ወንጌል ዘሉቃስ 4

ምዕራፍ 4

ዘከመ ተመከረ እግዚእ ኢየሱስ

1 # ማቴ. 4፥1-11፤ ማር. 1፥12-13። ወመልአ መንፈስ ቅዱስ ላዕለ እግዚእ ኢየሱስ ወተመይጠ እምዮርዳኖስ ወወሰዶ መንፈስ ገዳመ። 2#ዘፀ. 34፥28። አርብዓ መዐልተ ወአርብዓ ሌሊተ ያሜክሮ ሰይጣን ወኢበልዐ ወኢሰትየ ምንተኒ በውእቶን መዋዕል ወተፈጺሞን እማንቱ መዋዕል ርኅበ። 3ወይቤሎ ሰይጣን እመሰ ወልደ እግዚአብሔር አንተ በል ዝንቱ እብን ይኩን ኅብስተ። 4#ዘዳ. 8፥3። ወአውሥአ እግዚእ ኢየሱስ ወይቤሎ ጽሑፍ ዘይብል «አኮ በኅብስት ክመ ዘየሐዩ ሰብእ አላ በኵሉ ቃል ዘይወፅእ እምአፉሁ ለእግዚአብሔር።» 5ወአዕረጎ ሰይጣን ውስተ ደብር ነዋኅ ወአርአዮ መንግሥታተ ኵሉ ዓለም ከመ ወኢምንትኒ። 6ወይቤሎ ሰይጣን ዘንተ ኵሎ ምኵናነ ለከ እሁበከ ወዘንተኒ ክብረ እስመ ሊተ ተውህበ ወለዘፈቀድኩ እሁቦ። 7ወእምከመ ሰገድከ ሊተ አንተ ቅድሜየ ለከ ይኩንከ ኵሉ። 8#ዘዳ. 6፥13፤ 10፥12። ወአውሥአ ወይቤሎ እግዚእ ኢየሱስ ሑር እምድኅሬየ ሰይጣን ጽሑፍ «ለእግዚአብሔር አምላክከ ትስግድ ወኪያሁ ባሕቲቶ ታምልክ።» 9ወወሰዶ ኢየሩሳሌም ወአቀሞ ዲበ ርእሰ ማዕዘንተ ቤተ መቅደስ ወይቤሎ እመሰ ወልደ እግዚአብሔር አንተ ረድ ለሊከ ታሕተ እምዝየ ወተወረው። 10#መዝ. 90፥11። እስመ ጽሑፍ «ከመ ለመላእክቲሁ ይኤዝዞሙ በእንቲኣከ ከመ ይዕቀቡከ በኵሉ ፍናዊከ። 11ወበእደዊሆሙ ያነሥኡከ ከመ ኢትትዐቀፍ በእብን እግረከ።» 12#ዘዳ. 6፥16። ወአውሥአ እግዚእ ኢየሱስ ወይቤሎ ተብህለ «ኢታመክሮ ለእግዚአብሔር አምላክከ።» 13#ዮሐ. 14፥30፤ ዕብ. 4፥15። ወፈጺሞ ሰይጣን አመክሮቶ በኵሉ ኀደጎ እስከ ጊዜሁ።

በእንተ ቀዳሚት ስብከቱ

14 # ማቴ. 4፥12-16፤ ማር. 1፥14-15። ወተመይጠ እግዚእ ኢየሱስ በኀይለ መንፈስ ቅዱስ ወሖረ ገሊላ ወተሰምዐ ነገሩ በኵሉ በሓውርት። 15ወይሜህሮሙ በኵሉ ምኵራባቲሆሙ ወያነክሩ ምህሮቶ ወይሴብሕዎ ኵሉ። 16#ማቴ. 13፥58፤ ማር. 6፥1-6። ወሖረ ናዝሬተ ኀበ ተሐፅነ ወቦአ ምኵራበ በዕለተ ሰንበት በከመ ያለምድ ወተንሥአ ያንብብ። 17ወወሀብዎ መጽሐፈ ኢሳይያስ ነቢይ ወከሢቶ መጽሐፈ ረከበ መካነ ኀበ ጽሑፍ ዘይብል። 18#ኢሳ. 61፥1-2። «መንፈሰ እግዚአብሔር ላዕሌየ ዘበእንቲአሁ ቀብዐኒ እዜንዎሙ ለነዳያን ፈነወኒ ወእስብክ ሎሙ ግዕዛነ ለፂዉዋን ወአስተፍሥሖሙ ለኅዙናን ወይርአዩ ዕዉራን ወአንግፎሙ ለግፉዓን ወእፍትሖሙ ለሙቁሓን ወእፈውሶሙ ለቍሱላን። 19#ዘሌ. 25፥10። ወእስብክ ዐመተ እግዚአብሔር ኅሪተ»።#ቦ ዘይዌስክ «ወዘኮነ መዋዕለ» 20ወከደነ መጽሐፈ ወመጠዎ ለላእክ ወነበረ ወአንሥኡ አዕይንቲሆሙ ኵሎሙ እለ ሀለዉ ውስተ ምኵራብ ወነጸርዎ። 21ወአኀዘ ይበሎሙ ዮም በጽሐ ቃለ ዝንቱ መጽሐፍ ወተሰልጠ ውስተ እዘኒክሙ። 22#መዝ. 44፥2፤ ኢሳ. 50፥4፤ ዮሐ. 6፥42። ወእለ ሰምዕዎ ኵሎሙ አንከሩ ሞገሰ ቃሉ ወሣእሣአ አፉሁ ወይቤሉ አኮኑ ዝንቱ ውእቱ ወልደ ዮሴፍ። 23#ማቴ. 4፥13። ወይቤሎሙ ቦኑ ትብሉኒ ኵልክሙ ዛተ ምሳሌ ዐቃቤ ሥራይ ፈውስ ርእሰከ ኵሎ ዘሰማዕነ ዘገበርከ በቅፍርናሆም ግበር በዝየኒ በሀገርከ። 24#1፥29። ወይቤሎሙ አማን እብለክሙ ኢይከብር ነቢይ በሀገሩ። 25#1ነገ. 17፥8-24፤ 18፥1-10፤ ያዕ. 5፥17። አማን እብለክሙ ብዙኃት መበለታት ሀለዋ በውስተ እስራኤል አመ መዋዕለ ኤልያስ ነቢይ አመ ተዐጽወ ሰማይ ሠለስተ ዓመተ ወስድስተ አውራኀ እስከ ኮነ ረኀብ ዐቢይ ውስተ ኵሉ ምድር። 26ወኢተፈነወ ኤልያስ ኀበ አሐቲ እምኔሆን ዘእንበለ ኀበ አሐቲ ብእሲት መበለት ዘሰራጵታ ዘሲዶና። 27#2ነገ. 5፥1-14። ወብዙኃን እለ ለምጽ ሀለዉ በውስተ እስራኤል አመ መዋዕለ ኤልሳዕ ነቢይ ወኢነጽሐ አሐዱሂ እምኔሆሙ ዘእንበለ ንእማን ሶርያዊ። 28#ግብረ ሐዋ. 22፥22። ወተምዑ ኵሎሙ እለ ሀለዉ በምኵራብ ሰሚዖሙ ዘንተ። 29ወተንሥኡ ሶቤሃ ወአውፅእዎ አፍኣ እምሀገር ወወሰድዎ ውስተ ሕፅነ ርእሰ ደብር ዘተነድቀት ላዕሌሁ ሀገሮሙ ከመ ያጽድፍዎ። 30#ዮሐ. 8፥59፤ 10፥39። ወውእቱሰ ኀለፈ እንተ ማእከሎሙ ወሖረ። 31#ማቴ. 4፥13-17፤ ማር. 1፥21-28። ወወረደ ቅፍርናሆም ሀገረ ገሊላ ወመሀሮሙ በሰንበት። 32#ማቴ. 7፥28-29፤ ኤር. 23፥29። ወያነክሩ ምህሮቶ እስመ በትእዛዝ ውእቱ ቃሉ።

ዘከመ አሕየወ እግዚእ ኢየሱስ ዘቦቱ ጋኔን

33ወሀሎ ብእሲ በምኵራብ ዘጋኔን እኩይ ላዕሌሁ ወከልሐ በዐቢይ ቃል። 34ወይቤ ምንት ብየ ምስሌከ ኢየሱስ ናዝራዊ መጻእከኑ ታጥፍአነ አአምረከ መኑ አንተ ኦ ቅዱሱ ለእግዚአብሔር። 35ወገሠጾ እግዚእ ኢየሱስ ወይቤሎ ተፈፀም ወፃእ እምኔሁ ወነፅኆ ጋኔኑ ማእከለ ምኵራብ ወወፅአ እምኔሁ ወኢነከዮ ወኢምንተኒ። 36#1ጴጥ. 3፥22። ወደንገፁ ኵሎሙ ወተናገሩ በበይናቲሆሙ ወይቤሉ ምንትኑ ዝ ነገር እስመ በትእዛዝ ወበኀይል ይኤዝዞሙ ለአጋንንት እኩያን ወይወፅኡ። 37ወወፅአ ወተሰምዐ ነገሩ በኵሉ በሓውርተ አድያም።

ዘከመ አሕየዎሙ እግዚእ ኢየሱስ ለሐማተ ጴጥሮስ ወለካልኣን ሕሙማን

38 # ማቴ. 8፥14-16፤ ማር. 1፥29-39። ወወፂኦ እምኵራብ ቦአ ቤተ ስምዖን ወሐማቱ ለስምዖን ተሐምም ዐቢየ ፈፀንተ ወነገርዎ በእንቲኣሃ። 39#10፥40፤ ማቴ. 8፥15-17። ወቆመ ኀቤሃ ወገሠጾ ለፈፀንታ ወኀደጋ ወተንሥአት ሶቤሃ ወተልእክቶሙ። 40ወሶበ የዐርብ ፀሓይ አምጽኡ ኀቤሁ ኵሎ ድዉያነ ወሕሙማነ እለ ቦሙ ደዌ ዘዘ ዚኣሁ ወለለ አሐዱ እምኔሆሙ አንበረ እዴሁ ዲቤሆሙ ወፈወሶሙ። 41#ማቴ. 8፥29፤ ማር. 3፥12። ወብዙኃን አጋንንት ይወፅኡ ወይኬልሑ ወይብልዎ አንተ ውእቱ ክርስቶስ ወልደ እግዚአብሔር ወይጌሥጾሙ ወኢያበውሖሙ ይንብቡ እስመ የአምርዎ ከመ ውእቱ ክርስቶስ። 42ወጸቢሖ ወፅአ ወሖረ ውስተ ገዳም ወኀሠሥዎ ሕዝብ ወሖሩ ኀቤሁ ወአኀዝዎ ወአቀምዎ ከመ ኢይኅልፍ እምኔሆሙ። 43#8፥1። ወይቤሎሙ ለካልኣትኒ አህጉር ሀለወኒ እዜንዎን በእንተ መንግሥተ እግዚአብሔር እስመ እንበይነ ዝንቱ ተፈነውኩ። 44ወይሰብክ በምኵራባተ ገሊላ።

Currently Selected:

ወንጌል ዘሉቃስ 4: ሐኪግ

Highlight

Copy