ወንጌል ዘማቴዎስ 14

ምዕራፍ 14

በእንተ ዮሐንስ ወሄሮድስ

1 # ማር. 6፥19-29፤ ሉቃ. 3፥19-20፤ 9፥7። ወበውእቱ መዋዕል ሰምዐ ሄሮድስ ንጉሥ ነገሮ ለእግዚእ ኢየሱስ። 2ወይቤሎሙ ለአግብርቲሁ ዝ ውእቱ ዮሐንስ መጥምቅ ውእቱ ተንሥአ እሙታን ወበእንተ ዝንቱ ይትገበራ ኀይላት ቦቱ። 3እስመ ውእቱ ሄሮድስ አኀዞ ለዮሐንስ ወሞቅሖ በቤተ ሞቅሕ በእንተ ሄሮድያዳ ብእሲተ ፊልጶስ እኁሁ እስመ ኪያሃ አውሰበ#ቦ ዘኢይጽሕፍ «እስመ ኪያሃ አውሰበ» 4#ዘሌ. 18፥16። እስመ ይቤሎ ዮሐንስ ሎቱ ኢይከውነከ ታውስብ ብእሲተ እኁከ ፊልጶስ። 5#21፥26። ወእንዘ ይፈቅድ ይቅትሎ ይፈርሆሙ ለሕዝብ እስመ ከመ ነቢይ ይሬእይዎ ለዮሐንስ። 6#ሆሴ. 7፥5። ወከዊኖ ዕለተ ልደቱ ለሄሮድስ መጽአት ወለተ ሄሮድያዳ ወዘነፈት ሎቱ በማእከሎሙ ወአደመቶ ለሄሮድስ። 7ወበእንተዝ መሐለ ላቲ ከመ የሀባ ዘሰአለቶ። 8ወይእቲሰ አቅደመት አእምሮ በኀበ እማ ወትቤሎ ሀበኒ በዝየ በጻሕል ርእሶ ለዮሐንስ መጥምቅ። 9ወተከዘ ንጉሥ በእንተ መሐላሁ ወበእንተ እለ ይረፍቁ ምስሌሁ ወአዘዘ ከመ የሀብዋ። 10ወፈነወ ሶቤሃ መስተራትዓተ ሐራ ወመተሩ ርእሶ ለዮሐንስ በቤተ ሞቅሕ። 11ወአምጽኡ ርእሶ በጻሕል ወወሀብዋ ለይእቲ ወለት ወይእቲሰ ወሰደት ወወሀበት ለእማ። 12ወመጽኡ አርዳኢሁ ወነሥኡ በድኖ ወቀበርዎ ወመጺኦሙ ዜነውዎ ለእግዚእ ኢየሱስ።

በእንተ ቀዳሚት አብዝኆተ ኅብስት ወክልኤቲ ዓሣ

13 # ማር. 6፥31-34፤ ዮሐ. 6፥1-15። ወሰሚዖ እግዚእ ኢየሱስ ተግኅሠ እምህየ በሐመር ውስተ ገዳም እንተ ባሕቲቱ ወሰሚዖሙ አሕዛብ ተለውዎ በእግር እምአህጉር። 14#9፥36። ወወፂኦ ርእየ ብዙኃነ አሕዛበ ወምሕሮሙ ወአሕየወ ድዉያኒሆሙ። 15ወምሴተ ከዊኖ ቀርቡ ኀቤሁ አርዳኢሁ ወይቤልዎ ገዳም ውእቱ ብሔር ወሰዓቱኒ ኀለፈ ፈንዎሙ ለአሕዛብ ከመ ይሑሩ ውስተ አህጉር ወይሣየጡ ለርእሶሙ መብልዐ። 16ወይቤሎሙ እግዚእ ኢየሱስ አኮ መፍትው ይሑሩ ርኁባኒሆሙ አላ ሀብዎሙ አንትሙ ዘይበልዑ። 17ወይቤልዎ አልብነ ዝየ ዘእንበለ ኀምስ ኅብስት ወክልኤቲ ዓሣ። 18ወይቤሎሙ አምጽእዎን ሊተ ዝየ። 19ወአዘዞሙ ለሰብእ ይርፍቁ ዲበ ሣዕር ወነሥአ ውእተ ኀምሰ ኅብስተ ወክልኤ ዓሣ ወነጸረ ኀበ ሰማይ ወባረከ ወፈተተ ወወሀበ ለአርዳኢሁ ወአርዳኢሁኒ አቅረቡ ለሕዝብ። 20#2ነገ. 4፥42-44። ወበልዑ ኵሎሙ ወጸግቡ ወአግኀሡ ዘተርፈ ፍተታተ ወመልአ ዐሠርተ ወክልኤተ መዛርዐ ምሉአ። 21ወእለሰ በልዑ እሙንቱ ሰብእ የአክሉ ኀምሳ ምእት ብእሲ ዘእንበለ አንስት ወደቅ።

ዘከመ ሖረ እግዚእ ኢየሱስ ዲበ ባሕር

22 # 8፥18፤ ማር. 6፥45-46፤ ዮሐ. 6፥16-21። ወአዘዞሙ ሶቤሃ ለአርዳኢሁ ከመ ይዕርጉ ውስተ ሐመር ወይቅድምዎ ወይሑሩ ኀበ ማዕዶተ ባሕር እስከ ሶበ ይፌንዎሙ ለአሕዛብ። 23#ሉቃ. 6፥12። ወእምዝ ፈትሖሙ ለአሕዛብ ወዐርገ ውስተ ደብር እንተ ባሕቲቱ ይጸሊ ወምሴተ ከዊኖ ባሕቲቱ ሀሎ ህየ። 24ወሐመርሰ ናሁ ሀሎ ማእከለ ባሕር ርኁቀ መጠነ ዕሥራ ወኀምስቱ#ቦ ዘኢይጽሕፍ «ርኁቀ መጠነ ዕሥራ ወኀምስቱ ምዕራፍ» ምዕራፍ ወይትሀወክ እሞገድ ወያመነድቦ ማዕበለ ባሕር እስመ እምቅድሜሁ ውእቱ ነፋስ። 25ወበራብዕት ሰዓተ ሌሊት መጽአ ኀቤሆሙ እግዚእ ኢየሱስ እንዘ የሐውር ዲበ ባሕር። 26ወሶበ ርእይዎ አርዳኢሁ እንዘ ዲበ ባሕር የሐውር ደንገፁ ወፈርሁ እንዘ ይብሉ ምትሐት ውእቱ ወእምግርማሁ ዐውየዉ። 27ወበጊዜሃ ተናገሮሙ እግዚእ ኢየሱስ እንዘ ይብል ተአመኑ አነ ውእቱ ኢትፍርሁ። 28ወአውሥአ ጴጥሮስ ወይቤ እመሰ አንተሁ እግዚኦ አዝዘኒ እምጻእ ኀቤከ እንተ ዲበ ማይ፤ 29ወይቤሎ ነዓ ወወሪዶ ጴጥሮስ እምዲበ ሐመር ሖረ ዲበ ማይ ይብጻሕ ኀበ እግዚእ ኢየሱስ። 30#8፥25። ወሶበ ርእየ ነፋሰ ኀያለ ፈርሀ ወአኀዘ ይሰጠም ወዐውየወ ሶቤሃ እንዘ ይብል እግዚኦ አድኅነኒ። 31#6፥30፤ ያዕ. 1፥6። ወሶቤሃ ሰፍሐ እዴሁ እግዚእ ኢየሱስ ወአኀዞ ወይቤሎ ውኁደ ሃይማኖት ለምንት ናፈቀ። 32ወዐሪጎ ውስተ ሐመር ይእተ ጊዜ ኀደገ ነፋስ። 33#8፥27፤ 16፥16። ወእለ ውስተ ሐመር ሰገዱ ሎቱ እንዘ ይብሉ አማን ወልደ እግዚአብሔር አንተ። 34#ማር. 8፥38። ወዓዲዎሙ ባሕረ በጽሑ ምድረ ጌንሴሬጥ። 35ወአእመርዎ ሰብአ ውእቱ ብሔር ወፈነዉ ኀበ ኵሉ አድያም ወአምጽኡ ሎቱ ኵሎ ሕሙማነ። 36#9፥21፤ ሉቃ. 6፥19። ወአስተብቍዕዎ ከመ ይግሥሡ ጽንፈ ልብሱ እስመ ኵሎሙ እለ ገሠሥዎ የሐይዉ።

Currently Selected:

ወንጌል ዘማቴዎስ 14: ሐኪግ

Highlight

Copy