Yowanis 10
10
Ege Yeese Koortan Sinɔ Mentanŋɔŋk
1Tonuɓa Yeese kɛ "Eekeer tona kɔnaaŋ, iɗit sinɔ guuguny keera jiŋkuyɛɛkoŋk goy omalte a moko tugaat nɛɛkɛkik, ege iɗit sinɛ agalt ɛ iɗit sinɔ muujik. 2Ma iɗit sinɔ guuguny tugaat nɛɛkɛkik koortan jiŋkuyɛɛkoŋk. 3Tayɗi koortaana saa jiŋkuyɛɛkoŋk koortan sinɛ tuga nɛɛkkiŋ. Tiyɛr jiŋkuyɛ gɛɛnɛ wɛɛŋa gɛɛŋkiŋ. Nɛ sɛŋk riy jiŋkuyɛ gɛɛŋk tiriyaakɛ gɛŋk nɛ diile sɛɛg walasa. 4Saa boŋkuɗ jiŋkuyɛ gɛɛŋk walasak baŋɛk nɛ ŋawite sɛɛge ɔɗɔɔkɛ, nɛ nomɛrɗiŋ agut sinɔ jiŋkuyɛ gɛɛnɛ ɗegerarɗi wɛɛŋa gɛɛŋkik. 5Yakana jiŋkuyɛ gɛɛnɛ kir nomɛɛ ete omalte, ma gonarɗiŋ agut sinɔ kirɗi ɗegerɔɔn wɛɛŋa gɛɛŋkik."
6Tonuɓa sɛɛga Yeese rɔmɛ sini, yakanaɓa sɛɛga ki mɛlɛɛ any sinɛ tonu sɛɛgaak. 7Nɛɓa Yeese tonu sɛɛga kɛkar kɛ, "Eekeer tona kɔnaaŋ, eet tuga jiŋkuyɛɛkoŋk. 8Agut sini joop sigɛkan mɛlɛrki eete jeemɛk baŋɛ agaltiir a mujik. Kirɓa sɛɛga tiiɗit jiŋkuyɛ gɛɛnɛk. 9Tuga nɛɛk eet. Iɗit sinɔ guuguny eeteek bɔdɛkoyŋ. Guugunyŋ nɛ ŋaarkiŋ, laŋi nyon sinɔ ireeɗɛ sɛɛnŋɔŋkuŋ. 10Kus agalt agɛya, a ŋɔɔlɛɛta a sɔɔkiyɛɛka dakɛɗa. Makan saak kusa kɛnɔ laŋir jiŋkuyɛ gɛɛnɛ wɛɛŋa, kɛnɔ latu wɛɛŋa sigɔ ɓɔɔka a ŋaaŋayiikŋɔŋk."
11"Eet koortan sinɔ mentanŋɔŋk. Koortan sinɔ mentanŋɔŋk gaɓɛ wɛɛŋa gɛɛŋk agut jiŋkuyɛ gɛɛŋkiŋ. 12Iɗit sinɔ ijaagɗi woriyaak, moko jiŋkuyɛ gɛɛnɛ gɛɛŋk, sɛɛn koortan. Saa dɛnɛɛɗ tuwooku, nɛ ŋɔr jiŋkuyɛ gɛɛŋk nɛ gonŋ. Nɛ tuwoo nɛɛkɛ ŋakiɗi jiŋkuyɛɛkɛ gɛɛnɛ nɛ kɛɛtɛ sɛɛgiŋ. 13Nɔ koortan nɛɛkɛ gonɗuk agut sinɔ sɛɛn iɗit sinɔ ijaagɗi woriyaak, nɛ ki koɓiit jiŋkuyɛɛka gɛɛnaak.
14"Eet koortan sinɔ mentanŋɔŋk. Ɗegera saak jiŋkuyɛ gaaŋkiŋ, maɓɔrɛti jiŋkuyɛ gaanɛ ɗegerarŋ, 15ɗegera sɛɛg oko sinɛti ɗegerɗi Baabɛɛk ɛ oko sinɛ ɗegerɗa Baabɛɛk. Gaɓa wɛɛŋa gaaŋk agut jiŋkuyɛ gaaŋkiŋ. 16Laka jiŋkuyɛ ɔgɔ sigɔ moko atu keer sineenekiŋ. Nɛta ɗɛyɛ a ɓɔrɛ ɗɔka sɛɛgiŋ. Tiyɛr sɛɛk wɛɛŋa gaaŋkiŋ. Ɓɛɛlɛrkɔɔ a pony omoŋ, egekɔɔ koortan nɛŋk omoŋ. 17"Porutu Baabɛɛŋ agut sinɔ gaɓɛɛɗa wɛɛŋa gaaŋk, sigɛkɔɔ murka kɛnɔ kusa boŋa sɛɛgkiŋ. 18Kɛɛ iɗit sinɔte boŋu wɛɛŋa gaaŋkik. Laka ɓaŋkawuka sinɔ gaɓɛɛɗa wɛɛŋa gaaŋk ɛ boŋa sɛɛg kɛkarkiŋ. Boŋkaakan sekiyɛ sigi sooy lak Baabɛɛk."
19Any sinɛɓa ŋaarki waasiyɛɛkɛ sigeegek, nɛɓa lakɛ pakakat kɛkar joope Ayuuduk kɔɔr. 20Sɛɛge joop a ɓɔɔkaaŋ tonurɓa kɛ, "Lak setan, maraatikan. Tiiɗigiɗɔ agut jikon?"
21Ma ɔgɔɔk tonur kɛ, "Waasiyɛ sigi kirki ŋaarin ad iɗit sinɔ lak setank! Setan oolɛ a ɓuuke taamɛ motakoŋkuŋ?"
Tonu Yeese Kɛ Eet Tɔɔn Waakoyotoŋk
22Gayɛɓa ɔɔtɛ sinɔ eemɛyɗɛɛ Ba'aal ijaag a tɔɔnuk Gode sinɛ Geetitank Yorsaleeme. Egeɓa ɔɔtɛ nɛɛkɛ ɛyɛkeer baŋgiyoŋk. 23Weeweriiɓa Yeese Godeey sinaanɛ Geetitank, nyon Ŋawiitoŋk Salamoonuk. 24Saaɓak tolɗiiɓa joop Ayuuduk sɛɛne tookɛɛta nɛ tonurgeeɗ kɛ, "Arinkoy tin a lakii koɓiiɗak a pɛɛy mɛlɛɛɗa okoɗa? Ɔkɔn iin Kereseeŋ tonte tina kɛ ɗɔm."
25Nɛɓa Yeese jumur sɛɛga kɛ, "Tona kan kɔnaaŋ, nɛ kiir ŋaadit. Sɔɔriyɛ sigɛ ijaaga tiriyaakɛ Baabɛɛkik waasɛ ɔɔtɛ naak. 26Yakana sɔɔk kiirti ŋaadit agut sinɔ moko iinak jiŋkuyɛ gaaŋkik. 27Jiŋkuyɛ gaaŋk tiyɛr wɛɛŋa gaaŋkiŋ. Ɗegera sɛɛgiŋ nɛ sɛɛk nomɛr eeteeŋ. 28Gaɓaakoy sɛɛga wɛɛŋa sigɛkoy nɔkoy nɔkoyk, kirkoy badɛ adaktan. Kɛɛ iɗit sinɔkoy boŋku sɛɛg ariit naakɛkik. 29Baabɛɛ sinɛkanta gaɓɛ sɛɛgik kaalɛ ola baŋɛ. Kɛɛ iɗit sinɔkoy boŋku sɛɛg ariit Baabɛɛkik. 30Eet a Baabɛɛ eteŋk omoŋ."
31Nɛɓa joop Ayuuduk boŋur giɗeek kɛkar kɛnɔgun baabaalar. 32Nɛɓa Yeese tonu sɛɛga kɛ, "Yaaŋakɔ kɔna ijaagaak sigɔ mentaanaŋɔŋk a ɓɔɔkaaŋ sigɔ kanta gaki sɛɛg Baabɛɛk. Anɛti baabaalari agut ijaag won?"
33Nɛɓa sɛɛk jumurargeeɗ joop Ayuuduk kɛ, "Baabaaliini agut sinɔ nyɔɔnɗun Waakoyok, mokonu baabaalii agut any sinɛkɔ ijaagink mentanŋɔŋk, agut sinɔ ariiɗin ɛɛk nook a Waakoyo, ma iin iɗitik."
34Nɛɓa Yeese tonu sɛɛga kɛ, "Mokoɓato taapɛɛ higii noŋk kɛ, 'Tona kɛ iinak suumiyɛ.' 35Joop sigɛɓa sɛɛga mɛlki pɛɛni Waakoyotoŋkuk ɔkɔn sɛɛg riy kɛ, 'jookakiŋ,' nɛ ɗegerɛɛ kɛ kɛɛkoy aalɛt Pɛɛni Waakoyotoŋk. 36Ɔkɔn ɓɛɛlɛ oko sinikiŋ anɛ iɗit sinɔɓa geeti Baabɛɛk nɔɓa wosɛyki ɗookak agut sinɔ toniiɗ kɛ, 'Eet Tɔɔn Waakoyotoŋkuk,' nɛ toniir kɛ, 'Nyɔɔnun Waakoyo.' 37Ɔkɔn moko ijaaga ijaag Baabɛɛkiŋ, nɛ katti ŋaadɛɛ. 38Ma ɔkɔn ijaaga ijaag Baabɛɛkiŋ, nɛ kɛygun aasi kiir ŋaadit eetiŋ ma in ŋaadɛɛ ijaag naak. Ɗegerarikɔɔ ant sineene kɛ ɗɔm kɛ Baabɛɛ a eet maɓɔrɛ eet a Baabɛɛ.
39Nɛɓa sɛɛk ɗɛyɛr gaamita kɛkar, yakanaɓa sɛŋk bɔdɛ sɛɛge ariit nɛ ŋaarŋ. 40Ekaŋɛɓa Yordanoos kɛkar nɛ mɛlɛ saanaɓa sɛɛn aadiiɗ Yowanis sinɛ a'aadiik tuki nɛɛkɛkik, nɛɓa beeɗ saadi. 41Nɛɓa kurak joop a ɓɔɔkaaŋ son lak sɛɛnik nɛ tonur kɛ, "Kiɓa Yowanis ijaagɛ sɔɔriyɛ, mayakana any sinɛɓa tonu Yowanis agut iɗit sinik baŋɛ eekeer." 42Nɛɓa saadi ŋaadir sɛɛn joop a ɓɔɔkaaŋ.
Currently Selected:
Yowanis 10: KSTM
Highlight
Share
Copy
Want to have your highlights saved across all your devices? Sign up or sign in
