ማቲወስት ወንጌል 11

ፈወነ 11

ጣምቀተ ይዃንስ እየሱስ ትጐ በርሰው ዋቕረ

(ሉቃ. 7፡18-35)

1እየሱስም ፅጭ ሊጘ ክንደጢዝ እኒን ቃውትድ ይው ኻተት ግረ ጘጝ ስፍረድ በር ጝጣቂል ችጝሸቍ ኻትምጢል ሲቭክጠ፣ ክንስጠም ፊሩ።

2ይዃንስም ወኽኒ ጝንል ፅባ ክርስቶስ ሰራሸው ሰቭድ ወሻንስቅ ጝክንደጢስ ሊጘድ ጝጐ እፃቕ 3«ተርጡ ይሽትር ሊሚድሽረርድ ክትመ? ዊንስ ላየ ሊሚድነ?» የው ዋቕሩ። 4እየሱስም፦ «ፊትርን ቓልድርነዊዝመ ወሽርነዊዝ እጝቅትቅ ይዃንስስ ድቍጥን። 5እንወ ኻርብድ ቓልጘኵ፤ ኻካዛንድ ተግርጘኵ፤ ለምፃማንድ ቓድጘኵ፤ ዲጝቋራንድ ወሽጘኵ፤ ክረቍድ ጕጘኵ፤ ድኺዝም ወንጌል ሲቭክሸኵ።#እሳ. 35፡5-6፤ 61፡1። 6ይቍዝ ፅጋራው እጅር ቀቫሸው የጝ» ዩ።

7ይዃንስቲስ እፃሸቍድ ፊርጘት ግረ እየሱስ ኽዝቪዝ ይዃንስት ማጥን እንት ያ ዊግትጠ ኪርሙ፦ «ወረጘ ቓልትርነ በራኸይል ፍርኑ? ፊግየዝ ዊዝውሽተው ኣቲነ ቓልትርነመ? 8ዊንስ ወረጘ ቓልትርነ ፍርኑ? ሸግጥ ኣልብ ሲረው እጅር ቓልትርነመ? ሸግጥ ኣልብ ሲረቍ እቅመ ንጕሳነ ጝንጢል እኵ። 9እደስለ ወረጘ ቓልትርነ ፍርኑ? ነቭይ ቓልትርነመ? የይ! ነቭዪስም ዲቈውድየንት ቓልትርነ የጝ የኵን።

10‹እንወ ክበው በዊል ፃጛ ክጒደነድየንት ኣስለው

ይእፃሸረድ ክበዊል እፃጭር›

ይሽት ፃፍሽተውድ ጝማጥን የጝ።#ምል. 3፡1። 11እማንዝ የኵን፤ እቍኒስ እዅርሸቊዝ ማኽሊስ ጣምቀተ ይዃንስት ዲቈው ጕየውም፤ ምጝግስተሰማያትስ ግን እጝቂስቅ እጥንድ ጝጊስ ዲቍጡ። 12ጣምቀተ ይዃንስት ዚምኒስ ኪርም ነኳን ኣሽ ምጝግስተሰማያት ጭቕጘ ፈራቐች፤ በርታቐቍ እቅም ጝርግል ጥውጥቍ። 13ነቭያታኒዝመ ሙሴት ኽጊዝ እጝቅቅ ይዃንስትል ኣሽ ትንቪት ዊግትጝኵ።#ሉቃ. 16፡16። 14ነስየ ለምርትርነ በንርነውዝየ፦ ‹ተርጡ› ይሽተው ይልያስድ እኒን ይዃንስ የጝ።#ምል. 4፡5፤ ማቲ. 17፡10-13፤ ማር. 9፡11-13። 15ወሸው ቀርዝ ፃየውድቅ ወሽነ።

16እን ዅለድ ወረጘዝ ተክዝጭር? ኣሪ ስፍረይል ጐይጝ ጝታፃምጥድዛት ጭጝጛ

17‹ኣቲነ ዋስኑን፤

ክትን ግን ዚቪርነቅም፤

ሊዝም ሊስኑን፤

ክትን ግን ሊዚርነቅም›

የቍ እፈርድዛት ተክጘኵ። 18ይዃንስ ዂጝቀ ዝዪጝቀ ተራን፦ ‹እን እጅርድ ጋኒንዝ ፃይሸው የጝ› ይጘኵ። 19እጅር ዅር ቈሽ ዃ ዝያ ተራን፦ ‹እንስ ዀይረ፣ ዝየተ፣ ቀረጥ ቀቨቊዝመ ኽጥያትኝጢዝ ወደጅ የጝ› ይጘኵ። ጥቨቭት ትክክልነይድ ግን ጝርሰቪዝ ኣርቕሽትች።»

ንስኻ ጥዊየቍ ኻትምጢል ተረው ፍርድድ

(ሉቃ. 10፡13-15)

20ኣይንድ እየሱስ ንቕፀቍ ታምራን ፃቨቍ ኻጥምጥድዛይ ንስኻ ጥዊየቍ ኣጙዝ እንት ያ ዊቅስጠ ኪርሙ፦ 21«ኰራዚስ ወየው! በተሰይደስ ወየው! ክታግል ፃቭሽተቍ ታምራንድ ጢረውስስመ ሲዱነስ ፃቭሽትጝ ዊንጛን፣ ጛይ ኻትምጢዝ እቅድ ግምር ሲርጝ ፃብረልም ጐይጝ ገነ በውገ ንስኻ ጥውጥጘ ዊን።#እሳ. 23፡1-18፤ ኽዝ. 26፡1—28፡26፤ እዩ. 3፡4-8፤ ኣመፅ. 1፡9-10፤ ዘካ. 9፡2-4። 22እንዝ ማጥን ፍርድዝ ኰር ክታግል ችጘው ቕፃሪስ ሽ ሰደውምስመ ጐመረስትል ችጘው ቕፃርድ ቀልጡ የኵን። 23እፈ ቅፍርናዀም! ክትምመ ሲመይ ኣሽ ንየስ ንየስ ይሩ? ሲወል ኣሽ ጊምትር፤ ክግል ፃቭሸውቍ ታምራንድ ሰደውምስ ፃቭሽትጝ ዊንጛን ሰደውም ነኳን ኣሽ ድዚጝቀ ዊንተ ዊንች።#እሳ. 14፡13-15፤ ዘፍ. 19፡24-28። 24እንዝ ማጥን ፍርድዝ ኰር ክግል ችጘው ቕፃሪስ ሽ ሰደውምትል ችጘው ቕፃርድ ቀልጡ የኵን።»#ማቲ. 10፡15፤ ሉቃ. 10፡12።

ክርስቶስትውዝ ችጝሸው ፈውጘ

(ሉቃ. 10፡21-22)

25እየሱስም ኣይንድ፦ «ሲመይሰመ ዝቨዝ ኣደረ ኣረር ኣየወ! እኒንት ጥቨቭኝጢስ፣ ኣርቐቲስም ሲውርድር ኣርቓቊዝ ጋልፅራንስቅ ሚዝየንዘኵን። 26የይ፤ ኣየወ! እኒንት ፃቭተ ክቀሰው ፍቃድድ ኣቕኩ። 27ይር እጝቅትቅ ይጭስ ነይኩ፤ ኣይር ኣየውዝየ ዅር ኣው ኣቐጘ ኣርቐው ኣውማውም እጀው። እኒዝጘም ዅር ኣየውዝየ ዅርም ጝጭስ ጋልፅጠ በነውድ ኣየውዝየ ኣይርት ኣርቐው ኣውማውም እጀው።#ይዃ. 3፡35፤ 1፡18፤ 10፡5።

28እፈ ዝላቕርነቅ፣ ፅጐወው መውርዝም ፅጐውሽርነቅ እጝቅ ክታትርነ! ይጐ ላቝጥን፤ ያንም ክታት ፈውስጭር። 29ይሚዝቭድ ክታዲጊል መውጥን፤ ይጊስም ክንድጥን፤ ያን ገርኽ የጝ፤ ይእዘንድም ትዅት የጝ፤ ክታኒፍሲዝም ፈውጘ ችጝትርንቅ።#የር. 6፡16። 30ይሚዝቭድ ፅጐዋው፣ ይመውርድም ቀለው የጝ» ዩ።

Currently Selected:

ማቲወስት ወንጌል 11: ኽምጣኣኪ

Highlight

Copy