ግብረ ሐዋርያት 5

ምዕራፍ 5

በእንተ ሐናንያ ወብእሲቱ

1ወሀሎ አሐዱ ብእሲ ዘስሙ ሐናንያ ወስመ ብእሲቱ ሰጲራ ወሤጡ ዐጸዶሙ። 2#4፥37። ወቀሠጡ መንፈቀ ሤጡ ተማኪሮሙ ምስለ ብእሲቱ ወአምጽኡ መንፈቀ ሤጡ ወአንበሩ#ቦ ዘይቤ «ወቀሠጠ መንፈቀ ሤጡ ተመኪሮ ምስለ ብእሲቱ ወአምጽአ መንፈቀ ሤጡ ወአንበረ ታሕተ እግረ ሐዋርያት» ታሕተ እግረ ሐዋርያት። 3#ዮሐ. 13፥2። ወይቤሎ ጴጥሮስ ኦ ሐናንያ እፎ መልአ ሰይጣን ውስተ ልብከ ከመ ተሐስዎ ለመንፈስ ቅዱስ ወትቅሥጥ እምሤጠ ዐጸድከ። 4አኮኑ ለከ ነበረ እምቅድመ ትሢጦ ወሶበሂ ሤጥኮ በፈቃድከ ለምንትኬ ኀለይከ በልብከ ትግበር ከመዝ ለእግዚአብሔርኬ ሐሰውኮ ወአኮ ለሰብእ።

5ወሰሚዖ ዘንተ ነገረ ሐናንያ ተነጽሐ ወሞተ ወኮነ ዐቢይ ግርማ ወፈርሁ ኵሎሙ እለ ሰምዑ። 6#ዘሌ. 10፥4-5። ወተንሥኡ መሐዛት እምኔሆሙ ወጾርዎ፥ ወገነዝዎ ወአውፅእዎ ወቀበርዎ። 7ወእምዝ እምድኅረ ሠለስቱ ሰዓት መጽአት ብእሲቱ ወኢያእመረት ዘኮነ ምታ ወቦአት። 8ወይቤላ ጴጥሮስ ንግርኒ እስኩ በመጠነዝኑ ሤጥክሙ ዐጸደክሙ ወትቤ እወ ከማሁ። 9ወይቤላ ጴጥሮስ በእፎ እንከ ኀበርክሙ ታመክርዎ ለመንፈስ ቅዱስ ናሁኬ እገሪሆሙ ለእለ ቀበርዎ ለምትኪ ኀበ ኆኅት ወእሙንቱ ይወስዱኪ ኪያኪኒ። 10ወተነጽሐት ሶቤሃ ታሕተ እገሪሁ ወሞተት ወቦኡ ወራዙት ወረከቡ በድና ወወሰድዋ ወቀበርዋ ኀበ ምታ። 11ወኮነ ዐቢይ ግርማ ወፈርሁ ኵሎሙ አብያተ ክርስቲያናት ወእለ ሰምዕዎ ለዝ ነገር። 12#3፥11። ወበእደዊሆሙ ለሐዋርያት ይትገበር ተኣምር ወመንክር ብዙኅ በውስተ ሕዝብ ወሀለዉ ኅቡረ በቤተ መቅደስ ውስተ ሕዋረ ሰሎሞን።

13ወእምዝ እንከ አልቦ ዘተኀበለ ይስሐጦሙ ዳእሙ አክበርዎሙ ሕዝብ ወአዕበይዎሙ። 14#2፥47፤ 4፥4። ወብዙኃን ይትዌሰኩ እለ የአምኑ በእግዚእነ ወብዙኃን ዕደው ወአንስት።

በእንተ ፈውሶ ድዉያን

15 # 19፥11-12። ወያመጽኡ ድውያነ በዐራታት ወያነብርዎሙ ኀበ ዐውድ ከመ ይብጽሖሙ ጽላሎቱ ለጴጥሮስ ሶበ የኀልፍ ወይትፌውሱ እምደዌሆሙ። 16ወይመጽኡ ብዙኃን እምአህጉረ አድያም ዘኢየሩሳሌም ወያመጽኡ ድዉያነ ወእለ አጋንንት እኩያን ወየሐይዉ ኵሎሙ።

በእንተ ቅንአተ ሊቃነ ካህናት

17 # 4፥1-6። ወተንሥኡ ሊቀ ካህናት ወእለ ምስሌሁ ወሕዝበ ሰዱቃውያን ወቀንኡ ዲቤሆሙ። 18ወአኀዝዎሙ ለሐዋርያት ወአውዓልዎሙ ሙዓለ ውስተ ቤተ ሞቅሕ። 19#12፥7። ወመልአከ እግዚአብሔር አርኀወ አናቅጸ ቤተ ሞቅሕ በሌሊት ወአውፅኦሙ ወይቤሎሙ። 20ሑሩ ባኡ ምኵራበ ወመሀርዎሙ ለሕዝብ ዘንተ ነገረ ሕይወት። 21#4፥5። ወሰሚዖሙ ዘንተ ጌሡ ነግሀ በጽባሕ ወቦኡ ምኵራበ ወመሀሩ ወሊቃነ ካህናትሰ ወእለ ምስሌሆሙ አስተጋብኡ ዐውዶሙ ወኵሎ ሊቃነ ቤተ እስራኤል ወለአኩ ቤተ ሞቅሕ ያምጽእዎሙ ለሐዋርያት። 22ወበጽሑ ወዓልያኒሆሙ ወኀጥእዎሙ ወተሠወጡ ወነገርዎሙ። 23ወይቤልዎሙ ረከብነ ቤተ ሞቅሕ ንሡገ ወቅቱረ ወዝጉሐ እንተ ኵለሄ ወሠገራት የዐቅቡ አናቅጺሁ ወአርኂወነ አልቦ ዘረከብነ በውስጥ። 24ወሰሚዖሙ ዘንተ ነገረ ሊቃነ ካህናት ወመገብተ ምኵራብ ኀጥኡ ዘይገብሩ ወይቤሉ ምንትኑ እንጋ ዝ ነገር። 25ወመጽአ አሐዱ ወይቤሎሙ ነዮሙ እሙንቱ እደው እለ ሞቃሕክምዎሙ ውስተ ምኵራብ ይቀውሙ ወይሜህሩ ለሕዝብ። 26ወእምዝ ሖረ መጋቤ ምኵራብ ምስለ ወዓሊሁ ያምጽእዎሙ እንዘ ይዬውህዎሙ#ቦ ዘይዌስክ «ወአኮ በግብር» እስመ ይፈርህዎሙ ለሕዝብ ኢይውግርዎሙ። 27ወአምጽእዎሙ ወአቀምዎሙ ማእከለ ዐውድ ወሐተትዎሙ ሊቃነ ካህናት። 28#4፥18፤ ማቴ. 27፥25። ወይቤልዎሙ አኮኑ ከላእናክሙ ከመ ኢትምሀሩ በስሙ ለኢየሱስ ወኢለመኑሂ ወናሁ መላእክምዋ ትምህርተክሙ ለኢየሩሳሌም ወትፈቅዱኑ ታግብኡ ላዕሌነ ደሞ ለዝ ብእሲ። 29ወተሰጥዎሙ ጴጥሮስ ምስለ ሐዋርያት ወይቤሎሙ ይኄይሰነ ናደሉ ለእግዚአብሔር እምነ አድልዎ ለሰብእ። 30#3፥15። አምላከ አበዊነ አንሥኦ ለኢየሱስ ዘአንትሙ ዐለውክምዎ ወሰቀልክምዎ ዲበ ዕፅ ወቀተልክምዎ። 31#2፥33። ኪያሁ ረሰዮ እግዚአብሔር መልአከ ሕይወት ወአልዐሎ በየማኑ ወወሀቦሙ ለእስራኤል ንስሓ ከመ ይትኀደግ ሎሙ ኀጢአቶሙ። 32#ሉቃ. 24፥48፤ ዮሐ. 15፥26-27። ወንሕነ ሰማዕቱ ለዝንቱ ነገር ወመንፈስ ቅዱስ ዘወሀቦሙ እግዚአብሔር ለእለ የአምኑ ቦቱ። 33#7፥54። ወሰሚዖሙ ዘንተ ተምዕዑ ወሐቀዩ ስነኒሆሙ ወፈቀዱ ይቅትልዎሙ።

በእንተ ምክረ ገማልያል

34 # 22፥3። ወተንሥአ አሐዱ እምውስተ ዐውድ እምሕዝበ ፈሪሳውያን ዘስሙ ገማልያል መምህረ ኦሪት ወክቡር ውእቱ በኀበ ኵሉ ሕዝብ ወአዘዘ ያእትትዎሙ ለሐዋርያት ሕቀ እምውስተ ዐውድ። 35ወይቤሎሙ አንትሙ ሰብአ እስራኤል አድኅኑ ርእሰክሙ ወዑቁ በእንተ እሉ ሰብእ ዘከመ ትገብሩ። 36ቀዲሙኒ እምቅድመዝ መዋዕል ተንሥአ ቴዎዳስ ዘግብጽ ወአዕበየ ርእሶ ወተለውዎ አርባዕቱ ምእት ሰብእ ወጠፍአ ውእቱኒ ወኵሎሙ እለ አምኑ ቦቱ ተዘርዉ ወኮኑ ከመ ዘኢተፈጥሩ። 37ወእምድኅሬሁ ተንሥአ ይሁዳ ዘገሊላ በመዋዕል ዘተጽሕፉ ሰብእ በእንተ ጸባሕት ወተለውዎ ብዙኃን ሕዝብ ወሞተ ውእቱሂ ወእለ ተለውዎሂ ተዘርዉ ኵሎሙ። 38#ማቴ. 15፥13። ወይእዜኒ እብለክሙ ኅድግዎሙ ለእሉ ሰብእ ወኢትስሐጥዎሙ ለእመሁ ዘእምኀበ ሰብእ ዝ ምክሮሙ ወዝ ግብሮሙ የኀልፍ ወይሰዐር። 39#9፥5። ወለእመ እምኀበ እግዚአብሔር ኮነ ኢትክሉ አኅድጎቶሙ ወከመ ዘምስለ እግዚአብሔር ይትበአስ ኢትኩኑ። 40#22፥19። ወኦሆ አበሎሙ ወጸውዕዎሙ ለሐዋርያት ወቀሠፍዎሙ ወገሠጽዎሙ ኢይንግሩ እንከ በስሙ ለኢየሱስ ወኀደግዎሙ። 41#ማቴ. 5፥10-13፤ 1ጴጥ. 4፥14። ወወፅኡ እምዐውድ እንዘ ይትፌሥሑ እስመ ከፈሎሙ መንፈስ ቅዱስ ከመ ያኅሥርዎሙ በእንተ ስሙ። 42ወኵሎ አሚረ ይፀመዱ ትምህርተ በቤተ መቅደስ ወውስተ ቤትኒ ኢኀደጉ ነጊረ በእንተ እግዚእነ ኢየሱስ ክርስቶስ።

Currently Selected:

ግብረ ሐዋርያት 5: ሐኪግ

Highlight

Copy