Lukaas 1
1
1Iin Tewopiloos sinɛ eemɛyɛɛk,
Taapɛrɓa joop aɓɔɔkaaŋ Waasiyɛ sigɔ yaaŋɛr ola sigɛɓa ijaagɛɛ sɛɛg eteŋkɛ kɔɔruk. 2Ege sigi tuki nɛɛkɛ waasiyɛ sigɔɓa tina yaaŋɗi joop sigɛɓa dɛnɛr taamtuk a tukiɗi tuki nɛɛkɛkik, a joop sigɛɓa ijaageer pɛɛni Waakoyotoŋkuk. 3Maɓɔrɛ saak aɓa tukuka tuki nɛɛkɛk saaɓa mermenɗa any baŋɛ kɛ ɗɔmk baŋiya, nɛkan dɛna ata mentan a inna taapɛɛra waasiyɛ gɛɛŋk a ɓɛɛlɛr patan. 4Nɔkan ijaagiiɗa oko sinikik kɛnɔ ɗegerin kɛ eekeer rɔɔriyɔn sinɛkanni rɔɔriyɗɛɛk.
Yaaŋiyɛ Ɓartiyɛ Yowanis Sinɛ A'aadiik
5Eme sinaanɛɓa ege Herodis tapaɗ ɗoo Yuudaak, lakɛɓa tapaɗ ŋaadiyɛɛkoŋk sinɔ riyɛ kɛ Jakariyaasik pakatiit tapaaɗikeenoŋk Aabiyakeek. Egeɓa jarti nɛɛkɛ komoy tɔɔmɔk Aaroonuk, riyɛɓa kɛ Elsaabeet. 6Mentaanaɓa sɛɛk agetu pɛɛy taamɛkɛ Waakoyotoŋkuŋ, koorɛrɓa sekiyɛ a dambiyɛ Waakoyotoŋk baŋɛ a kɛɛ any sinɔ tikerk. 7Yakanaɓa kɛɛ sɛɛge tɔɔn agut sinɔɓa ege Elsaabeet tersikank, maɓa sɛɛk bɔɔlɔŋeer a getu pɛɛy.
8Ɓeny omalte pony ijaag tapaaɗikeenoŋkuk Jakariyaasik egeɓa ɔɔtɛ nɛɛkɛ sinɔ ijaagɗiɗ sɛŋk Godeey sinaanɛ Geetitank, nɛɓa ar ijaag tapaaɗikeenoŋk taamɛkɛ Waakoyotoŋk. 9Ɗirgeeɗɓa ɔɔtɛ sinɔ guugunyɗu Godeya sinaana Geetitank Waakoyotoŋk kɛnɔ uduŋe itaanɛ oko dambi ijaag tapa ŋaadiyɛɛkoŋkuk. 10Saaɓa uduŋeeɗ itaanɛ Godeey sinaanɛ Geetitank takik, maɓa joop sigɛ ɓɔɔkaak baŋɛ ɛtɛr walas nɛ ɗanɗamaaŋ.
11Nɛɓa yaaŋɛ ɛɛk wosɛytan Suumiyoŋk Jakariyaasa a ɛtɛtɛr nyon sinaanɛ uduŋeetoŋk goy sineene ɗiɗikaak. 12Saaɓa Jakariyaas dɛnɛɛɗik, nɛɓa ŋaati a ɓuriiŋ. 13Yakanaɓa tongeeɗ wosɛytan nɛɛkɛ kɛ, "Iin Jakariyaas, kat ɓuriikin. Tiyɛɛ kɔna ɗanɗamɔn nookuŋ. Ɓartɛ kɔɔna jarti nookɛ Elsaabeet tɔɔn sinɔ mooyk, nɛkɔɔ riyin kɛ Yowanis. 14Laŋinkɔɔ sɛɛne yaaka jɛt, maɓɔrɛ yaakɔɔ joopa a ɓɔɔkaaŋ agut ɓartɛɛt nɛɛkiŋ, 15obiikoy sɛŋk taamɛkɛ Suumiyoŋkuŋ. Kikoy sɛŋk tuu ogool wɛynik a tuu om sinɔ pɔɔyɛɛŋɔŋk, enyɛɛrikoy sɛŋk Wɛɛŋa sigɔ Geetitaanakik a in ar ɛmɛse amɗ. 16Jumurkukɔɔ sɛŋk joop Israeelik a ɓɔɔkaaŋ son lak Suumi nɛŋk Waakoyok. 17Maɓɔrɛ ragadkɔɔ joop gɛɛŋk Suumiya Wɛɛŋakɛ a ɓaŋkawukaat oko iɗit pɛrkaakoŋk Eliyaas. Jumurkukɔɔ ɓayɛtun ɛpɛnaakakoŋk son lak tɔɔmɔk gɛŋkik, a ɓayɛtun joop sigɛ kir ɗɛyɛ any sinɛ tonɛɛkik son lak ɗegerɔn ɛɛkoŋk joop sigɛ mentaana taamɛkɛ Suumiyoŋkuk."
18Nɛɓa sɛŋk Jakariyaas tonu wosɛytaana sinaana kɛ, "Ɗegerakɔɔ any sini kɛ eekeer jikoy? Eet bɔɔlɔŋ, maɓɔrɛ jarti naakɛ ɓɔɔka emeyi gɛɛnɛŋ."
19Nɛɓa tongeeɗ wosɛytan nɛɛkɛ kɛ, "Eet Gɛbireel sinɛ ɛtɛtɛɗa taamɛkɛ Waakoyotoŋkuk. Wosɛykɛɛkɔtu sooy lak Waakoyok kɛnɔna kusa waasa Pɛɛni sini Ɓɛlkɛɛstank. 20Dɛnko. Agut sinɔ kiiɗin ŋaadit pɛɛni sinɛ kɔna tonaakik, kinkɔɔ oolɛ toni nɔkɔɔ ɓartɛɛɗɛɛ tɔɔn nɛɛkik. Dusanɛɛkɔɔ pɛɛni naak ɔɔtɛ nɛɛkɛk."
21Koorɛrɓa joop Jakariyaasiŋ. Nɛɓa reemɗi ɓayɛtun gɛŋk agut sinɔɓa beeɗirkiɗ kɛ many Godeya sinaana Geetitank takanak. 22Saaɓa Jakariyaas ŋaarkiɗik, nɛɓa ki oolɛ toni a joopuk. Nɛɓa sɛɛk ɗegerar kɛ dɛnɛkɔ any om Godeey sinaanɛ Geetitank tak. Tonɗiiɓa sɛɛga a ijojopiiɗ ari, nɛɓa beeɗ oko sinɛk a ki oolɛ toni.
23Saaɓa ruumeeɗɛɛ ɔɔtɛ sinɛ ijaagoŋkuk baŋiya, nɛɓa Jakariyaas ŋaar nyaka nɛɛkaak. 24Nɛɓa gamɛ ɔɔtɛ sinɔɔnɛ balaaŋɔŋk jarti nɛɛkɛ Elsaabeetiŋ, nɛɓa beeɗ a dugiɗi godeey tak a ɛyɛkeer tuul. 25Nɛɓa tonu kɛ, "Ijaagkɔta Suumii any sinɔ mentanŋɔŋk. Ijaagkɔta maariyeet nɛɛk, nɛkɔte ɔɔyɛ keeny sinɛkɔ laka joope kɔɔrkuŋ."
Yaaŋiyɛ Ɓartiyɛ Yeeseek
26Saaɓa gamɛɛɗ Elsaabeetik ɛyɛkeerɛ tula ome nɛɛkɛk, wosɛykiɓa Waakoyot wosɛytan nɛɛk Gɛbireel Naajireeta. Naajireet katamɛ sinɔ ar ɗook Gɛlilaak. 27Wosɛykɛɛɓa son lak peet sinɔ inɓa kir ɗeegarɔn a mooyk sinɔ riyɛ kɛ Maariyamuk. Sɛɛnɓa mɛyii iɗit sinɔ komoy Daawitik sinɔ riyɛ kɛ Yoosepuk. 28Nɛɓa mɛlki son lak sɛɛnik nɛ tongeeɗ kɛ, "Digoyna, iin geetitan peetakɛ kɔɔr. Waakoyo a iin agut omoŋ."
29Nɛɓa sɛŋk ŋaati jɛt agut waasiyɛ wosɛytan sinɛk, nɛ koɓu kɛ, "Ege sini digoy sinɔ ɓɛɛlɛ ɛkik." 30Nɛɓa sɛŋk wosɛytan sinɛ tongeeɗ kɛ, "Iin Maariyam, kat ɓuriikin. Yaa ɓayɛ Waakoyotoŋk jɛt. 31Dɛnko, gamunkɔɔŋ nɛkɔɔ ɓartin tɔɔn sinɔ mooyk, nɛkɔɔ riyin tiriya gɛɛŋk kɛ Yeesee. 32Obiikɔɔ sɛŋkiŋ, riyɛ kɛ Tɔɔn Waakoyo sinɛ Obiik. Gageeɗkɔɔ Suumii Waakoyot barsum ɔrɛɛ nɛɛk Daawitikik. 33Beeɗkoy suumiikent Israeele nɔkoy nɔkoyk. Kɛɛ pedtan Burɛ nɛɛkɛk."
34Nɛɓa Maariyam tonu wosɛytaana sinaana kɛ, "Eet inɓa kii ɗeegarɔn a mooy. Anɛkɔɔ gayɛ any sini ɛk?"
35Nɛɓa jumurgeeɗ wosɛytan nɛɛkɛ kɛ, "Mɛlɛrkikɔɔna Wɛɛŋa sigɔ Geetitaanakik, dokukɔɔne ɓaŋkawuka Waakoyo sinɛ Obiik. Agut sini ege tɔn sinɛkɔɔ ɓartink geetitan, riyɛ kɔɔ kɛ Tɔɔn Waakoyotoŋk. 36Dɛnko, tekaan nook Elsaabeet gamɛ tɔɔn sinɔ mooyk bɔlɔŋkaat nɛɛkɛk, ege sisɔ ɛyɛker gɛɛnɛ tula om sigɛkan gamɛɛɗik maɓa totonɛɛ kɛ sɛɛn nɔ tersikan. 37Kɛɛ any sinɔ ooɗɛ Waakoyok ara."
38Nɛɓa saadi baŋiya, tongeeɗ Maariyam kɛ, "Eet ijaagen Suumiyoŋk. Inta ɓɛɛlɛ oko sinɛ toniiɗink." Nɛɓa sisa wosɛytan sinɛ pakat ɛɛk nɛ ŋaarŋ.
Lɛɛwɛ Maariyam Elsaabeet
39Saaɓak ŋaarɓa Maariyam a gorgorŋ nɛ kɛɛ ɗooka sinɔɔna ar kurkumɛɛkɛ Yuudaak, nɛ mɛlɛ katamɛya omalta. 40Nɛɓa guuguny godeya Jakariyaasik nɛ digoyɛ Elsaabeet. 41Saaɓa Elsaabeet tiyɛɛɗ digoy Maariyamuk, nɛɓa ɓeesiɗi tɔn sinɛ lak amɗukuŋ. Nɛɓa Elsaabeet enyɛɛri Wɛɛŋa sigɔ Geetitaanakik.
42Nɛɓa tonu a ɗooruŋ kɛ, "Geeti kɔnu Waakoyot peetakɛ baŋɛ kɔɔr, geetitan tɔn sinɛkɔɔ ɓartink. 43Ege eeta sini eemɛyɔn sinɔ ɓɛɛlɛ ɛkik, nɔ kusuɗ ɛmɛsa Suumiya naaka son lak eetik. 44Saakɔ tiyɛɛɗa digoy nookuk, nɛkɔ ɓeesiɗi tɔn sinɛ laka amɗuk yaakat. 45Geeti kɔnu Waakoyot agut sinɔ ŋaadiɗin kɛ ijaagkɔɔna Suumii any sinɛ kɔna tonukŋɔŋk.
Ɗanɗamɔn Maariyamuk Pɔɔsiyɛɛkoŋk
46Tonuɓa Maariyam kɛ,
"Eemɛya Suumi wɛɛŋa gaaŋk baŋɛ.
47Yaa ɓayɛ naakɛ, agut sinɔ ege Waakoyot Suumi naakik.
48Dɛnɛti Waakoyot eet sinɛ ijaagen nɛɛk sinɛ balaaŋɔŋkuŋ.
A tukiɗi ɓenyse ɓartiyɛ baŋɛ tonurkɔɔta kɛ geeti kɔnu Waakoyotuŋ.
49Agut sinɔ ijaagkɔta Waakoyo sinɛ lak ɓaŋkawukaak any sinɔ obiiŋɔŋk,
ege tiriya gɛɛnɛk geetitaanak.
50Ijaag Waakoyot maariyeet nɛɛk joopa sigaaga ɓurer sɛɛnik baŋɛ,
ɓartiyɛɛkɛ ɓartiyɛɛka.
51Yaaŋɛkɔ ɓaŋkawuka nɛɛk ariit nɛɛkɛ sinaanɛ ɓaŋkawuŋɔŋk,
kɛɛtɛkɔ joop sigɛ ɓɔŋgɔɔrɛr ɛɛk nɛŋk rakaayak koɓiɗakɛ gɛŋkik.
52Rikitkikɔ suumiyɛ barsumatɔkɛ gɛŋk,
ma ɓɔŋgɔɔrɛ joop sigɛ atu ɗookuk rakaaya eemɛyɔɔn.
53Joop sigɛ latu ŋaawuk arkɔ sɛɛg a ɓooɗorar any sinɔ mentanŋɔŋk,
ma joop sigɛ latu worik ɔɔyɛ sɛɛg a ɓɛɛlɛr sɔkɔn.
54Ijaageer gɛɛŋk joop Israeelik.
Koɓukukɔ maariyeet nɛɛk.
55Ijaagkɔ Waakoyot any sinɛɓa guugunygeeɗ kuumeeta ɔrɛya naŋk,
Abrahama a tɔɔmɔka gɛɛnaakik nɔkoy nɔkoy."
56Beeɗɓa Maariyam sooy lak Elsaabeetik a ɛyɛkeer jiit, nɛ ŋaar nyaka nɛɛkaak.
Ɓartiyɛ Yowanis Sinɛ A'aadiik
57Gayɛɓa Elsaabeeta ɔɔtɛ ɓartɛɛtoŋk, nɛɓa ɓartɛ tɔɔn sinɔ mooyk. 58Joop sigɛ beeɗir a sɛɛn jɔkikentik a tekaaneer gɛɛŋk tiyɛrɓa kɛ argeeɗkɔnɔ Suumii maariyeet nɛɛk sinɔ obiiŋɔŋkuŋ. Nɛɓa yaa sɛɛga a sɛɛn agut omoŋ.
59Ɗoŋikɛ tula jiiteene nɛɛkɛk, kurakɓa kɛnɔ yawɛr sasalɛ nɛɛk. Ɗɛyɛrkɛɓa a gun riyar tiriyaakɛ ɛpɛnaak kɛ Jakariyaas. 60Yakanaɓa ɛmɛsa tonu kɛ, "Moko! Oko sinɛk riyɛ kɛ Yowanis!"
61Nɛɓa sɛɛk tonurgeeɗ kɛ, "Kɛɛɓa tekaaneerɛ goonɛ sinɔɓa riyɛ tiriyaakɛ sigeegek." 62Nɛɓa saadi baŋiya kɔɔniyar ɛpɛn yaaŋiyɛɛkɛ kɛ, "Ɗɛyin a riyɛ tɔɔn nook kɛ wooɗ?" 63Nɛɓa kalɛyi Jakariyaas any taapɛɛtoŋk kɛnɔ gaɓɛrgeeɗ, nɛɓa taapɛ kɛ, "Riyɛ kɛ Yowanis." Nɛɓa reemɗi ɓayɛtun gɛŋk agut any sini. 64Nɛɓa sisa Jakariyaas oolɛ toni, nɛ tuke pɔɔsiyɛ Waakoyotoŋk.
65Nɛɓa joop sigɛ beeɗir jɔkikentik ɓuriiŋ agut ola sigi baŋɛ, nɛɓa tiyɛɛ waasiyɛ gɛɛŋk ɗook Yuudaak sinaanɛ ar kurkum raŋk baŋɛ. 66Kɔniniyiɓa joop sigɛɓa tiyɛr any sinik baŋɛ kɛ, "Tɔɔn sini ɓɛɛlɛkɔɔ ɛk?" Nɔɓa ɓɛɛlɛɛɗ oko sinikik agut sinɔɓa Suumi a sɛɛn agut omoŋ eekeerɛk.
Pɛrka Jakariyaasik
67Enyɛɛriɓa ɛpɛna tɔɔna nɛɛka, Jakariyaas Wɛɛŋa sigɔ Geetitaanakik nɛɓa waasɛ pɛrka kɛ,
68"In dakɛr pɔɔsiyɛɛk Waakoyota Israeelik,
agut sinɔkɔ kusuɗ son lak joop gɛɛŋk maariyeet nɛɛkɛ ɛkɔ ebɔdɛ sɛɛg tikiyɛɛkɛk.
69Boŋkukɔ tina iɗit sinɔ eɓɔdiɗiiŋɔŋk sinɔ obiiŋɔŋk,
ijaagente nɛɛkɛ komoy Daawitik,
70oko sinɛɓa tonurɗu joop pɛrkaakoŋk sigɔ geetitaanak,
sigaagɛɓa ɓɛɛlɛr a tukiɗi emeyikɛ sigaagɛɓa ɗeeŋkik.
71Ebɔdukukɔ tin ariit gumaakeer gaŋkik,
a joop sigɛ manɗiikik baŋɛ.
72Nɔkɔ ijaagiiɗ oko sinikik yaaŋɛ maariyeet nɛɛk ɔrɛyaka gaŋk,
koɓuku kuumeet nɛɛk sinɔ geetitank.
73Ege sini kuumeet sinɛɓa kuumɗiiɗi ɔrɛya naŋk Abrahamaak.
74Bɔdukiikɔ gumakeerɛ gaŋk,
kɛnɔ ijaagɗikii Waakoyota a kii ɓuriit,
75Waakoyote taamɛkɛ a eteŋk geetitaanak
a mentankii eme sinaanɛ ɓɛɛlɛɛɗii wɛɛŋakɛk baŋɛ.
76Maɓɔrɛ iin tɔɔn naak sini, riyɛni kɛ iɗit pɛrkaakoŋk Waakoyotoŋk sinɛ lak ɓaŋkawukaak.
Kɛɛɗinkɔɔ tuki Suumii ɔɗɔɔkɛ kɛnɔ ijaagin joop a ragadir ɛɛk mɛlɛɛɗa nɛɛkaak.
77Gaɓunkɔɔ joopa gɛɛna ɗegerɔn ɛɛkoŋk bɔdɛɗoŋk
sinɔ laŋirɗi tɔŋɔɗ tikiyɛɛkoŋkuk.
78Agut maariyeet a pori Waakoyo naŋkik,
tayɛkɔɔtina waawuy bɔdɛɗoŋk dari.
79Tipeyɗi sɛŋk joopa sigaaga atu nyuugurk a sigaaga atu tipii retoŋkuk,
ikekeɓi deraka gaŋk gopana bɔdɛɛɗoŋk."
80Nɛɓa Yowanis ɓɔlɔɔrɛŋ nɛ ɓaŋkaawurŋ kalbii nɛɛkɛ. Nɛɓa beeɗ paaton mɛlɛɛɗa nɔɓa yaaŋɛɗ ɛɛk joopa Israeelik.
Currently Selected:
Lukaas 1: KSTM
Highlight
Share
Copy
Want to have your highlights saved across all your devices? Sign up or sign in
