LUKAS 14
14
Ar Yesus nen akuni ambi u warek ma dek ekige wene
1Ar Yesus o hari Sabat paga, ap nggok ambi Farisi mende uma erom na lagage. Ir akuni etoma nen, Ar Yesus nenggerogon erigin yiluk, inil waganggu lagugwa. 2Nen etegerogo werekma, ar akuni ambi u elabutla i totatuk, inggi iyok pirik etarurak ndak dek mende ma, Ar Yesus oba arar wagage. 3Arar wagagemo, Ar Yesus nen ir ap guru-guru agama inom, nen ir ap Farisi mende inom, ir eta inom welagwi mende enogo yoraga dogolir, “Nir mende agama edo diru mbalek paga nen, akuni u kunik mende, o hari Sabat paga u dek erinaburak ndak yitaga a, dek a?”
4Ir guru-guru agama inom, nen ir Farisi mende inom, inane dek mban puk agugwa. 5#Mat. 12:11Tuguluk ar Yesus nen akuni obogar yoraga dogolir, “We walkigik negen yegerogon, ar akuni ambi, kir ya agotik mende nen, ar akburak a, ar anggo lembu a, agar kululikmo nggokbok togon hari Sabat paga wuramo, ibar-ibar ndilogo likbi warigin dek eti kar ta kwak nen kwak?” yiluk kinok yorarige.
6Ogwe, ar akuni ambi nen kwak, wene onggo Ar Yesus yotuk dek mondok arar o.
Iniliti yanggolek nen akuni inakba ekwa mende yirige wene
7Ir akuni kuro mende ernogo, korek tarumo pano ma nggwe kau mban kotagwi, ekwi Ar Yesus il daga lagagerek, Ar nen wene yi emeriragage. 8#Ams. 25:6-7“Kir nen kwe yigogo kunogo buok nen yiluk kinayonggo bumo, kursi pano kwak mondok ndalogo bugun etnaga paga korek tari lagup o. Nenaluk, akuni nggok kwak negen mende ayonggo biluk nggodek dogomo, 9nen ar kir kimbirak yonggo binagu werek waktuk, kar koba watuk yokega dogolir, ‘Abeak, maga banino, kar korek yi, ap waga eli akdip bogoma o.’ Etegerogon yokirumo, kar kenggadi nggi nggo kalok, kursi ambotna irep ma ndalek eti paga korektari ligin o. 10Eti paga ma, kir etegerogon yonggo binagagwi kalok, korek taruwok nen yiluk kalok etnaga, irep paga ambotna nggwe yemernaga korek taru o. Etegerogon korek kinalok, ar yonggo binagu werek watuk yokeraga dogolir, ‘Eyo, Nogari! Yogo o kursi pano ndalek paga kwak, korek taknok nen eme o, yiluk bagi ligin o.’ Etegerogon etaga kigik, kir eti ir akuni kuro yemenogo inilka paga wogokbinagagun. 11#Mat. 23:12; Luk. 18:14Nenaluk, ir akuni woguk batagwi mende ernogo, tebe bagin o. Ogwe, ir akuni tebek bata tagwi mende ernogo, yade dagin o,” yiluk yoragage.
12Yoraga lagagerek, Ar Yesus nen tuguluk ar ap ai werek enogo yoga dogolir, “Kar akuni dago dindaga nau a, kukbaga nau a, inayonggo bik nen yiluk kalok, ir kar kinom kunik mende a, kogari kinom endago mende a, ir ininggi werek inai korok-korok kinom agandik mende a, etnaga inayonggo bugup o. Nenaluk, ir nen onggo kar kayonggo bagagun ar kalok, kar kobabur pano erigin enogo eti, onggo arar kodagin o. 13Etiar ma, kar nen pesta erik nen yiluk kalok, akuni ininggi dek mende, akuni ininggi iniyok nggedalek mende, akuni inago ndalek mende, akuni inil mbuk mende, etnaga kwak inayonggo bau o. 14Eti erigin kalok, adeknggen nggok mende arar koba bigin o. Nenaluk, ir akuni eti nen, kar kobabur pano erigin ernogo, ir nen onggo wokiru ndak de eti paga o. Kar kobabur pano erigin ernogo, ir akuni pano mende iniluk erogo mendagin eti paga, Ar Allah nen onggo wokirigin o.”
Pesta nggok erigin mende obalirogo yirige wene
(Mat. 22:1-10)
15Ar Yesus wene yega aruk kolek welagagerek, Ar ap ambi inom dago nunggwi mende nen, Ar Yesus yoga dogolir, “Ar akuni ambi, Ar Allah Raja ndak-ndak menatuk warigin eti paga, imbirak dago nigin eti perak, onde ekodagin o.”
16Ogwe, Ar Yesus nen ar akuni enogo wene onggo yoga dogolir, “O ambi paga, ar akuni ambi pesta nggok mondok eka dogolir, akuni pakalok mondok ar inayonggo bigin o. 17Nen pesta enogo erurak o arar panggo yirigemo, ar akuni enogo nen yedoman mende yoraga dogolir, ir akuni inayonggo bu mende inoba lalok yegerogon yorano, ‘Pesta erurak obok pikpuk erek ma, kir ibar watno o!’ yiluk yorano. 18Ogwe ir akuni yemenogo inaditik inadiktak nen maga binanino yiluk yugu dogolir, ar ambi nen yega dogolir, ‘An ngger negen ya arar, agar bugudak ambi onggo mbalkirik mo, nil mbenari laurak ma, warigin dek o, ma kakla togok danugup o.’ 19Nen ar ap ambi nen yega dogolir, ‘An ngger negen ya ar, lembu agun agwe inebe lima paga inonggo mbalkirik mo, yabumo wuldau nakla andagirik mo, warigin dek o. Ma, kakla togok danugup o.’ 20Nen ar ambi nen yega dogolir, ‘An kwe ngger yi arar waganggirik mo, warurak ndak dek arar aga o, ma kakla togok danugup o.’
21Nen ar Yedoman mende enogo tuguluk uma iyok paga wagagerek, ar tuan mende enogo yori wagage. Yorigemo ar tuan mende enogo wenemuk pakalok yega lagarik, nen yedoman enogo yoga dogolir, ‘Yogo, tuan paga nggwe, nen akuni inuma bakma nggwe, kota etoma arar lan o. Nen ir akuni ininggi dek mende inom, ininggi iniyok mbalek mende inom, inil mbuk mende inom, nen iniyok tuan laurak ndak dek mende inom, obogar wogorek watno o.’ 22Nen ar ap yedoman mende enogo nen onggo yoga dogolir, ‘Tuan mende wae, wene kar yegen ndak-ndak arar ekirik ogwe, o akuni korek tarumo o ndalek yoma, wedek pakalok ar puk aga o.’ 23Yorigemo ar tuan mende enogo nen yoga dogolir, ‘Yogo tuan nggok paga nggwe inom, nen kota abel tekman nggwe etoma inom, lambimo nggwe agarik mende etoma inom, uma yoma yeber aruwak nen, ibar nandodogo wogorek watno o. 24Nen kinakla eberek togon o! Ir akuni an alep inayonggo bagi mende, wagikdek puk agiya mende eti, dago yabongga darin mende, ir nugun mondok dek o!’ ”
Ar Yesus mutok lagwi mende nen, ye mende nde mende oba mi erogo dambe kaurak wene
(Mat. 10:37-38)
25Ir akuni Ar Yesus laganem, inom pakalok ar lagugwa. Nen ar Yesus il medok togon bikdaga lagagerek, yoraga dogolir, 26#Mat. 10:37“Ir akuni An Noba warugun mende ogwe, agwiya iliti kunik inom, ombae iliti kunik inom, agwe iliti kunik inom, elege akburi iliti kunik inom, ogari iliti kunik inom, nen ar ebe iliti kunik inom, akuni eti, ebe An mutnarek lagwa mende etarurak, mondok ndak dek arar o. 27#Mat. 10:38, 16:24; Mrk. 8:34; Luk. 9:23Ir akuni inao kari karo piyalogo kodalok, nen An mutnarek laurak ina'ir mende eti, ir An mutnarek lagwi mende etarurak ndak dek arar o. 28Ar akuni ambi kir ya agotik mende nen kwak, o nggayo mbedarik nen yiluk kalok, ibanini mondok eti, korek latuk nen eti erigin onggo uang mende ndak-ndak wulabigin yiluk, akla eberurak o. Eti erigin paga, ar mende uang werek mende eti, ndak mbedaru arigin a, mbedaru ndak dek arigin a, eti ilu arigin o. 29Nenaluk, o mbedaru yiluk erigin mende ernogo, ukbula etbega dogu, eru ndak arar arigin kalok, ir akuni yabu eka eti inil kugun mende ernogo, obogar nen agakndok kambugun o. 30Nen ir nen yugu dogolir, ‘Lak kani, ar akuni yi, o nggayo mbedarik nen yiluk ekerek ogwe, eru ndak dek nen dambe kege yi kogop!’ 31Nen ar ap raja ambi nen, ar mende tentara inebe sepuluh ribu paga ma, nen ar ap raja imbirak ndugi mbalek mende ambi, ar mende tentara inebe dua puluh ribu kalok, erigin ebebar kwak eti, ar raja eti korek latuk, akla pik pak eberurak eti, an nimbirak abu ndak ar a? 32Nen ar obatne dek werek eti, ibar ilu arigin kalok, ar inom wim mende enogo auwan walegar dagik, an ninom wim dambuluok o, yiluk ibar-ibar wene aworomi yonggo lakbagin o.” 33Irep paga Ar Yesus nen yoraga dogolir, “Kir kinake paga etegerogon ar o. Kir kinamindi kinamendek mbo burak ndak dek kalok, kir ya agoktip mende ambi nen, An mutnarek lagwa mende etarurak ndak dek arar o.”
Mayu induk dek mende wene
(Mat. 5:13; Mrk. 9:50)
34“Mayu eti pano mende arar o, ogwe muk induk dek arumo, induk werek eraru ndak a? 35Eti paga ambi eru dek arar o. Yabula bi lau inom, nen aingge yagoma bi lau inom, ambi eru ndak dek arar o. Ma, we mbo lakburak mende eti arar o. Kinaruk werek kalok, kinaruk kolalini o.”
Currently Selected:
LUKAS 14: WLW
Highlight
Share
Copy
Want to have your highlights saved across all your devices? Sign up or sign in
