Matius 21

Yesus disambut kotakan ramai di kota Yerusalem

(21:1-11)

(Mrk. 11:1-10; Luk. 19:28-38; Yoh. 12:12-15)

1Watu Yesus agatn boko murid-Nyo hampir datakng di Yerusalem, sia' datakng di laman Betfage di sisi bukit Jaitun.#21:1: Bukit Jaitun ado hubukan agatn kodatakan Rajo Inyo Dijanjian Allah, ia'an Rajo inyo urakng Israel sobut ‘Kristus’, tiat Zakharia 14:4. Yesus monyiuh duo urakng murid-Nyo doholu. Kato-Nyo, 2“Botula'cam ko laman di polaju nantai. Kaitn duo paca'an moniant siku' koledai botina' agatn ana'nyo dikobat'an di tihakng di santai. Lopasan koduo koledai nantai lalu baba' ko si'itan. 3Aman ado urakng inyo monogur kaitn, padahan ko urakng nian, ‘Tuhatn momontikannyo. Apo paca'an copatmo Sio momulakannyo.’ ”

4Kojadian nantai tojadi oca' pomandiran Allah monjadi nyata. Watu joman komai ado nabi inyo monyampaian pomandiran Allah nantai dinga' ni'in bunyinyo:

5“Padahan ko boko pondudu' di kota Yerusalem,

‘Porotiancam, Rajo kaitn tongahan datakng ko kaitn!

Sio lomah-lombut.

Sio monunggakng koledai botina',

ongko siku' ana' koledai inyo muda'.’ ”#21:5: Doi' buku Zakharia 9.9

6Koduo murid nantai botula' lalu molabuhan sama'an inyo dipandiran Yesus ko sia'. 7Sia' mombaba' koledai botina' nantai bosamo agatn ana'nyo ko Yesus. Sia' moincar jubah sia' di pucu' koledai muda' nantai lalu Yesus noi' ko pucu'nyo. 8Banya' bondar urakng inyo moincar boko jubah sia' dijalatn pakai' mohormati Sio. Ado banya' jam urakng inyo monota' boko ranggau kayu lalu moncacainyo di jalatn. 9Banya' urakng bojalatn di pohadapan ongko di bolikat Yesus. Sia' mondongkakng-mondorah,

“Hosana! Pujicam Rajo doi' koturutan Daud!#21:9: Rajo doi' koturutan Daud ia'an sobut'an inyo bukai pakai' Kristus, ia'an ‘Rajo Inyo Dijanjian Allah’. Tiat 1 Taw. 17:11-14, Mazmur 132:11, Yesaya 9:7, 11:10, Yer. 23:5.

Pujicam Sio inyo datakng mowakili Tuhatn Allah!

Pujicam Sio di tompat inyo kotakan tinggi!”#21:9: Urakng banya' ni'in momuji Yesus agatn momakai kato doi' buku Mazmur 118:26.

10Watu Yesus momansu'i Yerusalem, somuo urakng di kota monjadi ramai. Boko urakng di kota nantai botakutn, “Sopo kiro urakng ni'in?”

11Boko urakng inyo tuyut Yesus monimbasi, “Ni'innam Yesus, nabi doi' laman Nazaret di propinsi Galilea.”

Yesus monundukng boko podagakng doi' tongahlamanan Rumah Allah

(21:12-17)

(Mrk. 11:15-19; Luk. 19:45-48; Yoh. 2:13-16)

12Lalu Yesus mansu' ko tongahlamanan Rumah Allah. Sio monundukng somuo urakng inyo bojual-boli di tompat nantai.#21:12: Pasar ni'in momudahan boko urakng inyo datakng doi' jouh pakai' momboli posombahan. Apo pasar nantai soharusnyo ditompatan di tompat bukai. Solaitn nantai, sia' gola' monyambian duit obai ongkah ulih monggunoan duit husus pakai' Rumah Allah. Urakng inyo monyambian duit nantai hala mongolakar jam. Sio mombali'an boko meja inyo dipakai ulih boko ponyambian duit. Sio morobahan boko bangku inyo dipakai ulih boko ponjual posombahan burukng daro. 13Kato-Nyo ko sia', “Pomandiran Allah totulis dalapm buku Suci: ‘Rumah-Ku ia'an rumah pakai' bodoa.’#21:13: Tiat buku Yesaya 56:7. Apo kaitn monjadiannyo samo sama'an sayakng ponyamun!”#21:13: Tiat buku Yeremia 7:11.

14Lalu, banya' urakng buto ongko urakng timpakng datakng ko Yesus di tongahlamanan Rumah Allah nantai. Sio monyamani sia'. 15Apo boko imam kopala' huatan boko guru agama Yahudi moniant boko mujisat nantai lalu monjadi kotakan godi. Sia' godi jam obai ado boko bobia' di tongahlamanan Rumah Allah nantai inyo momuji Yesus. Boko bobia' nantai mondongkakng-mondorah, “Hosana! Pujicam Rajo doi' koturutan Daud!”

16Boko imam kopala' ongko boko guru nantai bopandir ko Yesus, “Duatn mondinga' la'apo inyo dipandiran boko bobia' ni'in?”#21:16: Boko imam kopala' huatan boko guru agama Yahudi co pocayo obai Yesus ia'an Rajo nantai. Jadi sia' honda' oca' Yesus monogur boko bobia' nantai.

Kato Yesus ko sia', “Au, Aku mondinga' mo. Apo pasti kaitn kalo mombaco pomandiran ni'in di Buku Suci: ‘Duatn udah bulah oca' boko bobia' muda' ongko boko bobia' kocit momuji Duatn.’ ”#21:16: Doi' buku Mazmur 8:3.

17Lalu Sio moninggalan sia'. Sio botula' ko luar kota Yerusalem ko laman Betania lalu bomalapm di su'utn.

Yesus monyumpah kayu ara inyo kinyo bobuah

(21:18-22)

(Mrk. 11:12-14, 20-26)

18Holapm sunsukng kohobu'annyo, Yesus bobali' ko kota Yerusalem. Dalapm pojalatan, Sio mooso kolaparan. 19Di pinggir jalatn, Sio moniant sokayu' kayu ara. Jadi, Sio mohampiki kayu nantai, apo co nyiant sobigi' pan buah kayu nantai. Ongkah ado doutnnyo am. Kato-Nyo ko kayu nantai, “Kolai paca'an co kalo bobuah agi'.” Lansukng kayu nantai mungguram.

20Kali boko murid Yesus moniant kojadian nantai, sia' hiratn bondar. Kato sia', “Ubo apo kayu ara nantai lansukng monjadi layu?”

21Timbas Yesus ko sia', “Dinga'anbo! Aman kaitn ulih pocayoam ongko co gangga'-gua'an, bulah mujisat sama'an la'apo inyo Aku labuhan ko kayu ara nantai. Apo bukainyo bayo nian ja'. Soumpamonyo kaitn monyiuh bukit ni'in, ‘Toangkat lalu tobuakng ko dalapm lout!’ Jadi hal nantai paca'an tojadi.#21:21: Tiat catatan di Matius 17:20. 22La'apo pan inyo kaitn minto dalapm doa, kaitn paca'an monorima'nyo, aman kaitn pocayo.”

Boko pomimpitn urakng Yahudi tongahan godi sia' botakutn mongona'i kuaso Yesus

(21:23-27)

(Mrk. 11:27-33; Luk. 20:1-8)

23Lopas nantai, Yesus mansu' ko tongahlamanan Rumah Allah lalu mongajar di santai. Watu nantai, boko imam kopala' ongko boko pomimpitn banso Yahudi datakng ko Sio. Kato sia', “La'apo hak Duatn molabuhan nantai somuo? Sopo inyo moonji'i kuaso nantai ko Duatn?”

24Kato Yesus ko sia', “Aku pan paca'an botakutn ko kaitn. Aman kaitn monimbasi-Ku, lalu Aku paca'an monimbasi kaitn mongona'i sopo inyo moonji'i kuaso ko Aku pakai' molabuhan somuo ni'in. 25Ni'in Aku botakutn: Sopo inyo moonji'i kuaso ko Yohanes pakai' mombaptis? Allah kata'an monsio ai?”

Jadi, sia' bohoupm goyap jawabannyo di antaro sia'. Kato sia', “Aman kito bopandir, ‘Allah inyo moonji'i kuaso nantai ko Yohanes’, Yesus paca'an monogur kito obai kito co pocayo agatn Yohanes.#21:25: Boko pomimpitn ni'in sadar aman sia' moaku'i obai hak Yohanes ia'an doi' Allah, sia' gola' mompocayo'i ajaran Yohanes mongona'i Yesus (Matius 3:7-12, Lukas 3:15-18 ongko Yohanes 1:24-34). Nantai boroti sia' jam gola' moaku'i obai hak Yesus ia'an doi' Allah. 26Apo aman kito bopandir, ‘Bayo monsio inyo’ moonji'i kuaso nantai ko io kito gola' agatn urakng banya' ni'in, obai sia' pocayo Yohanes ia'an nabi inyo dionji'i kuaso doi' Allah.”

27Jadi sia' bopandir ko Yesus, “Koi co tohu.”

Yesus bopandir, “Aman ubo nian, Aku pan co momadahannyo ko kaitn sopo inyo moonji'i kuaso ko Aku pakai' molabuhan somuonyo ni'in.”

Yesus monyandikan boko pomimpitn urakng Yahudi agatn bobia' inyo co molabuhan kohonda' bopainyo

(21:28-32)

28 Lalu Yesus bopandir ko boko imam kopala' huatan ko boko totuho, “Ubo apo pondapat kaitn mongona'i kisah ni'in: Ado siku' urakng Bopai bisi duo urakng ana' lolaki. Bopainyo nantai monomu'i ana' inyo potamo lalu bopandir, ‘Ana'ku, botula'cam bokorojo di kobutn anggur sari ni'in.’ 29Timbas ana'nyo nantai, ‘Cuku sanggup.’ Apo lopas nian io monyosal lalu botula' bokorojo di kobutn anggur nantai.

30Bopai nantai monomu'i ana'nyo inyo koduo lalu momadahan hal inyo samo, monyiuh io labuh bokorojo di kobutn anggur. Timbas Ana'nyo nantai, ‘Au, Bopai’, aku paca'an botula'mo. Apo io co botula'. 31-32Nah, doi' antaro duo ana'nyo nantai, inyo mono molabuhan kohonda' bopainyo?” Timbas sia', “Inyo potamo.” Kato Yesus ko sia', “Dinga'anbo! Yohanes Pombaptis datakng pakai' monunju'an ko kaitn caro hidup bondar di hadapan Allah. Apo kaitn co pocayo agatn io. Apo boko urakng inyo bodosa sama'an boko ponagih pajak huatan boko botina' lahukng, sia' pocayo ko Yohanes. Biar pan kaitn moniant nantai, apo lopas nian kaitn co monyosal. Kaitn totap co pocayo ko io. Obai nantaiam, boko ponagih pajak huatan boko botina' lahukng paca'an lobih doholu monjadi anggota koluarga Koraja'an Allah daripado kaitn.”

Yesus monyandikan boko pomimpitn urakng Yahudi samo agatn boko potani ponyewa inyo jahat

(21:33-46)

(Mrk. 12:1-12; Luk. 20:9-19)

33“Dinga'anbo kisah inyo bukainyo agi': Ado siku' urakng umputn tanah inyo bulah kobutn anggur. Sio bulah pagar sokolilikngnyo, mongali lubakng tompat mohapit buah anggur nantai, ongko moninjakan pos pakai' monjago'i kobutnnyo. Lopas nian, io monyewaan kobutn nantai ko boboropo potani, lalu botula' ko nogori bukai. 34Watu musipm mongopil anggur nantai hampikam, puku' kobutn nantai monyiuh boboropo hulutnnyo ko boko potani ponyewa nantai pakai' mongopil hasil kobutn inyo udah monjadi hak umputnnyo. 35Apo boko potani ponyewa kobutn nantai monangkap boko hulutn nantai. Inyo siku' sia' pantu, inyo siku' agi' sia' bunuh, huatan inyo siku' urakng bukai agi' sia' tikapi agatn batu.

36Lopas nian, urakng umputn kobutn nantai monyiuh agi' boko hulutnnyo inyo bukai, lobih banya' doi' inyo potamonyo. Apo boko potani nantai boulahan sia' agatn caro inyo samo. 37Koponsuahannyo, umputn kobutn nantai bopikir, ‘Pasti boko potani nantai paca'an mohormati ana'ku.’ Lalu io monyiuh ana'nyo ko sia'. 38Apo, pas boko potani ponyewa nantai moniant ana' urakng umputn kobutn tongahan datakng, sia' bohoupm agatn siku'-monyiku', ‘Io nian ia'an ahli waris puku' kobutn ni'in nononyo io monjadi urakng umputn kobutn ni'in aman bopainyo udah mati. Mara, kito mombunuh io oca' warisan kobutn ni'in paca'an monjadi umputn kito!’ 39Jadi, sia' monangkapnyo, lalu mondudus koluar doi' kobutn anggur nantai ongko mombunuhnyo.”#21:33-39: Kobutn anggur molambakan umant Allah, huatan puku'nyo Allah (Yes. 5:1-7). Boko potani ponyewa molambakan Boko pomimpitn urakng Yahudi inyo monula' boko nabi. (Boko polayatn molambakan boko nabi nantai.) (2 Tawarikh 36:14-16). Yesus udah tohu hajat sia' pakai' mombunuh Sio jam.

40 Lalu Yesus botakutn ko boko pomimpitn banso Yahudi nantai, “Timpu urakng umputn kobutn anggur nantai datakng, la'apo inyo paca'an io pulah ko boko potani inyo ponyewa kobutn nantai?”

41Timbas sia' ko io, “Pasti urakng umputn kobutn nantai paca'an mombunuh boko urakng jahat nantai. Lalu io paca'an monyewaan kobutn anggur nantai ko boko potani inyo honda' moonji'i pombagian hasil kobutn ko io udah watunyo.”

42Kato Yesus ko sia', “Pasti kaitn kalo mombaco di Buku Suci mongona'i ni'in:

‘Batu inyo dibuakan boko tukakng bangunan udah monjadi batu kotakng pontikng pakai' bangunannyo.

Tuhatn inyo molabuhan nantai!

Hebat bondar pogota'an-Nyo nantai.’ ”#21:42: Doi' buku Mazmur 118:22-23.

43 Lalu Yesus bopandir, “Jadi, pondinga'ancam ni'in: Hak kaitn pakai' monjadi anggota Koraja'an Allah paca'an dikuti' doi' kaitn. Hak nantai paca'an dionju' ko banso inyo sotia molabuhan kohonda' Allah.#21:43: Teks asli baso Yunani momakai kiasan ‘banso inyo mohasilan buah Koraja'an Allah nantai.’

[ 44Batu nantai paca'an mohancuran sotiap urakng inyo jatu' di pucu'nyo, huatan moropu'an sotiap urakng inyo ditinggakngnyo.”]#21:44: Batu nantai molambakan Yesus. Boko pomimpitn urakng Yahudi monula' Sio, apo Sio kotakan pontikng. Sio ia'an Rajo Inyo Dijanjian Allah, inyo disobut ‘Kristus’. Boko urakng inyo jatu' ko batu nantai huatan boko urakng inyo ditinggakng batu nantai molambakan boko urakng inyo monula' Yesus. Sia' paca'an dihukupm nononyo. Tiat Yesaya 8:14-15; Daniel 2:34-35, 44-45; Roma 9:31-33; 1 Korintus 1:23; 1 Petrus 2:8.

45Watu boko imam kopala' huatan boko pomimpitn agama Yahudi doi' kolompok Farisi mondinga' boko poumpamoan nantai, sia' mongoroti obai Yesus bopandir mongona'i diri sia'. 46Jadi sia' bogoyap caro pakai' monangkap Sio. Apo co ulih, obai sia' gola' agatn urakng banya' inyo moanggap Yesus sobagai nabi.

Currently Selected:

Matius 21: TBDS

Highlight

Copy