Hujii Ergamittootaa 11
11
Phexiros Gara Ummata Waaqa Duga'aa Titti Hin Amannee Maali'iif Akka Deeme Ibisuu Isaa
1Arddii Yihuda'aa titti ka argaman ergamittootaa fi obboleeyyan, ummata Waaqa dhuga'aa titti hin amannee dubbii Waaqaa fudhachuu isaan ni dhagayan. 2Phexiros gara Yerusaalemii deebi'ee yeroo deemetti, kristaanonni Yihudotaa worri naamusa gadoomaa titti amanan, 3«Waayee maaliitiif gara mana worra hin gadoominii aseentee isaan woliin nyaate?» jechu'uun ni gilndisaniin. 4Phexiros garuu akkana jechu'uun waan maraa tartiibaan ibisuu jala ni qabe,
5«Ani magaalaa Yophee titti kadhannaa irra uduu jiru yaada hafuuraatiin muldhata ni arge, muldhanni arge'llee wonitti golgata guddaa uffataa fakkaatu, kallattii arffaniin qabamee, sami'ii yoo bu'uu fi gara kiyya yoo dhufu, 6Isa guutadhee yoo laalu, golgata uffataa irratti beeyiladoota, bineensota bosonaa, uumamittoota garaa isaaniitiin lafa irra harkifatanii fi sinbirroota samii irra bararan'llee ni arge, 7‹yaa Phexiros! Ka'iitii qala'aa nyaadhu!› qooniqqa naan jedhu'llee naan jedhu'llee» ni dhagaye. 8Ani garuu, hin ta'u yaa Gooftaa! qulqulluu ka hin ta'in yookiin wonitti battiin afaan kiyya aseenee hin beeku jedhe. 9Garuu yeroo lammaffaa'llee, Waaqinni qulqulluu ka taasise ati batti'i jechuun sirraa hin malu! deebii jedhu, sami'ii ni dhagaye. 10Kun'llee yeroo sadihi eega ta'een duubatti wonitti uffata fakkaatu sun, marrinuu gara sami'ii ni fudhatame. 11Kunoo yeroo sanitti Qiisaariyaa gara kiyya ka ergaman namoonni sadihii gara mana ani keessa turee ni gayan. 12Shakkii tokko malee isaan woliin akka deemuuf'llee, Hafuurri Qulqulluun natti ni hime, obboleeyyan jahaan kunniin'llee ana woliin turan, isaaniin woliin'llee gara mana Qorneelewos jedhamuu ni aseenne. 13Inni'llee maleyikkicha mana isaa keessa dhabatee akka argee fi gara Yophe'ee nama ergitee Phexiros ka dhame Simooniin waamsis, 14inni'llee atii fi maatiin kee marri ka ittiin fayyitan dubbii Waaqaa isinitti ni hima akka isaan jedhe nutti ni hime. 15Ani'llee dubbachuu yeroo jala qabetti, Hafuurri Qulqulluun bifa yeroo jalqaba nuratti bu'eetiin, isaan irratti'llee ni bu'e. 16#HuE 1:5.Yeroo sanitti, Yohaannis bishaaniin ni cuuphe, isin garuu Hafuura Qulqullu'uun ni cuuphamttan jechu'uun dubbii Gooftaan dubbate ni yaadadhe. 17«Nu'u Gooftaa Yesus Kristostti yeroo amannetti Waaqinni kennaa nuuf kenne isaaniif'llee eega kennee duubatti, Waaqa dhoogu'uuf ka danda'u ani eennu!»
18Isaan'llee kana yeroo dhagayanitti waan deebisan dhabanii ni caldhisan, «Eegaa Waaqinni ummata Waaqa dhugaa titti hin amanne'llee, jireenna haarawaan ka isaan gayu dhiifama isaaniif kennee jira» jechu'uun Waaqa ni galateeffatan.
Amanttoonni Anxokiya'aatti «Kristaana» Jedhamuu Isaanii
19 #
HuE 8:1-4. Isxifaanos woqaramee yeroo du'etti waayee ari'atama ka'eetiin amanttoonni bittinaayan, haga Finiqee fi Qophiroos, haga Anxokiyaa'llee ni deeman, dubbii Waaqaa'llee Yihudota qofa malee, kaanniintti hin dubbataniiyyu ture. 20Haa ta'u malee Qophrosii fi Qareena'aa ka dhufan amanttoonni tokko tokko gara Anxokiyaa yeroo deemanitti, Giriikota dabalatee waayee oduu mishaa Gooftaa Yesusii, ni lallaban. 21Gooftaan'llee humnnaan isaan ni gargaara ture, namoonni baay'een'llee amananii gara Gooftaa ni deebi'an.
22Woldaya amanti'ii ta Yerusaalemiin turtte'llee kana waan dhageetteef, Baarnaabaasiin gara Anxokiyaa ni ergiteen. 23Inni'llee deemee Waaqinni kennaa isaa ka bilisaa ummataaf attamitti akka kenne yeroo argetti ni gammade, marrinuu onnee guutu'uun jabaatanii Goofta'aaf amanamoota ta'anii, akka jiraataniif isaan ni gorsse. 24Inni'llee Hafuurri Qulqullu'uu fi amantiin ka itti guuttamtte nama mishaa waan tureef, namoonni laakkofssi isaanii baayi'ee ta'an, gara Gooftaa ni deebi'an.
25Kanaan duubatti Baarnaabaas Saa'oliin barbaaduuf, gara Xerseesii ni deeme. 26Yeroo argateenitti'llee gara Anxokiyaa ni fideen, lamaanuu woggaa tokko guutuu woldayoota woliin tokkummaan ta'anii, namoota baayi'ee ni barsiisan, barattoonni isaa'llee yeroo jalqabaatiif Anxokiya'atti, «Kristaana» jedhamanii ni waamaman.
27Yeroo sanitti barsiisonni nabiyyoota jedhamanii waamaman, Yerusaalemii gara Anxokiyaa ni deeman, 28#HuE 21:10.Isaan keessaa'llee tokko Agaabos ka jedhamu ka'ee, biyya lafaa mara irratti beelli ol aanaan akka ta'u kakaasnssa Hafuura Qulqulluutiin raaga ni dubbate, kun'llee ka ta'e bara nugusa Rooma'aa Klaawudiiyosii titti ture. 29Kanaaf amanttoonni Anxookiyaa jiraatan obboleeyyan Yihudaa jiraataniif, tokkoon tokkoon isaanii akka danddeettii isaaniitiin buusii wolitti baasu'uun, gargaarssi akka ergamuuf ni murteessan. 30Buusii'llee raawwatanii harka Barnaabaasii fi Sa'oliitiin, durssitoota woldayaatiif ni ergan.
Currently Selected:
Hujii Ergamittootaa 11: ArsiDNT
Highlight
Share
Copy
Want to have your highlights saved across all your devices? Sign up or sign in
