ወንጌል ዘዮሐንስ 19

ምዕራፍ 19

ዘከመ ቀሠፎ ጲላጦስ ለእግዚእ ኢየሱስ

1 # ማቴ. 27፥27-32፤ ማር. 15፥15-21፤ ሉቃ. 22፥63-65። ወእምዝ ነሥኦ ጲላጦስ ለእግዚእ ኢየሱስ ወቀሠፎ። 2ወጸፈሩ ሐራ አክሊለ ዘሦክ ወአስተቀጸልዎ ላዕለ ርእሱ ወአልበስዎ ልብሰ ሜላት። 3ወይመጽኡ ኀቤሁ ወይብልዎ በሓ ንጉሠ አይሁድ ወይጸፍዕዎ ገጾ። 4ወወፅአ ካዕበ ጲላጦስ አፍኣ ወይቤሎሙ ናሁ አወፅኦ ለክሙ አፍኣ ከመ ታእምሩ ከመ አልቦ ዘረከብኩ ላዕሌሁ ጌጋይ ወኢአሐተኒ። 5#መዝ. 21፥6፤ ኢሳ. 53፥3። ወወፅአ እግዚእ ኢየሱስ አፍኣ እንዘ ይትቄጸል አክሊለ ዘሦክ ወይለብስ ሜላተ ወይቤሎሙ ጲላጦስ ነዋ ውእቱ ብእሲ። 6ወሶበ ርእይዎ ሊቃነ ካህናት ወወዓልያኒሆሙ ከልሑ ወይቤሉ ስቅሎ ስቅሎ ወይቤሎሙ ጲላጦስ ንሥእዎ ለሊክሙ ስቅልዎ አንሰ ኢረከብኩ ላዕሌሁ ጌጋየ። 7#ዘሌ. 24፥15-16። ወአውሥኡ አይሁድ ወይቤልዎ ንሕነሰ ሕግ ብነ ወበከመ ሕግነ ርቱዕ ይሙት እስመ ወልደ እግዚአብሔር ረሰየ ርእሶ። 8ወሰሚዖ ጲላጦስ ዘንተ ነገረ ፈርሀ ፈድፋደ። 9#ማቴ. 27፥12። ወቦአ ካዕበ ኀበ ዐውድ ወይቤሎ ለእግዚእ ኢየሱስ እምአይቴ አንተ ወኢተሰጥዎ እግዚእ ኢየሱስ ወኢምንተኒ። 10ወይቤሎ ጲላጦስ ሊተሂ ኢትነብበኒሁ ኢተአምርሁ ከመ ብዉሕ ሊተ እቅትልከሂ ወብዉሕ ሊተ አሕዩከሂ። 11ወአውሥአ እግዚእ ኢየሱስ ወይቤሎ ኢኮንከ ብዉሐ ላዕሌየ ወኢምንተኒ እመ ኢተውህበ ለከ እምሰማይ ወበእንተ ዝንቱ ለዘአግብአኒ ኀቤከ ዘየዐቢ ጌጋይ ላዕሌሁ። 12ወበእንተዝ ፈቀደ ጲላጦስ ያሕይዎ ወከልሑ አይሁድ ወይቤሉ እመ አሕየውኮ ለዝንቱ ኢኮንከ ዐርኮ ለቄሳር እስመ ኵሉ ዘያነግሥ ርእሶ ዐላዌ ነጋሢ ውእቱ። 13#ማቴ. 27፥15-31፤ ሉቃ. 23፥13-25። ወሰሚዖ ጲላጦስ ዘንተ ነገረ አውፅኦ ለእግዚእ ኢየሱስ አፍኣ ወነበረ ዲበ መንበር ውስተ መካን ዘስሙ ሊቶስጥሮስ ወበዕብራይስጥ ይብልዎ ገቦታ። 14ወዐርበ ፋሲካ ወውእቱ ጊዜ ቀትር ዘስሱ ሰዓት ወይቤሎሙ ጲላጦስ ለአይሁድ ነዋ ንጉሥክሙ ወከልሑ ወይቤሉ አእትቶ ወስቅሎ። 15ወይቤሎሙ ጲላጦስ ለንጉሥክሙኑ እስቅሎ ወአውሥኡ ሊቃነ ካህናት ወይቤሉ አልብነ ንጉሥ ዘእንበለ ቄሳር። 16#ማቴ. 27፥32-44፤ ማር. 15፥21-32፤ ሉቃ. 23፥26-47። ወእምዝ ወሀቦሙ ይስቅልዎ ወተመጠውዎ ለእግዚእ ኢየሱስ ወአውፅእዎ አፍኣ። 17#ዘፍ. 22፥6፤ ማር. 15፥26። ወወሰድዎ እንዘ ይጸውር መስቀሎ ውስተ መካን ዘስሙ ቀራንዮ ወበዕብራይስጥ ይብልዎ ጎልጎታ። 18ወህየ ሰቀልዎ ወሰቀሉ ምስሌሁ ካልኣነ ክልኤተ ፈያተ አሐደ እምለፌ ወአሐደ እምለፌ ወማእከሎሙ ኢየሱስሃ። 19ወጸሐፈ ጲላጦስ መጽሐፈ ወአንበረ ዲበ መስቀሉ ወይብል መጽሐፉ ኢየሱስ ናዝራዊ ንጉሦሙ ለአይሁድ ውእቱ ዝንቱ። 20ወብዙኃን እምአይሁድ እለ አንበብዋ ለይእቲ መጽሐፍ እስመ ቅሩብ ውእቱ መካን ለሀገር ኀበ ሰቀልዎ ለእግዚእ ኢየሱስ ወጽሕፈቱ ጽሑፍ ውእቱ በዕብራይስጥ ወበሮማይስጥ ወበጽርእ። 21ወይቤልዎ ሊቃነ ካህናት ለጲላጦስ ኢትጽሐፍ ከመ ውእቱ ንጉሦሙ ለአይሁድ አላ ለሊሁ ይቤ ንጉሦሙ ለአይሁድ አነ። 22ወአውሥአ ጲላጦስ ወይቤሎሙ ዘጸሐፍኩ ጸሐፍኩ። 23ወሐራሰ ሶበ ሰቀልዎ ለእግዚእ ኢየሱስ ነሥኡ አልባሲሁ ወረሰይዎ አርባዕተ ክፍለ ለለአሐዱ እምሐራ ወክዳኖሂ እልታኀ ዘአልቦ ርፍአት ዘእምላዕሉ እንመቱ። 24#መዝ. 21፥18። ወተባሀሉ በበይናቲሆሙ ኢንግምድ ወኢንስጥጥ አላ ንትፋሰስ ለዘረከቦ ይርከቦ ከመ ይብጻሕ ቃለ መጽሐፍ ዘይቤ «ተካፈሉ አልባስየ ለርእሶሙ ወተዓፀዉ ዲበ ዐራዝየ» ወከመዝ ገብሩ ሐራ። 25ወይቀውማ ኀበ መስቀሉ ለእግዚእ ኢየሱስ እሙ ወእኅታ ለእሙ ወማርያም እንተ ቀለዮጳ ወማርያም መግደላዊት። 26#13፥23። ወሶበ ርእዮሙ እግዚእ ኢየሱስ ለእሙ ለእሙ ወለረድኡ ዘያፈቅር ይቀውሙ ይቤላ ለእሙ ብእሲቶ ነዋ ወልድኪ። 27ወይቤሎ ለውእቱኒ ረድኡ ነያ እምከ ወእምይእቲ ሰዓት ነሥኣ ውእቱ ረድእ ወአእተዋ ቤቶ። 28#ማቴ. 27፥45-56፤ ማር. 15፥33-41። ወእምዝ ሶበ ርእየ እግዚእ ኢየሱስ ከመ ተፈጸመ ኵሉ ከመ ይብጻሕ ቃለ መጽሐፍ ይቤ ጸማእኩ። 29#መዝ. 68፥21። ወቦ ህየ ግምዔ ዘምሉእ ብሒአ ወመልኡ ሰፍነገ እምውእቱ ብሒእ ወአሰሩ በቈጽለ ሁስጱ ዲበ ኅለት ወአስተርከቡ ውስተ አፉሁ ወዐጸሩ። 30#ዕብ. 5፥9። ወሰሪቦ ብሒአ እግዚእ ኢየሱስ ይቤ ተፈጸመ ኵሉ ወአጽነነ ርእሶ ወመጠወ ነፍሶ። 31#ዘፀ. 34፥25፤ ዘዳ. 21፥23። ወአይሁድሰ እስመ ዐርብ ውእቱ ይቤሉ እላንቱ ሥጋት ኢይቢታ ዲበ መሳቅሊሆን በእንተ ሰንበት እስመ ዐባይ ዕለታ ለይእቲ ሰንበት ወሰአልዎ ለጲላጦስ ከመ ይስብሩ ቍየጺሆሙ ወያውርድዎሙ። 32ወመጽኡ ሐራ ወሰበሩ ቍይጾ ለቀዳማዊ ወለካልኡኒ እለ ተሰቅሉ ምስሌሁ። 33ወሶበ ሖሩ ኀበ እግዚእ ኢየሱስ ርእይዎ ወረከብዎ ከመ ሰለጠ መዊተ ወኢሰበሩ ቍይጾ። 34አላ አሐዱ እምሐራ ረገዞ ገቦሁ ዘየማን በኲናት ወሶቤሃ ወፅአ እምኔሁ ደም ወማይ። 35ወዘርእየ ስምዐ ኮነ ወጽድቅ ውእቱ ስምዑ ወአእመረ ውእቱ ከመ ጽድቀ ይነግር ከመ አንትሙሂ ትእመኑ። 36#ዘፀ. 12፥46። ወዝንቱ ኵሉ ዘኮነ ከመ ይብጻሕ ቃለ መጽሐፍ ዘይቤ «ዐጽሞ ኢትስብሩ እምኔሁ።» 37#ዘካ. 12፥10፤ ራእ. 1፥5። ወካዕበ ይብል ካልእኒ መጽሐፍ «ሀለዎሙ ይርአይዎ ለዘወግእዎ።»

ዘከመ ሰአለ ዮሴፍ ሥጋሁ ለእግዚእነ

38 # ማቴ. 27፥57-61፤ ማር. 15፥42-47፤ ሉቃ. 23፥50-55። ወእምድኅረ ዝንቱ ሰአሎ ለጲላጦስ ዮሴፍ ዘአርማትያስ ወዝንቱ ረድኡ ለእግዚእ ኢየሱስ በኅቡእ በእንተ ፍርሀቶሙ ለአይሁድ ከመ ይንሣእ ሥጋሁ ለእግዚእ ኢየሱስ ወአብሖ ጲላጦስ ወሖረ ውእቱኒ ወነሥአ ሥጋሁ ለእግዚእ ኢየሱስ። 39#3፥1-2፤ መዝ. 44፥8። ወመጽአ ኒቆዲሞስኒ ዘሖረ ኀቤሁ ለእግዚእ ኢየሱስ ቀዲሙ ሌሊተ ወአምጽአ ምእተ ልጥረ ከርቤ ወዓልወ ሕዉሰ በዘቦቱ ይቀብርዎ። 40ወነሥኡ ሥጋሁ ለእግዚእ ኢየሱስ ወገነዝዎ በመዋጥሐ ክታን ዘሰንዱናት ምስለ አፈው በከመ ሕገ አይሁድ ሶበ ይገንዙ ወይቀብሩ። 41#ኢሳ. 53፥9። ወቦ ህየ ገነት ውስተ ውእቱ መካን ኀበ ሰቀልዎ ወውስተ ውእቱ ገነት ዝኅር ሐዲስ ዘአልቦ ዘተቀብረ ውስቴቱ። 42ወህየ ቀበርዎ ለእግዚእ ኢየሱስ እስመ ተፍጻሜተ ዐርቦሙ ውእቱ ለአይሁድ ወቅሩብ ውእቱ መቃብር ኀበ ሰቀልዎ።

Currently Selected:

ወንጌል ዘዮሐንስ 19: ሐኪግ

Highlight

Copy