ማ̈ርቆ̈ሳ 8
8
ዬሱ̈ሲ ኦይዲ ሙኩላ ኣስ ፊ̈ሺ ሙሲዴ
ማ̈ቶ̈ሳ 15፡32-39
1ዪና̇ ኢዝ ኬሊ̇ንባራ ዎይሊን ዎርዦ ኢ̈ክ ማ̈ቃር ሺ̈ቂዴ፤ ኢንታ̇ብ ሙይዝ ባዝ ባዮ̇ኮታ̇ቦ ዬሱ̈ሲ ፌ ታማ̈ራን ጼይጋር ኢንታ̇ኮ፥ 2“ኣሳን ዓን ታባር ዓይዚ̇ ቃም ዶኢኔ። ኢንቲ̇ ሙይዝ ባዚ ባዮ̇ ኮታ̈ቦ ኢንታባዚን ታ̈ና ዎይሊን ሚቻ̇ዴ። 3ዓና̇ ጋፍሲንቲ̇ኖንዲፌ̈ኒ ቴ ኢንታ ኣ̈ል ሚሼ̈ጌይንዶ ኢንታ ጋርታ̇ፖ̇ ፔታ̇ን ፔታ̇ናን ጎት ቤሳ̇ፖ̇ ዬይኖኮታ̇ቦ ዳ̈ቡራር ጎይምጋል ኬዲዝዳ” ጌይዴ።
4ኢ ታማ̈ራን ኢ̈ኮ “ኣሲ ባዮ̇ ቤሳ̇ ዓ ጋርታ ዓ ዎይ ዎርዣ̈ብ ጊዲዝ ፊ̈ሺ ዎይዲፖ ቤንቲ̇̈ራ?” ጌይዴ። 5ዬሱ̈ሳር “ኣ̈ፊን ሶ̈ላ̇ ዪንታ̇ክ ዎ?” ጋ̈ር ኦይጪ̇ን፥ ኢንታ̇ር “ታብዛ ሶ̈ላ̇ ሙታ̇ ኑ̈ክ ዎ” ጌይዴ።
6ኢያሬ ዎርዣ̈ኮ “ዪንቲ̇ ሳ̈ዳ ዶኢብቴ̇” ጋ̈ሪ ታብዛ ሶ̈ሊ̇ን ኤካ̇ር ጾ̈ሳ̇̇ ጋላቲኖ̈ፖ ዓኒ ዳርሲ̇ ዳርሳ̇ሪ ዎርዣ ዎይ ዬልምፔ̈ኒ ፌ ታማ̈ራንቦ ኢሚ̇ዴ፤ ኢንታ̇ሬ ዎይ̈ን ዬልዴ። 7ኢሺት̇ ሞላሬ ሙቃ̇ ዎዶ̈ን ዪና ኢዝቦ ጾ̈ሳ̇̇ ጋላታሪ ዎርዣ ዬልምፔ̈ኒ ፌ ታማ̈ራን ኪ̈ቲ̇ዴ። 8ዎርዣ ዎይ ሙዪ ሚሽኪ̇ዴ። ኢናፖ̇ ኢንቲ̇ ሙይን ሺኖ ዶካ̇ ታብዛ ሌ̈ማታ ኩም ሺ̈ሺ ዲንዴ። 9ሙይኖ ኣሳንር ኦይዲ̇ ሙኩላ ማ̈ቂሬ። ዬሱ̈ሲ ዎርዣ ሚሺኖፖ ዓኒ፥ 10ፌ ታማ̈ራንባር ዎል ማ̈ቃ̇ር ጎጛባር ዳልማኑ̈ታ ጌይዝ ቤስ̇ ሉኪ̇ዴ።
11ፋራሳ̈ዋን ዬሱ̈ሳክ ዬ̈ሪ ኢባር ፋላማ ኤ̈̇ዴ። ኢያ ፋ̈ጫ̇ንዳብ ኮያሪ “ኣፋፖ̇ ማላ̇ ኑ̈ና ቤይሳቤ” ጋ̈ር ኦይጪ̇ዴ። 12ዬሱ̈ሳር ፌ ቡ̈ዳባር ዎይሊን ሹ̈ናሪ “ዓታ̇ባሮ ኣሳ̈ዲ ማላ̇ ቤቃ̇ንዳብ ኣባብ ኮዪ̈ራ? ቴ ዪንታ̇ብ ኪን ሶ̈ላሬ፥ ዪ̈ፌ̈ኖ ባዝ ኣባካር ዪንታ̇ብ ኦ̈ንቲባ̈ሴ” ጌይዴ። 13ኢናፖ̇ ኢንታ ኣሻ̇ሪ ጎጛ ጋርታ̇ ጌላሪ ጌዳ ፊ̈ን ፊ̈ጚዴ።
ዬሱ̈ሲ “ፋራሳ̈ዋን ታማ̈ርሲዝ ቲሚርቲ̇ን ጋልዳ̇ፖ̇ ዪንታ̇ ና̈ጊብቴ” ጌይዴ
ማ̈ቶ̈ሳ 16፡5-12
14ዬሱ̈ሳ ታማ̈ራን ሶ̈ላ̇ ኤ̈ካ̇ይ ቦቲጚኖኮታ̇ቦ ጎጚን ጋርታ ፔቲ̇ ሶ̈ላ̇ ሙታ̇ ዎዶኬ ሜላ ኣባካር ባዬ̇። 15ዬሱ̈ሲ ኢንታኮ “ፋራሳ̈ዋንፕኬ ሄሮዶ̈ስ ኢርሺን ጋልዳፖ̇ ዪንቲ̇ ና̈ጊንቲ̇ብቴ” ጋ̈ሪ ኪ̈ቲ̇ዴ።
16ኢንታ̇ሬ “ዪና̇ ኢ ጌይኖንዳ ኑ ሶ̈ላ̇ ኤ̈ካ̇ዮኮታ̇ቤ̇ ኣባብ ዶ̈ኔ?” ዪዝ ጋ̈ር ዎልዎልኣ ሶ̈ሊንቲዴ።
17ዬሱ̈ሲ ኢንቲ ቆፒ̇ኖን ኤራሪ ኢንታኮ “ዪንቲ ‘ኑ ሶ̈ላ̇ ኤ̈ካ̇ዮ ኮታ̇’ ጋ̈ሪ ዎልዎልኣ ኣባብ ሶ̈ሊራ? ዪንታ̇ብ ዓታ̇ር ኣባካር ጌላካ̇ዮ ኣሳ? ዪንታ̇ ቡ̈ዳ ዓታ̇ር ፊርቂ̇ንታካ̇? ጌይዴ። 18ኣ̈ፊ ዪንታ̇ብ ዎ፥ ቤቂ̇ ዲጚባ̈ሳ? ዋይ ዪንታ̇ብ ዎ፥ ሲስኪባ̈ሳ? ዪንታ̇ብ ዎዛ̈ርታ̇ር ኤልቅ ጋ̈ባሳ? 19ታ̈ኒ ኢሺ̇ን ሶ̈ሊ̇ን ኢሺ̇ን ሙኩላ ኣሳብ ዳርሳ̇ር ኢሚ̇ን ኢንቲ ሙይን ሺኖ ኣ̈ፊን ሌ̈ማታ ኩም ዲንቴ?” ጋ̈ር ኦይጪ̇ን፥ ኢንታሬ “ታጶ̇ ናምኢ ሌ̈ማታ ኩም” ጌይዴ።
20“ዪና̇ ኢዝፌ̈ኒ ታብዛ ሶ̈ሊ̇ን ኦይዲ̇ ሙኩላ ኣሳብ ዳርሳ̇ር ኢሚ̇ን ኢንቲ ሙይን ሺኖ ኣ̈ፊን ሌ̈ማታ ዲንቴ?” ጋ̈ር ኦይጪ̇ን ኢንታሬ “ታብዛ ሌ̈ማታ ኩም” ጌይዴ።
21ኢያሬ “ዓት ዪዲኮ ዪና̇ ዪንታ̇ብ ኣባብ ኤልቅ ጋ̈ካ̇ይ ኣታ̇?” ጌይዴ።
ዬሱ̈ሲ ቤ̈ቴሳይዳ ኣ̈ፊ ዎቢ̇ኖ ፔቲ̇ ኣስ ፋዴ
22ዬሱ̈ሳኬ ኢ ታማ̈ራንኬ ዎልኣ ቤ̈ቴሳይዳ ጋዝ ቤሲ̇ን ዬይኖፖ ዓኒ ኣሳን ኣ̈ፊ ዎቢ̇ኖ ፔቲ̇ ኣስ ዬሱ̈ሳክ ኤሄ̈ሪ ፋምፔ̈ን ኢያ ጌሺዴ። 23ኢያሬ ና̈ሳ ኣ̈ፍ ዎባ̇ ኩሺን ኤ̈̇ሪ ኢ ዎ ቤሲ̇ምፖ̇ ቡጊድ ኢያ ኬሳ̇ሪ፥ ኢ ኣ̈ፋን ጋልዳ ጩቲ̇ኖፖ̇ ዓኒ ፌ ኩሺን ኢ ጋልዳ ጋዳ̇ሪ “ዓት ኔ ኣ̈ፊን ኣባክ ቤቂ̇ ዲጛ̈ራ?” ጋ̈ር ኦይጪ̇ን፥ 24ኢያር ሾክ ጋር ቤቃ̇ሪ “ኣ̈፥ ኣሲ ዬዛ ታ̈ብ ቤንቲ̇̈ርዶ̈ኒ፥ ሚ ኤንኢዛ̈ዲፌ̈ን ማይጻር ታ̈ብ ቤንቲ̇̈ሬ” ጌይዴ።
25ዬሱ̈ሲ ዓታ̇ር ናምኢ ፌ ኩሺን ና̈ሳ ኣ̈ፋን ጋልዳ ጋዲ̇ን ዪና̇ ኢዝባራ ኢ ኣ̈ፊን ፋጺን ጎት ዎ ባዛር ዎይ ኮሺንቺ̇ ቤቃ̇ንዳብ ዳንዳኢዴ። 26ኢናፖ̇ ዬሱ̈ሲ ናሳ̈ኮ “ዎዳ ኔ ዎ ቤሲ̇ን ማ̈ቃ̇ ሉካፔ፥ ኢናሬ [ኦ̈ባክ ኣባካር ሶ̈ላፔ̇]” ዪዝ ጋር ኢያ ኣ̈ል ሚሺዴ።
ዬሱ̈ሲ ክርስቶ̈ሳ ማ̈ቂኖን ጴ̈ጥሮ̈ሲ ሶ̈ሊዴ
ማ̈ቶ̈ሳ 16፡13-20፤ ሉቃ̈ሳ 9፡18-21
27ዬሱ̈ሲ ፌ ታማ̈ራንባር ዎል ማ̈ቃ̇ሪ ፊልጶ̈ስ ቂሳ̈ራ ጌይዝ ቤስ̇ ቡጊድ ዎ ቤሳ̇ን ጋርታ̇ ሉኪ̇̈ርዶ̈ር ጎይምጋልዳ “ኣሳ ታ̈ና ኦ̈ና ጌይራ?” ጋ̈ሪ ፌ ታማ̈ራን ኦይጪ̇ዴ።
28ኢንታ̇ሬ “ፔታ̇ን ፔታ̇ናን፥ ጻማ̇ቂዛ ዋ̈ኒ̇ሳ ጌይሬ፤ ሜላን ኤ̈ላ̈ሳ ጌይሬ፤ ዶካ̇ን ናባን ጋርታ̇ፖ ፔታ̇ና̈ዳ ጌይሬ” ዪዝ ጋ̈ር ማሂዴ።
29“ዓት ዪዶኮ ዪንቲ ታ̈ና ኦ̈ና ጌይራ” ጋ̈ር ኦይጪ̇ን፥ ጴ̈ጥሮ̈ሲ ኢ̈ኮ “ኔ̈ኒ ክርስቶ̈ሳ” ጌይዴ።
30ዬሱ̈ሳር ኢንታኮ “ዪኖ̇ ኦ̈ባካር ሶ̈ላፒ̇ቴ” ጋ̈ር ኪ̈ቲዴ።
ዬሱ̈ሲ ፌ ዓይቃ̇ዚን ቲ̈ኒታር ሶ̈ሊዴ
ማ̈ቶ̈ሳ 16፡21-28፤ ሉቃ̈ሳ 9፡22-27
31ዬሱ̈ሲ ፌ ታማ̈ራንኮ “ጋዳ ጪጛሻን፣ ቄ̈ሳ ኣላቃንኬ ሙ̈ሳ ሂጋ̇ ታማ̈ርሲዛን ታ̈ና ኣሳ ናኣ ዎይሊን ሌቂ̇̈ሬ፥ ማ ዎ̈ሬ። ማ̈ቂ̇ናካሬ ታ̈ኒ ዓይዚ̇ ቃምባራ ዓይቃ ጋርታ̇ፖ̇ ዲንዳ̈ሬ” ጋ̈ር ታማ̈ርሲዴ። 32ኢ ዪና̇ ኢንታ̇ብ ፋል̇ ሶ̈ሊን፥ ጴ̈ጥሮ̈ሲ ጌዳ ዱማ ኢያ ኤ̈ጛሪ “ኔ ዎሃ ዪፌ̈ኖ ባዝ ሶ̈ላ̈ፔ̇” ዪዝ ጌዪ ኢያ ጎይሊዴ።
33ዬሱ̈ሲ ጋስ ቢሪንቲ̇ ፌ ታማ̈ራን ቤቂ̇ ሙታ̇ዶ̈ር ጴ̈ጥሮ̈ሳክ ጋ̈ሪ “ኣን ዓ̈ ሴ̈ጣና! ኔ ታ ላፋፖ̇ ፋካ̇ቤ፤ ኔ̈ኒ ኣሲ ቆፒ̇ዛ̈ዲፌ̈ንዶኬ ጾ̈ሳ̇̇ ቆፒ̇ዛ̈ዲፌ̈ን ቆፓ̇ባሴ” ዪዝ ጋ̈ር ኢያ ቆዲ̇ዴ።
34ኢናፖ̇ ዓኒ ዬሱ̈ሲ ዎርዣ̈ዳኬ ፌ ታማ̈ራን ጼይጋሪ “ቴ ዎሂን ዬ̇ንዳብ ኮዪዝ ኣሲ ፌ ቆማ̇ብ ቆፓ̇ዚን ኣሾ̇ጋ̈ቤ፤ ፌ ማስቃ̇ሊን ቶ̈ካ̇ር ቴ ዎሂን ዬ̇ጋ̈ቤ። 35ፌ ሼምፒ̇ን ጋዳ̇ንዳ̇ብ ኮዪዝ ኣሲ፥ ኢዞ ይሲ̇̈ሬ፤ ቴ ጊሻ̇ብኬ ዎጛላ ጊሻብ ጋ̈ሪ ፌ ሼምፒ̇ን ኣ̈ ኢሚ̇ዛ̈ዲ ፌ̈ና ፋ̈ሬ። 36ኣሲ ኣላማ ጋልዶ ቆሊን ዎይ ዲጛር ዱሪታሪ፥ ኢ ሼምፒ̇ን ዬ̈ጌንዶ ኢያ ኣ ማ̈ዳ̇̈ራ? 37ኣሲ ፌ ሼምፒን ቤስ̇ ማ̈ቂዝ ባዝ ኣብዝ ጪጋ̇ንዳ̇ብ ዳንዳኢ̈ራ? 38ዓ ጾ̈ሳ̇̇ ጎይን ዬ̇ንዳ̇ብ ኮዪባ̈ሶ፥ ናጋራንቻ̇ ዓቶ̇ ኣሳ ቲ̈ን ታ ሱ̈ምን ጼይጊ̈ንታምባርኬ ታ ቃ̈ሊን ሶ̈ሊንታምባራ ዬ̈ልቂዝ ኣሲ ዎይ፥ ታ ኣሳ ናኣ̈ዲ ታ ባ̈ባ ቦንቻ̇ ባርኬ፥ ጌ̈ሻ ኪ̈ታንቻንባር ዬ̈ርዶ̈ር ቴ ኢያ ቤቃ̇ር ዬ̈ልቃ̇̈ሬ!” ጌይዴ።
Currently Selected:
ማ̈ርቆ̈ሳ 8: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
