Joanes 3

Nuarin-tas alupas 3.

1IS eteuc natimi is ethi irai ilpu Farisi, nidan Nikotimus, is atimi alupas u nupu Jutaia aien:

2is apan aien ehele Iesu an nepeig, um ika ehelen, Ak Rabai, ecra ato aijama, nikavaig, na atimi esege ahes ehele Atua aiek: et elika vaig tah natimi nagovaig niji auritai elika iji eigki na ago aiek, el et eti amen ehelen a Atua.

3Is tas ehelen a Iesu, um ika, Et idim inivaijec ineig ek asaig ehelum ainyak mika, El eh eti lep apos tah natimi, inyi elika vai yin necetaivaig nelcau o Atua.

4Is um ika ehelen a Nikotimus. Uhpu lep ehvapos natimi ineig et mun efatimi aien? et elika vai yin napanvaig an nipjinetgai risin, mika uhpu lep apos yin.

5Is um ika a Iesu, Et idim inivaijec ineig ek asaig ehelum ainyak mika, El eh eti lep apos tah natimi an wai im lep an Nesgan Upene, inyi ehka vai yin napanvaig an nelcau o Atua:

6et ohun nitai ineig er apos an nohun; ja et esgan nitai ineig et apos a Nesgan Upene:

7jim imyiali vai intas ineigki aiek ek mun asaig ehelum ainyak mika, Eris idim ika uhpu lep apos caua:

8et ispun iji nimtinjop, na ahgei nohran aiek, jam eti ato inuarin ineig et ahes iran, im inuarin ineig et apan iran: et um ucco natimi agega et apos ra a Nesgan Upene.

9Is tas a Nikotimus, um ika ehelen, Etpu ehveteuc nitai iji eigki?

10Is tas a Iesu, um ika ehelen, Na atimi esege aiek imi nupu Isreel, jam eti ato nitai iji eigki?

11Et idim inivaijec ineig ek asaig ehelum ainyak mika, Ecra tas aijama va nitai iji eigki ecra ato aijama, um asuptecnaig nitai iji eigki, ecris almoi aijama; ja eka eti eteuc an tas unyima aijaua.

12El eka eti imyiisjis ninivaijec aijaua ek wat tas ehelemia ainyak va niji itai an nobohtan, akupu imyiisjis ninivaijec aijaua um uauo, el ek tas ehelemia ainyak va niji itai an nohatag?

13Is eti aridjai an nohatag tah natimi, aien ache is ahes an nohatag aien um asuol, Inhal o natimi, et amen aien an nohatag.

14¶ Is atijai nimyiv an namasacen a Moses, etpu idim ucco eris idim ika uhpu atijai Inhal o natimi:

15va eri eti emesmas a ilpu atimi asgeig iran asega, jam leh nitai umoh iran ineig inyi ti lep ti.

16Is um ucce naiheuc vai iji pece asega o Atua is abrai Inhal o un is eti ache aien, va eri eti emesmas a ilpu atimi asgeig iran asega, jam leh nitai umoh iran ineig inyi ti lep ti.

17Is eti abrai Inhal o un a Atua mika yi asuol pam an nobohtan par ika eri emesmas atimi an nobohtan; ja is abrai yin aien mika yi imyiatamaig atimi an nobohtan aien.

18Eris eti ika etpu mas a natimi ineig et asgeig iran aien: ja eris idim ika etpu mas a natimi ineig et eti asgeig iran aien, va nedo o un, nikavaig, et eti asgeig aien an nidai Inhal o Atua et ethi ache.

19Eris ika erupu emesmas atimi va nedo ura, nikavaig, is ham inlah an nobohtan, ja is aiyu inliinmopoi atimi va naupat, jam has inliinmopura ara vai inlah, va nedo has ura.

20Era amcel vai inlah ara asega era ago nedo has ara, um eti apan u inlah, va eri jim ecetai nedo ura:

21ja et apan u inlah natimi ineig et ago nedo inivaijec aien, mika eri ecetai nedo o un, nedo ineig et ago aien vai Atua.

22¶ Is wat ti pan itac nitai iji eigki, is apan an pece Jutaia a Iesu im ilpu atimi atahaijeg yin; is amen eahki ehele ra aien, um baptiso ira atimi.

23Is lep baptiso ira atimi a Joanes Inon ubutpotet u Selim, is ahinag inwai eahki: eris ahtag pan ehelen natimi, um leh nabaptiso ira ra.

24Eris pam eti ati Joanes anliin neom ipjin an naopan iyehki.

25¶ Im lep ineig, eris imyiisjis jipe inyiri ra a ilpu ahaiji atimi atahaijeg Joanes im nupu Jutaia.

26Eris apan ehele Joanes ara, um ika ehelen, Ak Natimi esege, aien is amen ehelum aien an nahaijin Jortan itac, aien as asuptecnai yin aiek, et idim baptiso ira atimi aien; era ahtag pan ehelen natimi asega.

27Is tas a Joanes, um ika, Et elika vaig tah natimi intup ispun lehvaig tah nitai, el eh eti alupai yin an nohatag.

28Eka idim ato aijaua mika kis ika ainyak, Ek eti Kristo ainyak, ja eris abrai nyak mika ki uhup iran ainyak.

29Aien er aniv yin im natahaig ineig inyi atidai aien, etpu atidai aien: ja et aiji a etoai natimi ineig etpu atidai aien, um atahaijeg yin, um imyiacitak alupas va nohra natimi ineig etpu atidai aien: et idim ucco et esjilid nimyiacitak unyak.

30Eris idim ika etpu esjilid aien, ja ekpu asuol ainyak.

31Aien et ahes an nohatag aien, et esjilid aien irai iji itai asega: aien et ahes an nobohtan aien, et obohtan aien, um tas va nobohtan: aien et ahes an nohatag aien, et esjilid aien irai iji itai asega.

32Et asuptecnaig nitai ineigki aien is ecetai aien um atahaijeg, ja et idim eti leh intas asuptecnaig o un tah natimi.

33Aien is leh intas asuptecnaig o un aien, is ati nitai asjaaicnaig o un aien mika et inivaijec a Atua.

34Aien is abrai yin a Atua et asuptecnaig intas o Atua aien: et idim alupai yin Nesgan Upene a Atua mika yi amen alupas ehelen.

35Et aiyu inliinmopoi Etmak vai Inhal o un, is ati niji itai asega ehelen aien.

36Aien et asgeig irai Inhal o Atua aien, et o un nitai umoh iran ineig inyi ti lep ti: aien et eti asgeig irai Inhal o Atua aien, inyi ti ecetai nitai umoh iran aien; ja et amen iran intavaitap o Atua.

Currently Selected:

Joanes 3: VAO63

Highlight

Copy