ወንጌል ዘሉቃስ 3

ምዕራፍ 3

በእንተ ስብከት ዘዮሐንስ መጥምቅ

1 # ማቴ. 3፥1-12፤ ማር. 1፥1-8። ወአመ ዐሠርቱ ወኀምስቱ ዓመተ መንግሥቱ ለጢባርዮስ ቄሳር እንዘ ጲላጦስ ጰንጤናዊ መልአከ ይሁዳ ወሄሮድስ ንጉሥ ላዕለ ገሊላ ወፊልጶስ እኁሁ መልአከ ኢጡርያስ ወለብሔረ ጥራኮኒዶስ ወሊሳንዩስ ሀቢ እንተ ሳብላኔስ። 2ወአመ ሐና ወቀያፋ ሊቃነ ካህናት መጽአ ቃለ እግዚአብሔር ላዕለ ዮሐንስ ወልደ ዘካርያስ በገዳም። 3ወዖደ አድያመ ዮርዳኖስ ወሰበከ ጥምቀተ ለንስሓ በዘይትኀደግ ኀጢአት። 4#ኢሳ. 40፥3-5። በከመ ይብል ቃለ መጽሐፈ ኢሳይያስ ነቢይ ዘይቤ፤ «ናሁ ቃለ ዐዋዲ ዘይሰብክ በገዳም ወይብል ጺሑ ፍኖተ እግዚአብሔር ወዐርዩ መጽያሕቶ። 5ኵሉ ማዕምቅ ይምላእ ወኵሉ ደብር ወወግር ይተሐት ወይኩን መብእስ መጽያሕተ ርቱዐ ወይዕሪ ፍኖት መብእስ። 6#ኢሳ. 52፥10። ወይርአይ ኵሉ ዘነፍስ አድኅኖቶ ለእግዚአብሔር።» 7#ማቴ. 12፥34፤ 23፥33። ወይቤሎሙ ዮሐንስ ለሕዝብ እለ መጽኡ ኀቤሁ ያጥምቆሙ ኦ ትውልደ ሰበድዓት መኑ ነገረክሙ ታምሥጡ እመቅሠፍት ዘይመጽእ። 8#ማቴ. 3፥8-9፤ ዮሐ. 8፥33-39። ግበሩ እንከ ፍሬ ዘይደልወክሙ ለንስሓ ወኢይምሰልክሙ በብሂለ ሀሎ አቡነ አብርሃም እብለክሙ ከመ ይክል እግዚአብሔር አንሥኦ ውሉድ ለአብርሃም እምእላንቱ አእባን። 9#ማቴ. 3፥10፤ 7፥19፤ ዮሐ. 15፥6። እስመ ናሁ ወድአ ተሠይመ ጕድብ ኀበ ጕንደ ዕፀው ወለኵሉ ዕፅ ዘኢይፈሪ ፍሬ ሠናየ ይገዝምዎ ወውስተ እሳት ይወድይዎ።

በእንተ እለ ተስእልዎ ለዮሐንስ

10 # ግብረ ሐዋ. 2፥37። ወተስእልዎ ሕዝብ ወይቤልዎ ምንተ ንግበር። 11#ኢሳ. 58፥7፤ ያዕ. 2፥13-15። ወአውሥአ ወይቤሎሙ ዘቦ ክልኤ ልብስ ኪዳናት የሀብ ለዘአልቦ ወዘሂቦ እክል ከማሁ ይግበር። 12#ሉቃ. 7፥29። ወመጽኡ መጸብሓንሂ ያጥምቆሙ ወተስእልዎ ወይቤልዎ ሊቅ ምንተ ንግበር። 13ወይቤሎሙ አልቦ ዘትገብሩ ፈድፋደ እምዘተአዘዝክሙ። 14#ዘሌ. 19፥13። ወተስእልዎ ሐራሂ ወይቤልዎ ንሕነኬ ምንተ ንግበር ወይቤሎሙ ኢትትዐገሉ ወኢመነሂ ወኢትሂዱ አላ ንበሩ በበሲሳይክሙ። 15#ዮሐ. 1፥19-20። ወኀለዩ ኵሉ ሕዝብ በልቦሙ ወመሰሎሙ ዮሐንስ ከመ ውእቱ ክርስቶስ። 16#ማቴ. 3፥11-12፤ ዮሐ. 1፥27። ወአውሥአ ዮሐንስ ወይቤሎሙ ለኵሎሙ አንሰ አጠምቀክሙ በማይ ወይመጽእ ዘይጸንዐኒ ዘኢይደልወኒ እፍታሕ ቶታነ አሣእኒሁ ወውእቱ ያጠምቀክሙ በመንፈስ ቅዱስ ወበእሳት። 17ዘመሥኤ ውስተ እዴሁ ወያነጽሕ ዐውደ እክሉ ወያስተጋብእ ሥርናዮ ውስተ መዛግብቲሁ ወሐሠሮሰ ያውዒ በእሳት ዘኢይጠፍእ። 18ወቦ ባዕድኒ ብዙኅ ዘመሀሮሙ ለሕዝብ ወገሠጾሙ።

ዘከመ ተሞቅሐ ዮሐንስ መጥምቅ

19 # ማር. 6፥17-18። ወኮነ ዮሐንስ ይጌሥጾ ለሄሮድስ ወይዘልፎ በእንተ ሄሮድያዳ ብእሲተ ፊልጶስ እኁሁ ወበእንተ ኵሉ እኩይ ዘገብረ ሄሮድስ። 20ወዓዲ ወሰከ እንበይነ ዝኒ ተቀየሞ ለዮሐንስ ወዐጸዎ ውስተ ቤተ ሞቅሕ።

በእንተ ጥምቀቱ ለእግዚእነ ኢየሱስ

21 # ማቴ. 3፥13-17፤ ማር. 1፥9-11። ወእምድኅረ ተጠምቁ ኵሉ ሕዝብ ተጠምቀ እግዚእ ኢየሱስኒ። 22#ዘፍ. 22፥2፤ መዝ. 2፥7፤ ኢሳ. 42፥1፤ ማቴ. 3፥17፤ ማር. 1፥11፤ ሉቃ. 9፥35። ወእንዘ ይጼሊ ተርኅወ ሰማይ ወወረደ መንፈስ ቅዱስ ላዕሌሁ በአምሳለ ሥጋ ርእየተ ርግብ ጸዓዳ ወመጽአ ቃል እምሰማይ ዘይብል አንተ ውእቱ ወልድየ ዘአፈቅር ወኪያከ ሠመርኩ።

በእንተ መጽሐፈ ትውልድ ዘኢየሱስ

23 # 4፥22። ወየአክል ሠላሳ ክረምቱ ለእግዚእ ኢየሱስ ወይመስሎሙ ወልደ ዮሴፍ ውእቱ። 24ወልደ ዔሊ ወልደ ማቲ ወልደ ሌዊ ወልደ ሜልኪ ወልደ ዮና ወልደ ዮሴፍ። 25ወልደ ማታትዩ ወልደ አሞጽ ወልደ ናሆም ወልደ ኤስሎም ወልደ ናጌ። 26ወልደ ማአት ወልደ ማታትዩ ወልደ ሴሜይ ወልደ ዮሴፍ ወልደ ዮዳ። 27ወልደ ዮናን ወልደ ሬስ ወልደ ዘሩባቤል ወልደ ሰላትያል ወልደ ኔሪ። 28ወልደ ሜልኪ ወልደ ሐዲ ወልደ ዮሳ ወልደ ቆሳም ወልደ ኤልሞዳም ወልደ ኤር። 29ወልደ ዮሴዕ ወልደ አልዓዛር ወልደ ዮራም ወልደ ማጣት ወልደ ሌዊ። 30ወልደ ስምዖን ወልደ ይሁዳ ወልደ ዮሴፍ ወልደ ዮናን ወልደ ኤልያቄም። 31#2ሳሙ. 5፥17። ወልደ ሜልያ ወልደ ማይናን ወልደ ማጣት ወልደ ናታን ወልደ ዳዊት። 32#ሩት 4፥22። ወልደ ዕሤይ ወልደ ኢዮቤድ ወልደ ቦዔዝ ወልደ ሰልሞን ወልደ ነአሶን። 33#ዘፍ. 29፥35። ወልደ አሚናዳብ ወልደ አራም ወልደ ኦርኒ ወልደ ኤስሮም ወልደ ፋሬስ ወልደ ይሁዳ። 34#ዘፍ. 21፥2-3። ወልደ ያዕቆብ ወልደ ይስሐቅ ወልደ አብርሃም ወልደ ታራ ወልደ ናኮር። 35ወልደ ሴሩኅ ወልደ ራግው ወልደ ፋሌቅ ወልደ ኤቦር ወልደ ሳላ። 36#ዘፍ. 5፥3-32። ወልደ ቃይንም ወልደ አርፋክስድ ወልደ ሴም ወልደ ኖኅ ወልደ ላሜሕ። 37ወልደ ማቱሳላ ወልደ ሄኖክ ወልደ ያሬድ ወልደ መላልኤል ወልደ ቃይናን። 38#ዘፍ. 5፥1-3። ወልደ ሄኖስ ወልደ ሴት ወልደ አዳም ወልደ እግዚአብሔር።

Currently Selected:

ወንጌል ዘሉቃስ 3: ሐኪግ

Highlight

Copy