YOHANES 2
2
Sal᷊iwang u kawing su Kana
1Dua l᷊ou bou e'e pia sal᷊iwang u kawing su soa ngu Kana su Galilea, dang i mama ngi Yesus ene pai se'e. 2I Yesus dingang u manga tumatuhu-E ninoti l᷊ai sarang sal᷊iwang e'e. 3Su tempo ngu anggori seng nasue, i mama-Nge nangul᷊i si Yesus, “I sire nikasueng u anggori.”
4I Yesus nusumimbahi, “Mama, kumbahang muparenta si Sia. Mborong ta nurating temponge Ia mupakal᷊ahe u watangeng-Ku.”
5Kateho i mama ngi Yesus nangul᷊i su manga koki, “Koako apang ko iul᷊i-E si kumu.”
6Su se'e pia bunsari nung ko nisadia tampa u ake guna ngu l᷊auhasi tumuhu adati tau Yahudi. Tataho u bunsari simbau e'e patehang manga mahasu su literi. 7I Yesus nangul᷊i su manga koki e'e, “Tahoneko ake apang bunsari e'e.” Bunsari e'e kaul᷊ie nitahonang i sire nipakapene. 8Mbuhue I Yesus nangul᷊i si sire, “Pangal᷊ako ake e'e singkodo wawa sarang tumbonang u sal᷊iwang,” I sire numbawa ake e'e sarang tumbonang u sal᷊iwang, 9dang tumbonang e'e nanemang ake ko seng nuwal᷊u nakoa anggori. (I sie wugha minsang anggori e'e bou apa, kitang i sire koki ko nutaho u ake e'e matitong.) Kuteu tumbonang sal᷊iwang e'e nusumandighi su pardegong ko ese, 10mbuhue nangul᷊i si sie, “Biasange taumata manadia ngu anggori ko kapiange horo dang hindo apang manga sake seng masahe manginung, wuhue we pilonang u anggori biasa. Arawe i'i i kau nundeso u anggori ko kapiange sarang silou i'i!”
11E'e ko makal᷊aherang kahimotongange nikoa I Yesus. E'e nikoa-E su Kana su Galilea. Dingang u tatia e'e I Sie nanode u kawawantughi-E. Kuteu manga tumatuhu-E nangimang si Sie.
12 #
Mat. 4:13
Bou e'e I Yesus tamai nakoa sarang Kapernaum singkahindo dingang i mama-Nge, manga ana u simbau-E l᷊au manga tumatuhu-E. Pai se'e i sire natana manga pira l᷊ou l᷊iwuenge.
I Yesus nusumu su Wal᷊e ngu Mawu
(Mat. 21:12-13; Mrk. 11:15-17; Luk. 19:45-46)
13 #
Sasu. 12:1-27
Su tempo seng masandighi u L᷊ou Paska ngu tau Yahudi, I Yesus nakoa sarang Yerusalem. 14Su Wal᷊e ngu Mawu su Yerusalem I Sie nakarea manga muwawal᷊u u sapi, domba, l᷊au manga paluma; dang l᷊ai apang mananukari doi kakangiang se'e. 15I Yesus nukoa samboki tal᷊i simbua bou e'e nanguseri apang binatang e'e, mbaeng domba kere'e l᷊ai sapi, bou l᷊al᷊ung u Wal᷊e ngu Mawu. Manga meda ngu mananukari doi nasue niwal᷊intuing-E hakiu manga doi ngi sire nukaesi tamai-mai. 16Mbuhue I Sie nangul᷊i su manga muwawal᷊u paluma, “Hengke kaul᷊ie bou i'i. Kumbahang wal᷊e ngi Yamang-Ku koateng tampa u pudaganeng!” 17#Mzm. 69:10Inau manga tumatuhu-E nakatinaung ayeti su Buki Susi i'i, “Kakindaghi-Ku su Wal᷊e ngu, o Mawu Ruata, nakasahoka naung-Ku.”
18Manga mangangawasa ngu tau Yahudi nundoka si Yesus, angkung i sire, “Kenangko pukoa ko makal᷊aherang, mariadi kere tatia si kami himoneu i Kau pia haki mukoa kere i'i.”
19 #
Mat. 26:61, 27:40; Mrk. 14:58, 15:29 I Yesus nusumimbahi, “Pakaopehi wal᷊e i'i dang su l᷊al᷊ung u tilu l᷊ou sarung sau Daku ipararisi.”
20Bou e'e i sire nangul᷊i, “Paupul᷊onung su taunge nupararisi Wal᷊e ngu Mawu i'i. Dang I Kau sau mupararisi su l᷊al᷊ung u tilu l᷊ou?”
21Kateho pandung u Wal᷊e ngu Mawu ko nihabari Yesus e'e ko Badang-E sisane 22Inau samuringe, suapang I Yesus nipuwangung bou papate, manga tumatuhu-E nakatinaungte hal᷊i e'e ko seng mbuae nihabari-E. Kuteu i sire nangimang suapang ko mawawohe su l᷊al᷊ung u Buki Susi dang suapang ko niul᷊i I Yesus.
I Yesus matitong apang taumata
23Tintal᷊a I Yesus su Yerusalem tempo e'e pia Putatinaungangu Paska, maul᷊i taumata nangimang si Sie ual᷊ingu manga ko makal᷊aherang nikoa-E. 24Kateho I Yesus sisane ta nangimang si sire, watu'u I Sie matitong kakanoa u apang taumata. 25Ta wahal᷊uasu taumata manintiro si Sie bou hal᷊i i sai-sai, watu'u I Sie seng matitong apang ko su l᷊al᷊ung u naung u taumata.
Currently Selected:
YOHANES 2: PLT
Highlight
Share
Copy
Want to have your highlights saved across all your devices? Sign up or sign in
