Hujii Ergamittootaa 12
12
Kristaanota Irra Ka Gaye Ari'atama Ol Aanaa
1Bara sanitti nugufnni Heerodis namoota woldayaa amanti'ii tokko tokko ari'uu jala ni qabe, 2obboleessa Yohaannisii Yaaqoobiin billayaan ni ajjeesiseen. 3Wonitti kun Yihudotaa akka gammachiiseen yeroo argetti Phexirosiin'llee dabalee ni qabssiiseen, kun'llee ka ta'e guyyoota worri Yihudotaa ayyaana qixxa'aa itti kabajattutti itti ture. 4Phexirosiin eega qabssiiseen duubatti gara mana hidha'aa ni galcheen, ayyaana Yihudotaa ka Faasika'aatiin duubatti haga ummataaf isa dhiyeessuuntti, afur afur ta'anii akka isa eeganiiniif lolttoota afuriitti ni kenneen. 5Kanaaf Phexiros mana hidha'aa titti qabamee ni eeggama ture, garuu woldeenni amantii waayee isaatiif gara Waaqaa, ciminnaan ni kadhatti ture.
Maleyikkichi Phexirosiin Mana Hidha'aatii Akka Baaseen
6Heerodis guyyaa itti aanutti Phexirosiin ummatatti dhiyeessuuf yaadee ture, Phexiros'llee halkan sanitti birbiraata lamaan hidhamee, loltoota lamaan jidduu rafee jira ture, loltoonni kuunniin'llee balbala mana hidha'aa ni eegan ture. 7Yeroo sanitti maleyikkaan Goofta'aa ifatti ni muldhate, mana hidha'aa keessatti'llee ifin ni ife, maleyikkichi'llee Phexirosiin cinaacha dhayee dammaqiseeniiti, «Dadafaan ka'i!» jedheen, birbiraatonni'llee harkiin isaa irraa ni kufan. 8Maleyikkichi'llee, «Uffata kee uffadhu! Kophee kee'llee godhadhu!» ni jedheen. Phexiros'llee akkuma ajajame ni raawwate, maleyikkichi'llee, «Qoola kee uffadhuutii ana horddofi!» ni jedheen. 9Phexiros'llee bayeeti ni horddofeen, muldhata waan argu itti fakkaate malee wonitti maleyikkichi raawwate marrinuu, dhugaa itti hin fakkaanne. 10Wordiyyaa tokkoffa'aatii fi lammaffaa bira dabrranii gara magaala'aa gara ka nama fidhuu gara cufantaa sibiilaa ni gayan. Cufantaan'llee uduma naminni hin tuqiniin akkanumaan isaanii banameeti, bayanii karaa dagale'ee tokkoon dabrranii ni deeman, dimmaa'llee maleyikkichi Phexirosiin biraa fooyamee ni deeme.
11Phexiros'llee gara qalbbii isaa titti deebi'ee, «Gooftaan maleyikkaa isaa ergee harka Heerodisiitii fi ummanni Yihudotaa ni eegan waan turan mara irraa ka ana fayyise ta'uu isaa, amma dhugamaanuu beekee jira» jedhe.
12Kana eega mirkaneeffateen duubatti namoonni baayi'een bakka tokkotti wolitti qabamanii gara bakka itti kadhatanii, gara mana Maariyaamii ni deeme, Maariyaamiin tun'llee haadha Marqoos jedhamuu haadha Yohaannisii turtte. 13Phexiros achi gayee balbala alaa yeroo dhadhayetti, Roodaa ta jedhamtte hojjattuun manaa takka eennuun akka ta'e beeku'uuf jecha, gara balbaalaa ni dhuftte. 14Qooniqqa Phexirosii ta'uu yeroo beekitetti, baay'inna gammachuu isi'ii irra ka ka'een balbala uduu hin banin, fiigiddee gara keessaa aseenitteeti, «Phexiros balbala dhaabatee jira!» jechu'uun ni dubbatte. 15Isaan'llee, «Maraattee jirta!» jedhaniin. Isiin garuu, «Dhugamaanuu isa!» yoo jettu ni mirkaneessite, isaan'llee eegasuu, «Wordiyyicha isaa maleyikkicha ta'a» jedhan.
16Phexiros garuu balbala dhadhayuu itti fufe, isaan'llee balbala bananii yeroo isa arganitti, ni maalalan. 17Inni garuu akka caldhisaniif harka isaatiin akeekee, Gooftaan mana hidha'aatii attamitti akka isa baaseen isaanitti odeesseeti, «Waan kana Yaaqoobii fi amantoota hafanitti'llee himaa» isaaniin ni jedhe. Isaan irraa fooyamee'llee gara bakka bira'aa ni deeme.
18Yeroo bari'etti'llee lolttoonni, «Phexirosiin maalttu irra gayee jira laata?» jechu'uun, haalaan ni jeeqaman. 19Heerodis'llee gara isaatiin Phexirosiin barbaachisee yeroo dhabeenitti, worra wordiyyaa eegan eega qorateen duubatti, akka ajjeeffaman ni ajaje, Saniin duubatti'llee Heerodis Yihuda'aa gara Qisariyaa deemee, achi ni taa'e.
Du'iinssaa Heerodisii
20Heerodis namoota Xiiroosii fi Sidoona'aa irratti haalaan dallanee ni ture isaan'llee tokkumma'aan dhufaniiti, gorssaan nugusaa Bilaasxosii akka isaan gargaaruuf isa kadhatanii, tole eega jecchisiisaniin duubatti'llee nugusicha araara ni gaafatan, Kana'llee ka raawwatan biyyiti isaanii nyaata ka argattu bulchiinsa nugusichaatii waan turef.
21Guyyaa beelamametti Heerodis uffata isaa ka nugusaa uffatee teessoo irra taa'ee, ummataaf haasaya ni taasise. 22Ummanni'llee, «Kun qooniqqa Waaqaati malee, qooniqqa namaatii miti!» jedha'aa ni iyyan. 23Heerodis Waaqaaf ulfinna uduu hin kenniin hafuu isaatiin, bakkumatti maleyikkaan Goofta'aa dhayeeniiti raammayee ni du'e.
24Dubbiin Waaqaa garuu yeroo maraa deebi'ee, babaldhata'aa ni deema ture. 25Baarnaabaasii fi Saa'ol tajaajila isaanii xumuranii, Yerusaalemii gara Anixokiya'aa ni deebi'an, Marqoos ka jedhamu Yohaannisiin'llee, isaan woliin fudhataniinii ni dhufan.
Currently Selected:
Hujii Ergamittootaa 12: ArsiDNT
Highlight
Share
Copy
Want to have your highlights saved across all your devices? Sign up or sign in
