ግብረ ሐዋርያት 4
4
ምዕራፍ 4
በእንተ ቅንአቶሙ ለሊቃነ ካህናት ወመገብተ ምኵራብ
1 #
ሉቃ. 22፥4-52። ወእንዘ ይነግሮሙ ለሕዝብ መጽኡ ሊቃነ ካህናት ወመገብተ ምኵራብ ወሰዱቃውያን። 2ወቀንኡ ላዕሌሆሙ እስመ ይሜህርዎሙ ለሕዝብ ወይነግርዎሙ በእንተ ኢየሱስ ከመ ሐይወ እምዉታን።#ቦ ዘይቤ «ወሕይወተ ሙታን» 3ወአኀዝዎሙ ወአውዐልዎሙ ሙዓለ እስከ ጌሠም እስመ ወድአ መስየ። 4#2፥47። ወብዙኃን ሰብእ እለ ሰምዕዎ ለዝ ነገር ወአምኑ ወኮነ ኍልቆሙ ለዕደው እለ አምኑ መጠነ ኀምሳ ምእት።
5ወእምዝ በሳኒታ ተጋብኡ መላእክት ወረበናት ወጸሐፍት በኢየሩሳሌም። 6ወሐና ሊቀ ካህናት ወቀያፋ ወዮሐንስ ወእለ እስክንድሮስ ወኵሎሙ ዘመደ ካህናት። 7#ማቴ. 21፥23። ወአቀምዎሙ ማእከለ ዐውድ ወሐተትዎሙ ወይቤልዎሙ በኀይለ መኑ ወበስመ መኑ ገበርክሙ ዘንተ አንትሙ።
በእንተ አውሥኦተ ጴጥሮስ
8 #
ሉቃ. 12፥11። ወመልአ መንፈስ ቅዱስ ሶቤሃ ላዕለ ጴጥሮስ ወይቤሎሙ ስምዑ መላእክተ ሕዝብ ወረበናት። 9#ዮሐ. 10፥32። ለእመሁ ንሕነ ንትኴነን ኀቤክሙ በእንተ ረድኤተ ሕሙም ዘኮነ ዮም በምንትኑ እንከ ሐይወ ዝንቱ። 10#3፥15። አእምሩ እንከ ጥዩቀ ኵልክሙ ወኵሉ ቤተ እስራኤል ከመ በስሙ ለኢየሱስ ክርስቶስ ናዝራዊ ዘአንትሙ ቀተልክምዎ ወእግዚአብሔር አንሥኦ እሙታን ወቦቱ ሐይወ ዝንቱ ወቆመ ቅድሜክሙ። 11#ማቴ. 21፥42፤ መዝ. 117፥22። እስመ ውእቱ እብን ዘመነንክምዎ አንትሙ ነደቀት ወውእቱ ኮነ ውስተ ርእሰ ማእዘንት። 12#ማቴ. 1፥21። ወአልቦ ካልእ ሕይወት በዘየሐይዉ ወአልቦ ካልእ ስም በታሕተ ሰማይ ዘይትወሀብ ለዕጓለ እመሕያው።
በእንተ ከሊአ ትምህርት
13ወሶበ ርእይዎሙ ለጴጥሮስ ወለዮሐንስ ከመ ገሃደ ይነግርዎሙ አእመርዎሙ ከመ ሰብእ የዋሃን እሙንቱ ወኢየአምሩ መጽሐፈ ወአንከርዎሙ እስመ የአምርዎሙ ዘልፈ ከመ ምስለ ኢየሱስ ሀለዉ። 14#3፥8-9። ወይሬእይዎ ለዝኩሂ ብእሲ ዘሐይወ ይቀውም ምስሌሆሙ ወኀጥኡ ዘይብሉ ወዘይነብቡ። 15ወአእተትዎሙ ሕቀ እምዐውድ ወተናገሩ በበይናቲሆሙ። 16#ዮሐ. 11፥47። ወይቤሉ ምንተ ንሬስዮሙ ለእሉ ሰብእ ናሁ ተዐውቀ ትምህርቶሙ በኀበ ኵሎሙ እለ ይነብሩ ኢየሩሳሌም ወገሃደ ኮነ ወኢንክል ከቢቶቶ። 17#5፥28። ዳእሙ ከመ ፈድፋደ ኢይብዛኅ በላዕለ ሕዝብ ንገሥጾሙ ከመ ዳግመ ኢይንግሩ በስሙ ለኢየሱስ ለሰብእ። 18ወጸውዕዎሙ ወይቤልዎሙ ግሙራ ኢትንግሩ ወኢትምሀሩ በስሙ ለኢየሱስ።
በእንተ አውሥኦተ ሐዋርያት
19 #
5፥29። ወተሰጥውዎሙ ጴጥሮስ ወዮሐንስ ወይቤልዎሙ ይረትዕኑ በቅድመ እግዚአብሔር ኪያክሙ ንስማዕ ወአኮ ለእግዚአብሔር ፍትሑ እስኩ ለሊክሙ። 20ንሕነሰኬ ኢንክል ከቢቶቶ ለዝንቱ ነገር። 21ወእምዝ ገሠጽዎሙ ወኀደግዎሙ ሶበ ኀጥኡ በዘይኴንንዎሙ እስመ ኵሉ ሕዝብ የአኵቱ እግዚአብሔርሃ በእንተ ውእቱ ተኣምር ዘኮነ። 22እስመ ፈድፈዶ እምአርብዓ ዓመት ለውእቱ ብእሲ ዘበላዕሌሁ ኮነ ዝ ተኣምረ ሕይወት። 23ወተፈቲሖሙ ሖሩ ኀበ ሰብኦሙ ወነገርዎሙ ኵሎ ዘይቤልዎሙ ሊቃነ ካህናት ወረበናት።
በእንተ አእኵቶቶሙ እግዚአብሔርሃ
24ወሰሚዖሙ ዘንተ አንሥኡ ቃሎሙ ኅቡረ ኀበ እግዚአብሔር ወይቤሉ አንተ እግዚአብሔር አምላክ ዘገበርከ ሰማየ ወምድረ ወባሕረ ወኵሎ ዘውስቴቶሙ። 25#መዝ. 2፥1-2። ዘለሊከ ነበብከ በመንፈስ ቅዱስ በአፈ ዳዊት ገብርከ አቡነ ወትቤ «ለምንት አንገለጉ አሕዛብ ወሕዝብኒ ነበቡ ከንቶ። 26ወተንሥኡ ነገሥተ ምድር ወመላእክትኒ ተጋብኡ ምስሌሆሙ ኅቡረ ላዕለ እግዚአብሔር ወላዕለ መሲሑ።» 27#ሉቃ. 23፥12። አማን አንገለጉ በዛቲ ሀገር ላዕለ ቅዱስ ወልድከ ኢየሱስ ዘቀባዕካሁ ሄሮድስ ወጲላጦስ ጴንጤናዊ ምስለ ሕዘቢሆሙ ወሕዝበ እስራኤል። 28#2፥23። ከመ ይግበሩ በከመ ሥርዐተ እዴከ ወምክርከ ከመ ይኩን። 29#ኤፌ. 5፥19። ወይእዜኒ እግዚኦ ርኢ ትምክሕቶሙ ወሀቦሙ ለአግብርቲከ ገሃደ ይንግሩ ቃለከ። 30ወትስፋሕ እዴከ ወትግበር ትእምርተ ወመንክረ በስመ ወልድከ ኢየሱስ ክርስቶስ ንጹሕ። 31ወእንዘ ይጼልዩ አድለቅለቀ ውእቱ መካን ኀበ ሀለዉ ይነብሩ ኅቡረ ጉቡኣን ወመልአ መንፈስ ቅዱስ ዲበ ኵሎሙ ወነገሩ ቃለ እግዚአብሔር ገሃደ።
በእንተ ማኅበር
32 #
2፥44። ወኵሎሙ እለ አምኑ በአሐዱ ልብ ወበአሐቲ ነፍስ ወአልቦ እምውስቴቶሙ ዘይብል ዝሰ ዚኣየ ንዋይ አላ ዘኵሎሙ ኅቡረ። 33#2፥47። ወዐቢየ ኀይለ ይገብሩ ሐዋርያት ስምዐ ተንሥኦቱ ለእግዚእ ኢየሱስ ወዐቢይ ሞገስ ቦሙ በኀበ ኵሉ። 34#2፥45። ወአልቦ እምውስቴቶሙ ጽኑስ ወኵሉ ዘቦ ቤት ወዐጸድ ይሠይጡ ወያመጽኡ ሤጦ። 35#ዘዳ. 15፥11፤ ኢሳ. 58፥7። ወያነብሩ ታሕተ እገሪሆሙ ለሐዋርያት ወእሙንቱ ይከፍሉ ለጽኑሳን ለለአሐዱ በከመ መፍቅዱ።
36ወሀሎ አሐዱ ብእሲ ዘስሙ ዮሴፍ ዘይብልዎ በርናባስ እምውስተ ሐዋርያት ወበትርጓሜሁ ይብልዎ ወልደ ፍሥሓ ሌዋዊ ዘምድረ ቆጵሮስ። 37ወቦ ገራህት ወሤጠ ወአምጽአ ሤጦ ወአንበረ ታሕተ እግረ ሐዋርያት።
Currently Selected:
ግብረ ሐዋርያት 4: ሐኪግ
Highlight
Share
Copy
Want to have your highlights saved across all your devices? Sign up or sign in
