YOHANES 18
18
I Yesus nisame
(Mat. 26:47-56; Mrk. 14:43-50; Luk. 22:47-53)
1Suapang I Yesus mbuae nukal᷊iomaneng kere'e, I Sie dingang u manga tumatuhue nakoa sarang simbuka ngu sal᷊uhi Kidron. Pai se'e pia simbau taman, dang I Yesus dingang u tumatuhu-E nusumu su l᷊al᷊ung u taman e'e. 2I Yudas taumata tahapusingking e'e, matitong u tampa e'e; watu'u I Yesus seng masau mukomol᷊i se'e dingang u manga tumatuhu-E. 3Kuteu i Yudas natamai nakoa sarang tampa e'e dingang numbawa sordado ngu Romawi singkomol᷊ang dang pirangkatau mundadiaga Wal᷊e ngu Mawu ko niroi u manga tumbonang u imam dingang u manga tau Farisi. I sire nahia u aghiri, sol᷊o dang obori. 4I Yesus seng matitong u kaul᷊i u ko sarung mariadi su watangeng-E. Inau I Sie nusumandighi manga taumata e'e dingang nukina, “I sai reakeng i kumu?”
5Nisimbahi sire, “I Yesus tau Nazaret.”
Angkung I Yesus, “Ko Ia I Sie.”
I Yudas ko tahapusingking kararisi su se'e dingang i sire. 6Su tempo I Yesus mbuae nangul᷊i si sire, “Ko Ia I Sie,” i sire kaul᷊ie nusumoho bou e'e nawanting su tana. 7I Yesus sau nukina paghisa si sire, “Ko i sai kahireakeng i kumu?”
Sasimbahi sire, “I Yesus tau Nazaret.”
8Angkung I Yesus, “Ia seng mbuae nuhabari si kumu ko Ia I Sie. Dang boko mang Ia reakeng i kumu, walate i sire ko wal᷊inge i'i patamai.” 9(Dingang u mbuae nangul᷊i kere'e, naganapi apang ko su horoe seng mbuae niul᷊i I Yesus: “Yamang, bou manga taumata ko seng nisarakang I Yamang si Sia, takoae sarang manga singkatau ko nailang.”)
10I Simon Petrus ko pia pera mawawawa, nanawu perange bou e'e namili l᷊ang u imam ko mawantughi sarang tul᷊inge kuaneng nasahing. Areng u l᷊ang e'e i Malkus. 11#Mat. 26:39; Mrk. 14:36; Luk. 22:42Kuteu I Yesus nangul᷊i si Petrus, “Tahoe sau perangu su l᷊al᷊ung u homange! Apa su sipirangu Ia ta sarung manginung wohosi u singsara ko nionggo I Yamang si Sia?”
I Yesus niwawa nupasaruang i Hanas
12Bou e'e manga Sordado ngu Romawi dingang u komandang i sire dang apang mundadiaga u tau Yahudi naname dang nuhapusi si Yesus. 13Horoe I Yesus niwawa i sire nupasaruang i Hanas, i empo ngi Kayafas. I Kayafas e'e ko imam ko mawantughi su taung e'e. 14#Yoh. 11:49-50Dang i sie seng mbuae nangonggo u sasasa su manga mangangawasa ngu tau Yahudi mapiang singkatau mate guna ngu kaul᷊i u kawanua.
I Petrus nusunial᷊i I Yesus
(Mat. 26:69-70; Mrk. 14:66-68; Luk. 22:55-57)
15I Simon Petrus dingang u singkatau tumatuhu-E ko wal᷊inge nutumuhu si Yesus. Imam ko l᷊abo matitong u tumatuhu ko wal᷊inge i'i; inau i sie tumuhu nusumu dingang I Yesus sarang lilahi u wal᷊e ngu imam ko l᷊abo, 16Arawe i Petrus nangampal᷊i su l᷊ikuri su mohong u tukari. Bou e'e tumatuhue ko wal᷊inge e'e nusumuwang sarang l᷊ikuri dang nudidato dingang u l᷊ang kowawine mundiaga tukari bou e'e numbawa si Petrus nusumu sarang l᷊al᷊unge. 17L᷊ang kowawine mudadiaga tukari e'e nangul᷊i si Petrus, “Ei wal᷊ingewe i kau l᷊ai simbau tumatuhu taumata e'e?”
“Wal᷊inge,” angkung i Petrus.
18Su tempo e'e natarang dunia matinoung, inau manga l᷊ang dingang u mundadiaga nundaki putung nundarang su se'e. I Petrus natamai l᷊ai nurumarisi nundarang dingang i sire.
I Yesus nipakinateng imam ko l᷊abo
(Mat. 26:59-66; Mrk. 14:55-64; Luk. 22:66-71)
19Imam ko l᷊abo nukina si Yesus hal᷊i u manga tumatuhu-E dang hal᷊i u tintiro-E. 20I Yesus nusumimbahi, “Ia sintinia mang mudidato mal᷊ahe su tingo ngu hape. Sintinia Ia manintiro su manga wal᷊e pukakal᷊iomanengang dang su Wal᷊e ngu Mawu Ruata, tampa u tau Yahudi ko sintinia mukomol᷊i. Ta paghisa Ia mamuni ngu manga apa ko hino ngu Daku iul᷊i. 21Inau nakurawe I Tuang mukina si sia? Mangkate pukina si sire ko seng mbuae nakaringihi si Sia nanintiro. Seng mal᷊ahe i sire kaul᷊ie matitong u apang ko Daku niul᷊i.”
22Su tempo I Yesus nangul᷊i kere'e singkatau mundadiaga se'e dingang namal᷊eri si Sie dang nangul᷊i, “I Kau wahani mangul᷊i kere'e su imam ko l᷊abo!”
23I Yesus nusumimbahi, “Boko Ia nunsal᷊a didato manga apa, ul᷊iko su si'i apa sal᷊ae! Arawe boko ko Daku niul᷊i e'e mang tingari, nakurawe i kau namal᷊eri si Sia?”
24Bou e'e i Hanas nangoro taumata pumbawa si Yesus kal᷊ahapusi sarang koa i Kayafas, Imam Ko Mawantughi.
I Petrus sau nusunial᷊i si Yesus
(Mat. 26:71-75; Mrk. 14:69-72; Luk. 22:58-62)
25I Simon Petrus mang l᷊ai mborong kararisi kapundarange su se'e. Apang taumata nangul᷊i si sie, “Wal᷊ingewe i kau l᷊ai simbau tumatuhu u taumata e'e?” Kateho i Petrus nusunial᷊i, “Angkunge wal᷊inge!”
26Singkatau l᷊ang u imam ko l᷊abo, ko ghe u tau ko tul᷊inge nisahing i Petrus, nangul᷊i, “Wal᷊ingewe ia nakawua si kau su taman e'e mahundingang I Sie?”
27Bou e'e i Petrus sau nusunial᷊i, “Ta,” – dang pase'e su orasi e'e manu nukumuku.
I Yesus nupasaruang i Pilatus
(Mat. 27:1-2,11-14; Mrk. 15:1-5; Luk. 23:1-5)
28Mborong mal᷊uka-l᷊ukari i sire numbawa si Yesus bou wal᷊e ngi Kayafas sarang istana ngu Gubernur. Manga taumata ngu Yahudi sisane ta nusumu su istana, tadeau i sire ta mal᷊amuhu tumuhu atorang u agama, watu'u i sire mo tumuhu kumang kang u Paska. 29Watu'u e'e i Pilatus nusumuwang nakoa sarang koa i sire dang nukina, “Apa kabaratang i kumu su taumata i'i?”
30I sire nusumimbahi, “Boko I Sie ta nunsal᷊a, i kami ta sarung mumbawa i Sie sarang koa i Tuang Gubernur.”
31I Pilatus nangul᷊i si sire, “Al᷊ae I Sie dang pariksaite I Sie tumuhu atorang i kumu!”
Kateho manga taumata ngu Yahudi e'e nusumimbahi, “I kami ta botonge muhukung u taumata pakapate.” 32#Yoh. 3:14, 12:32(I'i nariadi tadeau maganapi apang ko niul᷊i I Yesus bou hal᷊i u kakakoae I Sie sarung mate.)
33I Pilatus sau nusumu su l᷊al᷊ung u istana dang nukui si Yesus, bou e'e nukina, “Uare ko I Kau ratu ngu tau Yahudi?”
34I Yesus nusumimbahi, “Apa i'i ko kakina u sisane arako pia manga taumata ko wal᷊inge ko seng mbuae nuhabari si kau bou hal᷊i u Ia?”
35I Pilatus nusumimbahi, “Apa su naung-U ia i'i ko tau Yahudi? Ko nanarakang I Kau si sia e'e ko bangsa-Ngu sisane dang manga tumbonang u imam. Apa ko seng nikoa-U?”
36I Yesus nangul᷊i, “Kararatuang-Ku wal᷊inge bou dunia i'i. Kiko kararatuang-Ku mang tingari bou dunia i'i, inau apang taumata-Ku sarung mutawakal᷊i tadeau Ia kumbahang isarakang su mangangawasa ngu Yahudi. Kateho tingari Kararatuang-Ku wal᷊inge bou dunia i'i!”
37Kuteu i Pilatus nukina si Sie, “Boko kere'e, I Kau ko Ratu?” I Yesus nusumimbahi, “Ko i kau nangul᷊i u Ia i'i ratu. Ia nipahinding dang nusumongo su dunia i'i kitang simbau pandung, e'e mangonggo kasaksiang hal᷊i u kabanarang. Taumata ko asal᷊ie bou kabanarang e'e mundaringihi si Sia.”
38I Pilatus nukina si Sie, “Ko apa mangal᷊enge kabanarang?”
I Yesus nihukung hukumang papate
(Mat. 27:15-31; Mrk. 15:6-20; Luk. 23:13-25)
Bou e'e i Pilatus nusau nusumuwang bou l᷊al᷊ung u istana dang nangul᷊i suapang tau Yahudi, “Ia ta nakarea sal᷊a sarang simbau si Sie. 39Kateho tumuhu narang i kumu, su L᷊ou ngu Paska sintinia ia mambeng mamilo u singkatau taumata ngu hukumang. I kumu mo tadeau ia mamilo u ratu ngu tau Yahudi guna ngi kumu?”
40I sire nusumimbahi l᷊au kakihae, “Ta, kumbahang I Sie, kateho i Barabas!” (I Barabas ko singkatau tahahampasi)
Currently Selected:
YOHANES 18: PLT
Highlight
Share
Copy
Want to have your highlights saved across all your devices? Sign up or sign in
