ወንጌል ዘማርቆስ 14

ምዕራፍ 14

ዘከመ ተማከሩ ሊቃነ ካህናት ይቅትልዎ ለእግዚእ ኢየሱስ

1 # ማቴ. 26፥1-60፤ ዮሐ. 13፥1-5፤ ሉቃ. 22፥1። ወእስከ ሰኑይ መዋዕል ፋሲካ በዓለ መጸለት ወኀሠሡ ሊቃነ ካህናት ወጸሐፍት ይትመየንዎ ወየአኀዝዎ ወይቅትልዎ። 2#ማቴ. 26፥5። ወይቤሉ አኮኬ በበዓል ከመ ኢይትሀወኩ ሕዝብ።

በእንተ እንተ ቀብዐቶ ለእግዚእነ ዕፍረተ

3 # ማቴ. 26፥6-13፤ ዮሐ. 12፥1-8። ወእንዘ ሀሎ ቢታንያ በቤተ ስምዖን ዘለምጽ እንዘ ይረፍቅ መጽአት ብእሲት ወአምጽአት ዕፍረተ ዘአልባጥሮስ ዘናርዱ ቅድው ዘዕፁብ ሤጡ ወአኮሰቶ ወሶጠት ዲበ ርእሱ። 4ወቦ እለ ተምዑ ወይቤሉ ለምንት ዘመጠነዝ ኀጕል ዘዝ ዕፍረት። 5እምኢተክህለኑ ይሠየጥ ዝንቱ ዕፍረት ፈድፋደ እምሠለስቱ ምእት ዲናር ወይትወሀብ ለነዳያን ወገሠጽዋ። 6ወይቤሎሙ እግዚእ ኢየሱስ ኅድግዋ ለብእሲት ወኢታስርሕዋ ሠናየ ግብረ ገብረት ላዕሌየ። 7#ዘዳ. 15፥11። ወለነዳያንሰ ዘልፈ ትረክብዎሙ በኀቤክሙ ወጊዜ ፈቀድክሙ ታሤንዩ ሎሙ ወኪያየሰ አኮ ዘልፈ ዘትረክቡኒ። 8ወዛቲኒ ዘባቲ ገብረት ወአቅደመት ወቀብዐተኒ ሥጋየ ለቀበርየ። 9አማን እብለክሙ ኀበ ሰበክዋ ለዛቲ ወንጌል ውስተ ኵሉ ዓለም ይነግሩ ዘገብረት ዛቲ ብእሲት ወይዜከርዋ።

ዘከመ አግብኦ ይሁዳ ለእግዚእነ ኢየሱስ

10 # ማቴ. 26፥14-17፤ ሉቃ. 22፥23-27። ወይሁዳ አስቆሮታዊ አሐዱ እምዐሠርቱ ወክልኤቱ ሖረ ኀበ ሊቃነ ካህናት ከመ ያግብኦ ሎሙ። 11ወሰሚዖሙ ተፈሥሑ ወተናገርዎ የሀብዎ ሠላሳ ብሩረ ወፈቀደ በጽሚት ያግብኦ ሎሙ።

በእንተ በዓለ ፋሲካ

12 # ማቴ. 26፥17-24፤ ሉቃ. 22፥7-15። ወአመ ቀዳሚት ዕለት በዓለ መጸለት ፋሲካ አመ ይጠብሑ ፍሥሐ ይቤልዎ አርዳኢሁ በአይቴ ትፈቅድ ንሑር ናስተዳሉ ለከ ትብላዕ ፍሥሐ። 13ወፈነወ ክልኤተ እምአርዳኢሁ ወይቤሎሙ ሑሩ ሀገረ ዘቅድሜክሙ ወትረክቡ ብእሴ ዘይጸውር ጻሕበ ማይ ወትልውዎ ኀበ ቦአ ቤት። 14#11፥3። ወበልዎ ለበዓለ ቤት ይቤለከ ሊቅ አይቴኑ ጽርሕ ኀበ እበልዕ ፍሥሐ ምስለ አርዳእየ። 15ወውእቱ ያርእየክሙ ጽርሐ ዐቢየ ወንጹፈ ወርሡየ ወህየ አስተዳልዉ ለነ። 16ወሖሩ አርዳኢሁ ሀገረ ወረከቡ በከመ ይቤሎሙ ወአስተዳለዉ በህየ ፍሥሐ። 17ወመስዮ ሖረ ምስለ ዐሠርቱ ወክልኤቱ አርዳኢሁ።

ዘከመ ከሠተ ለሐዋርያት ዘያገብኦ

18ወእንዘ ይረፍቁ ወይበልዑ ይቤሎሙ እግዚእ ኢየሱስ አማን እብለክሙ አሐዱ እምኔክሙ ዘይበልዕ ምስሌየ ያገብአኒ። 19#ዮሐ. 13፥21-27። ወአኀዙ ይተክዙ ወይበሉ በበ አሐዱ አነኑ እንጋ ውእቱ። 20ወአውሥአ ወይቤሎሙ አሐዱ እምዐሠርቱ ወክልኤቱ ዘይጸብሕ ምስሌየ ውስተ መጽብሕየ። 21ወወልደ ዕጓለ እመሕያውሰ የሐውር በከመ ጽሑፍ በእንቲኣሁ ወባሕቱ አሌ ሎቱ ለውእቱ ብእሲ ዘእምኔሁ ይትሜጠውዎ ለወልደ ዕጓለ እመሕያው እምኀየሶ ሶበ ኢተወልደ ለውእቱ ብእሲ።

ዘከመ ሠርዐ ሥርዐተ ቍርባን

22 # ማቴ. 26፥26፤ ሉቃ. 22፥19-23፤ ዮሐ. 13፥18-32። ወእንዘ ይበልዑ ነሥአ እግዚእ ኢየሱስ ኅብስተ ወባረከ ወፈተተ ወወሀቦሙ ወይቤሎሙ ንሥኡ ብልዑ ዝውእቱ ሥጋየ። 23#1ቆሮ. 11፥23-30። ወነሥአ ጽዋዐኒ ወአእኲቶ ወሀቦሙ ወይቤሎሙ ንሥኡ ወስትዩ እምኔሁ ኵልክሙ። 24ወይቤሎሙ ዝውእቱ ደምየ ዘሐዲስ ሥርዐት ዘይትከዐው በእንተ ብዙኃን። 25#ማቴ. 26፥28-30፤ ሉቃ. 22፥14-20። አማን እብለክሙ ኢይሰቲ እንከ እምዝንቱ ፍሬ ወይን እስከ እንታክቲ ዕለት አመ እሰትዮ ሐዲሰ በመንግሥተ እግዚአብሔር ። 26#ማቴ. 26፥30። ሰቢሖሙ ወአንቢቦሙ ወፅኡ ውስተ ደብረ ዘይት።

ዘከመ ኀደግዎ ሐዋርያት ለእግዚእ ኢየሱስ

27 # ዘካ. 13፥7፤ ማቴ. 26፥30-35፤ ዮሐ. 16፥32። ወይቤሎሙ እግዚእ ኢየሱስ ለአርዳኢሁ ኵልክሙ ትክሕዱኒ በዛቲ ሌሊት እስመ ጽሑፍ ዘይብል «እቀትሎ ለኖላዊ ወይዘረዋ አባግዒሁ።» 28#16፥7። ወእምድኅረ ተንሣእኩ እቀድመክሙ ገሊላ። 29ወይቤሎ ጴጥሮስ ለእመኒ ኵሎሙ ክሕዱከ አንሰ ኢይክሕደከ። 30#ዮሐ. 13፥38። ወይቤሎ እግዚእ ኢየሱስ አማን እብለከ አንተ ትክሕደኒ ዮም ሥልሰ በዛቲ ሌሊት ዘእንበለ ይንቁ ዶርሆ ክልኤ ጊዜ። 31ወአፈድፈደ ጴጥሮስ ትምክሕተ ወተሐልፎተ እንዘ ይብል እመውትሂ ምስሌከ ወኢይክሕደከ ወከማሁ ይቤሉ ኵሎሙ።

ዘከመ ጸለየ እግዚእ በጌቴሴማኒ

32 # ማቴ. 26፥36-46፤ ሉቃ. 22፥39-47። ወሖሩ ዐጸደ ወይን እንተ ስማ ጌቴሴማኒ ወይቤሎሙ ለአርዳኢሁ ንበሩ ዝየ እስከ አሐውር ከሃ ወእጼሊ። 33ወነሥኦሙ ለጴጥሮስ ወለያዕቆብ ወለዮሐንስ ምስሌሁ ወአኀዘ ይተክዝ ወይኅዝን። 34#ዮሐ. 12፥27። ወይቤሎሙ ተከዘት ነፍስየ እስከ ለሞት ንበሩ ዝየ ወትግሁ እንከ። 35ወእምዝ ተአተተ ሕቀ ወሰገደ ውስተ ምድር ወጸለየ ከመ ትኅልፍ እምኔሁ ይእቲ ሰዓት ለእመ ይትከሀል። 36#10፥38። ወይቤ አባ ወአቡየ ኵሉ ይትከሀለከ አኅልፋ እምኔየ ለዛቲ ጽዋዕ ወባሕቱ ፈቃደ ዚኣከ ለይኩን ወአኮ ፈቃደ ዚኣየ። 37ወገቢኦ ረከቦሙ እንዘ ይነውሙ ወይቤሎ ለጴጥሮስ ስምዖን ትነውምኑ ወኢትክል ተዐግሦ አሐተ ሰዓተ። 38ትግሁ ወጸልዩ ከመ ኢትባኡ ውስተ መንሱት እስመ መንፈስ ይፈቅድ ወሥጋ ይደክም። 39ወሖረ ካዕበ ወጸለየ ወኪያሁ ክመ ይቤ። 40ወገቢኦ ካዕበ ረከቦሙ እንዘ ይነውሙ እስመ ከብዳ አዕይንቲሆሙ ወኢየአምሩ ዘይነብቡ። 41ወመጽአ በሣልስ ወይቤሎሙ ኑሙ እንከሰ ወአዕርፉ ምዕረ እስመ ናሁ በጽሐ ጊዜሁ ወናሁ ያገብእዎ ለወልደ ዕጓለ እመሕያው ውስተ እደ ኃጥኣን። 42ተንሥኡ ንሑር ናሁ በጽሐ ዘያገብአኒ።

ዘከመ አግብኦ ይሁዳ ለእግዚእነ ኢየሱስ ወዘከመ አኀዝዎ

43 # ማቴ. 26፥47-50፤ ዮሐ. 18፥2-15። ወእንዘ ይትናገሮሙ በጽሐ ሶቤሃ ይሁዳ አስቆሮታዊ አሐዱ እምዐሠርቱ ወክልኤቱ ወምስሌሁ ብዙኃን ሰብእ ምስለ መጣብሕ ወአብትር እምኀበ ሊቃነ ካህናት ወጸሐፍት ወረበናት። 44ወወሀቦሙ ትእምርተ ዘያገብኦ ወይቤሎሙ ዘሰዐምክዎ ውእቱ አኀዝዎ ወአጽንዕዎ ወሰድዎ። 45ወሶቤሃ መጽአ ኀቤሁ ወይቤሎ ረቢ ወሰዐሞ። 46ወሰፍሑ እደዊሆሙ ላዕሌሁ ወአኀዝዎ። 47#ማቴ. 26፥50። ወመልሐ መጥባሕቶ አሐዱ እምእለ ምስሌሁ ይቀውሙ ወዘበጦ ለገብረ ሊቀ ካህናት ወመተሮ እዝኖ። 48ወአውሥአ እግዚእ ኢየሱስ ወይቤሎሙ ከመ ሰራቂኑ ትዴግኑኒ መጻእክሙ ምስለ መጣብሕ ወአብትር ተአኀዙኒ። 49#ማቴ. 26፥54-57። ወኵሎ አሚረ ሀሎኩ ምስሌክሙ እሜህር በምኵራብ ወኢአኀዝክሙኒ ወባሕቱ ከመ ይብጻሕ#ቦ ዘይዌስክ «ቃል ዘጽሑፍ ውስተ መጻሕፍት» ዘውስተ መጻሕፍት። 50#ማቴ. 26፥57። ወኀደግዎ ኵሎሙ አርዳኢሁ ወጐዩ። 51ወተለዎ አሐዱ ወሬዛ ዘይትዐጸፍ ሰንዱነ ዕራቆ ወአኀዝዎ ወራዙት። 52ወኀደገ ሰንዱኖ ወጐየ ዕራቆ።

ዘከመ ቆመ እግዚእ ኢየሱስ ውስተ ዐውድ

53 # ማቴ. 26፥57፤ ሉቃ. 22፥54፤ ዮሐ. 18፥13። ወወሰድዎ ለእግዚእ ኢየሱስ ኀበ ሊቀ ካህናት ወተጋብኡ ኀቤሁ ኵሎሙ ሊቃነ ካህናት ወጸሐፍት ወረበናት። 54ወተለዎ ጴጥሮስ እምርኁቅ ውስተ ውሳጤ ዐጸደ ሊቀ ካህናት ወነበረ ምስለ ወዓልያኒሆሙ ይስሕን መንገለ በርህ። 55#ዮሐ. 18፥19-24፤ ማቴ. 26፥59። ወኀሠሡ ሊቃነ ካህናት ወኵሉ ዐውድ ሰማዕተ ሐሰት በዘያስተዋድይዎ ለእግዚእ ኢየሱስ ከመ ይቅትልዎ ወኀጥኡ። 56ወብዙኃን እለ አስተዋደይዎ በሐሰት#ቦ ዘኢይጽሕፍ «በሐሰት» ወኢኀብረ ቃሎሙ። 57ወቦ እለ ተንሥኡ ሰማዕተ ሐሰት ወነበቡ። 58#ዮሐ. 2፥19-25። ወይቤሉ ንሕነ ሰማዕናሁ እንዘ ይብል አነ እነሥቶ ለዝንቱ ቤተ መቅደስ ዘእድ ገብሮ ወበሠሉስ ዕለት አሐንጽ ካልአ ዘእድ ኢገብሮ። 59ወምስለ ዝኒ ኢኀብረ ስምዖሙ። 60ወተንሥአ ሊቀ ካህናት በማእከለ ዐውድ ወሐተቶ ለእግዚእ ኢየሱስ ወይቤሎ አልቦኑ ዘትሰጠው እንዘ መጠነዝ ያስተዋድዩከ። 61#15፥2። ወአርመመ ወኢተሰጥዎ ወኢምንተኒ ወካዕበ ሐተቶ ሊቀ ካህናት ወይቤሎ አንተኑ ውእቱ ክርስቶስ ወልዱ ለቡሩክ። 62ወይቤሎ እግዚእ ኢየሱስ እወ አነ ውእቱ ወትሬእይዎ ለወልደ ዕጓለ እመሕያው እንዘ ይነብር በየማነ ኀይል ወይመጽእ በደመና ሰማይ። 63ወሠጠጠ አልባሲሁ ሊቀ ካህናት ወይቤ ምንተ እንከ ትፈቅዱ ሎቱ ሰማዕተ። 64#ዮሐ. 19፥7። ናሁ ለሊክሙ ሰማዕክሙ ጽርፈቶ ምንተ እንከ ትብሉ ወአግብኡ ፍትሐ ኵሎሙ ወይቤሉ ይቅትልዎ። 65ወአኀዙ እምውስቴቶሙ ይውርቅዎ ወይጽፍዕዎ ገጾ ወይኵርዕዎ ርእሶ ወይቤልዎ ተነበይ ለነ ክርስቶስ መኑ ጸፍዐከ ወኮኑ ወዐልት ይጸፍዕዎ በሕቁ።

ዘከመ ክሕዶ ጴጥሮስ ለእግዚእ ኢየሱስ

66 # ማቴ. 26፥69፤ ሉቃ. 22፥56-62፤ ዮሐ. 18፥15-27። ወእንዘ ሀሎ ጴጥሮስ ታሕተ ውስተ ዐጸድ መጽአት አሐቲ ወለት እምአእማተ ሊቀ ካህናት። 67ወርእየቶ ለጴጥሮስ ይስሕን ወነጸረቶ ወትቤሎ አንተሂ ምስለ ኢየሱስ ገሊላዊ ሀሎከ። 68ወክሕደ ወይቤላ ኢየአምር ወኢይጤይቅ ዘትብሊ ወወፅአ አፍኣ ኀበ ጸናፌ ዐጸድ ወነቀወ ዶርሆ። 69ወርእየቶ ካዕበ ካልእት ወለት ወትቤሎሙ ለእለ ይቀውሙ ህየ ዝንቱኒ እምኔሆሙ ውእቱ ወክሕደ ካዕበ። 70ወእምድኅረ ሕቅ ካዕበ ይቤልዎ ለጴጥሮስ እለ ይቀውሙ አማን እምኔሆሙ አንተ ወገሊላዊ አንተ ወቃልከ ያዐውቀከ። 71ወአኀዘ ይትረገም ወይምሐል ከመ ኢየአምሮ ለውእቱ ብእሲ ዘትብሉ ወሶቤሃ ነቀወ ካዕበ ዶርሆ። 72ወተዘከረ ጴጥሮስ ቃሎ ለእግዚእ ኢየሱስ ዘይቤሎ ሥልሰ ትክሕደኒ ዘእንበለ ይንቁ ዶርሆ ክልኤ ጊዜ ወበከየ።

Currently Selected:

ወንጌል ዘማርቆስ 14: ሐኪግ

Highlight

Copy