Maatiyoos 28

Ŋaarki Yeese Ret Walasa

(Mar. 16:1-10; Luk. 24:1-12; Yow. 20:1-10)

1Saaɓa ɗoyiiɗ waawuy Sambatɛyoŋk Ayuuduk waawuy Sambatɛyoŋk romiɗ gibi Maariyam Mɛgdooluk a Maariyam om kaarɓa kɛnɔ dɛnɛr pii nɛɛk. 2A gorgorŋ lakɛɓa yike ɗookoŋk sinɔ obiiŋɔŋk, agut sinɔɓa worworiikiɗ wosɛytan Waakoyotoŋk dari nɛ girgiɗe giɗee sinɛɓa koriiɗɛɛ pii nɛɛkik nɛ beeɗiɗ raŋk. 3Ɗaawurɓa taamɛ wosɛytan nɛɛkik a ito nyaalan, tupeenyɓa abii nɛɛkɛ a ito malwan. 4Ɓurerɓa koortaana gɛɛnɛ wosɛytan nɛɛk nɛ piiɗer a ɓɛɛlɛr a ito joop sigɔkɔ rɛrŋɔŋk.

5Tonuɓa wosɛytan Waakoyotoŋk jartiyatɔka sigaaga kɛ, "Iinakɛ kat ɓuriikɛɛ, ɗegera kɛ ɗɛyɛɛr Yeesee sinɛkan laalawɛɛk. 6Kɛɛ seedi, ŋaarkikɔŋ oko sinɛkan toniiɗik. In kusɛɛ dɛnɛɛ saan kɔ ɗuɗuŋɗuɗek. 7Sisɔ in ŋaarɛɛ a gorgorŋ nɔ kɛɛɗɛɛ tonɛɛ nomtaanaka gɛɛna kɛ, 'Ŋaarkikɔ ret walasaŋ, ɗeykunkɔɔ kɔne ɔɗɔɔkɛ Gɛlilaaka laŋiirkɔɔ sooy.' Sisɔ tonakɔ kɔnaaŋ."

8Ŋaararɓa jartiyatɔk sigɛ saadi pii nɛɛkɛ a gorgorŋ a tuɓur a yaaka sinɔ obiiŋɔŋk. Nɛɓa reerir nɛ kaar tonur nomtaanaka gɛɛnaak. 9Nɛɓa sisa laŋki sɛɛg Yeese gopɛ nɛ tonu sɛɛga kɛ, "Digoy kɔna." Nɛɓa sɛɛk wideetar ɛɛk son lak sɛɛnik, nɛ gaamur derak gɛɛŋk nɛ ugumergeeɗiŋ. 10Tonuɓa sɛɛga Yeese kɛ, "Kat ɓuriikɛɛ in kɛɛɗɛɛ tonɛɛ manyaakaka eeta nɔ kaar Gɛlilaaka dɛnɛrkɔɔtu sooy."

11Saaɓa atukuɗ jartiyatɔk sigɛ gopɛk, nɛɓa amaasiniyɛɛkɛ gɛɛnɛ a omoŋ omoŋ kaar katamɛya nɛ tonur any sinɛkan ɓɛɛlɛk baŋɛ ɔɗɔweera tapa ŋaadiyɛɛkoŋk. 12Ɔɗɔweer tapa ŋaadiyɛɛkoŋk a gutarɛyɛ tolɗiiɓa agut omoŋ nɛ waasiɗi nɛɓa gaɓɛr wori a obiiŋ amaasiniyɛɛka gɛɛnaak, 13nɛ tonur sɛɛga kɛ, "Toniirkɔɔ joopa kɛ, 'Kurakkɔ agalir nomtaanak gɛɛnɛ buusɛ Yeeseek kaalt ma ɗeegariiŋ.' 14Ɔkɔnkɔɔ tiyɛ any sini ɗumaat ɗookaŋ, tonguɗiikɔɔ any nɛɛkiŋ ariikɔɔ a kɛɛ rakatɛ sinɔkɔɔ laŋirkɔɔk." 15Nɛɓa amaasiniyɛ gɛɛnɛ boŋur wori nɛɛk nɛ ijaagir oko sinɛkɔ toniiɗɛɛ sɛɛgak, totonɛɛ any sini sooy lak joop Ayuuduk nɔ mɛlɛɛɗa ɓɛɛnyɔwase.

Sekiyɛ Pedtan Nɛɛk

(Mar. 16:14-18; Luk. 24:36-49; Yow. 20:19-23; Ija. 1:6-8; 1 Kor 15:3-8)

16Kaarɓa nomtaanak sigɛ aarin a omoŋɔŋk saanakan sɛɛga yaaŋɛ Yeese kɛnɔ kaargeeɗik kurkuma sinaana ar Gɛlilaakeek. 17Saaɓa dɛnɛrɗik nɛ ugumergeeɗiŋ, ma joop a omoŋ omoŋ latugeeɗ koɓiɗak a pɛɛy. 18Wideerɓa Yeese ɛɛk son lak sɛɛgik nɛ tonu sɛɛga kɛ, "Gaɓɛɛɓata ɓaŋkawuka baŋɛ dari a ɗook. 19Sisɔ in kɛɛɗɛɛ nɔ kaar ariir joop ɗookoŋk baŋɛ a nomtaanak nɔ aadiir sɛɛg tiriyaakɛ Ɛpɛn eteŋkaak a Tɔɔn nɛɛkik a Wɛɛŋa sigɔ Geetitaanakik, 20in rɔɔriyɛɛ sɛɛg kɛnɔ ijaagir any sinɛkɔ kɔna tonaak. Eet a iinak agut omoŋ ɓɛɛnyɔwɛ gɛɛŋk baŋɛ nɔkoy mɛlɛɛɗa pediya ɗookoŋk."

Currently Selected:

Maatiyoos 28: KSTM

Highlight

Copy