Markoos 15

Diilɛɛ Yeesee Son Lak Pilatoosuk

(Maa. 27:1-2,11-14; Luk. 23:1-5; Yow. 18:28-38)

1Romiɗ gibi ɔɗɔweer tapa ŋaadiyɛɛkoŋk, a gutarɛyɛ, a rɔɔriytaanak higi Muuseek, a joop sigɔ gaɓɛr woorank baŋɛ lalaŋiiɓa agut omoŋ nɛ waasiɗiiŋ. Nɛɓa korkoɗar Yeese nɛ diiler nɛ kaar gaɓɛr Pilatoosa sinaana ɗumaat ɗookak.

2Nɛɓa Pilatoos kɔɔniy kɛ, "Iin Tapaɗ Ayuuduk?"

Nɛɓa Yeese tongeeɗ kɛ, "Ii, oko sinɛ toniiɗiŋk."

3Ɔɗɔweer tapa ŋaadiyɛɛkoŋk ooɗɛrɓa Yeesee olaatɛ sigɔɔgɛ ɓɔɔkaaŋɔŋk. 4Kɔɔniyɓa Pilatoos kɛ, "Daariiɗina olaatɛ sigɔɔgɛ ɓɔɔkaaŋɔŋk kɛɛ any sinɔ jumurunk?"

5Nɛɓa Yeese kɛɛ any sinɔ jumurk, a reemɗi ɓayɛ Pilatoosuk.

Pɛrɛdɛɛ Yeesee Ret

(Maa. 27:15-26; Luk. 23:13-25; Yow. 18:39-40; 19:1-16)

6Lakɓa iɗit sinɛ ɗumaat ɗookak barɛ sinɔ woorkuɗ korkortan a omoŋ sinɛ kɔɔniyar joopk kɛnɔ sɛɛga woorkɛ Ba'aale Ɗoyiɗoŋk. 7Lakɛɓa joop godeey korkoɗɔɔnoŋk sigɔɓa ŋaaŋarar raŋana koɓiiɗ sinɔɔnɛ ŋɛɛwɛnŋɔŋk nɛɓa ɓokootar joopuk. Joope sigeege egeɓa omaay iɗit sinɔ riyɛ kɛ Bɛrbaanik. 8Nɛɓa joop gɛɛnɛ wideetar ɛɛk son lak Pilatoosuk nɛ kalɛyir kɛnɔ ijaag sɛɛga oko sinɛkan barɛrɗik.

9Nɛɓa Pilatoos kɔɔniy sɛɛg kɛ, "Ɗɛyɛɛr a kɔna woorka Tapaɗ Ayuuduk?" 10Ɗegerɓa kɛ ɔɗɔweer tapa ŋaadiyɛɛkoŋk gaɓɛrgeeɗkan Yeesee agut sinɔ porurɗu ɛkan gɛŋkik. 11Ɔɗɔweer tapa ŋaadiyɛɛkoŋk moyurɓa joop sigɛ ɓɔɔkaak kɛnɔ kalɛyir kɛnɔ sɛɛga woorkɛ Bɛrbaan ɔɔtɛ Yeeseek.

12Kɔɔniyɓa Pilatoos joop gɛɛŋk kɛkar kɛ, "Saa woorkuɗa Bɛrbaanik, ma iɗit sini riyari kɛ Tapaɗnɔ Ayuuduk ara ɛk?" 13Nɛɓa sɛɛk ooyɛr kɛ, "Laalawuk!"

14Tonuɓa sɛɛga Pilatoos kɛ, "Ijaagkɔ tikiyɛ kɛ jikonak?"

Nɛɓa sɛɛk ooyɛr a kaalɛŋ kɛ, "Laalawuk!"

15Nɛɓa Pilatoos ɗɛyɛ kɛnɔ yaa joopa gɛɛnaak, nɛ woorku Bɛrbaan nɛ ŋɔɗuruŋ, ma ari Yeesee a ɗiŋɛɛ nɛ gaɓɛ amaasiniyɛɛka Roomuk kɛnɔ laalawar.

Daraayɛr Amaasiniyɛk Yeese

(Maa. 27:27-31; Yow. 19:2-3)

16Saaɓak diilerɓa Yeesee amaasiniyɛ gɛɛnɛk keera sinaana ɗumaat ɗookak, nɛɓa amaasiniyɛ gɛɛnɛ baŋɛ tolɗi sɛɛne tookɛɛta. 17Gaɓɛrgeeɗɓa ɛɛka abii sinɔ dɛɛŋɔŋk ɛɓa ɓɔrɛ kɛnyargeeɗ dooroy ɓɛynikoŋk nɛ gaɓɛrgeeɗ ɔɗɔwa. 18Nɛɓa ɓɔŋgɔrɛrgeeɗ arin a darayɛr kɛ, "Iin Tapaɗ Ayuuduk, digoyna!" 19Mamalarɓa ɔɗɔ nɛɛk sombalɛɛkɛ, topɛpɛyargeeɗɓa nɛ ɛtɛr korontunɛ nɛ ugumergeeɗiŋ. 20Daraayɛrɓa nɛ boŋurkuɗ abii sinɛ dɛɛŋɔŋk, nɛ gaɓɛrgeeɗ ɛɛka abii sinɛɓa nɛɛk, nɛ diiler kɛnɔ kaar laalawar.

Laalawɛɛ Yeesee

(Maa. 27:32-44; Luk. 23:26-43; Yow. 19:17-27)

21Lakɛɓa iɗit Kɛrenaak sinɔ riyɛ kɛ Simionuk ɛpɛn Aleksandrosa a Ruupoosa. Saaɓa mɛlkiɗ kɛntɛɛk, nɛɓa amaasiniyɛk remɛrgeeɗ kɛnɔ ɓataki laalawutan Yeeseek. 22Nɛɓa saadi baŋiya diiler Yeesee nyona sinɔɔna riyɛ kɛ Golgotaa ma wooran nɛɛk Ɛmɛɛnan Ɔɗɔwoŋkuk". 23Saaɓa mɛlɛrɗi saanak, nɛɓa gaɓɛrgeeɗ ogool wɛynik sigɔɓa lotɛ a any sinɔ riyɛ kɛ kɛrbeek kɛnɔ uteɗ, yakanaɓa kiɗɛyɛ a uteŋ. 24Nɛɓa laalawar nɛ abiyaka gɛɛna orur ita nɛ kaakasar sɛɛgiŋ.

25Saaɓa laalawarɗi Yeeseek, egeɓa ɔɔtɛ nɛɛkɛ sayitiyɛ jiit romiiɗoŋk. 26Taapɛɛɓa taapiyɛ sigɔ yaaŋɛr tikiyɛ gɛɛŋkik kɛ, "Tapaɗ Ayuuduk". 27Saaɓak laalawɛɛɓa joop sigɔ sɔɔkɛr ɓɛɛlɛtik a pɛɛy a Yeesee agut omoŋ, om goyse ɗiɗikakɛk ma om goyse kantunakɛk. 28[Dusanɛɛ sineene pɛɛni sinɛɓa tonɛɛ Wargatɛɛ Waakoyotoŋk kɛ, "Ikomɛɛ a joop sigɔ tikitaanakik."]

29Joop sigɛɓa ɗoyur sinaanɛ jɔkoŋkuk daraayɛrɓa a ŋɛɛŋɛyɛr ɔɗɔɔk nɛ tonurgeeɗ kɛ, "Iin sininɔ aalin Gode sinɛ Geetitank nɛ kɛnyin ɗoŋikɛ sigɔɔgɛ jiitik. 30Ebɔdutɔ ɛɛk nook! Worworakatɔ laalawutant nɛɛkɛ ɗooka!"

31Ɔɗɔweer tapa ŋaadiyɛɛkoŋk a rɔɔriytaanak higi Muuseek daraayɛrɓa a tonur kɛ, "Ebɔdɛkan joop ɔgɔ, ma ki oolɛ ebɔdɛɛt ɛɛk nɛɛkik. 32Ɔkɔnɓɔ sɛɛn Keresee, tapaɗ Israeelik, intɔ worworiik sisɔ laalawutant nɛɛkɛ, nɔ dɛnii nɔɓɔre ŋaadii!" Maɓɔrɛ joop sigɛɓa laalawɛɛ sɛɛg a sɛɛn agut omoŋɔŋk nyɔɔnar sɛɛniŋ.

Rɛr Yeesee

(Maa. 27:15-56; Luk. 13:14-19; Yow. 19:28-30)

33Atukiɗi sayitiyɛɛkɛ sigɔɔgɛ tula omk nɔ mɛlɛɛɗa sigɔɔga tula aŋank, 34ɓɛɛlɛɓa ɗook raŋk baŋɛ a nyuugur, atukiɗi sayitiyɛɛkɛ sigɔɔgɛ tula aŋank duriyeɓa Yeese a ɗooruŋ kɛ, "Elohee, Elohee, lama sɛbɛktanii? "Wooran nɛɛk sini kɛ, "Waakoyo naakɛ, Waakoyo naakɛ, ŋɔɗunkɔtu agut jikonk?"

35Tiyɛrɓa duri nɛɛk joop sigɛɓa ɛtɛtɛɗar saadik a omoŋ omoŋ nɛɓa tonur kɛ, "Riy Eliyaas." 36Nɛɓa sɛɛge iɗit omaay sisa reeri nɛɛkɛ boŋku abii sinɔ yuuse maawuk, nɛ yuusukuɗ ogool wɛynik sigɔ kowɛrŋɔŋk nɛ rokopɛ sombala, nɛ gaɓɛɛr Yeeseya kɛnɔ uteɗ. Nɛɓa iɗit sinɛ tonu kɛ, "Kat, dɛniikɔɔ saakɔɔ mɛlkiɗ Eliyaas nɔkɔɔ woorkuɗukuŋ!"

37Nɛɓa Yeese duriye a ɗooruŋ nɛ rɛrŋ.

38Saaɓak abii sinɛɓa biritɛɛ Godeey sinaanɛ Geetitank pɔɔkiɗiɓa a pɛɛy rakaay mɛlɛɛɗa ɗooka. 39Ɔɗɔwen amaasiniyɛ sigɔ ɗibɛk sinɛɓa ɛtɛtɛr laalawutant nɛɛkɛ taamɛkɛk saaɓa dɛnɛɗ Yeesee a duriye oko sinik nɛ rɛrŋɔŋk, nɛɓa tonu kɛ, "A egekɔrɔ iɗit sini Tɔɔn Waakoyotoŋk eekeerɛ!"

40Lakɛɓa saadi jartiyatɔk sigɔɓa mermemenik a yowɛɛɗŋɔŋk sɛɛge kɔɔr ɓɛɛlɛrɓa Maariyam Mɛgdooluk, a Maariyam sinɛ ɛmɛs Yaykooba sinaana tɛmk ɛ ɛmɛs Yosaak, a Sɛlomee. 41Nonomarɓa sɛɛk Yeeseye a kɔkɔnyar saaɓa arkiɗ Gɛlilaakeek. Lakɛɓa ɓɔrɛ jartiyatɔk ɔgɔ a ɓɔɔkaaŋ sigɔɓa kurak Yorsaleema a Yeesee agut omoŋɔŋk.

Kɔɔwɛɛ Yeesee

(Maa. 27:57-61; Luk. 23:50-56; Yow. 19:38-42)

42Agut sinɔɓa kɔjururkuɗŋɔŋk egeɓa ɔɔtɛ nɛɛkɛ ragad a isiis waawuya Sambatɛyoŋk Ayuuduk. 43Saaɓak mɛlkiɓa iɗit Armaatiyaasik sinɔ eemɛyɛɛŋɔŋk sinɔ riyɛ kɛ Yoosepuk sinɔɓa sɛɛn iɗit sinɔ gaɓɛ woorank joopa Ayuuduk. Sɛɛnɓa iɗit sinɔ kookor burɛ Waakoyotoŋk ŋaadiyɛɛkɛk. Nɛɓa kɛɛ diirikent son lak Pilatoosuk nɛ kalɛyiɗ buusɛ Yeeseek kɛnɔ gageeɗ. 44Reemɗiɓa ɓayɛ Pilatoosuk kɛ, "Rɛr a gorgor oko sinik ɛk?" Nɛɓa riyiri ɔɗɔwen amaasiniyɛ sigɔ ɗibɛk nɛ kɔɔniy kɛ, "Rɛrkɔ ɗeeŋkɔŋk eekeerɛ?" 45Nɛɓa tiyɛ rer Yeeseek ɔɗɔwente sinaanɛ amaasiniyɛ sigɔ ɗibɛk nɛ pɛgɛdɛ buusɛ nɛɛk Yoosepa kɛnɔ boŋuɗ. 46Nɛɓa Yoosep ɓali abii ɓuwaanoŋk sinɔ tɔɔnuk, nɛ woorku buusɛ Yeeseek laalawutant nɛɛkɛ, nɛ ɓuwu. Nɛ kɛɛ riiɓeer utula sinɔɔnaɓa kɔɔwɛɛ giɗeek takana, nɛ girgiɗki giɗee sinɔ obiiŋɔŋk, nɛ koriiɗ utul nɛɛk. 47Maariyam Mɛgdooluk, a Maariyam sinɛ ɛmɛs Yosaak mermementarɓa soon kɛ kɔɔwɛɛ Yeesee eetik.

Currently Selected:

Markoos 15: KSTM

Highlight

Copy