YOHANES 16

1Kaul᷊ie e'e Daku ipakatitong si kumu tadeau i kumu kumbahang musunial᷊i. 2I kumu sarung ipasuwang bou manga wal᷊e pukakal᷊iomanengang. Dang sarung sumongo temponge taumata ko mamate si kumu sarung manika i sie mutahamawu su Mawu Ruata. 3E'e koateng i sire si kumu watu'u i sire mborong wugha ngi Yamang dingang-Ku. 4Arawe orasi i'i e'e Daku ihabari si kumu, tadeau boko e'e sarung mariadi, i kumu makatinaung himoneu Ia seng mbuae nuhabari e'e si kumu.”

Pul᷊ahal᷊i u Roh u Mawu Ruata

“Hal᷊i i'i ta Daku ipakatitong si kumu mborong bou titae, watu'u Ia mborong mahundingang i kumu. 5Arawe orasi i'i Ia sarung matamai makoa sarang koa I Sie ko nundoi u Ia, dang takoae sarang singkatau bou i kumu mukina Ia makoa sarang apa. 6Katewe orasi i'i naung i kumu sarung masusa, watu'u Ia nangul᷊i hal᷊i e'e si kumu. 7Arawe Ia muhabari ko nuhino si kumu: seng kapiange si kumu, boko Ia matamai; watu'u boko Ia ta matamai, Mutatul᷊ung e'e sarung ta sumongo sarang koa i kumu. Arawe boko Ia matamai, Ia sarung mundoi I Sie sarang koa i kumu. 8Boko I Sie masongo, I Sie sarung mupakal᷊ahe su dunia mangal᷊eng u dosa, bou hal᷊i ko mutatahino, dang bou hal᷊i u hukumang u Mawu Ruata. 9I Sie sarung mul᷊ahe, himoneu ko ta mangimang si Sia e'e ko dosa; 10himoneu Ia nuhino, watu'u Ia makoa sarang koa I Yamang dang i kumu seng ta sarung makawua si Sia sau; 11dang himoneu Mawu Ruata seng manita muhukung, watu'u mangangawasa ngu dunia i'i seng nihukung.

12Maul᷊i l᷊ai ko hino ngu Daku ihabari si kumu, kateho su orasi i'i i kumu mborong ta makatarima. 13Arawe boko Roh e'e sumongo, I Sie ko mul᷊ahe u kabanarang u hal᷊i u Mawu Ruata, I Sie sarung mangaha si kumu tadeau makatitong u kaul᷊i u kabanarang. I Sie ta sarung mudidato bou watangeng-E sisane, kateho muhabari apang ko seng mbuae nikaringihi-E, dang I Sie sarung muhabari si kumu apang ko sarung mariadi su l᷊ou samuringe. 14I Sie sarung mupakawantughi u Ia, watu'u apang ko nihabari-E si kumu, nitarima-E bou Ia. 15Kaul᷊ie apang ko ene si Yamang e'e ko koa-Ku. E'e sabapie Ia mangul᷊i si kumu himoneu apang ko ihabari Roh si kumu, e'e nitarima-E bou Ia.”

Kasasusa l᷊au l᷊al᷊iaghi

16“Seng kate singkodo l᷊ai temponge i kumu seng ta sarung makawua si Sia, dang l᷊ai kate singkodo temponge i kumu sarung sau makawua si Sia.”

17Pira ngkatau manga tumatuhu I Yesus nanita nukakina singkatau dingang ko wal᷊inge, “Ko apa pandunge I Sie nangul᷊i si kite: ‘Kate singkodo tempo l᷊ai i kumu seng sarung ta makawua l᷊ai si Sia, dang l᷊ai kate singkodo tempo i kumu sarung makawua si Sia?’ Apa l᷊ai mangal᷊enge didato-E: ‘Ia makoa sarang koa I Yamang’?” 18I sire mukina turusi, “Ko apa mangal᷊enge, kate ‘singkodo’ tempo? I kite ta nakahingang I Sie kapudidatonge hal᷊i u apa!”

19I Yesus matitong i sire mo makina si Sie. Inau I Sie nangul᷊i, “Kanini Ia nangul᷊i, ‘Kate singkodo tempo, i kumu ta makawua si Sia, dang l᷊ai kate singkodo tempo i kumu sarung makawua si Sia.’ Ko e'e purarendehi kumu?

20Pangimangte; i kumu sarung sumangi dang mukahuang; kateho dunia sarung l᷊umighi. Naung i kumu sarung masusa kateho susa ngu naungu e'e sarung muwal᷊u makoa kal᷊al᷊uasi. 21Boko singkatau kowawine seng masandighi temponge mahinding, pundang mabuha, watu'u seng temponge i sie mutatahang. Arawe suapang anae e'e mal᷊iu, kowawine e'e seng ta makatinaung turue watu'u l᷊iaghi singkatau dario ko dio nusumongo su dunia. 22Kere'e l᷊ai dingang i kumu: orasi i'i naung i kumu masusa, arawe Ia mang sarung sau musombang i kumu, kuteu i kumu sarung mal᷊uasi; dang takoae sarang singkatau ko makapangal᷊a kal᷊al᷊uasi e'e bou naung i kumu.

23Su l᷊ou e'e, i kumu seng mangiro l᷊ai mukina manga apa si Sia. Pangimangte: Apa ko ipundokang i kumu si Yamang su l᷊al᷊ung u areng-Ku; e'e sarung ionggo I Yamang si kumu.#16:23: Apa ko ipundokang i kumu si Yamang su l᷊al᷊ung u areng-Ku; e'e sarung i onggo I Yamang si kumu: pira mbau wohe horo: Boko i kumu mundo manga apa si Yamang, I Sie sarung mangonggo u e'e si kumu su areng-Ku. 24Sarang orasi i'i i kumu mborong ta nundo manga apa su l᷊al᷊ung u areng-Ku. Pundote, kuteu i kumu sarung manarima tadeau l᷊al᷊uasi kumu masuku.”

Kal᷊auntung su dunia

25“Kaul᷊ie i'i Daku ihabari si kumu su l᷊al᷊ung u papinintu. Arawe sarung pia temponge, Ia seng ta mupake u l᷊ai papinintu, kateho seng mangul᷊i mal᷊ahe si kumu bou hal᷊i I Yamang. 26Su tempo e'e i kumu sarung mundo si Yamang su l᷊al᷊ung u areng-Ku: Katitongte, Ia ta sarung mundo bo I Yamang guna ngi kumu, 27watu'u I Yamang sisane kumindaghi i kumu. I Sie kumindaghi i kumu watu'u i kumu kumindaghi u Ia, dang mangimang himoneu Ia nusumongo bou Mawu Ruata. 28Tingari asal᷊i-Ku bo I Yamang, dang seng nusumongo su l᷊al᷊ung u dunia. Arawe orasi i'i Ia manintang u dunia sau musul᷊e sarang koa I Yamang.”

29Bou e'e manga tumatuhu I Yesus nangul᷊i si Sie, “I'i Mawu seng nangul᷊i mal᷊ahe dang seng ta nupake u papinintu, 30dang i kami matitong himoneu Mawu matitong u kaul᷊ie. Seng ta wahal᷊uasu singkatau mukina u manga apa su Mawu. Watu'u e'e i kami mangimang Mawu nusumongo bou Mawu Ruata.”

31I Yesus nusumimbahi si sire, “Kuteu i kumu seng mangimang su orasi i'i? 32Tinaungete! Temponge sarung musumongo, dang mang seng nasongo i kumu sarung ipukaesi. I kumu sarung mapul᷊e sarang wal᷊e ngi kumu singkatau-singkatau dang manintang u Ia sisane-Ku. Kateho Ia wal᷊inge sisane-Ku watu'u I Yamang mahundingang u Ia. 33Kaul᷊ie i'i Daku ihabari tadeau i kumu makahombang purarame watu'u nasimbau dingang-Ku. Su dunia i kumu sarung mutatahang u singsara. Kateho pakatatapi naung i kumu! Ia seng nakawata dunia!”

Currently Selected:

YOHANES 16: PLT

Highlight

Copy