YOHANES 12

I Yesus nil᷊anisang su Betania

(Mat. 26:6-13; Mrk. 14:3-9)

1Nungu l᷊ou suhoro u L᷊ou ngu Paska, I Yesus nakoa sarang Betania. Su tampa e'e natana i Lazarus ko seng nipuwangung-E bou papate. 2Pai se'e I Yesus nihaghesang i sire, dang i Marta nusiliwiri. I Lazarus l᷊au manga sake nukumangiang dingang I Yesus. 3#Luk. 7:37-38Bou e'e i Maria namai dingang u l᷊anisi narwastu ko mal᷊ighari kahingang patehang manga stenga literi. I sie naniwohi u l᷊anisi e'e su l᷊aeri Yesus, bou e'e nimue dingang u utae. Kaul᷊i u wal᷊e e'e nawungi ngu l᷊anisi e'e. 4Arawe i Yudas Iskariot, singkatau bou tumatuhu I Yesus – ko samuringe nusingking si Sie – nangul᷊i, 5“Hakiwe l᷊anisi e'e ta niwal᷊u dingang u harigange tiluhasu doi sal᷊aka,#12:5: doi sal᷊aka: Putuhung 6:7. dang doinge nionggo su tau ko susa?” 6I Yudas nangul᷊i kere'e wal᷊inge ual᷊ing i sie mutinaung tau ko susa, kateho ual᷊ing i sie e'e ko tahatako. Masau i sie mangal᷊a doi bou kasi u doi u taumata maul᷊i ko karareso si sie.

7Kateho I Yesus nangul᷊i, “Walate tau kowawine e'e! I sie nukoa i'i guna ngu l᷊ou pul᷊al᷊uwingang-Ku. 8#Sau. 15:11Tau ko susa sintinia mang dingang i kumu, arawe Ia ta.”

Komol᷊ang u taumata ko mundoka si Lazarus

9Maul᷊i tau Yahudi nakaringihi uare I Yesus seng pai su Betania, inau i sire natamai nakoa sarang e'e. I sire natamai wal᷊inge kitang ual᷊ing I Yesus, kateho l᷊ai ual᷊ing i sire mo makawua si Lazarus ko seng nipuwangung-E bou papate. 10E'e sabapie manga tumbonang u imam mo l᷊ai mamate si Lazarus; 11Watu i sie sarang nakakoa maul᷊i tau Yahudi nanintang i sire dang nangimang si Yesus.

I Yesus nusumu su Yerusalem dingang u kal᷊auntung

(Mat. 21:1-11; Mrk. 11:1-11; Luk. 19:28-40)

12Ndai mal᷊ou taumata maul᷊i ko seng nasongo mamantughi l᷊ou ngu Paska nakaringihi uare I Yesus seng simai kapundol᷊onge Yerusalem. 13#Mzm. 118:26Kuteu i sire nangal᷊a manga raung patuku bou e'e natamai manginsomahi si Sie, apiru kapuhul᷊iaghi, “Dalo su Mawu Ruata! Al᷊amatie I Sie, ko nusumongo su l᷊al᷊ung u areng u Mawu. Al᷊amati su Ratu ngu Israel!”

14I Yesus nakarea keledai paranggang simbau, dang nisakenange. Kuteu naganapi apang ko mawawohe su l᷊al᷊ung u Buki Susi:

15 # Za. 9:9 “Kumbahang mataku, mahua ngu Sion!

Putuhungte Ratu'u seng nusumongo,

sake-sake su keledai paranggang simbau!”

16Su tempo e'e manga tumatuhu I Yesus mborong ta nakahingang kaul᷊i u e'e. Kateho suapang I Yesus nipakawantughi su l᷊al᷊ung u kapapate-E, wuhue we i sire nakatinaung himoneu ko nikoa u manga taumata si Sie mang seng kawawohe su l᷊al᷊ung u Buki Susi bou hal᷊i I Sie.

17Apang taumata ko ene su tempo ngi Yesus nukui si Lazarus pasuwang bou kubul᷊i dang nupuwangung i sie bou papate, turusi nangonggo u kasaksiang u hal᷊i e'e. 18E'e sabapie taumata maul᷊i e'e natamai sarang koa I Yesus watu'u i sire nakaringihi himoneu ko I Sie nukoa ko makal᷊aherang e'e. 19Kuteu manga taumata ngu Farisi nangul᷊i simbau dingang ko wal᷊inge, “I kite seng ta makakoa manga apa! Tuhungete, kaul᷊i u dunia tamai nutumuhu si Sie!”

Taumata ngu Yunani pirangkatau mundea si Yesus

20Su tal᷊oara u manga taumata ko natamai mukal᷊iomaneng Sarang Yerusalem su tempo ngu sal᷊iwang e'e, pia l᷊ai pirangkatau taumata ngu Yunani. 21I sire nusumongo sarang koa i Filipus dang nangul᷊i, “Anu, kere wotonge i kami mo musombang I Yesus.” (i Filipus asal᷊ie bou Betsaida su Galilea.)

22Kuteu i Filipus natamai nupakatitong u hal᷊i e'e si Andreas, dang bou e'e i sire rua numbawa habari e'e sarang koa I Yesus. 23I Yesus nangul᷊i si sire, “Seng temponge Ahusi Taumata ipakawantughi. 24Mang tingari didato-Ku i'i: boko gandung simbau ta isuang su tana dang mate, i sie mang matatana simbau. Arawe boko gandung e'e mate, wuhue i sie muwua maul᷊i. 25#Mat. 10:39, 16:25; Mrk. 8:35; Luk. 9:24, 17:33Taumata ko kumindaghi puwawiahie sarung kailangeng puwawiahie. Arawe taumata ko mubinsi ngu puwawiahie su dunia i'i, sarung mupal᷊ihara e'e guna ngu puwawiahie ko kahingang l᷊au ko kakal. 26Taumata ko mo mutal᷊ung si Sia mambeng tumuhu si Sia: tadeau mutatal᷊ung-Ku mang dingang-Ku su apang tampa-Ku. Taumata ko mutatal᷊ung si Sia sarung iadateng I Yamang-Ku.”

I Yesus nuhabari papate-Nge

27“Naung-Ku maghawang, apa ko hinonge Daku iul᷊i su orasi i'i? Apa Ia mambeng mangul᷊i, ‘Yamang, pakal᷊iu ko Ia bou tempo i'i’? Kateho ual᷊ingu singsara ko Daku l᷊al᷊engang i'i Ia sumongo. 28Yamang, pakawantughi ko areng-U!” Kuteu singkararingihi pia tingihi bou l᷊angi nangul᷊i, “Ia seng mupakawantughi si Sie, dang Ia sarung sau mupakawantughi si Sie.”

29Taumata ko maul᷊i ko ene su se'e, nakaringihi tingihi e'e. I sire nangul᷊i, “E'e ko l᷊ul᷊u!” Arawe singga l᷊ai nangul᷊i, “Wal᷊inge! E'e ko tingihi malaikati kapudidatonge si Sie!”

30Bou e'e I Yesus nangul᷊i si sire, “Tingihi e'e nikaringihi, wal᷊inge guna ngu Ia kateho ko guna ngi kumu. 31I'i seng temponge dunia ihukung; manga mangangawasa ngu dunia seng nipakawata. 32Arawe Ia i'i, boko Ia seng ipakarange su wawo u dunia, Ia sarung mangomol᷊i kaul᷊i u taumata sarang koa-Ku.” 33I Sie nangul᷊i kere'e tadeau mupakal᷊ahe u kirapa kakakoae I Sie sarung mate.

34 # Mzm. 110:4; Yes. 9:6; Yeh. 37:25; Dan. 7:14 Taumata maul᷊i e'e nangul᷊i si Sie, “Tumuhu Buki u Torati kami, Ratu Mananal᷊amati sarung muwiahi sarang kal᷊iwuenge. Kirapa i kau makadidato ngu uare Ahusi Taumata mambeng ipakarange su wawo u dunia? I sai Ahusi Taumata e'e?”

35I Yesus nusimimbahi, “Kate singkodo temponge kasasua e'e ene su tal᷊oara i kumu. Inau; l᷊al᷊engte pariwe mborong pia kasasua, tadeau i kumu ta ikariking u kararundung. Taumata ko l᷊umal᷊eng su l᷊al᷊ung u kararundung ta makahingang minsang sarang apa i sie matamai. 36Pangimangte su kasasua e'e, pariwe kasasua e'e mborong ene si kumu, tadeau i kumu makoa manga ana u kasasua.”

Manga taumata ngu Yahudi ta mangimang

Suapang I Yesus mbuae nangul᷊i kere'e, I Sie nul᷊umal᷊eng bou pai e'e dang mandiri mutingkaandaghi watangeng-E si sire. 37Maning seng maul᷊i ko makal᷊aherang ko nikoa I Yesus su tingo ngi sire, i sire mang ta mangimang si Sie. 38#Yes. 53:1Kuteu naganapi apang ko niul᷊i u nabi Yesaya,

“Mawu ko i sai mangimang su habari kami?

Si sai kawasa ngu Mawu iandaghi?”

39E'e sabapie i sire ta mangimang, watu'u i Yesaya seng mbuae nangul᷊i l᷊ai,

“Mawu Ruata nangul᷊i,

40 # Yes. 6:10 ‘Ia mupakawuta ngu mata ngi sire,

mupakakitihi naung i sire;

tadeau mata ngi sire kumbahang makawua

sipirang i sire kumbahang makahingang.

Tadeau i sire kumbahang musul᷊e sarang koa-Ku, bou e'e Ia mupakaul᷊e ngi sire.’ ”

41I Yesaya nangul᷊i kere'e watu'u i sie seng nakawua kawawantughi Yesus, dang nuhabari hal᷊i I Sie.

42Maneng kere'e, maul᷊i taumata, nangilembo l᷊ai su tal᷊oara i sire mangangawasa ngu Yahudi nangimang si Yesus. Kateho i sire ta wahani mangaku ngu e'e su tingo, watu'u i sire mataku kumbahang sarang i sire tau Farisi ta mupakahumbang i sire sumu su wal᷊e pukakal᷊iomanengang. 43I sire lebe l᷊umiaghi idalo ngu taumata sul᷊ung u ihariga ngu Mawu Ruata.

Wisara ngi Yesus sarung mupunsal᷊a

44Bou e'e I Yesus nuwisara mauha, “Taumata ko mangimang si Sia, wal᷊inge I Sie mangimang si Sia, kateho si Sie ko nundoi u Ia. 45Dang taumata ko nakawua si Sia, e'e ko nakawua si Sie ko nundoi u Ia. 46Ia nusumongo su dunia i'i kere kasasua, tadeau kaul᷊i u apang taumata ko mangimang si Sia ta matana su l᷊al᷊ung u kararundung. 47Taumata ko mundaringihi tintiro-Ku, kateho ta tuhukang – wal᷊inge Ia mupunsal᷊a ngi sie. Watu'u Ia nusumongo wal᷊ingewe tadeau mupunsal᷊a ngu dunia i'i, kateho tadeau mupakasal᷊amati dunia. 48Taumata ko manolaki Ia dang ta mundaringihi tingihi-Ku, seng pia ko mupunsal᷊ang i sie. Wisara ko seng Daku nihabari, ko e'e sarung mupunsal᷊a ngi sie su L᷊ou Kiamati. 49Watu'u Ia ta mudidato bou kao-Ku sisane; I Yamang ko nundoi u Ia, ko I Sie nuparenta si Sia puhabari apang ko hinonge Daku iul᷊i l᷊au ko Daku ihabari. 50Dang Ia matitong himoneu parenta-E e'e ko mangonggo u puwawiahi ko kahingang l᷊au ko kakal. Kuteu Ia muhabari kere ko nitintiro ngi Yamang si Sia.”

Currently Selected:

YOHANES 12: PLT

Highlight

Copy