Markoos 5

Ebɔdɛ Yeese Iɗit Sinɔ Lak Wɛɛŋa Sigɔ Somkaanakik

(Maa. 8:28-34; Luk. 8:26-39)

1Ekaŋɛrɓa gɔrɔ sinɔ obiiŋɔŋk Gɛlilaak nɛ mɛlɛr ɗooka Gerasenoonuk. 2Saaɓa Yeese worworiikiɗ emɗ nɛɛkɛkik, nɛɓa sisa pepeti a iɗit sinɔɓa gaamur wɛɛŋa sigɔ somkaanakik a ŋaarki nyon piyakɔkoŋk. 3Beeberɓa iɗit sinɛ nyon piyakɔkoŋk, kɛɛ iɗit sinɔɓa aasi oolɛ a korkor meltikɛ awɛytiiroŋkuk. 4Korkokoɗɛɛɓa meltikɛ awɛytiiroŋk derakoŋk a arnoŋk agut ɓɔɔkaaŋ, yakanaɓa pupuɗ melti sigɛ awɛytiir derakoŋk a arnoŋk nɛ o'or sɛɛgiŋ. Nɛɓa kɛɛ iɗit sinɔ oolɛ a gaamu nɔ ari a beeɗiŋɔŋk ara. 5Weeweriiɓa a oo'oy ɓɛɛnyɔwɛ gɛɛŋk baŋɛ a ki nyɛyɛ waawuy a kaay sinɔɔnɛ nyon piyakɔkoŋkuk a sinɔɔnɛ kurkumɛ raŋank, yayawuɓa ɛɛk nɛɛk giɗeekɛ a lak doosoyɛ.

6Saaɓa iɗit sinɛ dɛnɛrkiɗ Yeesee a yowɛɛɗŋɔŋk, nɛɓa reeriir son lak sɛɛnik nɛ ugumgeeɗiŋ. 7Nɛɓa ooyɛ a ɗooruŋ a tongeeɗ kɛ, "Iin Yeesee, Tɔɔn Waakoyo sinɛ Obi Jɛtik, ooɗunti agut jikon? Kalɛyaani tiriyaakɛ Waakoyotoŋk, adarat katreeti laaŋoyin." 8Nɔɓa toniiɗ sinik agut sinɔɓa tongeeɗ kɛ, "Iinak wɛɛŋa sigɔ somkaanakik, in ŋaarɛ ete sineenek."

9Nɛɓa Yeese kɔɔniy kɛ, "Riyɛni kɛ wooɗ?"

Nɛɓa jumurgeeɗ kɛ, "Agut sinɔ ɓɔɔkaakiɗiiŋɔŋk riyɛti kɛ Leegiwoon#5:9 See kɛ Leegiwoonik pony amaasiniyɛ sigɔ kumɛyɛ tula omk. 10Kalɛyirɓa sɛɛn a ɓaŋkawuŋ kɛnɔ kat ɔɔyɛ sɛɛg ɗook sinaanɛ.

11I'irɛɛɓa saadi pony kuturɛ sigɔ ɓɔɔkaaŋɔŋk kurkum derɛ. 12Nɛɓa kalɛyir kɛ, "Adarat pɛgɛdire tina nɔ kɛɛɗii guugunyii kuturɛɛka sigɔɔga." 13Nɛɓa Yeese pɛgɛdɛ sɛɛgaŋ. Nɛɓa wɛɛŋa sigɛ somkaanakik ŋaararki ete sinaanɛ nɛ guugunyar kuturɛɛka gɛɛnaak. Nɛɓa kuturɛ sigɔ kumɛɛ pɛɛyk reerir a gorgorŋ sirpɛya nɛ ɗiirtar, nɛ ɗam sɛɛg gɔrɔ sinɔ obiiŋɔŋk.

14Nɛɓa irtaana sigɛ kuturɛɛkoŋk gonar nɛ kaar yaaŋɛr ɔɔtɛ nɛɛk katamɛɛ a sinɔɔnɛ kɛntɛyoŋk joopa. Nɛɓa joop ŋaarark kɛnɔ dɛnɛr any sinɛ ɓɛɛlɛk. 15Kurakɓa son lak Yeeseek. Nɛɓa dɛnɛr iɗit sinɛɓa gaamur wɛɛŋa sigɔ somkaanakik a lak abii eek a beeber saadi a ɗeger ɛɛk ɔɗɔ nɛɛkɛŋ, nɛɓa ɓuriiŋ. 16Joop sigɛɓa dɛnɛr any sinɛɓa ɓɛɛlɛk ete sinaanɛɓa gaamur wɛɛŋa sigɔ somkaanakik a kuturɛɛkɛ gɛɛnɛkik, yaaŋɛrɓa any sini joopa baŋɛ.

17Nɛɓa joop gɛɛnɛ kalɛyir Yeesee kɛnɔ ŋaar ɗook nɛŋk. 18Saaɓa Yeese arkiɗ teeŋɛt emɗak, nɛɓa kalɛyi sɛɛn iɗit sinɛɓa gaamur wɛɛŋa sigɔ somkaanakik kɛnɔ kaar agut omoŋ. 19Yakanaɓa Yeese kiigeeɗ pɛgɛdɛɛt, maɓa tongeeɗ kɛ, "Mak nyaka nooka, nɔ kɛɛɗin waasin joopa wɛy nookuk any sinɛ obiiŋɔŋk sinɛ kɔna ijaag Suumiik a sinɛ kɔnu maariyeeɗik."

20Nɛɓa iɗit sinɛ ŋaar ɗooka sinɔɔna riyɛ kɛ Katamɛɛ sigɔ Aarink nɛ waasɛ joopa baŋɛ any sinɛkan ijaaggeeɗ Yeeseek. Nɛɓa ŋaatir joop baŋɛ.

Ebɔdɛ Yeese Tɔɔn Iyairoosuk A Jarti Sinɔ Gortank

(Maa. 9:18-26; Luk. 8:40-56)

21Saaɓa Yeese ekaŋɛɗ emɗ ɗɛɛgasɔ gɔrɔ sinɔ obiiŋɔŋk, nɛɓa tolɗi joop a ɓɔɔkaaŋ sɛɛne tookɛɛta goroo nɛɛkɛ jɔk. 22Kusɓa iɗit om son lak Yeeseek sinɔ riyɛ kɛ Iyairoosuk sinɔ ɔɗɔwen gode tolɛɛɗoŋk Ayuuduk, nɛɓa ɗiiri sɛɛne taamɛkɛ. 23Nɛ kalɛyi a ɓaŋkawuŋ kɛ, "Tɔɔn naak sinɔ peetik sinɛ tɛmk ɗɛyɛ rer. Waɗire nɔ kɛɛɗin riiɓeeɗin ari nook raŋk. Nɔ bɔdɛ nɔ beeɗ wɛɛŋakɛ."

24Nɛɓa Yeesee kaar a sɛɛn agut omoŋ, nɛɓa nomɛrɗi joop a ɓɔɔkaaŋ a diri sɛɛne tookɛɛta. 25Lakɛɓa saadi joope sigaagɛ kɔɔr jarti om sinɔɓa rakakat a yɛrorom a emeyi aarin a pɛɛyk. 26Ɛnyɛnyɛɓa akiimaka a ɓɔɔkaaŋ a rakakat aɓa dusanɛ wori nɛɛk baŋɛ, yakanaɓa taŋge sisa aɓa kiigeeɗ laka eera. 27Tiyɛɓa sɛŋk ɔɔtɛ Yeeseek, nɛɓa kus joope sigaagɛ ɓɔɔkaak kɔɔr goyse baŋiyaak, nɛ ɓeesɛ abii nɛɛk. 28Nɔɓa ijaagiɗ sinik lakɓa koɓi sinɔ kɛ, "Ɔkɔnkɔɔ aasi ɓeesa abii nɛɛk dakɛɗaŋ, bɔdakɔɔŋɔŋk."

29Nyɛyɛɓa yɛrom sinɛɓa yɛroromk sisa, nɛɓa yoguku eek nɛɛkɛ a ɗeger kɛ bɔdukukɔ goriɗ nɛɛkɛŋ. 30Yogukuɓa Yeese sisa akɔ ŋaarki sɛɛne ɓaŋkawuka ebɔdɛtoŋk, nɛ kolɛɛnyɛ joopa sigaaga ɓɔɔkaak nɛ kɔɔniya kɛ, "Wooɗ sinɛ kume abii naakik?"

31Nɛɓa jumurargeeɗ nomtaanak gɛɛnɛ kɛ, "A dɛnin joop sigɛ ɓɔɔkaak a nomɛrne a diriiŋ, nɛ tonun kɛ 'Wooɗ sinɛ kume abii naakik?"'

32Yakanaɓa sɛŋk kolɛɛnyɛ kɛnɔ dɛnɛ iɗit sinɛkɔ ijaag any sinɛk. 33Ɗegerɓa jarti sinɛ any sinɛkɔ ijaaggiɗɛɛk, nɛ ɓuri a piiɗe nɛ kus ɗiiri sɛɛne taamɛkɛ nɛ tongeeɗ eekeer gɛɛŋk baŋɛ. 34Nɛɓa sɛŋk tongeeɗ kɛ, "Iin tɔɔn naak, ebɔdɛr kɔnu ŋaadiyɛ goonɛŋ. Ŋaari digoya. Bɔdu rakatɛɛ nookɛk."

35A inɓa Yeese toton any sini nɛ joop a omoŋ omoŋ sigɛɓa kurak woy Iyairoosuk, tonurgeeɗ kɛ, "Rɛrkɔ tɔn nookɛŋ. Ooɗun rɔɔriytan sisɔ agut jikon?"

36Yakanaɓa Yeese tiyɛ sini nɛ tonu ɔɗɔwenta sinaana gode tolɛɛɗoŋk Ayuuduk kɛ, "Kat ɓuriikin. Ma ŋaadi dakɛɗa."

37Kɛɛ iɗit sinɔɓa pɛgɛdgeeɗ Yeese kɛnɔ nomɛɗik Petrose a Yaykoobe a manya Yaykooba, Yowanise sɔgɔɔsɔyk. 38Saaɓa mɛlɛrɗi waa ɔɗɔwen sinɛ gode tolɛɛɗoŋkuk Ayuuduk, nɛɓa Yeese dɛnɛ joop gɛɛŋk a duriyer a wuɗaaŋ. 39Nɛɓa guuguny godeya takana nɛ tonu sɛɛga kɛ, "Duriyɛɛ a wuɗakɛɛ oko sinik agut jikon? Ɗeegar tɔn siniŋ, kikɔ rerin."

40Yakanaɓa joop gɛɛnɛ rɔgɛrɗiŋ. Ariɓa sɛɛg Yeese a ŋaarark walasa baŋɛ, nɛɓa boŋu ɛpɛn sinɛ tɔɔna nɛɛkaakik a ɛmɛs a nomtaanak gɛɛŋk nɛ guugunyar saana arkiɗ tɔn nɛɛkɛkik. 41Nɛɓa gaamu ari tɔɔn sinɛ peetik nɛ tongeeɗ kɛ, "Taltakum!", wooran nɛɛk sinɔ kɛ tonaana kɛ, "Iin tɔɔn sini peetik, ŋaar raŋanaak!" 42Tɔɔn sinɛ egeɓa emeyi gɛɛnɛ aarin a pɛɛy, nɛɓa ŋaar raŋana sisa nɛ tuke ŋawit gɔɔtaase kɛ gɔɔtaase. Saaɓa ɓɛɛlɛɛɗ oko sinik, nɛɓa joop gɛɛnɛ reemɗi ɓayɛtun gɛŋk jɛt. 43Nɛɓa Yeese tonu sɛɛga kɛnɔ kat lakɛ iɗit sinɔ ɗeger any sinik, nɛ tonu sɛɛga kɛ in gagiɗɛ any sinɔ ɗamŋɔŋk.

Currently Selected:

Markoos 5: KSTM

Highlight

Copy