MATIUS 12
12
O Sabat ake kinok yirugwa wene
(Mrk. 2:23-28; Luk. 6:1-5)
1 #
Ul. 23:25
O hari Sabat ambi paga, Ar Yesus tuwan gandum yagoma nggweru lagage mende, aworomi yemenogo nonaik agagemo,gandum enggen mbalogo nunggunem il da lagige. 2Ir akuni Farisi mende nen eti ekwi inil dagu lagugwarik, Ar Yesus yogu dogolir, “Kil lakdan! O hari Sabat paga eku dogorak dek o, yiluk wene hukum agama paga mbalek yemenogo, Kar kaworomi nen arar tagalir tagwi o, yiluk yorugwa.”
3 #
1Sam. 21:1-6
Ar Yesus nen onggo yoraga dogolir, “Ap Daud awor akbur inom nonaik nen ekugwa mende wene diru mbalek enogo, kir endaga talkikdek a? 4#Im. 24:9Ar Allah Ai Palek ma onggega lagagerek; nen roti Allah ake birugwa mende yemenogo na unggirige o. Wene hukum agama nir mende mbalek nen yega dogolir, ar inom, awor akbur inom, roti ir imam-imam inake pugurik mende na unggurak maga mondok welagage o. 5#Bil. 28:9-10Nen kir wene hukum Musa paga diru mbalek mende ambi endaga talukdek a men a, ir ap imam-imam Tuhan Ai Palekma yabu ekwi mende nen, wene Hari Sabat ake kolek mende tagalkwi dagik ar ogwe, kir maduk ekop yiluk yorar tagwi dek o. 6An wene yokeragin yi dik bini o: Ar Allah Ai Palek yi kigik, ar nggok mondok mende ambi werek o, yiluk yorarige. 7#Hos. 6:6; Mat. 9:13Alkitab diru mbalek paga nen yega dogolir: ‘An wadok eti, inakba ketagwi eti kwak o, nen binatang kurban nake birtagwi kwak eti, dek o.’ Nane yigi yi, kir nen ebebar kinakla andamu, kir nen ir akuni maduk ekwi dek kigik ar, kir nen maduk yoratagwi eti yoragu dogorak mondok dek o. 8Nenaluk Ar Akuni Inakbur eti nen, o hari Sabat ebe eti inggi pago werek Ar arar o.”
Akuni inggi penak warek ma ekige wene
(Mrk. 3:1-6; Luk. 6:6-11)
9Ar Yesus o etoma dambe kalok, nen o tamban erir tagama Allah Ai Palek ma nggwe arar lagage. 10Nen etoma ap ambi inggi penak warek mende welagage. Werekma Ar Yesus maduk erigin nggi yiluk ir inebe mende negen tuwam welagunem ma, ir nen Ar Yesus kinok yogu dogolir, “O Sabat paga, akuni u dek erinaku dogorak ndak a dek?” yiluk kinok yorugwa.
11 #
Luk. 14:5
Ar Yesus nen wene onggo yoraga dogolir, “Kar ambi kanggodak domba werekma, domba enogo witila etoma nggagadi wuramu, ar domba onde werek nen nenggerogon erurak, domba enogo witila nggarma etoma dambe kaurak a?
12Akuni inonggo domba ndak-ndak dek o! Ma, etegerogon kalok, o hari Sabat ake paga, akuni inake yamak dagu dogorak ndak arar o.” 13Ar Yesus nen ap inggi penak warek enogo yoga dogolir, “Kinggi lakbime.”
Ar akuni enogo inggi arar lakbi wagagemo, inggi penak ndak-ndak akdikmu arar pano agage o. 14Ogwe ir akuni Farisi mende enogo o tamban erir tagama dambe kalok wulkugwarik, Ar Yesus warurak yiluk inane dambulik wulkugwa.
Ar Allah nen pulogo lakbarige wene
15Ir akuni Farisi mende nen Ar Yesus warurak inakla andarugwa enogo ilu atuk, Ar o etoma dambe kalok arar lagagemo, ir akuni pakalogar Ar mutok lagugwa. Mutok lagugwama, Ar nen akuni pakalok yemenogo u warek mende inoba dek erogo barige. 16Ogwe Ar nen ir akuni u dek erinakige mende yemenogo akuni ambetak mondok yoragup o, yiluk yorarige. 17Etegerogon etagage eti, Ar Allah nen Yesaya obaru wene yorige mende diru mbalek ndak-ndak arar etaga o yiluk yirige,
18 #
Yes. 42:1-4
“An nen mirogo lakbu pulogo birigi mende ebe yi arar o.
Akuni ebe An niliti kunik nen Ar nen ye eka nde eka eti oba nadenggen arar o.
An mende Roh eti Ar arar wogorigin o.
An nen wene odo ndak-ndak morori taga mende eti Ar nen akuni o kuri dombok etoma yoragin o.
19Ar nen aredo wakikdek nen naik nggwak yigikdek,
nen ir akuni nen ane tuwan nggok paga nggwe etoma inaruk kulkikdek o.
20Wene pano mor-mor kologo mbalku dogorak mende eti mororir laga kigik,
pinde uwak tagalek mende eti tenggeligin dek o,
nen iragal akda dagagikdek tokde mban wulka kalok, akda kigin dek ar o.
21Etegeron erir waga kalok, ir akuni o kuri dombok etoma nen, iniliti Ar oba mban ar panggolugun o.”
Ar Yesus kwe Beelzebul eti obatne akla onggegerek elalin erir lektaga yiluk yorugwa inawene
(Mrk. 3:20-30; Luk. 11:14-23)
22Tuguluk ap ambi ebe il mbuk, nen ane unggukdek, ap eti kugi irimbo maduk mende akla unggirigemo warek werek ma, Ar Yesus oba akuni enogo wolok wagugwama, ane werek erogo bega, nen il mbuk enogo il benggelogo bega mondok pano arar erogo birige o. 23Ekigemo ir akuni nen, wi au, yiluk bi watuk ndi eku dogolir kinok men yorugwa, “Ap yi ebere ar Daud Akbur yirugwa enogo arar dogu a,” yiluk yirugwa.
24 #
Mat. 9:34, 10:25 Ir akuni wene yugwi eti ir ap Farisi mende nen inaruk kolal diluk, ir nen onggo yoragu dogolir, “Ar ap yi, ye kugi nde kugi inakepala Beelzebul eti nen obatne wogogemo, Ar nen kugi irimbo etoma mugogo wuldar waritaga o,” yiluk yirugwa.
25Ar Yesus nen ir akuni Farisi mende inakla andugwi obok yenggak dalok. Ar nen ir yoraga dogolir, “O negara ambimo ir-ir ar keyal diluk, nen ir inaworomi dombok dogal-dogal dogolir agorek welagwi kalok, negara enogo pano aitok dogir tagodek arar o. O kota ambila nen a, keluarga ambi nen a, eti ndak-ndak ar, ir-ir ar agorek welagwi kalok, dambulik mondok dogir tagodek arar o. 26Eti ndak-ndak, ar Iblis nen ar Iblis ar mugogo wulakburak kalok, ar aworomi inom inadik ndak dogal diluk arumo, ar enggawerek ar imbirak wim erurak ma, dambulik dogu ndak dek ar o. 27An akuni kugi irimbo obabur maduk mende oba werekma pano ekbigi mende kir nen Beelzebul endaga obatne paga eke o yiluk yogop o. Eta etegerogon kalok, kir kinaworomi yoma, ta obarne paga kugi irimbo eti mugogo wulabir tagwi? Etiar ma, kir kinaworomi nen, kir maduk o yiluk inugur kinaga o. 28Ogwe, An nen Ar Roh Allah eti obarne paga mban kugi irimbo eti mugogo wulinabir warik taga o. Eti paga nen, o yogondak ya, Ar Allah apma binanurak mende ernogo kinoba arar kenam ari waga o.
29Ma ap obatne werek mende ambi agarik agarek uma ndili ungguwok nen yiluk, ap obatne werek mende ebe ndak kede warogo bigikdek kigik, nenggerogon agarik agarek uma ndili unggurak? Ma ar ebe ndak kede warogo biluk kalok perak, ar agarek uma ndili unggu ndak o.
30 #
Mrk. 9:40
Ir akuni An noba nggwe lamboli wagikdek kalok, ir nen An nane tagalir tagwi o. Etegerogon ar, ir An yamar nagikdek kalok, An neyabu erek lemek pedek erir tagwi o! 31Eti paga nen, wene yi kinilu dogoni o. Ir akuni maduk eku dogolir, ir inane paga puduk padak yugwi mende eti, inebe maga bau ndak o! Ogwe, ar nen Roh Allah eti, wene maduk mende puduk padak yoga kalok, ar ebe maga bigin mondok dek o! 32#Luk. 12:10Etegerogon ar, ir akuni nen, Ar Akuni Inakbur eti wene maduk mende yorugun kalok, ir maga bau ndak ar o. Ogwe ar Roh Allah eti wene maduk mende yorugun kalok, ar akuni eti o yogondak ake paga inom, nen yabungga ake paga inom, maga bigin mondok dek o.”
O ebe o, nen o enggen o, inawene yirige wene
(Luk. 6:43-45)
33 #
Mat. 7:20; Luk. 6:44 “O enggen pano yiruwak nen yiluk kalok, o ebe pano mudi-mudi mondok dogorak. Ogwe o ebe mudi pano dek kalok, enggen pano yirigin dek ar o. O ebe pano a, arte maduk a, yiluk dikburak eti enggen yika paga mban o. 34#Mat. 3:7, 15:18, 23:33; Luk. 3:7, 6:45Kir akuni maduk mende arar. Nen kir akuni maduk mende ar ma, kir nen wene pano mende yurak eti nenggerogon? Wene maduk mende kinande paga nen yitagwi eti, wene ebe edo kinilitimo nen arar wundi wari taga o! 35Akuni inobabur pano mende eti inilitimu pano mende ar dogi taga mende o. Etegerogon ar, akuni inobabur maduk mban eri taga mende eti, inilitimo nen wene maduk mban ar wundi wari taga mende o.
36Eti paga, kinakla eberek dogoni o: O Irep Kudi paga nen, akuni obogar wene yugu dogogun ndak-ndak ar enendokma waganigin o. 37Nenaluk kar kane yega lagan eti paga ar, kar pano eka lagan, kar maduk eka lagan, yiluk hukuman koba bigin o.”
Akuni Farisi mende nen elalin mende erin yorugwa wene
(Mrk. 8:11-12; Luk. 11:29-32)
38 #
Mat. 16:1; Mrk. 8:11; Luk. 11:16 Tuguluk ir guru-guru agama inebe mende negen inom, nen ir akuni Farisi mende inom, ir nen yogu dogolir, “Guru Ninombae, Kar elalin ambi eka ninil kau wadok o, yiluk yorugwa.”
39 #
Mat. 16:4; Mrk. 8:12 Ogwe Ar Yesus nen onggo yoraga dogolir, “Kir akuni o yogondak ya paga agotik mende yi, wene yugu ndak-ndak erukbuk maduk eru mban kinanini tabul ndalek o. Kir nen An erukbuk elalin ambi erin yornogop a? Akuni kir kinake erukbuk elalin ambi erigin mondok dek, we ar Nabi Yunus nen elalin ekige eti mban arar dogogup mende o. 40#Yun. 1:17Ar Yunus ikan nggok akla yagadek ima werek kigik inggi mbere ambi welagage o. Etegerogon ar, Ar Akuni Inakbur eti, inggi mbere ambi paga ar, agar elabur akla yoma dogogin o. 41#Yun. 3:5O Irep Kudi paga, ir akuni o Niniwe mende inom, akuni o yogondak ya paga wigalek mende inom, ir nen ar aigak bagalugun o. Nenaluk ir akuni o Niniwe mende enogo Ar Yunus nen Allah Wene yora lagagemo, ir iniliti kwak batalok, ir inomaduk mende mbo birugwa o. Ogwe yogondakne ya paga, ar Yunus eti wukigik, ar ap nggok negen ambi werek ar o! 42#1Raj. 10:1-10; 2Taw. 9:1-12O Irep Paga eta, kwe ratu Selatan nggwe mende ambi ir akuni yogondak ya wigalek agarik mende inom menarugun nen ar nen inendokma waganigin ar o. Nenaluk ar kwe ratu eti, o mbogor irep paga etoma nen, wene ar Salomo akla nggagalek mende eti kolau wadok nen warigin o. Ogwe ar yogondak ya agarik mende eti, ar Salomo wukigik, ar kwak anggup idu mondok agarik o.”
Irimbo iyok paga unggirige wene
(Luk. 11:24-26)
43“Ar kugi irimbo eti akuni inakla nen wundiluk, kugi enogo ebe o tar walega dogomo wodalekma negen kau kwarir dagak-dagak lagage mende, ambimo il kalokdek arar o. 44Eta etegerogon kalok ar nen yega dogolir, ‘An numa welagimo niyok paga lagin o, yiluk yirige o. Yega lagagerek iyok paga lagage mende, yemenogo telek agubak kirik panoma mondok, ar il ka lagage o. 45Nen yabunggane irimbo inanini werek mende inebe tujuh paga inayonggo biluk lagage. Nen ir kugi enogo akuni enogo akla unggiluk etoma welagugwa. Puk ari unggirugwama, akuni enogo oba alep pano negen welagagerek ogwe, yabongga kwak mondok ebiluk maduk nggok arar oba agage o. Eti ndak-ndak ir akuni yogondakne wigalek mende inoba etegerogon ar etarigin o.”
Ar Yesus agwiya o, nen ogariyak inom ekugwa wene
(Mrk. 3:31-35; Luk. 8:19-21)
46Ar Yesus akuni pakalok yemenogo inom wene auwan yoraga werekma, Ar ogariyak inagwiya inom wagugwarik, ir nen ninom wene mbaluwok nen yiluk, nenggerogon ninom abuk aruwok yiluk, abel tekman nggwe torek mendek welagugwa. 47Ir akuni pakalok lagugwa yemenogo ar ambi nen Yesus men yorige, “Ninombae, Kar kagwiya o nen kogariyak o wagiya mende, kinom wene mbalu wadok nen tekman nggwe tokarek werek o,” yiluk yorige.
48Yorigemo Ar Yesus nen wene onggo yega dogolir, “An nagwiya eti ta? Nen nogari eti tani?” 49Tuguluk Ar awurumi mutok lagwi mende yemenogo inoba nggwe inggi tiktik lakbirigerek nen men yirige, “An nagwiya nogari eti ir inebe yi arar o, yiluk yorarige. 50Ta nen An Nombae mbogor paga mende akla andar taga ndak-ndak eka kalok, ar eti An Nogar, An Niru nen An Nagwiya o.”
Currently Selected:
MATIUS 12: WLW
Highlight
Share
Copy
Want to have your highlights saved across all your devices? Sign up or sign in
