ወንጌል ዘሉቃስ 13

ምዕራፍ 13

በእንተ ንስሓ

1ወበውእቱ መዋዕል መጽኡ ሰብእ ኀቤሁ ወዜነውዎ በእንተ ገሊላውያን እለ ደመረ ጲላጦስ ደሞሙ ምስለ መሥዋዕቶሙ። 2#ዮሐ. 9፥2-3። ወአውሥአ እግዚእ ኢየሱስ ወይቤሎሙ ይመስለክሙኑ እሙንቱ ገሊላውያን ኃጥኣን እምኵሉ ሰብአ ገሊላ እስመ ዛቲ ሕማም ረከበቶሙ። 3#መዝ. 7፥12። አልቦ እብለክሙ እመሰ ኢነሳሕክሙ አንትሙኒ ከማሆሙ ትትኀጐሉ ኵልክሙ። 4#ነህ. 3፥15፤ ዮሐ. 9፥2። ወሚመ ይመስለክሙኑ እሉ ዐሠርቱ ወሰመንቱ እለ ወድቀ ላዕሌሆሙ ማኅፈድ በሰሊሆሙ ወቀተሎሙ ከመ እሙንቱ ኃጥኣን እምኵሉ ሰብአ ኢየሩሳሌም። 5#ግብረ ሐዋ. 3፥19። አልቦ እብለክሙ እመሰ ኢነሳሕክሙ ከማሆሙ ትትኀጐሉ አንትሙሂ ኵልክሙ።

በእንተ በለስ ዘአልባቲ ፍሬ

6 # ኢሳ. 5፥2፤ ማቴ. 21፥19። ወመሰለ ሎሙ ወይቤሎሙ አሐዱ ብእሲ በለስ ቦቱ ውስተ ዐጸደ ወይኑ እምርት ወሖረ ኀቤሃ ይንሣእ ፍሬሃ ወኢረከበ። 7ወሶበ ኢረከበ#ቦ ዘኢይጽሕፍ «ወሶበ ኢረከበ» ይቤሎ ለዐቃቤ ወይን ናሁ ሠለስተ ዓመተ እንዘ እመጽእ እንሣእ ፍሬሃ ለዛቲ በለስ ወኢረከብኩ ግዝማ እንከሰ ከመ ኢታጽርእ ምድረነ። 8#2ጴጥ. 3፥9-15። ወአውሥአ ወይቤሎ ኅድጋ እግዚኦ ኀሪፈኒ እስከ እከሪ መሬተ ወእወዲ ወእክዑ ድኵዐ ታሕቴሃ። 9#ማቴ. 7፥19። ለእመቦ ከመ ትፈሪ ለዓሙ ወእመ አኮሰ ንገዝማ ለእመ ሐዮነ።#ቦ ዘኢይጽሕፍ «ለእመ ሐዮነ»

በእንተ ብእሲት ዘድኅነት በዕለተ ሰንበት

10ወመሀሮሙ በሰንበት በአሐዱ ምኵራብ። 11ወሀለወት አሐቲ ብእሲት እንተ አድወያ ጋኔን ዐሠርተ ወሰመንተ ዓመተ ወጕሕቈት ወኢትክል ርቱዐ ቀዊመ ግሙራ። 12ወርእያ እግዚእ ኢየሱስ ወመሐራ ወጸውዓ ወይቤላ ኦ ብእሲቶ ተስዕርኪ እምደዌኪ። 13#ዘፀ. 20፥9-10፤ ዘዳ. 5፥13-14፤ ማር. 7፥32። ወአንበረ እዴሁ ላዕሌሃ ወረትዐት ሶቤሃ ወአእኰተቶ ለእግዚአብሔር። 14ወአውሥአ መጋቤ ምኵራብ እንዘ ይትመዐዕ እስመ በሰንበት ፈወሰ እግዚእ ኢየሱስ ወይቤሎሙ ለሕዝብ አኮኑ ሰዱስ መዋዕል ውእቱ በዘትገብሩ ግብረክሙ ውእተ አሚረ ንዑ ተፈወሱ ወአኮ በዕለተ ሰንበት። 15#14፥5። ወአውሥአ እግዚእ ኢየሱስ ወይቤሎሙ ኦ መደልዋን አንትሙሰ ኢትፈትሑኑ አድገክሙ ወላሕመክሙ እምነ ምቅማሑ ወኢትወስድዎኑ ታስትይዎ ማየ በዕለተ ሰንበት። 16#19፥9። ወዛቲ ወለተ አብርሃም ናሁ ዐሠርቱ ወሰመንቱ ዓመት እምዘአሰራ ሰይጣን አኮኑ ርቱዕ ትትፈታሕ እምነ ማእሰራ ይእቲሂ በዕለተ ሰንበት። 17ወዘንተ ብሂሎ ተኀፍሩ ኵሎሙ እለ ቆሙ ላዕሌሁ ወተፈሥሑ ኵሉ ሕዝብ በእንተ ኵሉ መንክር ዘይትገበር እምኔሁ።

በእንተ ኅጠተ ሰናፔ ወበእንተ ዘርዕ ወብኁእ

18 # ማቴ. 13፥31-33፤ ማር. 4፥30-32። ወይቤሎሙ ምንተ ትመስል መንግሥተ ሰማያት ወበምንት አስተማስላ። 19ትመስል ኅጠተ ሰናፔ እንተ ነሥኣ ብእሲ ወዘርዓ ውስተ ገራህቱ ወልህቀት ወኮነት ዕፀ ዐባየ ወአጽለሉ አዕዋፈ ሰማይ ውስተ አዕጹቂሃ። 20ወካዕበ ይቤ በምንት አስተማስላ ለመንግሥተ እግዚአብሔር። 21#ማቴ. 13፥33። ትመስል ብኁአ ዘነሥአቶ ብእሲት ወደፈነቶ ውስተ ሐሪጽ ዘሠለስቱ መስፈርት ወአብኅአ ኵሎ።

በእንተ ኅሩያን እለ ይድኅኑ

22ወየሐውር አህጉረ ወአዕጻዳተ ያንሶሱ በኢየሩሳሌም ወይሜህር። 23ወይቤሎ አሐዱ እግዚኦ ውኁዳንኑ እንጋ እሙንቱ እለ ይድኅኑ። 24#ማቴ. 7፥13-14፤ ሮሜ 9፥31። ወይቤሎሙ ተኀየሉ ትባኡ እንተ ጸባብ አንቀጽ እብለክሙ ብዙኃን እለ የኀሥሡ ይባኡ ወኢይክሉ። 25#ማቴ. 25፥11-12። እስመ ይትነሣእ በዓለ ቤት ወየዐጹ ኆኅቶ ወይእተ ጊዜ ይእኅዙ ይቁሙ አፍኣ ወይጐድጕዱ እንዘ ይብሉ እግዚኦ እግዚኦ አርኅወነ ወያወሥእ ወይብሎሙ ኢየአምረክሙ እምአይቴ አንትሙ። 26#ማቴ. 7፥22-23። ወእምዝ ይእኅዙ ይበልዎ በላዕነሂ ወሰተይነሂ በቅድሜከ ወመሀርከ በመራሕብቲነ። 27#ማቴ. 8፥11-12፤ መዝ. 6፥8። ወይቤሎሙ እብለክሙ ኢየአምረክሙ እምአይቴ አንትሙ ረኀቁ እምኔየ ኵልክሙ ገበርተ ዐመፃ። 28#ማቴ. 22፥13፤ 25፥30። ወሑሩ ውስተ ብካይ ወሐቅየ ስነን ወአመ ርኢክምዎሙ ለአብርሃም ወለይስሐቅ ወለያዕቆብ ወለኵሎሙ ነቢያት በመንግሥተ እግዚአብሔር ወለክሙሰ ያውፅኡክሙ አፍኣ። 29#ማቴ. 8፥11-12። ወይመጽኡ እምጽባሕ ወእምዕራብ ወእምሰሜን ወእምደቡብ ወይረፍቁ ወይትፌሥሑ በመንግሥተ እግዚአብሔር። 30#ማቴ. 19፥30፤ 20፥16፤ ማር. 10፥31። ወይከውኑ ደኀርት ቀደምተ ወቀደምት ይከውኑ ደኀርተ።

ዘከመ ነገርዎ ለእግዚእ ኢየሱስ በእንተ ሄሮድስ

31 # 9፥7። ወበይእቲ ዕለት መጽኡ ፈሪሳውያን ወይቤልዎ ሑር እምዝየ እስመ ሄሮድስ ይፈቅድ ይቅትልከ። 32ወይቤሎሙ ሑሩ በልዋ ለዛቲ ቍንጽል ናሁ አወፅእ አጋንንተ ወእሁብ ሕይወተ ዮም ወጌሠመ ወበሣልስት እፌጽም። 33#7፥16። ወባሕቱ ዮምሰ ወጌሠመ ሀለውኩ ወበሣልስት አሐውር እስመ ኢይደልዎ ለነቢይ መዊት በአፍኣ ዘእንበለ በኢየሩሳሌም።

ዘከመ ተናገረ እግዚእ ኢየሱስ ተኃድጎታ ለኢየሩሳሌም

34 # ማቴ. 23፥37-39፤ መዝ. 16፥8፤ 90፥4። ኢየሩሳሌም ኢየሩሳሌም እንተ ትቀትሊዮሙ ለነቢያት ወትዌግሪዮሙ ለሐዋርያት እለ ተፈነዉ ኀቤኪ ሚመጠነ ፈቀድኩ አስተጋብኦሙ ለደቂቅኪ ከመ እንተ ታስተጋብእ ዶርሆ ዕጐሊሃ ታሕተ ክነፊሃ ወአበይክሙ። 35#መዝ. 68፥25፤ ኤር. 7፥14-15፤ 22፥5፤ ሚክ. 3፥12። ናሁ ይትኀደግ ለክሙ ቤትክሙ በድወ እብለክሙ ከመ ኢትሬእዩኒ እምይእዜ እስከ ሶበ ትብሉ ቡሩክ ዘይመጽእ በስመ እግዚአብሔር።

Currently Selected:

ወንጌል ዘሉቃስ 13: ሐኪግ

Highlight

Copy