Markus 16
16
Nuarin-tas alupas 16.
1IS wat ti pan itac nadiat atumop, ehtijis auarimtan niji itai auanipin upene a Mere nupu Mactala, im Mere risi Jakobus, im Salomi, mika ehtiji apan um aspi yin.
2An nuhihialeg, an nadiat uhup irai wiik, ehtijis apan ahtaij u unmun nij, an nehcohos u nagesega:
3ehtijis tas jipe ahtaij, um ika, Inyi atcelcaig inhat an neucsen mun nij vai cataij a di?
4Ehtijis wat almoi ahtaij, ehtijis ecetai ahtaij inhat eris mun atcelcaig pan an taka uarin: is alupas acen.
5Ehtijis apan ahtaij anliin mun nij, um ecet intakuras is ethi, is ateuc aien an nahaijin matan, is ahi napelumai iran um opra; ehtijis imtitaig ahtaij.
6Is ika ehele ehtaij aien, Jim imtitaig aijautaij: ehtaij ahilek Iesu nup an Nasared aijautaij, eris atgei yin an nauincai atgeig: et mun nusjai aien; et ti aien igcaki: almoi nuarin ineig aijautaij eris ati yin iran:
7ahtijmu atga unyimitaij aijautaij, um asuptecnaig ehele ilpu atimi atahaijeg yin im lep Pitrus, mika et mun uhup pan aien Calili: akupu ecet yin aijaua eahki, et idivaig is upyi asaig aien ehelemia.
8Ehtijis auroauro ahtaij um alau ijo, um ahes u unmun nij, um aha; ehtijis ucjucjucaij ahtaij, um imyiali, um eti tas ehelen tah: ehtijis imtitaig ahtaij.
9¶ Is wat nusjai a Iesu an nuhihialeg an nadiat uhup irai wiik, is upyi hup aien um ehcohos pan ehele Mere nupu Mactala, aien aigki is ahlo ilpu agelo has is seven ehelen aien.
10Is apan aien, um asuptecnaig ehele atimi iji ehki eris amen ehelen ara, eris wat ehtigtaig ara, um imyitai yin.
11Eris wat atahaijeg ara, nikavaig, is mun nusjai aien, um ehcohos pan ehelen, eris eti imyiisjis ninivaijec intas o un ara.
12IS wat ti pan itac nitai iji eigki, is ehcohos pan aien ehele natimi is ero ira ra, an natga urau alaig apan an tah anuarin, ja is eche nohun.
13Erus apan arau um asuptecnaig ehele ilpu etoarau: ja eris eti imyiisjis ninivaijec intas urau ara.
14IS um lep ehcohos pan aien ehele natimi is eleven an nateuc ura um hag, um ated ra va nimyiisjis nahcil ura im nipjin u inliinmopura, nikavaig, eris eti eteuc ara irai tas o atimi iji eigki, eris wat ecet yin ara an nusjai o un.
15Is um ika ehele ra aien, Akumu apan aijaua irai iji pece asega, um asuptecnaig intas-upene ehele atimi asega.
16Aien inyi imyiisjis ninivaijec aien, um leh nabaptiso iran, uhpu imyiatamaig yin; ja aien inyi ti imyiisjis ninivaijec aien, etpu erikinman iran aien.
17Etpu apitac nauritai elika iji eigki ira ra era imyiisjis ninivaijec ara; Erupu ahlo ilpu agelo has ara an nidak; erupu tas ara irai tas mat;
18erupu asjiraig imyiv ara; el era umnyi tah nitai mas vaig ara, inyi ti ucni ra; erupu atijai nikmara ara ira atimi emehe, erupu umumoh ara.
19IS wat tas ehele ra a Natimarid, um aridjai an nohatag, um ateuc an matai Atua.
20Eris apan ara, um asuptecnaig intas irai iji uari pece asega; is auritai ehele ra a Natimarid, um ago ipjin intas ura irai iji auritai ehka is apitac ira ra. Emen.
Currently Selected:
Markus 16: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
