Yowanis 17

Ɗanɗamɔn Yeeseek

1Saaɓa Yeese toniiɗ sinik baŋiya, nɛɓa ɓɔŋgɔɔrɛ ɛɛk nɛ dɛnɗi dariya nɛ ɗanɗama kɛ, "Iin Baabɛɛ, gayɛkɔ ɔɔtɛ nɛɛkɛɛŋ. Kɛnɔnu eemɛy Tɔn nookɛ eemɛyi Tɔɔn nook, 2agut sinɔkan gagiɗin ɓaŋkawuka, joope sigaagɛ atu ɗook raŋk baŋɛk, kɛnɔ gaɓɛ wɛɛŋa sigɛkoy nɔkoy nɔkoyk sigɛkan gagiɗin sɛɛg baŋɛk. 3Wɛɛŋa sigɛkoy nɔkoy nɔkoyk ɗegerɔn nook iin sinɛ Suumi sinɛ omoŋɔŋk sinɛ eekerkank, a Yeesee Keresee sinɛkan wosɛykin ɗookak. 4Eemɛya kanni ɗook raŋk a ijaaga ijaag sinɛkanta gaɓunk. 5Iin Baabɛɛ, sisɔ eemɛyi ɓɔrɛti sooy lak iinik, eemɛyɔɔn sinaanɛɓa laka a tukiɗi saaɓa riiɓeeɗɛɛ ɗook jeemɛk.

6"Yaaŋakan kɛ iin wooɗ joopa sigaagakan daamun sɛɛg ɗook raŋk nɔkanta gaɓun sɛɛgkiŋ. Sɛɛg kan gooŋk, nɛ kanta gaɓun sɛɛgiŋ, koorɛrkan sɛɛk pɛɛni nookuŋ. 7Ɗegerar sisɔ kɛ ar sooy lak iinik any sinɛkanta gaɓunk baŋɛ. 8Gaɓaakan sɛɛga pɛɛni sinɛkanta gaɓunkuŋ nɛkan sɛɛk boŋurŋ. Ɗegerar eekeerɛ kɛ kusaakan sooy lak iinik, ŋaadir kɛ wosɛykin kanti iin. 9Moko saak kalɛyɗiigiɗa ɗoo, ma kalɛyɗiika agut joop sigi kɔta gaɓun sɛɛgik, agut sinɔ gooŋkuk. 10Any sinɔ naakik baŋɛ nɛ nook, ma sinɔ nookuk nɛ naak. Eemɛyarti sɛɛkiŋ. 11Kaakɔɔ saak beeɗit ɗook raŋk atukiɗi sisɔ, ma sɛɛk atu ɗook raŋk. Kɔra saak son lak iinik. Iin Baabɛɛ sinɛ Geetitank. Joop sigikanta gaɓun sɛɛgik kɛnɔ ɓɛɛlɛr a omoŋ oko eteŋk, kooru sɛɛg tiriyaakɛ sigaagɛkanta gaɓun sɛɛgik. 12Saakan eet a sɛɛgik, koorakan sɛɛg tiriyaakɛ goonɛ sigaagɛkanta gaɓun sɛɛgkiŋ. Koorakan sɛɛg agut sini kɛnɔ dusanɛɛ pɛɛni sinɛɓa taapɛɛ Wargatɛɛ Waakoyotoŋkuk kɛɛ iɗit sinɔkoy badɛ sɛɛgeek adaktan, toomoy sinɔɔnɛkoy badɛk sɔgɔɔsɔyk.

13"Kɔra saak sisɔ son lak iinik. Saa arkiɗa ɗook sineene raŋk, kɛnɔ yaaka naakɛ bɛɛlɛ adaktan sooy lak sɛɛgik agut any sinɛ waasaak. 14Gaɓaakan saak sɛɛga pɛɛni nookuŋ. Oko sinɛ moko eet iɗit ɗookoŋk, nɛ ɓɔrɛ moko sɛɛg joop ɗookoŋk nɛ ɓooyu sɛɛg ɗookuŋ. 15Kalɛyaan kɛnɔ sɛɛg koorun setane mani kaa kalɛyit kɛnɔ sɛɛg boŋiirin ɗook walasa. 16Oko sinɛ moko eet iɗit ɗookoŋk, nɛ moko ɓɔrɛ sɛɛg joop ɗookoŋk. 17Geeti sɛɛg eekeerɛ goonɛk. Ege pɛɛni nookɛɛk eekeer. 18Oko sinɛkanti wosɛykiɗin ɗookak, nɛkan ɓɔra wosɛya sɛɛg ɗooka. 19Kɛnɔkɔɔ sɛɛg geetitaanak eekeerɛ, ara ɛɛk naak a eet geetitan.

20"Kalɛyaan goy pɛɛni nɛŋkik agut sinɔ ŋaadirɗi eetik, ma mokonu kalɛya agut sɛɛg dakɛɗa. 21Iin Baabɛɛ, kalɛyaan kɛnɔ sɛɛg omoŋ baŋɛ, maɓɔrɛ oko sinɛ arkiɗin eeteek. Maɓɔra kalɛyaan oko sinɛ arkiɗa iinek kɛnɔ ɓɔrɛ sɛɛk atu eteŋkɛ kɛnɔ ŋaadi ɗook kɛ wosɛykin kanti iin. 22Gaɓaakan sɛɛga eemɛyɔn sinɛkanta gaɓunk kɛnɔ sɛɛg omoŋ oko sinɛ eteŋk omoŋɔŋk. 23Kalɛyaan kɛnɔ sɛɛg omoŋ eekeerɛ, oko sinɛ arkiɗa sɛɛge, ɛ oko sinɛ arkiɗin eeteek. Saakoyk ɗegerkoy ɗook kɛ wosɛykinkantiŋ, ɛkoy ɗeger kɛ porun sɛɛg oko sinɛ poriiɗin eetik.

24"Iin Baabɛɛ, agut sinɔkanti poriiɗin a inɓa kɛɛ riiɓɛɛ ɗook kɛnɔ dɛnɛr eemɛyɔn sinɛkanta gaɓunk joop sigikanta gaɓun sɛɛgik, ɗɛya kɛnɔ beeɗir a eet agut omoŋ saadi arkiɗaak.

25"Iin Baabɛɛ sinɛ mentank, kirni ɗegerɔɔn joop ɗookoŋk ma saakini ɗegeraaŋ. Joop sigi ɗegerar kɛ wosɛykinkanti iin. 26Mɛyin sinɛti poriiɗink kɛnɔ ar sooy lak sɛɛgik, ɛ kɛnɔ arkaa sɛɛge, araakɔ sɛɛg kɛnɔ ɗegerar iin, ɛkɔɔ ara sɛɛg kɛnɔnu ɗegerar."

Currently Selected:

Yowanis 17: KSTM

Highlight

Copy