ወንጌል ዘዮሐንስ 20

ምዕራፍ 20

በእንተ ትንሣኤሁ ለእግዚእነ

1 # ማቴ. 28፥1-10፤ ማር. 16፥1-11፤ ሉቃ. 24፥1-12። ወበእሑድ ሰንበት መጽአት ማርያም መግደላዊት በጽባሕ ኀበ መቃብር እንዘ ዓዲሁ ጽልመት ወረከበት እብነ እቱተ እምአፈ መቃብር። 2#13፥23። ወሮጸት ወበጽሐት ኀበ ስምዖን ጴጥሮስ ወኀበ ዝኩ ካልእ ረድእ ዘያፈቅሮ እግዚእ ኢየሱስ ወትቤሎሙ ነሥእዎ ለእግዚእየ እምውስተ መቃብር ወኢየአምር ኀበ ወሰድዎ። 3ወወፅኡ ጴጥሮስ ወዝኩ ካልእ ረድእ ወሖሩ ኀበ መቃብር። 4ወእንዘ ይረውጹ ክልኤሆሙ ኅቡረ በደሮ ለጴጥሮስ ዝኩ ካልእ ረድእ በጺሐ ኀበ መቃብር። 5#19፥40። ወሶበ ሐወጸ ርእየ መዋጥሐ ንቡረ ወኢቦአ ባሕቱ። 6ወተለዎ ስምዖን ጴጥሮስ ወበጽሐ ወቦአ ውስተ መቃብር ወረከበ መዋጥሐ ንቡረ ውስተ አሐዱ ገጽ። 7#11፥44። ወሰበነኒ ዘዲበ ርእሱ እንተ ባሕቲቱ ጥብሉለ ወአኮ ምስለ መዋጥሕ። 8ወእምዝ ቦአ ዝኩኒ ካልእ ረድእ ዘበደሮ በጺሐ ኀበ መቃብር ወርእዩ ወአምኑ። 9#2፥19፤ መዝ. 11፥5፤ 16፥10፤ 1ቆሮ. 15፥4። እስመ ዓዲሁ ኢያእመሩ ዘውስተ መጻሕፍት ከመ ሀለዎ ይትነሣእ እምነ ምዉታን። 10ወእምዝ ሖሩ ክልኤሆሙ አርዳኢሁ ወአተዉ ቤቶሙ።

ዘከመ አስተርአያ እግዚእ ኢየሱስ ለማርያም መግደላዊት

11 # ማቴ. 28፥16-20፤ ማር. 16፥9-11፤ ሉቃ. 24፥1-10። ወማርያምሰ ቆመት ኀበ መቃብር አፍኣ ወትበኪ ወእንዘ ትበኪ ሐወጸት ውስተ መቃብር። 12ወርእየት ክልኤተ መላእክተ በጸዓድው አልባስ ወይነብሩ አሐዱ ትርአሰ ወአሐዱ ትርጋፀ ኀበ ነበረ ሥጋሁ ለእግዚእ ኢየሱስ። 13ወይቤልዋ እሙንቱ መላእክት ምንት ያበክየኪ ኦ ብእሲቶ ወመነ ተኀሥሢ ወትቤሎሙ ነሥእዎ ለእግዚእየ እምውስተ መቃብር ወኢየአምር ኀበ ወሰድዎ። 14#ማቴ. 28፥9። ወዘንተ ብሂላ ተመይጠት ድኅሬሃ ወርእየቶ ለእግዚእ ኢየሱስ እንዘ ይቀውም ወኢያመረት ከመ እግዚእ ኢየሱስ ውእቱ። 15ወይቤላ እግዚእ ኢየሱስ ብእሲቶ ምንት ያበክየኪ ወመነ ተኀሥሢ ወመሰላ ላቲሰ ዐቃቤ ገነት ውእቱ ወትቤሎ እግዚእየ እመኒ አንተ ነሣእኮ ንግረኒ ኀበ ወሰድኮ ከመ እሑር አነ ወእንሥኦ ኀቤየ ወእቅብዖ ዕፍረተ። 16#ማር. 10፥51። ወይቤላ እግዚእ ኢየሱስ ማርያም ወተመይጠት ወትቤሎ በነገረ ዕብራይስጥ ረቡኒ ዘበትርጓሜሁ ሊቅ ብሂል። 17#16፥28፤ ማቴ. 28፥9-10፤ ዕብ. 2፥11-12። ወይቤላ እግዚእ ኢየሱስ ኢትልክፍኒ እስመ ዓዲ ኢዐረጉ ኀበ አቡየ ወሑሪ ባሕቱ ኀበ አኀውየ ወበሊዮሙ አዐርግአ ኀበ አቡየ ወአቡክሙ ኀበ አምላኪየ ወአምላክክሙ። 18ወሖረት ማርያም መግደላዊት ወአብሠረቶሙ ለአርዳኢሁ ወትቤሎሙ ርኢክዎ ለእግዚእነ ወነገረቶሙ ዘንተ ዘከመ ይቤላ።

ዘከመ አስተርአዮሙ እግዚእ ኢየሱስ ለሐዋርያት

19 # ማቴ. 28፥16-20፤ ሉቃ. 24፥36-49፤ ኢሳ. 52፥7፤ 57፥19። ወመስዮ በይእቲ ዕለት ዘውእቱ እሑድ ሰንበት እንዘ ዕጽው ኆኅት ኀበ ሀለዉ አርዳኢሁ ጉቡኣን በእንተ ፍርሀቶሙ ለአይሁድ መጽአ እግዚእ ኢየሱስ ወቆመ ማእከሎሙ ወይቤሎሙ ሰላም ለክሙ። 20#19፥34፤ 1ዮሐ. 1፥1፤ መዝ. 21፥16። ወዘንተ ብሂሎ አርአዮሙ እደዊሁ ወእገሪሁ ወገቦሁ ወተፈሥሑ አርዳኢሁ ሶበ ርእይዎ ለእግዚእነ። 21#17፥18። ወይቤሎሙ ካዕበ እግዚእ ኢየሱስ ሰላም ለክሙ ወበከመ ፈነወኒ አብ ከማሁ አነሂ እፌንወክሙ። 22#ዘፍ. 2፥7። ወዘንተ ብሂሎ ነፍኀ ላዕሌሆሙ ወይቤሎሙ ንሥኡ መንፈሰ ቅዱሰ። 23#ማቴ. 16፥19፤ 18፥18። ለእለ ኀደግሙ ኀጢአት ይትኀደግ ሎሙ ወለእለሰ ኢኀደግሙ ኢይትኀደግ ሎሙ።

በእንተ ቶማስ

24 # ማቴ. 10፥3፤ 28፥16፤ ሉቃ. 24፥33። ወቶማስ አሐዱ እምዐሠርቱ ወአሐዱ አርዳኢሁ ዘይብልዎ ዲዲሞስ ኢሀሎ ምስሌሆሙ ሶበ መጽአ እግዚእ ኢየሱስ። 25#19፥34። ወይቤልዎ ካልኣኒሁ አርዳእ ርኢናሁ ለእግዚእነ ወይቤሎሙ እመ ኢርኢኩ እደዊሁ ወእገሪሁ ኀበ ቀነውዎ ወእመ ኢወደይኩ አጽባዕትየ ውስተ ቅንዋቲሁ ወእመ ኢያባእኩ እዴየ ውስተ ገቦሁ ኢየአምን። 26ወእምድኅረ ሰሙን መዋዕል እንዘ ሀለዉ ካዕበ አርዳኢሁ ውስጠ ወቶማስኒ ሀሎ ምስሌሆሙ እንዘ ዕጽው ኆኅት መጽአ እግዚእ ኢየሱስ ወቆመ ማእከሎሙ ወይቤሎሙ ሰላም ለክሙ። 27ወእምዝ ይቤሎ ለቶማስ አምጽእ አጽባዕተከ ዝየ ወርኢ እደውየ ወእገርየ ወሀብ እዴከ ወአብእ ውስተ ገቦየ ወኢትኩን ናፋቄ አላ እመን። 28ወአውሥአ ቶማስ ወይቤሎ እግዚእየ ወአምላኪየ። 29#1ጴጥ. 1፥7-8። ወይቤሎ እግዚእ ኢየሱስ እስመ ርኢከኒሁ አመንከኒ ብፁዓንሰ እለ እንዘ ኢይሬእዩኒ የአምኑኒ። 30ወብዙኃተ ካልኣተ ተኣምራተ ገብረ እግዚእ ኢየሱስ በቅድመ አርዳኢሁ ዘኢተጽሕፈ ውስተ ዝንቱ መጽሐፍ። 31#1ዮሐ. 5፥13። ወዝንቱሰ ተጽሕፈ እምኔሆን ከመ ትእመኑ አንትሙ ከመ እግዚእ ኢየሱስ ውእቱ ክርስቶስ ወልደ እግዚአብሔር ወአሚነክሙ ሕይወተ ዘለዓለም ትርከቡ በስመ ዚኣሁ።

Currently Selected:

ወንጌል ዘዮሐንስ 20: ሐኪግ

Highlight

Copy