ወንጌል ዘዮሐንስ 18

ምዕራፍ 18

ዘከመ ጸለየ እግዚእ ኢየሱስ በጌቴሴማኒ

1 # ማቴ. 26፥47-56፤ ሉቃ. 22፥47-53፤ 2ሳሙ. 15፥23። ወዘንተ ብሂሎ ወፅአ እግዚእ ኢየሱስ ምስለ አርዳኢሁ ማዕዶተ ቄድሮስ ፈለገ አርዝ ወቦ ህየ ገነት ዐጸደ ሐምል ወቦአ እግዚእ ኢየሱስ ውስቴታ ምስለ አርዳኢሁ። 2#ሉቃ. 21፥37። ወየአምሮ ይሁዳ ዘያገብኦ ለውእቱ መካን እስመ ብዙኀ ጊዜ የሐውር እግዚእ ኢየሱስ ህየ ምስለ አርዳኢሁ።

ዘከመ አግብኦ ይሁዳ

3 # ማቴ. 26፥47-56፤ ማር. 14፥43-52። ወነሥኦሙ ይሁዳ ለሠገራተ ሰጲራ እምኀበ ሊቃነ ካህናት ወፈሪሳውያን ወነሥአ ረድኤተ ወዓልያኒሆሙ ወሖረ ህየ በመኃትወ ጽጕ ወበፓናት ወበንዋየ ሐቅል። 4ወአእሚሮ እግዚእ ኢየሱስ ኵሎ ዘይበጽሕ ላዕሌሁ ወፅአ አፍኣ ኀቤሆሙ ወይቤሎሙ መነ ተኀሥሡ። 5#6፥20። ወአውሥኡ ወይቤልዎ ኢየሱስሃ ናዝራዌ ወይቤሎሙ እግዚእ ኢየሱስ አነ ውእቱ ወሀለወ ይሁዳኒ ዘያገብኦ ይቀውም ምስሌሆሙ። 6ወሶበ ይቤሎሙ እግዚእ ኢየሱስ አነ ውእቱ ገብኡ ድኅሬሆሙ ወወድቁ ዲበ ምድር። 7ወእምዝ ካዕበ ተስእሎሙ ወይቤሎሙ መነ ተኀሥሡ ወይቤልዎ ኢየሱስሃ ናዝራዌ። 8ወአውሥአ እግዚእ ኢየሱስ ወይቤሎሙ አኮኑ እቤለክሙ አነ ውእቱ ወእመሰ ኪያየ ተኀሥሡ ኅድግዎሙ ለእሉ ይሑሩ። 9#17፥12። ከመ ይብጻሕ ቃሉ ዘይቤ እለሰ ወሀብከኒ ኢተኀጕለ ወኢአሐዱሂ እምኔሆሙ። 10ወቦ መጥባሕት ለስምዖን ጴጥሮስ ወመልሐ መጥባሕቶ ወዘበጦ ለገብረ ሊቀ ካህናት ወመተረ እዝኖ ዘየማን ወስሙ ለውእቱ ገብር ማልኮስ። 11#ማቴ. 20፥22፤ 26፥39-75፤ ማር. 14፥36-72፤ ሉቃ. 22፥42-71። ወይቤሎ እግዚእ ኢየሱስ ለጴጥሮስ አግብኣ ለመጥባሕትከ ውስተ ቤታ ጽዋዐ ዘወሀበኒ አቡየ ኢየኀድግ ዘእንበለ እስተይ።

ዘከመ ቆመ እግዚእ ኢየሱስ ማእከለ ዐውድ

12ወአኀዝዎ ለእግዚእ ኢየሱስ ሠገራተ ሰጲራ ወሊቀ ዐሠርቱ ምእት ወወዓልያኒሆሙ ለአይሁድ ወኀመይዎ። 13ወወሰድዎ ኀበ ሐና ቀዲሙ እስመ ሐሙሁ ውእቱ ለቀያፋ ሊቀ ካህናት ዘእብሬቱ ይእቲ ዓመት። 14#11፥49-50። ወቀያፋሰ ውእቱ ዘአምከሮሙ ለአይሁድ ወይቤሎሙ ይኄይስ ይሙት አሐዱ ብእሲ እምይትኀጐል ኵሉ ሕዝብ።

በእንተ ክሕደተ ጴጥሮስ

15 # 20፥2-8፤ ማቴ. 26፥69-70፤ ማር. 14፥66-68፤ ሉቃ. 22፥57-60። ወተለውዎ ለእግዚእ ኢየሱስ እምርኁቅ ስምዖን ጴጥሮስ ወካልእኒ ረድእ ወውእቱሰ ረድእ ልሙድ በኀበ ሊቀ ካህናት ወቦአ ምስለ እግዚእ ኢየሱስ ውስተ ዐጸደ ሊቀ ካህናት። 16ወጴጥሮስሰ ቆመ አፍኣ ኀበ ኆኅት ወወፅአ ዝኩ ረድእ ዘልሙድ በኀበ ሊቀ ካህናት ወተናገራ ለዐጻዊት ወአብኦ ለጴጥሮስ። 17ወትቤሎ ይእቲ አመት ዐጻዊት ለጴጥሮስ አንተሂ እምአርዳኢሁኑ ለውእቱ ብእሲ አንተ ወይቤላ ውእቱኒ ኢኮንኩ። 18#ሉቃ. 22፥55። ወሀለዉ ይቀውሙ አግብርቲሆሙ ወወዓልያኒሆሙ ወይበቁጹ አፍሓመ ወይስሕኑ እስመ ብዙኅ ቍራ ለይእቲ ሌሊት ወይቀውም ጴጥሮስኒ ወይስሕን ምስሌሆሙ።

ዘከመ ተስእሎ ሊቀ ካህናት ለእግዚእ ኢየሱስ

19ወተስእሎ ሊቀ ካህናት ለእግዚእ ኢየሱስ በእንተ አርዳኢሁ ወበእንተ ትምህርቱ። 20#7፥26፤ ኢሳ. 48፥17። ወአውሥአ እግዚእ ኢየሱስ ወይቤሎ አንሰ ክሡተ ተናገርኩ በውስተ ዓለም ወበኵሉ ጊዜ መሀርኩ በምኵራብ ወበቤተ መቅደስ ኀበ ይትጋብኡ ኵሎሙ አይሁድ ወአልቦ ዘተናገርኩ ጽሚተ ወኢምንተኒ። 21ለምንት እንከ ትሴአለኒ ሊተ ተሰአሎሙ ለእለ ሰምዑኒ ዘተናገርክዎሙ እስመ እሙንቱ የአምሩ ዘተናገርኩ አነ። 22#ኢሳ. 50፥6። ወዘንተ ብሂሎ ጸፍዖ መልታሕቶ ለእግዚእ ኢየሱስ አሐዱ እምእለ ይቀውሙ ወዓልት ወይቤሎ ከመዝኑ ትትዋሥኦ ለሊቀ ካህናት። 23ወአውሥአ እግዚእ ኢየሱስ ወይቤሎ እመሰ እኩየ ነበብኩ ስምዐ ኩን ላዕሌየ ወአስተዋድየኒ በእንተ እኩይ ወእመሰ ሠናየ ነበብኩ እንከ ለምንት ትዘብጠኒ። 24ወፈነዎ ሐና ኅሙዮ ለእግዚእ ኢየሱስ ኀበ ቀያፋ ሊቀ ካህናት። 25ወሀሎ ስምዖን ጴጥሮስ ይቀውም ወይስሕን ወይቤልዎ አንተሂ እምአርዳኢሁኑ አንተ ወክሕደ ወይቤ ኢኮንኩ። 26ወይቤሎ አሐዱ እምአግብርቲሁ ለሊቀ ካህናት ዘእምአዝማዲሁ ለዝኩ ዘመተሮ ጴጥሮስ እዝኖ አኮኑ አነ ርኢኩከ ውስተ ገነት ምስሌሁ። 27ወካዕበ ክሕደ ጴጥሮስ ወሶቤሃ ነቀወ ዶርሆ።

ዘከመ ቆመ እግዚእ ኢየሱስ ቅድመ ጲላጦስ

28 # ማቴ. 27፥2-31፤ ማር. 15፥1-20፤ ሉቃ. 23፥1-25። ወወሰድዎ ለእግዚእ ኢየሱስ እምኀበ ቀያፋ ኀበ ዐውድ ወጎሕ ውእቱ ወኢቦኡ አይሁድ ውስተ ዐውደ ምኵናን እስመ ወድአ ጸብሐ ከመ ኢይርኰሱ እምቅድመ ይብልዑ ፍሥሐ። 29ወወፅአ ጲላጦስ አፍኣ ኀቤሆሙ ወይቤሎሙ ምንትኑ ጌጋዩ ለዝ ብእሲ በዘ አምጻእክምዎ ኀቤየ። 30ወአውሥኡ ወይቤልዎ ሶበሰ ኢኮነ ገባሬ እኪት እምኢያግባእናሁ ኀቤከ። 31#19፥6-10። ወይቤሎሙ ጲላጦስ ንሥእዎ አንትሙ ወበከመ ሕግክሙ ኰንንዎ ወይቤልዎ አይሁድ ለነሰ ኢይከውነነ ንቅትል ወኢመነሂ። 32#3፥14፤ 12፥32-33፤ ማቴ. 20፥18-19። ከመ ይብጻሕ ቃሉ ለእግዚእ ኢየሱስ ዘይቤ እንዘ ይኤምሮሙ በአይ ሞት ሀለዎ ይሙት። 33ወቦአ ካዕበ ጲላጦስ ውስተ ዐውድ ወጸውዖ ለእግዚእ ኢየሱስ ወይቤሎ አንተኑ ንጉሦሙ ለአይሁድ። 34ወአውሥአ እግዚእ ኢየሱስ ወይቤሎ ዘእምልብከኑ ትብል ዘንተ ወሚመ ቦኑ ባዕድ ዘነገረከ በእንቲኣየ። 35ወአውሥአ ጲላጦስ ወይቤሎ አነሂ አይሁዳዊኑ አነ አኮኑ ሕዝብከ ወሊቃነ ካህናት አግብኡከ ኀቤየ ምንተኑ እግበርከ።#ቦ ዘይቤ «ምንተ ገበርከ» 36ወአውሥአ እግዚእ ኢየሱስ ወይቤሎሙ መንግሥትየሰ ኢኮነት እምዝንቱ ዓለም ሶበሰ በዝንቱ ዓለም መንግሥትየ እምተአበሱ ሊተ ወዓልያንየ ከመ ኢያግብኡኒ አይሁድ ኀቤከ ወይእዜሰ ባሕቱ ኢኮነት እምዝየ መንግሥትየ። 37#8፥40-47፤ 1ጢሞ. 6፥13። ወይቤሎ ጲላጦስ እንከሰኬ ንጉሥ አንተ ወአውሥአ እግዚእ ኢየሱስ ወይቤሎ ለሊከ ትቤ ከመ ንጉሥ አነ ወአንሰ በእንተ ዝንቱ ተወለድኩ ወእንበይነ ዝንቱ መጻእኩ ውስተ ዓለም ከመ እኩን ሰማዕተ በጽድቅ ወኵሉ ዘእምጽድቅ ውእቱ ይሰምዐኒ ቃልየ። 38#ሉቃ. 23፥4-14። ወይቤሎ ጲላጦስ ምንትኑ ውእቱ ጽድቅ ወዘንተ ብሂሎ ወፅአ ካዕበ ኀበ አይሁድ ወይቤሎሙ አንሰ አልቦ ዘረከብኩ ጌጋይ ላዕሌሁ ወኢአሐተኒ። 39#ማቴ. 27፥15። ወባሕቱ ሀሎ ዘናለምድ ዘአሐዩ ለክሙ አሐደ እምነ ሙቁሓን ለለፋሲካ ትፈቅዱኑ አንከ አሕይዎ ለክሙ ለንጉሠ አይሁድ። 40#ግብረ ሐዋ. 3፥14። ወከልሑ ካዕበ ኵሎሙ ወይቤሉ አኮ ዘንተ ዘታሐዩ አላ በርባንሃ ወበርባንሰ ሊቀ ፈያት ውእቱ።

Currently Selected:

ወንጌል ዘዮሐንስ 18: ሐኪግ

Highlight

Copy