ዳ’ ጌይኖን ዪንቲ ሙ̈ሳ ማጻ̈ፊን ጋልዳፖ ናባ̇ቢ ቤቃካ̇ያ? 27ጾ̈ሳ̇̇̈ዲ ሼምፓ ባሮን ጾ̈ስዶኬ ዓይቂ̇ኖን ጾ̈ስ ጊዳካ̇ዬ።#12፡27 ሼምፓ ባሮን ዪ ጌይኖ̈ዲ ጾ̈ሳ̇̇ ኣማ̇ኒኖ ኣሳን ሳ̈ዳ̇ ኣይሻባር ዓይቂናካሬ ዓይቃ ጋርታ̇ፖ̇ ዲንዳ̇ር ሼምፓባር ሜናብ ዶኢዛኮታ̇ቦ። ዪ̈ኮታ̇ቦ ዪንቲ ዎይሊን ባሊቲ̇ኔ” ጌይዴ።
ጾ̈ሳ̇̇ ኪ̈ታን ዎይን ጋርታ̇ፖ ሺዚን ዎኒ̇ያ?
ማ̈ቶ̈ሳ 22፡34-40፤ ሉቃ̈ሳ 10፡25-28
28ሙ̈ሳ ሂጋ̇ ታማ̈ርሲዝ ኣሳን ጋርታ̇ፖ̇ ፔታ̇ና̈ዲ ኢንቲ̇ ዎልኣ ፋላማዚን ሲሲኪ̇ዴ። ኢናፖ̇ ዬሱ̈ሲ ኢንታብ ኮሺንቺ̇ ማሂኖን ቤቃ̇ር ኢ̈ክ ኡካ̇ሪ “ጾ̈ሳ̇ ኪ̈ታን ዎይን ጋርታ̇ፖ̇ ሺዚን ዎኒ̇ያ?” ጋ̈ሪ ኢያ ኦይጪ̇ዴ።
29ዬሱ̈ሲ ኢ̈ኮ “ዎይ̈ፖ̇ ሺዝ ጾ̈ሳ̇̇ ኪ̈ቲንዳ ‘ኢስሬ̈ል ዎርዣ̈ዶ! ሲስካ̇ቤ፥ ጎዳ ኑ ጾ̈ሳ̇̇̈ዲ ፔቲ̇ ጾ̈ሴ̇። 30ኔ̈ኒ ኔ ጎዳ ጾ̈ሳ̇̇̈ዳ ፎቲ ቡ̈ዳባራ፣ ፎቲ ቆፊባራ፣ ፎቲ ዎልቃባራ ዶሳቤ’ 31ናምኢንዳሬ ‘ኔ ኔ̈ና ካዚንዲፌ̈ኒ ኣስ ዎይ ካቤ’ ዪዝ ጋ̈ዚንዶ። ዪን ናምኣንፖ ኣ̈̇ዝ ሜላ ኪ̈ቲ ባዬ̇” ጋ̈ር ማሂዴ።
32ና̈ሳ ዬሱ̈ሳኮ “ኣስታማ̈ራ̈ዶ! ኔ ጋ̈ርዶራ ጾ̈ሲ̇ ፔታ̇ኔ፥ ኢ̈ፖ̇ ሜላ ባዬ̇ ዪዝ ጋ̈ር ሶ̈ሊኖን ኪን፤ 33ጾ̈ሳ̇̇̈ዳ ፎቲ ቡ̈ዳባራ፣ ፎቲ ቆፊባራ፣ ፎቲ ዎልቃባራ ዶሳዚንዲኬ ኣስ ዎይ ኔ ቆሚ̇ንዲፌ̈ኒ ዶሳዚንዳ̇፥ ጾ̈ሳ̇̇̈ቦ ታማ ጋርታ̇ ሚቺ̇ኖ ዣ̈ርሽኬ ሜላ ዣርሻ ሺሻ̇ዚምፖ̇ ሺ̈ሬ” ጌይዴ።
34ና̈ሳ ኮሺንቺ̇ ቆፓ̇ር ማሂኖን ዬሱ̈ሲ ቤቃ̇ሪ “ኔ̈ኒ ጾ̈ሳ̇̇ ካ̈ቲቲ ጋልዳፖ ኤሳ ጎቲ̇ኖ ኣስ ጊዳካ̇ዬ” ጌይዴ። ዪኒ̇ፖ ዓኒ ዬሱ̈ሳ ኦይች ኦይጫ̇ንዳብ ዎይ ኢ̈ጪ̇ዴ።
ክርስቶ̈ስ ኢ ኦ ናኣ?
ማ̈ቶ̈ሳ 22፡41-46፤ ሉቃ̈ሳ 20፡41-46
35ዬሱ̈ሲ ጾ̈ሳ̇̇ ኬ̈ ጋርታ̇ ታማ̈ርሲ̈ርዶ̈ሪ “ሙ̈ሳ ሂጋ̇ ታማ̈ርሲዛን ዎዛርፌ̈ኒ ‘ክርስቶ̈ሲ ዳ̈ዊታ ናኤ’ ጌይራ? 36ዳ̈ዊቲ ፌ ቆማ̇ብ ጌ̈ሻ̇ ኣያ̇ናባር ሶ̈ሊርዶር ጌዪ፥
ጎዳ̈ዲ ቴ ጎዳ̈ኮ ‘ታ̈ኒ ኔ ጻላ̈ታን ጋሚዝ ዲራ̈ስ ታ̈ብ ኡሻች ጎይ ዶኣቤ ጌይዴ’ ጌይሬ።
37ዳ̈ዊቲ ፌ ቆማ̇ብ ኢያ ‘ጎዴ’ ጌዪ ሙታ̇ዶ̈ሪ ዓት ዎዛርታ̇ር ክርስቶ̈ሲ ኢ̈ብ ናኢ ማ̈ቂ̈ራ?” ዪዝ ጌዪ ኦይጪ̇ዴ።
ዎይሊን ኣሲ ኡፋይስባር ኢ̈ኮን ሲስኪዴ።
ዬሱ̈ሲ “ሙ̈ሳ ሂጋ̇ ታማ̈ርሲዝ ኣሳን ጋልዳፖ̇ ና̈ጊንቲ̇ብቴ” ጌይዴ
ማ̈ቶ̈ሳ 23፡1-36፤ ሉቃ̈ሳ 20፡45-47
38ዬሱ̈ሲ ታማ̈ርሲ̈ርዶ̈ሪ “ጳሪን ኣፊላ ማኣር ጌዳክ ዓኒክ ዬ̇፥ ጋቢ ጋልባራ ኣሲ ኢንታ̇ ዎይሊን ቦንቺ̇ ሳሮ ጋምፔ̈ኒ ኮዪዝ ሙ̈ሳ ሂጋ̇ ታማርሲዛን ጋልዳፖ̇ ዪንቲ̇ ዪንታ̇ ና̈ጊብቴ̇። 39ኢንቲ̇ ኣይሁዳን ዎ̈ሳ ኬ̈ ጋርታ̇ ዎይፖ̇ ቲ̈ን ኣ̈̇ር ሾክ ጌይኖ ቤስ̇ ጋልዳ ዶኣንዳ̇ብ ኮዪ̈ሬ። ዲጊ̇ሳ ጋርታ̇ር ቦንች ቤስ̇ ዶኣንዳ̇ብ ኮዪ̈ሬ። 40ማቃ̇ር ሜላ̇ ፌ̈ና ቤይሳ̇ንዳ̇ብ ዎ̈ሳ ጳሪንሬ። ኣስኒ ዓይቂ̇ኖ ማጫ̇ን ኣ̈ል ጋርታ̇ ዎ ባዝ ሙዪ ዉርሲ ኢንታ̇ ዎርባይ̈ሬ። ዪ̈ኮታ̇ቦ ዎይፖ ሺዝ ፊርዳ ኢንታ̇ብ ዎ” ጌይዴ።
ኣስኒ ዓይቂ̇ኖ ፔቲ̇ ማጪ̇ን ኢሚ̇ኖ ባዝ
ሉቃ̈ሳ 21፡1-4
41ዬሱ̈ሲ ጾ̈ሳ̇̇ ኬ̈ን ጋርታ ማባ ሺ̈ሺ̇ዝ ሳ̈ጺኒን ቲ̈ን ዶኢንዶ̈ን፥ ዎይሊን ኣሲ ሚ̈ሽ ኤሄ̈ር ሳ̈ጺኒን ጋርታ̇ ሚሻምባር ቤቂ̇ዴ። ዱራን ዎይሊን ሚ̈ሽ ኤሄዪ ሚሺዴ። 42ኣስኒ ዓይቂ̇ኖ ፔቲ̇ ማጫ̇ ዎርባያዶ̈ራ ፔቲ̇ ሳንቲ ላ̈ሚንታ̇ምፔ̈ኖ ናምኢ ባካ̇ና ኤሄ̈ር ቶጛዴ። 43ዬሱ̈ሲ ፌ ታማ̈ራን ጼይጋሪ “ቴ ዪንታ̇ክ ኪን ጋ̈ሬ፥ ዓና̇ ሳ̈ጺኒን ጋርታ̇ ሚ̈ሺ̇ ሚሺኖ ኣሳን ዎይን ጋርታፖ̇ ሺሻር ቶጚኖንዳ ኣስኒ ኢዝቦ ዓይቂ̇ኖን ዓና̇ ዎርባዪንዶ። 44ኣባ ጌዬጌይንዶ፥ ሜላን ዎይ ፌ̈ብ ዎ ቆሊን ጋርታፖ̇ ፌ̈ብ ጊዳር ሺኖ ባዝ ሚሺኔ። ኢዛ ዎርባያዶ̈ራ ፌ̈ብ ኣባካር ኣሻ̇ካ̇ይዶ̈ራ ዎ ባዚን ዎይ ኤሄ̈ር ሚሻዴ” ጌይዴ።
Currently Selected:
ማ̈ርቆ̈ሳ 12: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
