Marqoose 16

Yesuusay haybowafa dendosa

Mat 28:1-8; Luq 24:1-12; Yoh 20:1-10

1Sanbata wontey gardine Magdoolaxhi Maaramey, Yayqoobeyndo Maaramey, Salomeni maaddhi Yesuusa aha tisheshe modhe sawwe abako u woondo.

2Hude wonte ketiya qoossi kesiyara boossaaka u hando. 3-4Usini ye boossa suma tuccecha shuchi u danda'uwa malla maaqicho gisha <<Boossa sumaafa shuche ooni nuuse andarsi ooxara?>> yeydi wolla zeerisine u hangicha. Hangisine kololli u beesune boossa sumaaka yecha shuchi bidzi bade andardi yesune u beedo.

5Boossaaka u gelusune bidzi na'i saabbay booxi maa'o maadhesesi oshichi badena uttusune beedi u du'eydo. 6Esini <<Du'eydofita! Suxhuttecha Nazrataxi Yesuusa hi worgesa erako ta ere. Dendiko e yese, haya baasso. Hay, aha u woysecho godo beewayte. 7Hatte dhaddi hanguwayte! E erusichoshituko Phexhroseseni <Hade be otechonikeko Galila dhaddi hi buro e gare. Yahako esa hi beene> hidi ohuwayte!>> yeydi e hido.

8Indowaxhitini iitana jhasshi koburdi boossaafa kessi u badho. Fettona be jhashecho gisha oonekoni bidzoni zeerutto baasso.

[Yesuusay indowaxhuse bentosa

Mat 28:9-10; Yoh 20:11-18

9Yesuusay Hude ketiya haybowafa be dendo geede laappi xhoozita i garafa be gooddecho Magdoolaxhi Maaramese burona e bento. 10Isini handi esaara yecha gerituse i oto. Usini higiliyakaara yeefiyakaara u yecha. 11Isini <<Yesuusay haybowafa dendiko en'a e yese. Ta aafenako ta beedo>> yeydi i oto. Usini isuse aade mahutto baasso.

12Ye e geedeni e erusichoshaafa lam'i wolko katamaafa are u hangusune Yesuusay feda bisshi e bento. 13Usini hanke maaddhi attasituko oto. Ye usituseni aade mahutto baasso.

Yesuusay tamma bidzituse bentosa

Mat 28:16-20; Luq 24:36-49; Yoh 20:19-23; Anx 1:6-8

14Ye e geede e erusicho tamma bidzi tato gara yesune Yesuusay ususe addeydi e bento. Esini ususe <<Ta dendo geede taa beeda axi otine <Aadeko> hidi hidobayta? Waydi <Aadeko> hidi hiiwaane? Yeydi fetto muxhuro hi miingesi abasuwa?>> yeydi e gayllo.

15Yesuusay assi ususe <<Ha saha gara uddi hanguwayte, axuseni uddina modhe odo ohuwayte! 16Aadessi xhamaqutti yesesi ooneni loolako e loole. Aadesso baasi garama yaa'uttoko e yaa'utte.

17-18Taanna aadexeesiti ta sunxuna xhooze u goodde, kille nuunanani u zeere, shooshita u aytakoni oo'oyne fetto wodhe dhale u usshakoni uso wodhuwasso. Be kucheni hargaxiti gara u gade, hargaxitini loole, yeenxhi micushe hanta u hante>> yeydi e hido.

Yesuusay afaaka kessosa

Luq 24:50-53; Anx 1:9-11

19Laaxi Yesuusay yeenxho uddi usuko be zeerdo geede afaaka kessi Wontose oshichi badena e utto.

20E erusichoshiti uddi wude seya haya hanti Wonto woosso u ohicha. Laaxini usaara hantena micushe hanta u hantoronike mati be woossoy aade maaqenike e minxicha.]

Currently Selected:

Marqoose 16: KilleC

Highlight

Copy