Markoos 8
8
Wɔɔrɛ Yeese Joop Sigɔ Kumɛɛ Aŋank
(Maa. 15:32-39)
1Saaɓak tolɗiiɓa joop a ɓɔɔkaaŋ kɛkar, kɛɛɓa sɛɛge any sinɔ ɗamarŋɔŋk. Nɛɓa Yeese riyiri nomtaanak gɛɛŋk nɛ tonu sɛɛga kɛ, 2"Sanɗita joop sigi ɓɔɔkaaŋɔŋkuŋ agut sinɔ sɛɛgkɔ a eet agut omoŋ a ɗoŋ jiit, nɛ kɛɛ sɛɛge any sinɔ ɗamarŋɔŋk. 3Kaa ɗɛyɛ a ŋɔɗura sɛɛg nyakika gɛŋk ma latu ŋaawu oko sinikiŋ, kɛnɔ mokɔɔ bɔɔla gopɛ. Maakɔ sɛɛge ɔgɔɔk kurak a yowɛɛɗiŋ."
4Nɛɓa jumurargeeɗ nomtaanak gɛɛnɛ kɛ, "Anɛ wooɗ sinɛkɔɔ oolɛ a laŋi ɗama sinɔ gayɛ joopa sigeega paaton sineenek?"
5Nɛɓa Yeese kɔɔniy sɛɛg kɛ, "Ma latukari kiiwakɔ a eger?" Nɛɓa sɛɛk tonurgeeɗ kɛ, "Lakii kiiwakɔ a tula pɛɛy."
6Nɛɓa tonu joopa gɛɛna kɛnɔ dokurɗe ɗook. Nɛ gaamu kiiwakɔ sigɛ tula pɛɛyk, nɛ pɔɔsɛ Waakoyo, nɛ ŋapati, nɛ gaɓɛ nomtaanaka gɛɛna kɛnɔ gaɓɛr joopa gɛɛnak. Nɛɓa sɛɛk ijaagir oko sinɛkɔ sɛɛga toniiɗik. 7Latuɓa ɓɔrɛ sɛɛg oltiir sigɔ temetuŋɔŋk a tekerŋ, nɛɓa geeti oltiir gɛɛŋk, nɛ tonu nomtaanaka gɛɛna kɛnɔ in gaɓɛr joopa sigaaga ɓɔɔkaak. 8Nɛɓa ɗami baŋɛ nɛ ɓooɗorarŋ. Nɛɓa nomtaanak gɛɛnɛ tolɛr kootaayɔ sigɛɓa ŋayɗiikik a kantɛyɛ tula pɛɛy a enyaataŋ. 9Joop sigɛɓa ɗamiik kumɛɛɓa aŋan. Saaɓa ɗamiiɗik baŋiya, nɛɓa Yeese ŋɔɗur sɛɛgiŋ. 10Nɛɓa teeŋɛr Yeese a nomtaanak gɛɛŋk emɗa nɛ ŋaarar ɗooka Dalmanutaak.
Kɔɔniya Joop Paarisik Kɛnɔ Sɛɛga Ijaagɛ Sɔɔriyɛ
(Maa. 16:1-4)
11Kurakɓa joop Paarisik son lak Yeeseek nɛ tuker palamɛ a sɛɛn kɛnɔ paarir. Nɛɓa kɔɔniyar nɔ sɛɛga yaaŋɛ sɔɔriyɛ dari. 12Nɛɓa Yeese orku wɛɛŋa jɛt nɛ tonu sɛɛga kɛ, "Ɗɛyɛr joop eme sinik a sɛɛga yaaŋɛɛ sɔɔriyɛ agut jikon? Eekeer tona kɔnaaŋ, kɛɛkoy sɛɛga ijaagɛɛ sɔɔriyɛ." 13Nɛɓa ŋɔr sɛɛg, nɛ ŋaar emɗ ɗɛɛgasɔ.
Rɔɔriyɔn Joop Paarisik A Herodisik
(Maa. 16:5-12)
14Monɗiiɓa nomtaanak gɛɛnɛ a kir diilɛ kiiwu, maɓa latu kiiwu a omoŋ dakɛɗa, ma kɛɛ any sinɔɓa latuk emɗ takik ara. 15Nɛɓa sɛɛga tonu Yeese kɛ, "In koorɛɛ ɛɛk irsook joop Paarisik a Herodisik."
16Nɛɓa sɛɛk totoni ɛkanɛɛkɛ gɛŋk kɛ, "Kaɗɛɛŋ tonu tina oko sinik agut sinɔ tine kiiɗɛ kiiwuk."
17Nɛɓa Yeese ɗeger koɓiɗa gɛŋk nɛ tonu sɛɛga kɛ, "Ɓakɛyɗiikari agut sinɔ kɔne kiiɗɛ kiiwuk agut jikon? In kirkɔ koɓiiɗ ɛ in kɔna ki mɛlɛ? In ɓayɛtun goŋk atu kilarɔɔn? 18A latukari taamɛŋ nɛ kiir taant? A latukari weeniŋ nɛ kiir weent? A kirkɔ koɓiiɗ ɛk? 19Saakan ŋaparɗa kiiwakɔ sigɔ tuulk joopa sigɔɔga kumɛɛ tuulk, nɛkan tolɛɛr ŋaaytaanak gɛɛŋk a kantɛyɛ eger a enyaataŋ?" Nɛɓa sɛɛk jumurargeeɗ kɛ, "Kantɛyɛ aarin a pɛɛy a enyaataŋ."
20"Maɓɔrɛ kiiwakɔ sigɛkan tula pɛɛyk saakan ŋapatɗa joopa sigɔɔga kumɛɛ aŋank, tolɛɛrkan ŋaaytaanak gɛɛŋk a kantɛyɛ eger a enyaataŋ?"
Nɛɓa sɛɛk tonurgeeɗ kɛ, "Kantɛyɛ tula pɛɛy a enyaataŋ."
21Nɛɓa tonu sɛɛga kɛ, "Anɛ in kirkɔ koɓiiɗ?"
Ebɔdɛ Yeese Iɗit Sinɔ Motuk
22Saaɓa mɛlɛrɗi Beetɛsaydaakak, nɛɓa joop ɔgɔɔk ɗɔkarki iɗit om sinɔ motuk son lak Yeeseek. Nɛɓa kalɛyir kɛnɔ kumeeɗ. 23Nɛɓa sɛŋk gaamu ari iɗit sinɛ motuk nɛ puruute nɛ boŋiir mɛndɛre walasa. Nɛ topɛygeeɗ ɗeewa gɛɛŋk taamɛka, nɛ riiɓeeɗ ari nɛ kɔɔniy kɛ, "Tiilɗiikin sɛɛn sisɔŋ?"
24Nɛɓa iɗit sinɛ motuk ɓɔŋgɔɔrɛ ɛɛk nɛ tongeeɗ kɛ, "Ii, tiila joop a itota ŋawiiter kɛɛn."
25Nɛɓa Yeese riiɓe ari nɛɛk kɛkar ete sinaanɛ taamɛkɛ. Nɛɓa iɗit sinɛ dɛnɗi sisa, bɔdukuɓa a dɛnɛ ola baŋɛ kɛ ɗɔm. 26Ŋɔɗuruɓa Yeese nɛ ŋaar nyaka nɛɛka, ma tongeeɗ kɛ, "Kat kɛɛɗin mɛndɛra."
Ŋaadi Petros Kɛ Ege Yeese Keresee
(Maa. 16:13-20; Luk. 9:18-20)
27Kaarɓa Yeese a nomtaanak gɛɛŋk mɛndɛraka sigɔɔga atu Pilipoos Keesaariyaakek. Aɓa atu gopɛ tak nɛɓa kɔɔniy nomtaanak gɛɛŋk kɛ, "Riyarti joop kɛ Eetnɔ wooɗ?"
28Nɛɓa sɛɛk jumurargeeɗ kɛ, "Riyarni joop a omoŋ omoŋ kɛ Yowanis sinɛ A'aadiik, mani ɔgɔɔk riyar kɛ Eliyaas, ma ɓɔrɛ ɔgɔɔk riyarni kɛ joope pɛrkaakoŋk om."
29Nɛ kɔɔniy sɛɛg kɛ, "Ma iinak riyarti kɛ Eet nɔ wooɗ?"
Nɛɓa Petros jumurgeeɗ kɛ, "Iin Keresee."
30Nɛɓa Yeese rɔɔrɔk sɛɛga a ɓaŋkawuŋ kɛ, 'Kat lakɛ iɗit sinɔti tonurguɗɔɔk."
Tonu Yeese Rakatɛ A Rer Sinɛkɔɔ Laŋkik Tuki Nɛɛkɛk
(Maa. 16:21-28; Luk. 9:22-27)
31Tukeɓa Yeese rɔɔriyɔɔna nomtaanak gɛɛŋk kɛ Ɗɛyɛ Tɔɔna Etoŋk a laŋk rakatɛ sinɔ obiiŋɔŋk ɛ daraayɛɛ gutarɛyɛɛkɛ, a ɔɗɔweerɛ tapa ŋaadiyɛɛkoŋk, a rɔɔriytaanakɛ higi Muuseek, ɛkɔɔ ɓokotur nɛkɔɔ ŋaarki ret walsa ɗoŋikɛ sigɔɔgɛ jiitik baŋiyaaŋ. 32Saaɓa Yeese toniiɗ any sinik kɛ ɗɔmk, nɛɓa Petros puruute sɛɛn mowan nɛ ɓaarɗi sɛɛn kɛ, "Gunkɔ kin toniiɗ oko sinɛk." 33Nɛɓa Yeese kolɛɛnyɛ nomtaanaka gɛɛna nɛ mermen sɛɛg, nɛ lamɛ Petros kɛ, "Iin setan, widarte ɛɛk sɔ! Koɓun seŋk any etoŋk dakɛɗa, ma moko Waakoyotoŋk."
34Saadi baŋiya riyiriɓa Yeese joop sigɛ ɓɔɔkaak a nomtaanak gɛɛŋk, nɛ tonu sɛɛga kɛ, "Ɔkɔn lakɛ iɗit sinɔ ɗɛyɛ a nomɛ eeteekiŋ, in kaadɛ ɛɛk nɛɛk, nɔ ragad ɛɛk rakatɛya a reta, nɔ nomɛ eete. 35Iɗit sinɔ ɗɛyɛ a ebɔdɛ wɛɛŋa gɛɛŋkik, sɔɔkɛ sɛɛgiŋ. Mayakana iɗit sinɔ sɔɔkɛ wɛɛŋa gɛɛŋk agut Eet a Pɛɛni sinɔ Ɓɛlkɛɛstank, ebɔdɛ sɛɛgiŋ. 36Ɔkɔn laŋi iɗit any sinɛ ar ɗook raŋk baŋɛ, ma ɔkɔn sanɛ wɛɛŋa gɛɛŋkikŋ nɛ kɔnyageeɗ jikon? 37Maŋk oolɛ iɗit a koyu ɔɔtɛ wɛɛŋa gɛɛŋkik gati kɛ jikon? 38Iɗit sinɔ lak keeny eete a pɛɛnii naakɛkik, joope eme sinik sigeege kaadkaanak a tikitaanakik baŋɛk, lageeɗkoy ɓɔrɛ keeny Tɔn Etoŋk saakoy mɛlkiɗik eemɛyɔɔn Ɛpɛnaak a wosɛytaanak gɛɛŋk sigɔ geetitaanakik."
Currently Selected:
Markoos 8: KSTM
Highlight
Share
Copy
Want to have your highlights saved across all your devices? Sign up or sign in
