Maatiyoos 25
25
Rɔmɛ Peetak Sigɔ Aarink
1"Saakoyk burɛ dariyoŋk gayikoy a peetak sigɔ aarink, sigɔ ŋaararki a latu ola gɛŋk sigɔ ɗaawurŋɔŋk, kɛnɔ boŋur iɗit sinɔ waawuguɗɛɛŋɔŋkuk. 2Sɛɛge peetak sigɛ tuulk gaagɛyɛɓa, ma a tuul ɗegerarɓa ɛɛk. 3Nɛɓa sigɛ gaagɛyɛk diiler ola gɛŋk sigɔ ɗaawurŋɔŋk ma sɛɛge kɛɛ gaaji sinɔ ŋaaytank. 4Maɓa sigɛ ɗegerar ɛɛkik diiler ola gɛŋk sigɔ ɗaawurŋɔŋk ma latu gaaji sinɔ ŋaaytank ant. 5Saaɓa beeɗirkiɗ iɗit sinɛ waawuguɗɛɛkik nɛɓa latu ɗoŋ sɛɛg baŋɛ nɛ ɗeegararŋ.
6"Nɛɓa kaalt kɔɔr tiyɛr a riyɛ sɛɛg kɛ, 'Mɛlki iɗit sinɛ waawuguɗɛɛk, in ŋaarkɛɛ nɔ kusɛɛ boŋɛɛ.'
7"Saaɓak ŋaararɓa raŋana peetak gɛɛnɛ baŋɛ nɛ ragadir ola gɛŋk sigɔ ɗaawurŋɔŋk. 8Nɛɓa peetak sigɛ gaagɛyɛk tonur sigaaga ɗegerar ɛɛkik kɛ, 'Laararkɔɔ tine ola sigɔ ɗaawurŋɔŋk in tin gijɛɛ gaaji.'
9"Nɛɓa jumurar sɛɛga peetak sigɛ ɗegerar ɛɛkik kɛ, 'Kɛɛ tine gaaji sinɔ gayɛ eteŋka a iinakaak. In kɛɛɗɛɛ sookiya nɔ kɛɛɗɛɛ ɓalkɛɛ gaaji ɛɛka noŋk.'
10"Saaɓa kaarɗi ɓaliiɗa gaajiyak, nɛ mɛlki iɗit sinɛ waawuguɗɛɛk, nɛ peetak sigɛɓa atukun ragad ɛɛkoŋkuk kaar guugunyar wɔɔra sinaana waawanoŋk agut omoŋ, nɛ korɛɛ gode nɛɛk tuga nɛɛkiŋ.
11"Nɛ a balaaŋ mɛlɛrki peetak sigɛkan dakɛrkik nɛ tonur kɛ, 'Suumi naŋk, suumi naŋk, tay tina tuga nɛɛk.' 12Yakanaɓa sɛɛga tonu kɛ, 'Eekeer tona kɔnaaŋ, kaa kɔnu ɗegerɔɔn.'
13"Agut sini in koorikuunɛɛ ragad ɛɛkoŋk, agut sinɔ kiir ɗegerɔɔn ɓɛɛnyɔ nɛɛk maŋk sayiti nɛɛk sinɛkoy mɛlkiɗi Tɔn Etoŋkuk.
Rɔmɛ Ijaageer Sigɔ Jiitik
(Luk. 19:11-27)
14"Kɛkar burɛ Waakoyotoŋk gayi a iɗit sinɔɓa ŋaar ɗooka omaltaak nɛ riy ijaageer gɛɛŋk nɛ sɛɛga gaɓɛ wori nɛɛk kɛnɔ nagadɗiiɗik. 15Kaasɛɓa sɛɛga a omoŋ omoŋ oko oolan nɛŋk. Gaɓɛɓa omalta biriyatɔk a kumɛɛ tuul, ma omalta kumɛɛ pɛɛy, ma omalta kumɛ omoŋ nɛ ŋaar ɗooka omalta. 16Ŋaarɓa iɗit sinɛɓa boŋu biriyatɔk a kumɛɛ tuulk sisa nɛ nagadɗi sɛɛge nɛ laŋ biriyatɔk ɔgɔ a kumɛɛ tuul. 17Maɓɔrɛ iɗit sinɛɓa boŋu biriyatɔk a kumɛɛ pɛɛyk nagadɗi nɛ laŋ biriyatɔk ɔgɔ a kumɛɛ pɛɛy. 18Mayakana iɗit sinɛɓa boŋu biriyatɔk a kumɛ omoŋɔŋk, ŋaar nɛ kɔwu wori suumi nɛɛkik ɗooka.
19"Nɛɓa mɛlki suumi ijaageer gɛɛŋkik saadiɓa kegeeɗik ɔɔtɛ sinɔɔnɛ jeeɗoŋɔŋk baŋiya, nɛ riy ijaageer gɛɛŋk nɛ ikomu wori sinɛɓa gaɓɛ sɛɛgak. 20Wideerɓa ɛɛk iɗit sinɛɓa boŋu biriyatɔk a kumɛɛ tuulk a lak biriyatɔk ɔgɔ a kumɛɛ tuul nɛ tonu suumiya nɛɛka kɛ, 'Suumi naakɛ, gaɓunkanta biriyatɔk a kumɛɛ tuul isi laŋakan biriyatɔk ɔgɔ a kumɛɛ tuul.'
21"Nɛɓa tongeeɗ suumi nɛɛkɛ kɛ, 'Ijaaginkɔ a liki, iin ijaagen sinɔ mentan ɛ ŋaadɛɛŋɔŋk. Agut sinɔnu ŋaadiɗɛɛ ant sinɔɔnɛ tɛmŋɔŋkuk, suumakɔɔnu ant sinɔɔnɛ obiiŋɔŋk, waɗik guugunyu yaakata suumi nookuk.'
22"Nɛ wideer ɛɛk iɗit sinɛɓa boŋu biriyatɔk a kumɛɛ pɛɛyk nɛ tongeeɗ kɛ, 'Suumi naakɛ, gaɓunkanta biriyatɔk a kumɛɛ pɛɛy, isi laŋakɔ biriyatɔk ɔgɔ a kumɛɛ pɛɛy.'
23"Nɛɓa tongeeɗ suumi nɛɛkɛ kɛ, 'Ijaaginkɔ a liki, iin ijaagen sinɔ mentan ɛ ŋaadɛɛŋɔŋk. Agut sinɔnu ŋaadiɗɛɛ ant sinɔɔnɛ tɛmŋɔŋkuk. Suumakɔɔnu ant sinɔɔnɛ obiiŋɔŋk, waɗik guugunyu yaakata suumi nookuk.'
24"Nɛ wideer ɛɛk iɗit sinɛɓa boŋu biriyatɔk a kumɛ omoŋɔŋk, nɛ tonu suumiya nɛɛka kɛ, 'Suumi naakɛ, ɗegera kɛ iin iɗit sinɔ kalkalŋɔŋk, ɗootiɗiikin soodiɓa kiiɗin soowuɗitik ɛ tolɗiikin soodiɓa kiiɗin kɛɛtiɗiitik. 25Agut sini ɓurakanni, nɛkan kɛɛɗa kɔɔwa wori nook ɗooka isi wori nook.'
26"Nɛɓa jumurgeeɗ suumi nɛɛkɛ kɛ, 'Iin ijaagen sini ŋɛɛwɛnŋɔŋk ɛ dɔɔtɛk, ɔkɔnkan ɗegerin kɛ ɗootiɗiika soodiɓa kiiɗa soowuɗitik ɛ tolɗiika soodiɓa kiiɗa kɛɛtiɗiitikiŋ, 27gunkan gaɓun wori naak godeya baŋkiyoŋk, nɛ saa mɛlkiɗak gaɓunta a sinɛkan laŋiiɗɛɛk.
28"In boŋɛɛ wori nɛɛk nɔ gaɓɛɛ eta sinaana lak biriyatɔk a kumɛɛ ɗibɛɛ aarink. 29Iɗit sinɛ lakik siipigiɗɛkoyŋ ɓɔɔkaageeɗkoyŋ, ma iɗit sinɛ kiiɗɛk boŋkuɗɛɛkoy aasi sinɛ lakikiŋ. 30In boŋiirɛ ijaagen sini badtank nɛ oriirɛɛ nyuugura sinaana ar walasik, lakɛkoy saadi duri a ɗama ŋedakoŋk.
Pirdi Sinɛkoy Pedi Ɗookoŋk
31"Saakoy mɛlkiɗ Tɔn Etoŋk sɛɛn a wosɛytaanak gɛɛŋk baŋɛ eemɛyɔɔn nɛɛkɛk, nɛkoy dokuɗe barsum nɛɛkɛ eemɛyɔɔnoŋk. 32Nɛkoy tolɗi joop ɗookoŋk baŋɛ Sɛɛne taamɛkɛ, nɛkoy sɛŋk pakati joop sigɔ ɓɔɔkaaŋɔŋk oko sini pakatiiɗ irtaan jiŋkuyɛ a kemtek. 33Arikoy a ɛtɛr jiŋkuyɛ gɛɛnɛ ɗiɗikakɛ gɛɛnɛk ma kemte gɛɛŋk kantunakɛ gɛɛnɛk.
34"Saakoyk tonukoy suumi nɛɛkɛ joopa sigaaga atu ɗiɗikakɛ gɛɛnɛkik kɛ, 'Iinak sigɛɓa kɔnu geeti Baabɛɛk, in kusɛɛ, nɔ moonɛɛ burɛ sinɛɓa kɔna ragadɛɛ a tukiɗi saaɓa riiɓeeɗɛɛ ɗook. 35Agut sinɔ lakaɓa ŋaawu nɛɓati gijeer ɗamaŋ, lakaɓa paar nɛɓati gijeer maawuŋ, eetɓa koonat nɛɓati boŋiiriŋ. 36Ɓɛɛlaɓa konaan nɛɓata kadiɗikariŋ, goraɓa nɛɓati igoriiriŋ, korkoɗɛɛɓati nɛɓati lɛɛwɛɛriŋ.'
37"Tonurgeeɗkoy joop sigɛ mentaana taamɛkɛ Waakoyotoŋk saakoyk kɛ, 'Suumi naŋk, lakinɓa ŋaawu nɛɓani dɛnii nɔɓani gijii ɗama okoɗ? Maŋk lakinɓa paar nɛɓani dɛnii nɔɓani gijii maawu okoɗ? 38Iinɓa koonat nɛɓani dɛnii nɔɓani boŋii okoɗ? Maŋk ɓɛɛlinɓa konaan nɛɓani dɛnii nɔɓana kadiɗikii okoɗ? 39Maɓɔrɛ gorunɓa maŋk korkoɗɛɛɓani nɛɓani dɛnii nɔɓani lɛɛwii okoɗ?'
40"Jumurkoy sɛɛga suumi nɛɛkɛ kɛ, 'Eekeer tona kɔnaaŋ, any sinɛɓa ijaagiir manyaakaka eeta sigeega balaatuŋɔŋk omaltaak itoɓa ijaagiir eeta.'
41"Saadi baŋiya tonukoy joopa sigaaga atu kantunakɛ gɛɛnɛkik kɛ, 'Iinak koonykaanak inte wideerɛɛ ɛɛk sɔ. In kɛɛɗɛɛ maɗa sinaanakoy nɔkoy nɔkoyk sinaanaɓa ragadɛɛ setana a wosɛytaanak gɛɛŋkik. 42Agut sinɔ lakaɓa ŋaawu nɛɓati kiir tigii ɗama, lakaɓa paar nɛɓati kiir tigii maawu. 43Eetɓa koonat nɛɓati kiir boŋiiɗ, ɓɛɛlaɓa konaan nɛɓata kiir kadiɗiit, goraɓa ɛ ɓati korkoɗɛ nɛɓati kiir lɛɛwɛɛt.'
44"Jumurargeeɗkoy sɛɛk kɛ, 'Suumi naŋk lakinɓa ŋaawu maŋk lakinɓa paar, iinɓa koonat maŋk ɓɛɛlinɓa konaan, gorunɓa maŋk korkoɗɛɛɓani nɛɓani dɛnii nɔɓani kii tokony okoɗ?'
45"Saakoyk tonukoy sɛŋk sɛɛga kɛ, 'Eekeer tona kɔnaaŋ, any sinɛɓa kiir ijaagɛ manyaakaka eeta sigeega balaatuŋɔŋk omaltaak itoɓa kiir ijaagɛ eeta.'
46"Kaarkoy sigi goopana sinaanakoy nɔkoyk ma joop sigɛ mentaana taamɛkɛ Waakoyotoŋkuk kaar wɛɛŋaka sigaagakoy nɔkoy nɔkoyk."
Currently Selected:
Maatiyoos 25: KSTM
Highlight
Share
Copy
Want to have your highlights saved across all your devices? Sign up or sign in
