JENESI 28
28
1 Oku tabuaki e Aisake a Jekobe, bea fekau ia ki Betanalami. 6 Oku fakamau a Isoa moe ofefine o Isimeli. 10 Koe miji a Jekobe. 18 Koe maka i Beteli. 20 Koe fuakava a Jekobe.
1BEA ui e Aisake a Jekobe o ne tabuaki ia, o ne nainai kiate ia, mo ne behe ki ai, Oua naa ke fili ho unoho mei he gaahi ofefine o Kenani; 2Ka ke tuu o alu ki Betanalami, ki he fale o Betueli koe tamai a hoo fa‘e; bea ke fili hao unoho mei he gaahi ofefine o Lebani, koe tuogaane o hoo fa‘e. 3Bea ke tabuaki koe e he Otua Mafimafi, bea fakatubu mo fakatokolahi‘i koe; koeuhi ke ke hoko koe fuu kakai toko lahi. 4Bea ke tuku kiate koe ae tabuaki o Ebalahame, bea ki ho hako foki; koeuhi ke ke ma‘u ae fonua aia oku ke aunofo ki ai, aia nae foaki e he Otua kia Ebalahame. 5Bea nae fekau e Aisake a Jekobe ke ne alu: bea alu ia ki Betanalami kia Lebani, koe foha o Betueli koe tagata Silia, koe tuogaane o Lebeka, koe fa‘e a Jekobe mo Isoa.
6Bea i he mamata a Isoa kuo tabuaki e Aisake a Jekobe, o ne fekau ia ke alu ki Betanalami, ke fili moona ha unoho mei ai; bea mo ene tabuaki ia mo nainai kiate ia, o behe, Oua naa ke fili ha unoho mei he gaahi ofefine o Kenani: 7Bea mo ene talagofua a Jekobe ki he ene tamai mo ene fa‘e, bea kuo alu ia ki Betanalami; 8Bea i he mamata a Isoa oku ikai fiemalie ene tamai ko Aisake, i he gaahi ofefine o Kenani; 9Bea alu a Isoa kia Isimeli, o ne fakatokolahi aki ae gaahi unoho naa ne ma‘u a Mehalate, koe ofefine o Isimeli, koe foha o Ebalahame, koe tuofefine o Nebeoti, ke unoho moia.
10Bea alu atu a Jekobe mei Beasiba, mo ne fonoga ki Halani. 11Bea hoko ia ki he botu e taha, bea ne nofo ai i he bo koia, he kuo to ae laa; bea ne too ae gaahi maka oe botu koia, ke ne oluga aki, bea naa ne tokoto i he botu koia, o mohe. 12Bea miji ia, bea vakai, kuo fokotuu ha tuuga ki he fuga kelekele, bea tau hake hono botu ki he lagi, bea vakai, nae fealuaki hake mo hifo i ai ae kau agelo ae Otua. 13Bea vakai, nae afio a Jihova mei oluga i ai, bea behe eia, Ko au ko Jihova, koe Otua o Ebalahame ko hoo tamai, bea koe Otua o Aisake: koe fonua oku ke tokoto ai, teu foaki ia kiate koe, mo ho hako. 14Bea e tatau ho hako moe efu oe kelekele, bea te ke mafola koe ki he luluga moe hahake, bea ki he tokelau moe toga: bea e monuia iate koe mo ho hako, ae gaahi faahiga kotoabe o mamani. 15Bea vakai, oku ou iate koe, bea teu tauhi koe i hoo fonoga kotoabe, bea teu toe omi koe ki he fonua ni: koeuhi e ikai teu jiaki koe, ka teu fai aia kuou lea ai kiate koe.
16Bea a hake a Jekobe mei he ene mohe, bea behe eia, Koe mooni oku i heni a Jihova; bea nae ikai teu ilo ia. 17Bea nae manavahe ia, o ne behe, Oku fakamanavahe ae botu ni! oku ikai ko ha botu kehe eni, ka koe fale oe Otua, bea ko eni ae mataba oe lagi. 18Bea tuu hegihegi hake be a Jekobe, bea ne too mai ae maka naa ne oluga aki, bea ne to ia koe bou, bea liligi eia ae lolo ki ai. 19Bea ne ui ae higoa oe botu koia ko Beteli: ka ko hono higoa i mu‘a oe kolo koia ko Lusa. 20Bea fai ai e Jekobe ae fuakava, o behe, Kabau e iate au ae Otua, bea ne tauhi au i he hala ni oku ou alu ai, bea ne foaki kiate au a eku meakai, moe gaahi kofu keu ai, 21Koeuhi keu toe hoko ki he fale o eku tamai i he fiemalie, behe, teu Otua aki a Jihova; 22Bea koe maka ni, aia kuou to koe bou, e hoko ia koe fale oe Otua; bea i he mea kotoabe te ke tuku mai kiate au, teu atu mooni hono vahe hogofulu kiate koe.
Currently Selected:
JENESI 28: TWB
Highlight
Share
Copy
Want to have your highlights saved across all your devices? Sign up or sign in
