Jenesis 7
7
Nuarin tas alupas 7.
1 Et apan anliin nelcau a Noa, im ilpu hal o un, im niji itai umumoh. 17 Et atupun nahgarero u inwai, um alupas, i itu.
1IS ika a Ihova ehele Noa, Namu apam aiek anliin nelcau, im ilpu hal unyum asega; ek idim ato ainyak mika na upene aiek an nuhup unyak ira atimi asega an nopan inig.
2Namu lucsei aiek niji obotpot itai eklim edo irai pece upene asega, yi seven im seven ehni, natamaig im natahig: im lep niji obotpot, itai eklim edo irai pece eti upene asega, yi aro um aro ehni, natamaig im natahig.
3Im lep niji man an nauanohatag yi seven im seven ehni, natamaig im natahig; vai erupu umumoh ara um ahad an nobohtan asega.
4Etu wit ti pan itac nadiat inyi seven, ekpu ika ainyak yi ehe an nobohtan ira adiat inyi forte im nepig inyi forte; ekpu auahas niji itai umumoh asega ainyak an nobohtan kis ago ainyak.
5Is ago nedo asega inigki a Noa is asaig ehelen a Ihova.
6Is umoh a Noa irai mesese is siks huntret (600), ja is par ahgarero nobohtan.
7Is apan anliin nelcau a Noa, im ehtaij halav atamaig o un, im ehgan, im ehgai ehtaij halav atamaig o un, va nahgarero u inwai.
8Im lep niji itai eklim edo irai pece upene, im niji itai eklim edo irai pece eti upene, im niji man, im niji itai atahas asega an nobohtan,
9eris apan ara ehele Noa anliin nelcau, um aro um aro ehni, natamaig im natahig, is idivaig is asaig a Atua ehele Noa.
10Is ti pan itac nadiat is seven, ja is atupun um ahgarero nobohtan.
11An mesese siks huntretd irai Noa, im inmohoc sekunt, im nadiat seventiind, an nadiat iyehki is erijai injap, um asalgei intapnes an nohatag.
12Is ehe an nobohtan ira adiat is forte im nepig is forte.
13Is apan anliin nelcau a Noa an nadiat iyehki, im Sem, im Ham, im Jefed, ehtaij halav atamaig u Noa, im ehgai Noa, im ehgai ehtaij halav atamaig o un;
14im lep niji obotpot itai eklim edo irai pece aleg asega, im niji obotpot itai eklim edo irai pece auata upene asega, im niji obotpot itai atahas an nobohtan asega, im niji obotpot man asega.
15Eris apan ehele Noa anliin nelcau niji itai umumoh asega, um aro um aro ehni.
16Eris apan iran niji itai umumoh asega, natamaig im natahig, is idivaig is asaig ehelen a Atua: is atapnes iran a Ihova.
17Is ehe ira adiat is forte; is alupas inwai, is ahlaahos nelcau ijinies an nobohtan.
18Is esjilid inwai um ahgarero nobohtan; is ahman nelcau an narasin wai.
19Is esjilid acen inwai an nobohtan; is um atalulu niji au alupas asega ithan nohatag.
20Is ahga inwai, um ahlau jai irai kubit is fiftiin, um atalulu niji au.
21Eris emesmas niji itai umumoh asega an nobohtan, inman, im niji itai eklim edo irai pece auata upene, im niji itai eklim edo irai pece aleg, im niji itai asega et atahas au nobohtan, im lep natimi asega:
22eris idim emesmas niji itai umumoh asega au nobohtan.
23Ers auahas niji itai umumoh asega an nobohtan, natimi, im niji itai eklim edo irai pece, im niji itai atahas, im niji man an nauanohatag; eris auahas ra an nobohtan: is umoh ache a Noa, im lep ra eris amen ehelen ara anliin nelcau.
24Is esjilid inwai an nobohtan ira adiat is wun huntret im fifte.
Currently Selected:
Jenesis 7: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
