ወንጌል ዘሉቃስ 2

ምዕራፍ 2

በእንተ ተጽሕፎተ ሕዝብ

1ወኮነ በውእቱ መዋዕል ወፅአ ትእዛዝ እምኀበ አውግስጦስ ቄሳር ከመ ይጸሐፍ ኵሉ ዓለም። 2#ግብረ ሐዋ. 5፥37። ወውእቱ ጻሕፍ ቀዳሚ አመ ቄሬኔዎስ መስፍን ለሶርያ። 3#ዮሐ. 13፥2። ወሖረ ኵሉ ሰብእ ይጸሐፍ በበ ሀገሩ። 4#1፥26፤ ሚክ. 5፥2። ወዐርገ ዮሴፍኒ እምገሊላ እምሀገረ ናዝሬት መንገለ ይሁዳ ኀበ ሀገረ ዳዊት እንተ ስማ ቤተ ልሔም እስመ እምቤተ ዳዊት ወእምአዝማደ ቤቱ ውእቱ። 5ወሖረ ይጸሐፍ ምስለ ማርያም እንተ ፈኀሩ ሎቱ እንዘ ፅንስት ይእቲ።

በእንተ ልደተ እግዚእነ

6 # ማቴ. 1፥18-25። ወእምዝ እንዘ ሀለዉ ህየ በጽሐ ዕለተ ወሊዶታ። 7ወወለደት ወልደ ዘበኵራ ወአሰረቶ መንኮብያቲሁ#ቦ ዘኢይጽሕፍ «ወአሰረቶ መንኮብያቲሁ» ወጠብለለቶ በአጽርቅት ወአስከበቶ ውስተ ጎል እስመ አልቦሙ መካን ውስተ ማኅደሮሙ። 8ወሀለዉ ኖሎት ውስተ ውእቱ ብሔር ይተግሁ ወይሔልዉ ወየዐቅቡ መራዕይሆሙ ሌሊተ በበ እብሬቶሙ።#ቦ ዘኢይጽሕፍ «በበ እብሬቶሙ» 9#ኢሳ. 60፥1። ወናሁ ቆመ መልአከ እግዚአብሔር ኀቤሆሙ ወስብሐተ እግዚአብሔር ሠረቀ ላዕሌሆሙ ወፈርሁ ዐቢየ ፍርሀተ። 10ወይቤሎሙ መልአክ ኢትፍርሁ እስመ ናሁ እዜንወክሙ ዐቢየ ዜና ዘይከውን ፍሥሓ ለክሙ ወለኵሉ ዓለም።#ቦ ዘይቤ «ለኵሉ ሕዝብ» 11#ዮሐ. 4፥25። እስመ ናሁ ተወልደ ለክሙ ዮም መድኅን ዘውእቱ ክርስቶስ እግዚእ ቡሩክ በሀገረ ዳዊት። 12ወከመዝ ትእምርቱ ለክሙ ትረክቡ ሕፃነ እሱረ መንኮብያቲሁ ወጥብሉለ በአጽርቅት ወስኩበ ውስተ ጎል። 13#ዳን. 7፥10፤ ራእ. 5፥8-14። ወግብተ መጽኡ ምስለ ውእቱ መልአክ ብዙኃን ሐራ ሰማይ እንዘ ይሴብሕዎ ለእግዚአብሔር፤ 14#ኢሳ. 57፥19፤ ሮሜ 5፥1፤ ኤፌ. 2፥14-17። ወይብሉ ስብሐት ለእግዚአብሔር በሰማያት ወሰላም በምድር ለዕጓለ እመሕያው ሥምረቱ። 15ወእምዝ ዐሪጎሙ መላእክት እምኀቤሆሙ ውስተ ሰማይ ይቤሉ እሙንቱ ሰብእ ኖሎት በበይናቲሆሙ ንሑር ወናንሶሱ እስከ ቤተ ልሔም ወናእምር ዘንተ ነገረ ዘአርአየነ እግዚአብሔር። 16#ማቴ. 2፥11። ወሖሩ ፍጡነ ወረከብዎሙ ለማርያም ወለዮሴፍ ወለሕፃንኒ ይሰክብ ውስተ ጎል። 17ወርእዮሙ አእመሩ ከመ በእንተ ውእቱ ሕፃን ዘነገርዎሙ። 18ወኵሎሙ እለ ሰምዑ አንከሩ ዘነገርዎሙ ኖሎት። 19#1፥29። ወማርያምሰ ተዐቅብ ዘንተ ኵሎ ነገረ ወትወድዮ ውስተ ልባ። 20#መዝ. 146፥1። ወተመይጡ ኖሎት እንዘ ይሴብሕዎ ወየአኵትዎ ለእግዚአብሔር በእንተ ኵሉ ዘርእዩ ወሰምዑ ዘከመ ይቤልዎሙ።

ዘከመ ተገዝረ እግዚእ ኢየሱስ ወዘከመ አቀምዎ ውስተ ቤተ መቅደስ

21 # 1፥31፤ ዘሌ. 12፥3፤ ማቴ. 1፥25። ወአመ ተፈጸመ ሰሙን ዕለት ወሰድዎ ለሕፃን ከመ ይግዝርዎ ወሰመይዎ ስሞ ኢየሱስ በከመ ሰመዮ መልአክ እምቅድመ ትፅንሶ በከርሣ። 22#ዘሌ. 12፥6-8። ወአመ ተፈጸመ መዋዕለ ንጽሖሙ በከመ ሕገ ሙሴ ወሰድዎ ኢየሩሳሌም ያቅምዎ ቅድመ እግዚአብሔር። 23#ዘፀ. 13፥2-12። በከመ ጽሑፍ ውስተ ሕገ እግዚአብሔር «ኵሉ ተባዕት ዘይፈትሕ ማሕፀነ እሙ ቅዱሰ ይሰመይ ለእግዚአብሔር።» 24#ዘሌ. 12፥8። ወከመ ያብኡ መሥዋዕተ በእንቲኣሁ በከመ ተብህለ ውስተ ሕገ እግዚአብሔር «ዘውገ ማዕነቅ፥ ወእመአኮ ክልኤቲ ዕጕለ ርግብ።»

በእንተ ስምዖን

25 # ሐጌ 2፥8። ወሀሎ አሐዱ ብእሲ በኢየሩሳሌም ዘስሙ ስምዖን ወውእቱ ጻድቅ ወየዋህ ወይሴፎ ይርአይ መድኀኒቶሙ ወፍሥሓሆሙ ለእስራኤል ወመንፈስ ቅዱስ ላዕሌሁ። 26#መዝ. 88፥48። ወአርአዮ መንፈስ ቅዱስ ከመ ኢይመውት ዘእንበለ ይርአይ መሲሖ ለእግዚአብሔር። 27#22፥24። ወወሰዶ መንፈስ ምኵራበ ወሶበ አብእዎ አዝማዲሁ ለሕፃን እግዚእ ኢየሱስ ከመ ይግበሩ ሎቱ ዘበሕጉ። 28ተወክፎ ውእቱኒ፤ ወአንበሮ ውስተ ሕፅኑ ወባረኮ ለእግዚአብሔር ወይቤ፤ 29#ዘፍ. 46፥30፤ ራእ. 14፥13። ይእዜ ትስዕሮ ለገብርከ በሰላም እግዚኦ በከመ አዘዝከ። 30#ዘፍ. 49፥1-18። እስመ ርእያ አዕይንትየ አድኅኖተከ። 31#ኢሳ. 52፥10። ዘአስተዳለውከ ቅድመ ኵሉ ሕዝብከ። 32#ኢሳ. 42፥6፤ 49፥6። ከመ ትክሥት ብርሃነ ለአሕዛብ ወክብረ ለሕዝብከ እስራኤል። 33ወዮሴፍሰ ወእሙ ያነክሩ በእንተ ዘይነብብ ላዕሌሁ። 34#ኢሳ. 8፥14፤ ማቴ. 21፥42፤ ሮሜ 9፥32-33። ወባረኮሙ ስምዖን ወይቤላ ለእሙ ማርያም ናሁ ዝንቱ ሕፃን ሥዩም ለድቀቶሙ ወለተንሥኦቶሙ ለብዙኃን እምውስተ እስራኤል ወለትእምርት በዘይትወቀሱ። 35#ዮሐ. 19፥25። ወለኪሰ ይበውእ ውስተ ልብኪ ኲናት#ቦ ዘይቤ «ኲናተ ኑፋቄ» ከመ ይክሥት ኅሊና ልቦሙ ለብዙኃን።

በእንተ ሐና ነቢይት

36ወሀለወት ሐና ነቢይት ወለተ ፋኑኤል እንተ እምነገደ አሴር ወኀለፈ መዋዕሊሃ ወምስለ ምታሰ ነበረት ሰብዐተ ክረምተ እምድኅረ ነበረት በድንግልናሃ። 37#1ጢሞ. 5፥5። ወኮነት መዓስብተ ሰማንያ ወአርባዕተ ክረምተ ወኢትወፅእ እምኵራብ መዐልተ ወሌሊተ እንዘ ትትቀነይ በጾም ወበጸሎት። 38ወተንሥአት ሶቤሃ ወገነየት ወአእኰተቶ ለእግዚአብሔር ወነገረት በእንቲኣሁ ለኵሎሙ እለ ይሴፈዉ መድኀኒታ ለኢየሩሳሌም። 39#ማቴ. 2፥23። ወፈጺሞሙ ኵሎ ዘበሕገ እግዚአብሔር አተዉ ገሊላ ሀገሮሙ ናዝሬተ። 40#1፥80፤ 2፥52። ወልህቀ ሕፃን ወጸንዐ በመንፈስ ቅዱስ ወምሉእ ጥበበ ወፍጹም በጸጋ እግዚአብሔር ዘላዕሌሁ።

ዘከመ ተረክበ እግዚእ ኢየሱስ ማእከለ ሊቃውንት

41 # ዘፀ. 12፥1-27፤ ዘዳ. 16፥1-8፤ 23፥14-16። ወየሐውሩ አዝማዲሁ ኢየሩሳሌም ለለዓመት ለበዓለ ፋሲካ። 42ወአመ ኮኖ ፍጹመ ሎቱ ዐሠርቱ ወክልኤቱ ክረምት ዐርጉ ለበዓል ኢየሩሳሌም በከመ ያለምዱ። 43ወሰሊጦሙ ግብሮሙ አተዉ ገሊላ ሀገሮሙ ወሕፃንሰ እግዚእ ኢየሱስ ነበረ ኢየሩሳሌም ወኢያእመሩ ዮሴፍ ወእሙ። 44ወይመስሎሙ ከመ ዘበፍኖት ሀሎ ምስለ ሰብእ ወበጺሖሙ ኀሠሥዎ በዕለታ ኀበ አዝማዲሁ ወኀበ እለ የአምርዎ ወኢረከብዎ። 45ወሶበ ኢረከብዎ ተሠውጡ ኢየሩሳሌም እንዘ የኀሥሥዎ። 46ወእምዝ በሣልስታ ረከብዎ በምኵራብ እንዘ ይነብር በማእከለ ሊቃውንት ወያጸምዖሙ ወይሴአሎሙ። 47#4፥22፤ ዮሐ. 7፥15። ወያነክርዎ ኵሎሙ እለ ሰምዕዎ ጥበቦ ወአውሥኦቶ። 48ወሶበ ርእይዎ ደንገፁ ወትቤሎ እሙ ወልድየ ለምንት ከመዝ ረሰይከነ እስመ ናሁ አቡከኒ ወአነኒ ሰራሕነ እንዘ ነኀሠሥከ። 49#ዮሐ. 2፥16። ወይቤሎሙ ለምንት ተኀሥሡኒ ኢያእመርክሙኑ ከመ ይደልወኒ አሀሉ ውስተ ዘአቡየ ቤት። 50#ዘፀ. 20፥19። ወእሙንቱሰ ኢለበዉ ቃሎ ዘይቤሎሙ። 51ወሖረ ወወረደ ምስሌሆሙ ናዝሬተ ወኮነ ይትኤዘዝ ሎሙ ወእሙሰ ተዐቅብ ዘንተ ኵሎ ነገረ ወትወድዮ#ቦ ዘኢይጽሕፍ «ወትወድዮ» ውስተ ልባ። 52#1ሳሙ. 2፥26፤ ምሳ. 3፥4፤ ማቴ. 3፥1-2፤ ማር. 1፥1-8። ወእግዚእ ኢየሱስ ልህቀ ወዐብየ በጥበብ ወበምክር ወበጸጋ በኀበ እግዚአብሔር ወበኀበ ሰብእ።

Currently Selected:

ወንጌል ዘሉቃስ 2: ሐኪግ

Highlight

Copy