ወንጌል ዘሉቃስ 12

ምዕራፍ 12

በእንተ ብኁኦሙ ለፈሪሳውያን

1 # ማቴ. 10፥26-27፤ 16፥7-13። ወተጋብኡ ኀቤሁ አእላፍ ሰብእ እስከ ይትካየዱ በበይናቲሆሙ ወአኀዘ ይበሎሙ ለአርዳኢሁ ቅድመ#ቦ ዘይቤ «መቅድመ ኵሉ» ተዐቀቡ እምነብሑኦሙ ለፈሪሳውያን ዘውእቱ አድልዎ። 2#ሮሜ 2፥16። እስመ አልቦ ክዱን ዘኢይትከሠት ወአልቦ ኅቡእ ዘኢያስተርኢ። 3ወዘተናገርክምዎ በጽልመት ይትናገርዎ በብርሃን ወይሰማዕ ወዘሂ አልኆሰስክሙ በእዝን ይሰብክዎ በአጽራሕ ወበአንሕስት። 4#ዘሌ. 24፥9፤ ማቴ. 10፥28። እብለክሙ ለክሙ ለአዕርክትየ ኢትፍርህዎሙ ለእለ ይቀትሉክሙ ነፍስተክሙ ወእምዝ አልቦ ፈድፋደ ዘይክሉ ገቢረ። 5ወባሕቱ አርእየክሙ ዘትፈርሁ ፍርህዎሰ ለዘእምድኅረ ቀተለ ብዉሕ ሎቱ ይደይ ነፍሰኒ ወሥጋኒ ውስተ ገሃነም እወ እብለክሙ ኪያሁ ፍርሁ። 6አኮኑ ኀምስ አዕዋፍ ይሠየጣ በክልኤ ጸሪቀ አሶርዮን ወኢአሐቲ እምኔሆን ኢትትረሳዕ በቅድመ እግዚአብሔር ። 7#21፥18፤ ማቴ. 10፥28-32። ወለክሙሰ ሥዕርተ ርእስክሙኒ ኵሉ ኍሉቅ ውእቱ ኢትፍርሁ እንከ እስመ እምብዙኅ አዕዋፍ ትኄይሱ አንትሙ። 8#ማቴ. 10፥32። እብለክሙ ኵሉ ዘየአምን ብየ በቅድመ ዕጓለ እመሕያው አአምኖ አነሂ በቅድመ መላእክተ እግዚአብሔር። 9#9፥26፤ 2ጢሞ. 2፥12። ወዘሰ ክሕደኒ በቅድመ ዕጓለ እመሕያው እክሕዶ አነሂ በቅደመ መላእክተ እግዚአብሔር። 10#ማቴ. 12፥31-33፤ ማር. 3፥28፤ 1ዮሐ. 5፥16። ወኵሉ ዘነበበ ቃለ ፅርፈት ላዕለ ወልደ ዕጓለ እመሕያው ይትኀደግ ሎቱ ወዘሰ ነበበ ቃለ ፅርፈት ላዕለ መንፈስ ቅዱስ ኢይትኀደግ ሎቱ ኢበዝ ዓለም ወኢበዘ ይመጽእ ዓለም። 11#ማቴ. 10፥19-20፤ ማር. 13፥11። ወሶበሂ ይወስዱክሙ አዕዋዳተ ወኀበሂ መላእክት ወነገሥት ወመኳንንት ኢተኀልዩ ዘከመ ትብሉ ወዘከመሂ ትትናገሩ። 12እስመ መንፈስ ቅዱስ ውእቱ ዘይነብብ በላዕሌክሙ ሶቤሃ።

በእንተ ዘፈቀደ ይትካፈል ርስተ

13ወይቤሎ አሐዱ እምሕዝብ ሊቅ በሎ ለእኁየ ይክፍለኒ ርስትየ። 14ወይቤሎ እግዚእ ኢየሱስ አንተ ብእሲ መኑ ሤመኒ ከፋሌ ወመኰንነ ላዕሌክሙ። 15#1ጢሞ. 6፥9-10፤ መዝ. 36፥16። ወይቤሎሙ ዑቁ ወተዐቀቡ እምነ ኵሉ ትዕግልት እስመ አኮ በአብዝኆ ንዋይ ዘየሐዩ ሰብእ።

በእንተ ምሳሌ ባዕል ዘሠምረ ሎቱ ገራህቱ

16ወመሰለ ሎሙ ወይቤሎሙ አሐዱ ብእሲ ባዕል ዘሠምረ ሎቱ ተግባሩ ወደለዎ ብሔር። 17ወኀለየ በልቡ ወይቤ ምንተ እሬሲ ዘአልብየ ኀበ እዘግብ እክልየ ወበረከትየ። 18#መዝ. 38፥6። ወይቤ ከመዝ እገብር እነሥት ዘትካት መዛግብትየ ወአሐንጽ ካልአ ዘየዐቢ እምኔሁ ወእዘግብ ህየ እክልየ ወበረከትየ። 19ወእብላ ለነፍስየ ኦ ነፍስየ ብኪ ብዙኅ በረከት ዘዘገብኩ ለኪ ንቡረ ዘየአክለኪ ለብዙኅ ዓመታት አዕርፊ እንከሰ ብልዒ ወስትዪ ወተፈሥሒ። 20#መዝ. 38፥11፤ ዕብ. 9፥27። ወይቤሎ እግዚአብሔር ኦአብድ በዛቲ ሌሊት ይነሥእዋ ለነፍስከ እምላዕሌከ ለመኑ እንከ ይከውን ዘአስተዳለውከ። 21#ማቴ. 6፥19-33። ከማሁኬ ዘይዘግብ ሎቱ መዝገበ ዘኢኮነ እምእግዚአብሔር ብዕሉ።

ዘከመ ኢይደሉ ተዐፅቦ በከንቱ

22 # ማቴ. 6፥25-34። ወይቤሎሙ ለአርዳኢሁ በእንተ ዝንቱ እብለክሙ ኢተኀልዩ ለነፍስክሙ ዘትበልዑ ወዘትሰትዩ ወለሥጋክሙ ዘትለብሱ። 23እስመ ነፍስ ተዐፅብ እምሲሲት ወሥጋ የዐፅብ እምዐራዝ። 24#መዝ. 147፥9። ርእዩ ዕጕለ ቋዓት ዘኢይዘርዑ ወኢየአርሩ ወአልቦሙ መዛግብት ወኢውሳጥያት ወእግዚአብሔር ይሴስዮሙ እፎ እንከ ፈድፋደ ትኄይሱ አንትሙ እምአዕዋፍ። 25መኑ እምኔክሙ ኀልዮ ዘይክል ወስኮ አሐደ እመተ በዲበ ቆሙ። 26ወሶበ ኢትክሉ ዘንተ ዘይቀልል ለምንት ትኄልዩ ዘየዐፅብ። 27#1ነገ. 10፥4-7፤ 2ዜና መዋ. 9፥3-6፤ ማቴ. 6፥28። ናሁ ጽጌያተ ገዳም ርእዩ ዘከመ ይልህቁ ኢይፈትሉ ወኢይጻምዉ እብለክሙ ከመ ሰሎሞን ጥቀ ኢለብሰ ከመ አሐዱ እምእሉ በኵሉ መዋዕለ ክብሩ። 28ወለእመ ኮነ ሥርወ ጽጌ ዘዮም ሀሎ ወጌሠመ ውስተ እሳት ይትወደይ ከማሁኬ ይሬሲ እግዚአብሔር እፎ እንከ ፈድፋደ ለክሙ ኦ ሕጹጻነ ሃይማኖት። 29አንትሙሂ ኢትኅሥሡ ዘትበልዑ ወዘትሰትዩ ወኢትትፋለሱ።#12፥29 ቦ ዘይጽሕፍ «ወኢትጽሐቅዎ» 30እስመ ዘንተሰ ኵሎ አሕዛበ ዓለም ዘአፍኣ የኀሥሥዎ ወለክሙሰ የአምር አቡክሙ ከመ ተኀሥሥዎ ለዝንቱ ኵሉ። 31ወባሕቱ ኅሡ መንግሥተ እግዚአብሔር ወጽድቆ ወዝሰ ኵሉ ይትዌሰክ ለክሙ። 32#22፥29፤ ኢሳ. 41፥14። ኢትፍራህ ኦ ንኡስ መርዔት እስመ ሠምረ አቡክሙ የሀብክሙ መንግሥቶ። 33#18፥22፤ ዕብ. 10፥34። ሢጡ ንዋየክሙ ወሀቡ ምጽዋተ ግበሩ ለክሙ ቍናማተ ዘኢይበሊ ወመዛግብተ በሰማያት ዘኢየኀልቅ ኀበ ኢይረክቦ ሰራቂ ወኢያማስኖ ፃፄ ወቍንቍኔ። 34ወኀበ ሀሎ መዝገብክሙ ህየ ይሄሉ ልብክሙ።

በእንተ ትጋሀ ግብር

35 # ማቴ. 24፥42-51፤ 25፥1-14፤ 1ጴጥ. 1፥13። ወይኩን ቅኑተ ሐቌክሙ ወኅትወ መኃትዊክሙ። 36#1ጴጥ. 1፥13፤ ራእ. 3፥1፤ ዮሐ. 13፥4። ወአንትሙኒ ኩኑ ከመ ዕደው እለ ይጸንሑ እግዚኦሙ እስከ የአቱ እምከብካብ ከመ መጺኦ ወጐድጕዶ ያርኅውዎ ሶቤሃ። 37ብፁዓን እሙንቱ አግብርት እለ ይረክቦሙ እግዚኦሙ መጺኦ እንዘ ከመዝ ይገብሩ ወይተግሁ አማን እብለክሙ ከመ ይቀንት ሐቌሁ ወያረፍቆሙ ወያንሶሱ ማእከሎሙ ወይትለአኮሙ። 38ወእመኒ በካልእት ወእመኒ በሣልስት ሰዓተ ሌሊት መጽአ ወረከቦሙ ከመዝ ብፁዓን እሙንቱ እልክቱ አግብርት። 39#ማቴ. 24፥43፤ 1ተሰ. 1፥5፤ 2ጴጥ. 3፥10፤ ራእ. 16፥15። ወዘንተ ባሕቱ አእምሩ ሶበሁ የአምር በዓለ ቤት እንተ ጊዜ ይመጽእ ሰራቂ እምተግሀ ወእምሐለወ ወእምኢያብሐ#ቦ ዘይቤ «ወእምኢኀደገ» ይክርዩ ቤቶ። 40#ማቴ. 24፥22፤ 25፥13፤ ዘሌ. 24፥9። ወአንትሙሂ ድልዋኒክሙ ሀልዉ እስመ በጊዜ ኢተሐዘብክሙ ይመጽእ ወልደ ዕጓለ እመሕያው። 41ወይቤሎ ጴጥሮስ እግዚኦ ለነኑ ትሜስል ዘንተ ምሳሌ አው ለኵሉኑ። 42ወይቤሎ እግዚእነ መኑ እንጋ ውእቱ መጋቢ ኄር ወምእመን ወጠቢብ ዘይሠይሞ እግዚኡ ላዕለ ኵሉ ሰብአ ቤቱ ከመ የሀቦሙ ሲሳዮሙ በበጊዜሁ። 43ብፁዕ ውእቱ ገብር ዘመጺኦ እግዚኡ ይረክቦ እንዘ ከመዝ ይገብር። 44አማን እብለክሙ ከመ ላዕለ ኵሉ ንዋዩ ያሜግቦ። 45ወእመሰ ይቤ ውእቱ ገብር እኩይ በልቡ ይጐነዲ አቲወ እግዚእየ ወይእኅዝ ይዝብጥ ወያመንዝዝ ደቀ ወአዋልደ ዘቤተ እግዚኡ ወይበልዕ ወይሰቲ ምስለ ሰካርያን ወይሰክር። 46ወይበጽሕ እግዚኡ ለውእቱ ገብር በዕለተ ኢተሐዘበ ወበጊዜ ኢያእመረ ወይመትሮ እማእከሉ ወያገብእ መክፈልቶ ምስለ እለ ኢየአምኑ። 47ወለገብርሰ ዘየአምር ፈቃደ እግዚኡ ወኢይገብር ወኢያስተዳሉ ዘከመ ይፈቅድ ብዙኅ መቅሠፍቱ። 48ወዘሰ ኢየአምር ለእመ ኢገብረ ውኁድ መቅሠፍቱ ወለኵሉ ዘብዙኀ ወሀብዎ ብዙኀ ይትኃሠሥዎ ወለዘኒ ውኁደ አማሕፀንዎ ውኁደ ይትኃሠሥዎ።#ቦ ዘይቤ «ወለዘኒ ፈድፋደ አማሕፀንዎ ፈድፋደ ይተልውዎ» 49#ማቴ. 10፥34-36። እሳተ አምጻእኩ ለብሔር ወምንተ እፈቅድ ዘእንበለ አንድዶታ። 50#ማቴ. 20፥22፤ ዮሐ. 12፥27፤ ማር. 10፥38። ወባሕቱ ብየ ጥምቀት ዘእጠመቅ ወጥቀ#ቦ ዘይቤ «ወእፎ» እትዔገሥ እስከ እፌጽማ። 51#ማቴ. 10፥34-36። ወይቤሎሙ ለሕዝብ ይመስለክሙኑ ሰላመ ዘአምጻእኩ ለምድር አልቦ እብለክሙ ዘእንበለ መጥባሕት ወፍልጣን። 52ወእምይዜሰ ለእመ ኀምስቱ ሀለዉ ውስተ አሐዱ ቤት ይትፈለጡ ሠለስቱ እምክልኤቱ ወይትፈለጡ ክልኤቱ እምሠለስቱ ወይትፈለጥ አሐዱ እምካልኡ።#ቦ ዘኢይጽሕፍ «ወይትፈለጥ አሐዱ እምካልኡ» 53#ሚክ. 7፥6። ወይትፈለጥ አብ እምወልዱ ወወልድኒ እምአቡሁ ወትትፈለጥ እም እምወለታ ወወለትኒ እምእማ ወሐማት እመርዓታ ወመርዓትኒ እምሐማታ። 54#ማቴ. 16፥2። ወእምዝ ይቤሎሙ ለሕዝብ ሶበ ትሬእዩ ደመና ዘይዴምን መንገለ ዓረብ ዝናም ለመጺእ ከመዝ ይከውን ትብሉ። 55ወሶበ ይነፍኅ ነፋሰ አዜብ ሐሩር ለመጺእ ከመዝ ይከውን ትብሉ። 56#ዮሐ. 4፥35። ኦ መደልዋን ለገጸ ሰማይ ወምድር ተአምሩ አመክሮቶ ወእፎ ኢተአምሩ አመክሮቶን ለእላንቱ መዋዕል። 57ወለምንትኑ ለሊክሙ ኢትፈትሑ ጽድቀ።

በእንተ ዕርቅ

58 # ማቴ. 5፥25-27፤ ዕብ. 12፥14። ወሶበ ተሐውር ምስለ ዕድውከ ኀበ መልአክ ተዐረቅ በፍኖት ወሰልጥ ዘትፈድዮ ከመ ኢይትባጻሕከ ኀበ መኰንን ወመኰንን ይሜጥወከ ለወዓሊሁ ወወዓሊሁ ይሞቅሐከ። 59እብለከ ከመ ኢትወፅእ እምህየ እስከ ሶበ ትሴልጥ ደኃሪተ ገመስ ዘላዕሌከ።

Currently Selected:

ወንጌል ዘሉቃስ 12: ሐኪግ

Highlight

Copy