Markus 8
8
Nuarin-tas alupas 8.
1AN naopan iyehki eris asjapicnaig natimi is ahinag, jam eti apos nitai caig incara, is ahlaig vai ilpu atimi atahaijeg yin a Iesu, um ika ehele ra,
2Ek aiheuc va atimi iji eigki ainyak, era amen ehelek an nadiat et eseij, ja et ti nitai caig incara:
3el ek abrai ra ainyak mika eri apan ara irai imnim ura jam eti hag, inyi isji ra ara numlaig an nefalaig: eris ahes irai iji uari pece itac acen a ilpu ahaiji ra.
4Eris um ika ehelen a ilpu atimi atahaijeg yin, Inyi leh nitai caig eda tah par alaa atimi iji eigki an namasacen ineigki?
5Is ika ehele ra aien, Et ehed nareto unyimia aijaua? Eris um ika ara, Et seven ache.
6Is abrai atimi iji eigki aien mika eri ateucse ara an nobohtan: is leh nareto is seven aien, um naaurineig, um iswoplecoplec, um alupai ilpu atimi atahaijeg yin, mika eri alaa ra; eris um alaa atimi asjapicnaig ara.
7Is lep amen ehele ra inhakli numu jam eti elpat: is naaurineig aien, um ika, eri lep alaa ra.
8Eris um hag ara, um gaije: eris asjapicnaig ara nuari itai hegaig eris eti atahni, irai efehcat is seven.
9Ara eris hag ara eris idivaig eris for dausant ara: ja is par adcaijai ra aien.
10¶ Is auroauro aien um aridjai an nelcau, im lep ilpu atimi atahaijeg yin, um apan irai iji uari pece Talmanuda.
11Eris alau ijo a ilpu Farisi, um atupun um imyiisjis itai iran, um ugni yin mika yi ehvaig nauritai elika an nohatag aien, eris oop yin ara.
12Is efadeijai yin aien an nesgan, um ika, Era auri natimi an naopan ineig par ugni nauritai ehka? et inivaijec ineig ek asaig ehelemia ainyak mika, Eri eti ecetai nauritai elika natimi an naopan ineig.
13Is ude ra aien, um lep aridjai an nelcau, um atga o un, um apan alaig an nahaijin eahki.
14Eris eti imyiehva nareto a ilpu atimi atahaijeg yin par apos, is amen ehele ra an nelcau nareto is ethi ache.
15Is ated ra aien, um ika, Akumu aminjinai caua aijaua, um jim leh leven o ilpu Farisi, im lep leven o Herot.
16Eris um tas jipe ehele ra ara, um ika, Et asan tas ineigki aien va nedo uja, nikavaig, inta mun eti apos nareto akaija.
17Is wat ato a Iesu, is ika ehele ra aien, Eka auri aijaua par tas jipe ehelemia, um ika, Inta mun eti apos nareto akaija? eka ato itai aijaua, um aktaktai, ka oʼo? et echamecha inliinmopomia aijaua um uhum pam?
18Et eteuc nesganimtamia, ja eka eti alum itai aijaua; um eteuc intikgamia, ja eka eti ahgei itai aijaua, um eti imyiehva itai.
19Kis wat iswoplecoplec nareto is ikman ainyak um alaa atimi is faiv dausant, akis asjapicnaig nuari itai hegaig is aled aijaua, um atohoaig irai efehcat is ehed? Eris um ika ehelen ara, Is twelv.
20Im lep ineig, is wat seven nareto par alaa atimi is for dausant, akis asjapicnaig nuari itai hegaig is aled aijaua, um atohoaig irai efehcat is ehed? Eris um ika ara, Is seven.
21Is um ika ehele ra aien, Eka auri aijaua par eti aktaktai?
22IS apan aien Bedseta; eris imyiapan ehelen natimi is ethi ara is aupat nesganimtan, eris ugni yin ara mika yi atcei pan yin.
23Is asjiraig nikmai natimi iyehki aien is aupat nesganimtan, um imyiapan yin an taka uarin; is agdei nesganimtan aien, um atijai nikman iran, um ika ehelen, Na mun ecetai tah nitai aiek, ka oʼo?
24Is um asalgei nesganimtan aien, um ika, Ek alum atimi atga ainyak, ja era idivaig nauicai ara.
25Is um lep atijai nikman an nesganimtan aien, um ika ehelen yi lep asalgei; is um lah upene nesganimtan aien, is um almuktit atimi asega aien.
26Is abrai yin aien mika yi apan an nimnim o un, um ika, Jim apan an nuarin-pece ineigki, um jim asuptecnaig ehelen tah an nuarin-pece.
27IS apan a Iesu irai iji uari-pece Sisaria Filipai, im lep ilpu atimi atahaijeg yin: eris wat atga ara an nefalaig, is ahodai ilpu atimi i atahaijeg yin aien, um ika ehele ra, Era ika atimi ainyak di aigki?
28Eris ika ara, Nai Joanes aiek Natimi baptiso: ja era ika nahaiji ra, Elaija; um lep ika nahaiji ra, Tah irai ilpu profeta.
29Is um ika ehele ra aien, Eka ika aijaua ainyak di aigki? Is tas a Pitrus, um ika ehelen, Nai Kristo aiek.
30Is acaiji ra aien mika eri jim aniv yin ehelen tah natimi.
31Is atupun aien um esege imi ra, um ika, Etpu idim ahinag nohocred u Inhal o natimi; erupu amcel vai yin a ilpu atimi tas alep, im ilpu atimi ahlap esjilid, im ilpu atimi esege; uhpu atgei yin, ja et wit ti pan itac nadiat inyi eseij, etpu lep nusjai aien.
32Is asan tas ineigki aien, jam eti anvadenaig. Is leh yin a Pitrus, um acaiji yin.
33Ja is ahidai yin aien, um almaijidjid ilpu atimi atahaijeg yin, um acaiji Pitrus, um ika, Apan aiek an nidjik, ak Satana; na eti aktaktai aiek niji itai o Atua, jam aktaktai ache niji itai o atimi.
34¶ Is ahlaig va atimi is ahinag aien, im lep ilpu atimi atahaijeg yin, um ika ehele ra, Aien et ika aien yi ahced nyak, etmu ude nedo j ineig aien et merit vaig aien, um apos nauincai atgeig o un, um ahced nyak.
35Aien et imyicoho yin aien, etpu mas aien; ja aien inyi mas aien vai nyak im lep vai intas-upene, inyi umoh aien.
36Et eti upene vaig tah natimi inlehvaig nobohtan asega, um auahas nesgan.
37Inyi auanimtan nesgan tah natimi anhe?
38Aien et imyiehcamai nyak aien im lep intas unyak an nuhup o ilpu atimi auatatimi, im ilpu atimi ago nedo has an naopan ineig; etpu lep imyiehcamai yin a Inhal o natimi, et wit yetpam aien an natimi alupas o Etman, im ilpu agelo upene ehelen.
Currently Selected:
Markus 8: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
