ግብረ ሐዋርያት 6

ምዕራፍ 6

በእንተ ሢመተ ሰብዐቱ ዲያቆናት

1ወውእተ አሚረ በዝኁ ሕዝብ ወግዕዝዎሙ እለ እምአረሚ አርድእት ለአይሁድ እስመ ይሬእይዎን ለመበለታቲሆን እንዘ ኢይፀመዳ ኵሎ አሚረ ወያሰትታ ተልእኮቶን። 2ወጸውዕዎሙ ዐሠርቱ ወክልኤቱ ለኵሉ ሕዝብ ወይቤልዎሙ ኢይደልወነ ከመ ንኅድግ ቃለ እግዚአብሔር ወንፀመድ ማእዳተ። 3ኅረዩ እምውስቴትክሙ ሰብዐተ ዕደወ እለ ምሉኣን መንፈሰ ቅዱሰ ወጥበበ እለ ንሠይም ዲበ ዝ ግብር። 4ወንሕነሰ ንፀመድ ጸሎተ ወመልእክተ ቃሉ ወኀብሩ ኵሎሙ ሕዝብ። 5ወሠናየ ኮነ ዝ ነገር በኀቤሆሙ ወኀረዩ እስጢፋኖስሃ ብእሴ ዘምሉእ ሃይማኖተ ወመንፈሰ ቅዱሰ ወፊልጶስ ወጰርኮሮን ወኒቃሮና ወጢሞና ወጳርሜና ወኒቃላዎስ ፈላሴ ዘሀገረ አንጾኪያ። 6#1፥24። ወአቀምዎሙ ቅድመ ሐዋርያት ወጸለዩ ወወደዩ እደዊሆሙ ላዕሌሆሙ። 7#19፥20። ወዐብየ ቃለ እግዚአብሔር ወበዝኁ ሕዝብ በኢየሩሳሌም ፈድፋደ ወብዙኃን እምውስተ ካህናት እለ አምኑ።

ዘከመ ተቃወምዎ አይሁድ ለእስጢፋኖስ

8ወእስጢፋኖስሰ ምሉአ ጸጋ እግዚአብሔር ወኀይል ወይገብር ዐቢየ ተኣምረ ወመንክረ በውስተ ሕዝብ። 9ወቦ እለ ተንሥኡ እምኵራብ እንተ ስማ ሊቤርጢኖን ወቀርኔዎን ወእለክስንድሬዎን ወእለሂ እምቂልቅያ ወእስያ ወተኃሠሥዎ ለእስጢፋኖስ። 10#ሉቃ. 21፥15፤ ማቴ. 10፥20። ወስእኑ ታቃውሞቶ እስመ በጥበብ ወበመንፈስ ይትናገሮሙ። 11ወእምዝ አቅጸሩ ሎቱ ዕደወ ሰማዕተ ሐሰት ወመሀርዎሙ ከመ ይበሉ ሰማዕናሁ ለዝ ብእሲ እንዘ ይነብብ ነገረ ፅርፈት ላዕለ ሙሴ ወላዕለ እግዚአብሔር። 12ወሆክዎሙ ለሕዝብ ወለረበናት ወለጸሐፍት ወሮድዎ ወሰሐብዎ ወተባጽሕዎ ኀበ ዐውድ። 13#ኤር. 27፥11። ወአቀሙ ሎቱ ሰማዕተ ሐሰት ወይቤሉ ዝ ብእሲ አበየ ያርምም እንዘ ይነብብ ፅርፈተ ዲበ ቤተ መቅደስ ወዲበ ኦሪት። 14ወሰማዕናሁ እንዘ ይብል ኢየሱስ ናዝራዊ ይነሥቶ ለቤተ መቅደስ ወይስዕር ኦሪተክሙ ዘወሀበክሙ ሙሴ። 15ወነጸርዎ ኵሎሙ እለ ይነብሩ ዐውደ ወርእዩ ገጾ ከመ ገጸ መልአከ እግዚአብሔር።

Currently Selected:

ግብረ ሐዋርያት 6: ሐኪግ

Highlight

Copy